លោកស្រី ម៉ក់ រស្ម៊ី ធ្វើបទបង្ហាញក្នុងកិច្ចពិភាក្សាតុមូលស្តីពី«ស្ថានភាពបំណុលនៅកម្ពុជា»។ ហ៊ឹន ពិសី
ចំនួនគណនីដែលបានរៀបចំឥណទានឡើងវិញ គិតត្រឹមចុងខែវិច្ឆិកា ឆ្នាំ ២០២៤ មានប្រមាណជាង ៥៧ ពាន់គណនី ដែលស្មើនឹងទឹកប្រាក់ប្រមាណ ៨៥០ លានដុល្លារ។ ចំនួនទឹកប្រាក់នេះ គឺស្មើនឹង ១,៥ ភាគរយនៃទំហំឥណទានក្នុងប្រព័ន្ធហិរញ្ញវត្ថុនៅកម្ពុជា។ នេះបើយោងតាមមន្ត្រីនៅធនាគារជាតិនៃកម្ពុជា(NBC)។
អគ្គនាយករងបទប្បញ្ញត្តិ និងបរិយាបន្នហិរញ្ញវត្ថុ និងជាប្រធាននាយកដ្ឋានបទប្បញ្ញត្តិ ធនាគារជាតិនៃកម្ពុជា លោកស្រី ម៉ក់ រស្ម៊ី បានឱ្យដឹងក្នុងអំឡុងកិច្ចពិភាក្សាតុមូលស្តីពី«ស្ថានភាពបំណុលនៅកម្ពុជា»ដែលរៀបចំដោយរាជបណ្ឌិត្យសភាកម្ពុជា កាលពីថ្ងៃទី៤ ខែធ្នូ ថា នៅត្រឹមដំណាច់ខែវិច្ឆិកា ឆ្នាំ ២០២៤ ការរៀបចំឥណទានឡើងវិញពីសំណាក់គ្រឹះស្ថានហិរញ្ញវត្ថុនៅកម្ពុជាជូនទៅដល់អតិថិជនរបស់ខ្លួន គឺមានប្រមាណ ៥៧ពាន់គណនី ប៉ុន្តែបើគេរាប់ចំនួនអតិថិជន គឺមានត្រឹមតែជាង ៥៣ ពាន់អតិថិជនប៉ុណ្ណោះ។ សម្រាប់ចំនួនទឹកប្រាក់ ៨៥០ លានដុល្លារ គឺស្មើប្រមាណ ១,៥ ភាគរយនៃទំហំឥណទានសរុបក្នុងប្រព័ន្ធធនាគារនៅកម្ពុជា។
ការរៀបចំឥណទានឡើងវិញ គឺជាវិធីសាស្រ្តក្នុងការជួយសម្រាលបន្ទុកចំណាយដល់អ្នកជាប់កម្ចីដែលជួបបញ្ហាដោយសារការធ្លាក់ចុះប្រាក់ចំណូល។
លោកស្រីពន្យល់ថា មូលហេតុដែលចំនួនគណនីច្រើនជាងចំនួនអតិថិជន គឺដោយសារអតិថិជនខ្លះមានឥណទាន(ខ្ចីប្រាក់)នៅច្រើនគ្រឹះស្ថានហិរញ្ញវត្ថុ ដូច្នេះនៅពេលគាត់មានបញ្ហាប្រាក់សម្រាប់បង់សងត្រឡប់ គឺពួកគាត់អាចឱ្យគ្រឹះស្ថានដែលគាត់ជំពាក់ទាំងអស់រៀបចំឥណទានឡើងវិញ។
លោកស្រីបន្តថា តាមរយៈទិន្នន័យខាងលើនេះបង្ហាញថា ការរៀបចំឥណទានឡើងវិញក្នុងអំឡុងពេលនេះ គឺនៅមានកម្រិតទាបនៅឡើយបើធៀបនឹងវិធានការដែលធនាគារជាតិបានដាក់ចេញកាលពីអំឡុងពេលការរីករាលដាលជំងឺកូវីដ១៩ ដែលមានប្រមាណជាង ១០ភាគរយ។
លោកស្រីបានថ្លែងថា៖«យោងតាមរបាយការណ៍គឺចំនួនឥណទានពិតជាបានថយចុះ ប៉ុន្តែទន្ទឹមនឹងនេះ យើងក៏បានសង្កេតឃើញថា ប្រាក់ចំណេញរបស់គ្រឹះស្ថានធនាគារ និងហិរញ្ញវត្ថុគឺនៅមាននៅឡើយ។ ត្រង់ចំណុចនេះមានន័យថាទោះបីជាឥណទាននៅមានត្រឹមប៉ុណ្ណឹង ក៏ធនាគារនៅអាចរស់បាន តាមរយៈប្រាក់ចំណេញបច្ចុរបស់គាត់។ អ៊ីចឹងមានន័យថា វិស័យធនាគារទាំងមូលនៅមានភាពធន់»។
លោកស្រីលើកឡើងទៀតថា កន្លងមកមានបុគ្គលមួយចំនួនគិតថាការរៀបចំឥណទានឡើងវិញធ្វើឱ្យពួកគេទទួលបានផលចំណេញ ប៉ុន្តែធាតុពិតគឺវាធ្វើឱ្យអតិថិជន(អ្នកជាប់បំណុល)របស់គ្រឹះស្ថានហិរញ្ញវត្ថុ ត្រូវបង់ការប្រាក់កាន់តែច្រើន ដោយសារតែការពន្យាពេលសង់ត្រឡប់។
សមាជិកក្រុមប្រឹក្សាភិបាលសមាគមធនាគារកម្ពុជា លោក តូច ចៅចេក បានឱ្យដឹងថា សម្រាប់គ្រឹះស្ថានធនាគារ គិតត្រឹមខែតុលា ឆ្នាំ២០២៤ ទំហំនៃការរៀបចំឥណទានឡើងវិញមានទឹកប្រាក់ជាង ៥០០ លានដុល្លារ។
លោកកត់សម្គាល់ថា ការរៀបចំឥណទានឡើងវិញ បានជួយសម្រួលឱ្យស្ថានភាពរបស់អតិថិជនវិលត្រឡប់មកធម្មតាវិញ ក្នុងនោះអ្នកដែលទទួលបានការរៀបចំឥណទានឡើងវិញ ពីខាងធនាគារមានប្រមាណជាង ៧០-៨០ភាគរយ អាចសងមកធនាគារបានទៀងទាត់ឡើងវិញ។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក គី សេរីវឌ្ឍន៍ និយាយថា ស្ថានភាពបំណុលនៅប្រទេសកម្ពុជា ស្ថិតក្នុងកម្រិតមួយដែលនៅអាចគ្រប់គ្រងបាន ដោយវាពុំបង្កឱ្យមានការព្រួយបារម្ភនៅឡើយទេ។
ចំពោះការដាក់ចេញវិធានការរៀបចំឥណទានឡើងវិញពីសំណាក់ធនាគារជាតិនៃកម្ពុជា គឺពុំទាន់ទទួលបានលទ្ធផលជោគជ័យគួរឱ្យកត់សម្គាល់ទេ ព្រោះមានបុគ្គលមួយចំនួន គឺមិនបានប្រើប្រាស់សេវាកម្មជាមួយគ្រឹះស្ថានហិរញ្ញវត្ថុផ្លូវការឡើយ ពោលគឺពួកគេជំពាក់បំណុលក្រៅប្រព័ន្ធ។
ទោះយ៉ាងណា លោកបញ្ជាក់ថា បញ្ហាបំណុលនេះ គឺជារឿងដែលមានការជាប់ពាក់ព័ន្ធពហុភាគី ហើយគោលនយោបាយនីមួយៗត្រូវការពេលវេលានៅក្នុងការអនុវត្តដើម្បីទទួលបានប្រសិទ្ធភាពខ្ពស់ និងក៏ត្រូវការការចូលរួមពីគ្រប់ភាគីទាំងអស់។
ធនាគារជាតិនៃកម្ពុជា កាលថ្ងៃទី៣០ ខែសីហា ឆ្នាំ២០២៤ បានចេញសារាចរណែនាំឱ្យគ្រឹះស្ថានធនាគារ និងមីក្រូហិរញ្ញវត្ថុ ធ្វើការរៀបចំឥណទានឡើងវិញដល់អតិថិជន ក្នុងគោលបំណងជួយសម្រាលបន្ទុកចំណាយរបស់អតិថិជន។ ការអនុវត្តកិច្ចការងារនេះ ចាប់ពីត្រីមាសទី៤ ឆ្នាំ ២០២៤ រហូតដល់ដំណាច់ឆ្នាំ ២០២៥។
សារាចរណែនាំនេះមិនមែនជាលើកដំបូងឡើយ ដោយវាត្រូវបានដាក់ចេញខ្លះមកហើយចាប់តាំងពីមានការលេចឡើងនៃវត្តមានរបស់ជំងឺកូវីដ១៩ ដែលធ្វើឱ្យមានផលប៉ះពាល់យ៉ាងធ្ងន់ធ្ងរទៅដល់ប្រាក់ចំណូលសម្រាប់ប្រជាពលរដ្ឋ៕
