រ៉ែមាសផលិតបាននៅខេត្តមណ្ឌលគិរី នាពេលកន្លងទៅ។ រូបថត ក្រសួងរ៉ែ និងថាមពល
ភ្នំពេញៈ ការនាំចេញផលិតផលរ៉ែ ទៅក្រៅប្រទេសចាប់ពីដើមខែមេសា ឆ្នាំ ២០២៤ តទៅនឹងតម្រូវឱ្យអ្នកនាំចេញមានប្រាក់តម្កល់យ៉ាងតិច ៥ ភាគរយនៃតម្លៃសួយសារលើផលិតផលរ៉ែនាំចេញខណៈនីតិវិធីការដកប្រាក់តម្កល់វិញ គឺអាចធ្វើបានក្រោយបញ្ចប់ការនាំចេញជាស្ថាពរ និងនៅក្នុងលក្ខខណ្ឌដែលអ្នកនាំចេញបានបំពេញកាតព្វកិច្ចនានាចប់សព្វគ្រប់។
ក្រសួងសេដ្ឋកិច្ច និងហិរញ្ញវត្ថុ និងក្រសួងរ៉ែ និងថាមពល កាលពីថ្ងៃទី ២១ ខែកុម្ភៈ ឆ្នាំ ២០២៤ បានចេញប្រកាសអន្តរក្រសួងស្តីពី «បែបបទ និងនីតិវិធីនៃការបង់កាតព្វកិច្ចហិរញ្ញវត្ថុមិនមែនសារពើពន្ធសម្រាប់ការនាំចេញផលិតផលរ៉ែ» ដោយកំណត់ថា មុនពេលនាំចេញផលិតផលរ៉ែ គឺអ្នកនាំចេញត្រូវបង់ប្រាក់តម្កល់អប្បបរមាចំនួន ៥ ភាគរយ នៃថ្លៃសួយសារលើផលិតផលរ៉ែនាំចេញតាមបរិមាណគោលការណ៍កំណត់កូតាអនុញ្ញាតឱ្យនាំចេញនីមួយៗ ស្របតាមច្បាប់ និងលិខិតបទដ្ឋានគតិយុត្តជាធរមាន។
ខ្លឹមសារប្រកាសបន្ថែមថា ក្រសួងរ៉ែ និងថាមពល ត្រូវបញ្ឈប់ការផ្តល់វិញ្ញាបនបត្របញ្ជាក់ការនាំចេញ ឬស្នើសុំកិច្ចសហការជាមួយស្ថាប័នមានសមត្ថកិច្ចដទៃទៀត ដើម្បីបញ្ឈប់ការនាំចេញជាបណ្តោះអាសន្ន ក្នុងករណីដែលសមតុល្យនៃប្រាក់ធានាកាត់កង មានចំនួនទាបជាងកាតព្វកិច្ចហិរញ្ញវត្ថុមិនមែនសារពើពន្ធដែលត្រូវទូទាត់ទៅលើបរិមាណផលិតផលរ៉ែផ្អែកតាមវិញ្ញាបនបត្របញ្ជាក់ការនាំចេញដែលស្នើសុំ ឬទាបជាងកាតព្វកិច្ចហិរញ្ញវត្ថុមិនមែនសារពើពន្ធ ដែលត្រូវទូទាត់បរិមាណផលិតផលរ៉ែ នាំចេញជាក់ស្តែង។
អ្នកនាំចេញ ត្រូវបង់ប្រាក់តម្កល់អប្បបរមា និងប្រាក់ធានាកាត់កងយ៉ាងតិច ៥ ថ្ងៃ នៃថ្ងៃធ្វើការនៅមុនពេលនាំចេញផលិតផលរ៉ែលើកដំបូង។ ប្រាក់តម្កល់អប្បបរមាត្រូវបង់ចូលគណនីនៅធនាគារពាណិជ្ជដៃគូ ដែលមានម្ចាស់គណនីជាតំណាងក្រសួងសេដ្ឋកិច្ច និងហិរញ្ញវត្ថុ (ក្រុមការងារទារបំណុលអន្តរក្រសួង) និងក្រសួងរ៉ែ និងថាមពល។
គោលបំណងនៃប្រកាសអន្តរក្រសួងនេះ គឺដើម្បីកំណត់អំពីបែបបទ និងនីតិវិធីនៃការបង់កាតព្វកិច្ចហិរញ្ញវត្ថុមិនមែនសារពើពន្ធសម្រាប់ការនាំចេញផលិតផលរ៉ែ ដើម្បីធានាការប្រមូលចំណូលប្រកបដោយតម្លាភាព ប្រសិទ្ធភាព និងបញ្ចៀសការកើតមានបំណុលជាយថាហេតុ និងជួយសម្រួលលំហូរសាច់ប្រាក់របស់អ្នកនាំចេញផលិតផលរ៉ែ។
អគ្គនាយកនៃអគ្គនាយកដ្ឋានធនធានរ៉ែ នៃក្រសួងរ៉ែ និងថាមពល លោក អ៊ឹង ឌីប៉ូឡា ធ្លាប់និយាយថា ក្នុងឆ្នាំ ២០២៣ កម្ពុជាទទួលបានចំណូលសួយសារមិនមែនសារពើពន្ធពីវិស័យរ៉ែសរុបប្រមាណ ៥០,៣ លានដុល្លារ ស្មើនឹង ១៤៤ ភាគរយនៃផែនការកំណត់ដោយច្បាប់ហិរញ្ញវត្ថុ។ តួលេខនេះគឺកើន ២៥,២១ ភាគរយបើធៀបនឹងឆ្នាំ ២០២២។ លោកបន្តថា ការប្រមូលចំណូលមិនមែនសារពើពន្ធពីវិស័យរ៉ែកើនឡើងដោយសារ ការរីកចម្រើនការធ្វើអាជីវកម្មរ៉ែ។
បើតាមលោក ឌីប៉ូឡា ប្រភពចំណូលសំខាន់ៗរបស់វិស័យកម្ពុជាពេលនេះ គឺបានពីអាជីវកម្មរ៉ែសំណង់ រ៉ែមាស រ៉ែស៊ីម៉ងត៍ និងរ៉ែដែក ជាដើម។
សេដ្ឋវិទូនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ ភ្នំពេញ ប៉ុស្តិ៍ថា ប្រកាសអន្តរក្រសួងនេះមានគោលបំណងធ្វើការគ្រប់គ្រងការនាំចេញធនធានរ៉ែពីកម្ពុជាទៅក្រៅប្រទេសឱ្យកាន់តែមានប្រសិទ្ធភាព និងតម្លាភាព ព្រមទាំងទាញយកចំណូលមិនមែនសារពើពន្ធសម្រាប់សេដ្ឋកិច្ចជាតិ។ ចំណូលពីធនធានរ៉ែ នឹងក្លាយជាចំណែកសំខាន់សម្រាប់ថវិកាជាតិ ខណៈបច្ចុប្បន្នក្រៅពីការចម្រាញ់ និងកែច្នៃក្នុងស្រុក កម្ពុជាក៏បាននាំចេញធនធាតិរ៉ែផងដែរ។
លោកថ្លែងថា៖«ការណ៍នេះគឺដើម្បីធ្វើឱ្យការគ្រប់គ្រងការនាំចេញផលិតផលរ៉ែកាន់តែមានប្រសិទ្ធភាព»។
យោងតាមគេហទំព័រ https://www.khsearch.com មណ្ឌលរ៉ែសំខាន់ៗនៅកម្ពុជា រួមមាន មណ្ឌលប៉ៃលិន ដែលមានត្បូងមានតម្លៃ, មណ្ឌលពោធិ៍សាត់ មានរ៉ែថ្មកែវនៅភ្នំតាសាយ, មណ្ឌលកំពង់ធំ មានរ៉ែដែកនៅភ្នំដែក និងរ៉ែមាសកប់ក្នុងដីល្បាប់ សំណប៉ាហាំង ពិសេសនៅជុំវិញភ្នំជី និងភ្នំលឿង, មណ្ឌលកំពត មានកំណប់រ៉ែថ្មកំបោរ និងផូស្វាត, និងមណ្ឌលបាត់ដំបង មានកំណប់រ៉ែថ្មកំបោរ និងផូស្វាត៕
