រដ្ឋមន្ត្រីក្រសួងទេសចរណ៍ លោក ហួត ហាក់ (កណ្តាល) អំឡុងពេលចូលរួមក្នុងកម្មវិធី GX Foundation Khmer Cuisine Charity Dinner។ សហការី
កម្ពុជាមានសុទិដ្ឋិនិយមថានឹងអាចទាក់ទាញភ្ញៀវទេសចរ និងវិនិយោគិនចិន ជាពិសេសពីតំបន់រដ្ឋបាលពិសេសហុងកុង និងតំបន់រដ្ឋបាលពិសេសម៉ាកាវឱ្យចូលមកកម្ពុជាកាន់តែច្រើន បន្ទាប់ពីក្រុមគណៈប្រតិភូក្នុងវិស័យទេសចរណ៍កម្ពុជាបានជួបពិភាក្សាការងារជាអ្នកពាក់ព័ន្ធជាច្រើននៅក្នុងកម្មវិធី«GX Foundation Khmer Cuisine Charity Dinner»។
សេចក្តីប្រកាសព័ត៌មានរបស់ក្រសួងទេសចរណ៍ បានឱ្យដឹងថា «GX Foundation Khmer Cuisine Charity Dinner» គឺជាកម្មវិធីនេះដែលរៀបចំឡើងនៅតំបន់រដ្ឋបាលពិសេសហុងកុង នៃសាធារណរដ្ឋប្រជាមានិតចិន ចាប់ពីថ្ងៃទី ៣ ដល់ថ្ងៃទី៤ ខែធ្នូ ឆ្នាំ ២០២៤។
កម្មវិធីនេះមានគោលបំណងដើម្បីផ្សព្វផ្សាយ និងលើកកម្ពស់ម្ហូបអាហារខ្មែរ ព្រមទាំងផ្សព្វផ្សាយអំពីសក្តានុពលវិស័យទេសចរណ៍របស់កម្ពុជា សំដៅកៀរគរស្វែងរកមូលនិធិមនុស្សធម៌សម្រាប់គាំទ្រដល់គម្រោង «Project for Health Protection Against Dengue Fever” នៅខេត្តកំពង់ស្ពឺ និងសម្រាប់សកម្មភាពមនុស្សធម៌ដទៃទៀតនៅកម្ពុជា។
ក្នុងកម្មវិធី GX Foundation Khmer Cuisine Charity Dinner មានការចូលរួមពី លោក ហួត ហាក់ រដ្ឋមន្ត្រីក្រសួងទេសចរណ៍, លោក LEUNG Chun-ying ប្រធានក្រុមប្រឹក្សាភិបាលមូលនិធិ GX លោក LI Yongsheng ស្នងការរងនៃការិយាល័យស្នងការរបស់ក្រសួងការបរទេស នៃសាធារណរដ្ឋប្រជាមានិតចិនប្រចាំតំបន់រដ្ឋបាលពិសេសហុងកុង, អគ្គកុងស៊ុលកម្ពុជាប្រចាំតំបន់រដ្ឋបាលពិសេសហុងកុង, តំណាងមូលនិធិ GX នៅកម្ពុជា, តំណាងតំបន់រដ្ឋបាលពិសេសហុងកុង, តំបន់រដ្ឋបាលពិសេសម៉ាកាវ, ក្រុមប្រឹក្សាភិបាលទេសចរណ៍ហុងកុង, ធុរជនចិននិងអន្តរជាតិ ព្រមទាំងមានតំណាងប្រតិបត្តិករទេសចរណ៍ ក្រុមហ៊ុនអាកាសចរណ៍ និងក្រុមហ៊ុននាវាចរទេសចរណ៍ មកពីតំបន់រដ្ឋបាលពិសេសហុងកុង និងម៉ាកាវ ព្រមទាំងតំបន់នៅជុំវិញសរុបជាង ៣០០ នាក់។
នៅអំឡុងចូលរួមកម្មវិធី GX Foundation Khmer Cuisine Charity Dinner លោក ហួត ហាក់ បានលើកឡើងអំពីសក្តានុពលនៃវិស័យទេសចរណ៍ ការអភិវឌ្ឍសង្គម សេដ្ឋកិច្ច និងបរិយាកាសអនុគ្រោះសម្រាប់ការវិនិយោគនៅកម្ពុជា និងបានស្នើឱ្យភាគីចិនជួយលើកទឹកចិត្ត និងជំរុញភ្ញៀវទេសចរ និងវិនិយោគិនរបស់ខ្លួនធ្វើដំណើរមកកម្សាន្តនៅកម្ពុជាឱ្យបានកាន់តែច្រើន។
លោកនិយាយថា៖«ខ្ញុំសូមអំពាវនាវដល់ថ្នាក់ដឹកនាំ ភាគីពាក់ព័ន្ធ និងប្រព័ន្ធផ្សព្វផ្សាយចិនទាំងអស់ជួយផ្សព្វផ្សាយឱ្យបានទូលំទូលាយអំពីសក្តានុពលទេសចរណ៍ដ៏សម្បូរបែបរបស់កម្ពុជា និងជួយកៀរគរភ្ញៀវទេសចរឱ្យបានកាន់តែច្រើនថែមទៀត និងរៀបចំកញ្ចប់ទស្សនកិច្ចឱ្យបានច្រើនទៅកម្ពុជា ដោយក្រសួងទេសចរណ៍ នឹងផ្តល់ការសម្របសម្រួលឱ្យអស់ពីលទ្ធភាព»។
នៅក្នុងដំណើរទស្សនកិច្ចនេះ គណៈប្រតិភូកម្ពុជា ក៏មានជំនួបពិភាក្សាជាមួយអនុរដ្ឋមន្ត្រីទទួលបន្ទុកទេសចរណ៍ និងវប្បធម៌នៃតំបន់រដ្ឋបាលពិសេសហុងកុង, ប្រធានក្រុមប្រឹក្សាភិបាលទេសចរណ៍ហុងកុង, តំណាងការិយាល័យទេសចរណ៍តំបន់រដ្ឋបាលពិសេសម៉ាកាវ តំណាងក្រុមហ៊ុនអាកាសចរណ៍ China Southern Airlines, ក្រុមហ៊ុន Hong Kong Airlines ព្រមទាំងថ្នាក់ដឹកនាំក្រុមហ៊ុន/ទីភ្នាក់ងារទេសចរណ៍ធំៗ និងល្បីៗក្នុងទីផ្សារហុងកុង និងម៉ាកាវ ដូចជា ក្រុមហ៊ុន Goldjoy Travel Limited, Hong Kong Wing On Travel Service Limited ព្រមទាំងក្រុមហ៊ុននាវាចរទេសចរណ៍ Royal Caribbean Cruises HK Ltd. និងក្រុមហ៊ុនប្រឹក្សាយោបល់ក្នុងគម្រោង Disneyland Hong Kong សរុប ជាង ៣០ ទីភ្នាក់ងារ/ក្រុមហ៊ុន។
បើតាមក្រសួងទេសចរណ៍ តាមរយៈជំនួបនេះបណ្តាទីភ្នាក់ងារ/ក្រុមហ៊ុន សុទ្ធតែបានថ្លែងពីចំណាប់អារម្មណ៍ សំណូមពរ និងគម្រោងស្នើសុំធ្វើដំណើរមកស្វែងយល់ពីកាលានុវត្តភាពវិនិយោគ ជាពិសេសស្វែងយល់ពីសក្តានុពលទេសចរណ៍របស់កម្ពុជា ដើម្បីរៀបចំកញ្ចប់ទស្សនកិច្ចថ្មីបន្ថែមជូនអតិថិជនរបស់ខ្លួន នាពេលឆាប់ៗខាងមុខ។
លោក អនហេង សុភ័ក្ត្រ ប្រធានសមាគមមគ្គុទេសក៍ទេសចរណ៍ភាសាចិនកម្ពុជា បានប្រាប់ភ្នំពេញប៉ុស្តិ៍ថា បន្ទាប់ពីធ្លាក់ចុះយ៉ាងគំហុកកាលពីដើមឆ្នាំ ២០២០ ដោយសារវិបត្តិជំងឺកូវីដ១៩ ចំនួនភ្ញៀវទេសចរចិនមកកម្សាន្តនៅកម្ពុជាបានកើនឡើងជាបន្តបន្ទាប់ ប៉ុន្តែនៅមិនទាន់អាចប្រៀបធៀបនឹងមុនឆ្នាំ ២០២០ បានឡើយ។ លោកបន្តថា រយៈពេលស្នាក់នៅរបស់ភ្ញៀវចិន ភាគច្រើនគឺយូរជាងមុន ដោយសារការតភ្ជាប់ជើងហោះហើរត្រង់ពីទីក្រុងនានារបស់ប្រទេសចិនមកប្រទេសកម្ពុជាមិនមានច្រើនដូចមុនវិបត្តិកូវីដ១៩។
លោកបានថ្លែងថា៖«ភ្ញៀវជនជាតិចិន អាចចាត់ទុកថាជាភ្ញៀវមានសក្ដានុពលក្នុងវិស័យទេសចរណ៍កម្ពុជា។ ការបង្កើនកិច្ចសហប្រតិបត្តិការ ការលើកកម្ពស់ការផ្សព្វផ្សាយ និងការបង្កើនចំនួនជើងហោះហើរត្រង់ពីទីក្រុងសំខាន់របស់ចិនមកកម្ពុជា ប្រាកដជាអាចជួយទាក់ទាញភ្ញៀវជនជាតិចិនឱ្យធ្វើដំណើរមកកកម្ពុជាកាន់តែច្រើន។
បើតាមលោក សុភ័ក្រ កន្លងមកភ្ញៀវទេសចរចិនស្នាក់នៅកម្ពុជាមានចន្លោះ ៥-៨ថ្ងៃ ហើយតំបន់ទេសចរណ៍ដែលជាគោលដៅសំខាន់សម្រាប់ពួកគេ គឺរាជធានីភ្នំពេញ ខេត្តសៀមរាប និងខេត្តព្រះសីហនុ។
ទិន្នន័យក្រសួងទេសចរណ៍ បង្ហាញថា ចាប់ពីខែ ដល់ខែតុលា ឆ្នាំ២០២៤ កម្ពុជាទទួលបានភ្ញៀវបរទេសសរុប ៥,៣៧ លាននាក់ កើនឡើង ២២ ភាគរយបើធៀបរយៈពេលដូចគ្នាឆ្នាំ ២០២៣ ដែលមានចំនួន ៤,៤១ លាននាក់។ ក្នុងចំណោមភ្ញៀវខាងលើ គឺភ្ញៀវមកពីប្រទេសចិន រួមទាំងតំបន់រដ្ឋបាលពិសេសហុងកុង និងម៉ាកាវ មានចំនួន ៦៩១ ៨៧៤ នាក់ កើនឡើងជិត ៥៣ ភាគរយបើធៀបនឹងរយៈពេលដូចគ្នាកាលពីឆ្នាំ២០២៣។
ភ្ញៀវទេសចរអន្តរជាតិ ដែលមកទស្សនាកម្ពុជា ក្នុងឆ្នាំ ២០១៩ មានចំនួនសរុប ៦,៦១ លាននាក់ កើនឡើង ៦,៦ ភាគរយ បើធៀបនឹងឆ្នាំ២០១៨ ក្នុងនោះភ្ញៀវជនជាតិចិន ចំនួន ២,៣៦ លាននាក់ កើនឡើង១៦,៧ ភាគរយ៕
