នៅកម្ពុជាមានម្ចាស់អាជីវកម្មជាច្រើនដែលបើកអាជីវកម្មដោយមិនចុះបញ្ជី។ សហការី
ក្រុមហ៊ុន/សហគ្រាសអាជីវកម្មចំនួនជិត ១ ម៉ឺនបានទទួលជោគជ័យលើការចុះបញ្ជីនៅក្រសួងពាណិជ្ជកម្ម នារយៈពេល ១១ ខែឆ្នាំ ២០២៤ ដោយធ្លាក់ចុះជិត ២០ ភាគរយបើធៀបនឹងរយៈពេលដូចគ្នាឆ្នាំ ២០២៣ ប៉ុន្តែសម្រាប់ចំនួនក្រុមហ៊ុនដែលស្នើសុំលុបឈ្មោះចេញពីបញ្ជីពាណិជ្ជកម្មបែរជាកើនឡើងជាង ៣០ ភាគរយ។
របាយការណ៍ក្រសួងពាណិជ្ជកម្ម បានឱ្យដឹងថា ចាប់ពីខែមករា ដល់ខែវិច្ឆិកា ឆ្នាំ ២០២៤ មានក្រុមហ៊ុន/សហគ្រាសចំនួន ៩ ៥៣០ បានចុះបញ្ជីនៅក្រសួងពាណិជ្ជកម្ម ដោយចំនួននេះថយចុះ ១៧,១៧ភាគរយ បើធៀបនឹងរយៈពេលដូចគ្នាកាលពីឆ្នាំ ២០២៣ ដែលមានចំនួន ១១ ៥០៦។
ក្នុងចំណោមក្រុមហ៊ុនទាំងនោះ គឺក្រុមហ៊ុនមូលធន(ក្រុមហ៊ុនទទួលខុសត្រូវមានកម្រិត) មានចំនួន ៤ ៧២៥ កើនឡើង ៨ ភាគរយ, ក្រុមហ៊ុនពាណិជ្ជកម្មបរទេស ៥៤ ថយចុះ ១៦,៩២ ភាគរយ, សហគ្រាសឯកបុគ្គល ៤ ៧៥០ ថយចុះ ៣២,៧៧ ភាគរយ និងក្រុមហ៊ុនសហកម្មសិទ្ធិ ចំនួន ១។
របាយការណ៍ឱ្យដឹងទៀតថា ក្រៅពីក្រុមហ៊ុន/សហគ្រាសដែលបានចុះបញ្ជីថ្មី ក៏មានក្រុមហ៊ុន/សហគ្រាស ចំនួន ១ ២៨៤ បានស្នើសុំលុបឈ្មោះចេញពីបញ្ជីពាណិជ្ជកម្មផងដែរ ដោយកើនឡើងពី ៩៦៧ ក្រុមហ៊ុន ឬស្មើនឹង ៣២,៧៨ ភាគរយ។
ប្រធានសមាគមបច្ចេកវិទ្យាឌីជីថល នៃកម្ពុជា លោក ឈិន កេន បានប្រាប់ភ្នំពេញប៉ុស្តិ៍ក្នុងថ្ងៃទី២៥ ខែធ្នូ ថា ការចុះបញ្ជីពាណិជ្ជកម្មរបស់ក្រុមហ៊ុន/សហគ្រាស គឺជាការបំពេញកាតព្វកិច្ចរបស់ម្ចាស់អាជីវកម្មគ្រប់រូប។
ការចុះបញ្ជីក្រុមហ៊ុនអាជីវកម្ម គឺដោយសារតែម្ចាស់អាជីវកម្មបានប្រមើលមើលឃើញអាជីវកម្មរបស់ខ្លួននឹងបោះជំហានទៅមុខកាន់តែល្អ និងចង់ឱ្យមានការទទួលស្គាល់តាមផ្លូវច្បាប់។
ទាក់ទងនឹងការលុបឈ្មោះក្រុមហ៊ុន លោក ឈិន កេន បានអះអាងថា អាចបណ្តាលមកពីកត្តាជាច្រើនដូចជា វិបត្តិសេដ្ឋកិច្ចនៅក្នុងក្រុមហ៊ុន ជម្លោះរវាងម្ចាស់ភាគហ៊ុនក្រុមហ៊ុន ឬការផ្លាស់ប្តូរប្រភេទអាជីវកម្ម។
លោកនិយាយថា៖«នេះជានិន្នាការសកលដែលកើតមាននៅគ្រប់ប្រទេសលើពិភពលោក។ នៅពេលតម្រូវការទីផ្សារមាននិន្នាការទៅរកវិស័យ/ផ្នែកណាមួយ ម្ចាស់អាជីវកម្មអាចបិទអាជីវកម្មដែលជួបបញ្ហា ហើយទៅបើកអាជីវកម្មថ្មីដែលស្របតាមតម្រូវការទីផ្សារ»។
លោកលើកឡើងទៀតថា ស្ថានភាពសេដ្ឋកិច្ចនៅក្នុងប្រទេសតែងមានទំនាក់ទំនងជាមួយសេដ្ឋកិច្ចក្នុងតំបន់ និងពិភពលោក ដូច្នេះនៅពេលស្ថានភាពនយោបាយ និងសេដ្ឋកិច្ចពិភពលោកល្អប្រសើរ ចំនួនក្រុមហ៊ុន/សហគ្រាសអាជីវកម្មថ្មី ក៏នឹងកើនឡើងទៅតាមនោះដែរ។
ការខិតខំរបស់រដ្ឋាភិបាលក្នុងការសម្របសម្រួលបង្កើតឱ្យមាននីតិវិធីចុះបញ្ជីក្រុមហ៊ុន/សហគ្រាស តាមប្រព័ន្ធអនឡាញ កំពុងក្លាយជាចំណែកក្នុងការទាក់ទាញអ្នកវិនិយោគជាតិ និងអន្តរជាតិឱ្យមកបើកអាជីវកម្មនៅកម្ពុជាកាន់តែច្រើន។
អនុប្រធានសមាគមពាណិជ្ជកម្មកម្ពុជា-ចិន លោក ឡោ វិចិត្រ បាននិយាយថា ចំនួននៃក្រុមហ៊ុនចុះបញ្ជីអាជីវកម្មថយចុះ ស្របពេលការសុំលុបឈ្មោះកើនឡើង គឺអាចដោយសារតែដំណើរការអាជីវកម្មនៅកម្ពុជាក្នុងរយៈពេលជិត ១ឆ្នាំមកនេះ មានជួបបញ្ហាច្រើន។
បច្ចុប្បន្នអាជីវកម្មស្របច្បាប់នៅកម្ពុជាជាច្រើន បានជួបបញ្ហាដោយសារតែអាជីវកម្មដែលមិនបានចុះបញ្ជី។ លោកបន្តថា យោងតាមស្ទង់មតិដែលធ្វើឡើងដោយធនាគារពិភពលោក កាលពីឆ្នាំ ២០២៣ បានរកឃើញថា បញ្ហាចម្បងសម្រាប់ការបើកអាជីវកម្មនៅកម្ពុជា គឺការប្រឈមនឹងអាជីវកម្មជាច្រើនដែលមិនមានចុះបញ្ជីតាមផ្លូវច្បាប់។ ៧៨ភាគរយ គឺជាអាជីវកម្មដែលមិនមានចុះបញ្ជី។
លោកអះអាងថា៖«បញ្ហាប្រឈមមួយសម្រាប់សេដ្ឋកិច្ចនៅកម្ពុជា គឺមានអាជីវកម្មមិនផ្លូវការ(មិនបានចុះបញ្ជី) ជាច្រើន ដែលនេះមានន័យថាអាជីវកម្មមិនផ្លូវការ អាចផ្តល់ផលិតផល និងសេវាកម្មនៅក្នុងតម្លៃទាបជាងក្រុមហ៊ុនដែលបានចុះបញ្ជី និងគោរពច្បាប់។ អាជីវកម្មមិនបានចុះបញ្ជី បានបង្កើតឱ្យមានការប្រកួតប្រជែងដែលមិនស្មើភាព»។
