លោកស្រី តឹករ៉េត កំរង ក្នុងសម្ពោធជាផ្លូវការ មជ្ឈមណ្ឌលពាណិជ្ជកម្មឯកជនកម្ពុជា នៅទីក្រុងអាប៊ូដាប៊ី។ រូបថត MOC
ភ្នំពេញៈ អ្នកនាំពាក្យនៃក្រសួងពាណិជ្ជកម្មកម្ពុជាបានលើកឡើងថា ការដាក់ឱ្យដំណើការជាផ្លូវការនៃមជ្ឈមណ្ឌលពាណិជ្ជកម្មឯកជនកម្ពុជា (CPCC) នៅទីក្រុងអាប៊ូដាប៊ី ប្រទេសអេមីរ៉ាតអារ៉ាប់រួម គឺជាការបោះជំហានដ៏សំខាន់មួយរបស់កម្ពុជា ក្នុងការលើកកម្ពស់ និងជំរុញការធ្វើពាណិជ្ជកម្ម ទាក់ទាញការវិនិយោគ និងទំនាក់ទំនងទេសចរណ៍កាន់តែច្រើនជាមួយបណ្តាប្រទេសនានានៅក្នុងប្លុកអារ៉ាប់។
CPCC ត្រូវបានសម្ពោធជាផ្លូវការ កាលពីថ្ងៃទី ២៧ ខែកុម្ភៈ នៅទីក្រុង ទីក្រុងអាប៊ូដាប៊ី ប្រទេសអេមីរ៉ាតអារ៉ាប់ រួមក្រោមអធិបតីភាពលោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្ម និងមានការចូលរួមពីមន្ត្រី និងអាជ្ញាធរនៃប្រទេសអារ៉ាប់រួម និងតំណាងក្រុមហ៊ុន Oneroad Group ផងដែរ។
លោកស្រី កំរង បានលើកឡើងថា៖ «មជ្ឈមណ្ឌលពាណិជ្ជកម្មឯកជនកម្ពុជា នៅរាជធានីអាប៊ូដាប៊ី ត្រូវបានបង្កើតឡើងក្នុងគោលបំណងដើម្បីជំរុញការផ្សព្វផ្សាយ និងនាំចេញផលិតផលខ្មែរ ទៅកាន់ទីផ្សារអន្តរជាតិ ព្រមទាំងផ្សព្វផ្សាយឯកសារទាក់ទងនឹងវិស័យពាណិជ្ជកម្ម សេដ្ឋកិច្ច វិនិយោគ វប្បធម៌ និងទេសចរណ៍របស់ប្រទេសកម្ពុជា ទៅកាន់ធុរជន វិនិយោគិន និងភ្ញៀវទេសចរអន្តរជាតិ ជាពិសេសប្រទេសអេមីរ៉ាតអារ៉ាប់រួម»។
លោក ប៉ែន សុវិជ្ជា អ្នកនាំពាក្យក្រសួងពាណិជ្ជកម្មបានប្រាប់ ភ្នំពេញ ប៉ុស្តិ៍ នៅថ្ងៃទី ២៨ ខែកុម្ភៈថា ក្នុងពិធីសម្ពោធមជ្ឈមណ្ឌលពាណិជ្ជកម្មឯកជនកម្ពុជានៅប្រទេសអារ៉ាប់រួម គឺជាការបោះជំហានថ្មីមួយទៀតរបស់កម្ពុជាក្នុងពង្រីកទីផ្សាររបស់ខ្លួនទៅកាន់បណ្តាប្រទេសមជ្ឈិមបូព៌ា។
លោកបានមានប្រសាសន៍ថា៖ «មជ្ឈមណ្ឌលពាណិជ្ជកម្មឯកជនកម្ពុជានេះ នឹងបម្រើជាទីកន្លែងកណ្តាលមួយក្នុងការផ្សព្វផ្សាយផលិតផលរបស់យើងទៅកាន់បណ្តាប្រទេសមជ្ឈិមបូព៌ា ខណៈដែលយើងក៏កំពុងធ្វើការលើលើកិច្ចព្រមព្រៀងភាពជាដៃគូសេដ្ឋកិច្ចសព្វជ្រុងជ្រោយ [CAM-UAE CEPA]»។
លោកបន្តថា បច្ចុប្បន្ននេះ កម្ពុជាបាននិងកំពុងជំរុញការនាំចេញទៅកាន់ប្រទេសបណ្តាប្រទេសនៅអារ៉ាប់ ខណៈដែរក៏កំពុងមានការកើនឡើងនៃលំហូរវិនិយោគ និងភ្ញៀវទេសចរពីអារ៉ាប់មកកម្ពុជាកាន់តែមានកំណើនផងដែរក្នុងប៉ុន្មានឆ្នាំចុងក្រោយនេះ។
លោកថា៖ «យើងជឿជាក់ថា ក្នុងពេលអនាគតដ៏ខ្លីខាងមុខ ការដោះដូរពាណិជ្ជកម្ម ទេសចរណ៍ និងវិនិយោគនឹងមានការកើនឡើងយ៉ាងខ្លាំង»។
លោក ហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាបានប្រាប់ ភ្នំពេញ ប៉ុស្តិ៍ កាលពីពេលថ្មីៗនេះថា អេមីរ៉ាតអារ៉ាប់រួមដែលជាប្រទេសអភិវឌ្ឍន៍ដែលមានជំនាញខាងប្រេង និងឧស្ម័ន ដែលជាឱកាសច្រើនសម្រាប់កម្ពុជា។
លោកថ្លែងថា៖ «ខ្ញុំរំពឹងថា ការអនុវត្តកិច្ចព្រមព្រៀងនឹងបើកផ្លូវសំខាន់សម្រាប់ការនាំចេញផលិតផលកសិកម្មរបស់កម្ពុជាទៅកាន់ទីផ្សារអារ៉ាប់»។
នៅថ្ងៃទី ១៦ ខែមីនា ឆ្នាំ ២០២៣ កម្ពុជា និង UAE បានបញ្ចប់កិច្ចចរចាជាផ្លូវការសម្រាប់ CAM-UAE CEPA។
CEPA គឺជាប្រភេទនៃកិច្ចព្រមព្រៀងពាណិជ្ជកម្មសេរី (FTA) ដែលជាធម្មតារួមបញ្ចូលការគ្របដណ្តប់ដ៏ទូលំទូលាយលើសពីទំនិញ សេវា ការវិនិយោគ ដំណោះស្រាយជម្លោះ កម្មសិទ្ធិបញ្ញា លទ្ធកម្មរបស់រដ្ឋាភិបាល និងទម្រង់កិច្ចសហប្រតិបត្តិការសេដ្ឋកិច្ចឯកទេសផ្សេងៗទៀត។ ក្រសួងមិនទាន់បានប្រកាសកាលបរិច្ឆេទជាផ្លូវការសម្រាប់ការចុះហត្ថលេខាលើកិច្ចព្រមព្រៀងនេះនៅឡើយទេ។
ទិន្នន័យពីក្រសួងពាណិជ្ជកម្ម ពាណិជ្ជកម្មទ្វេភាគីរវាងកម្ពុជា និង AEU មានទឹកប្រាក់ចំនួន ៨៦,៨ លានដុល្លារអាមេរិក ក្នុងឆ្នាំ ២០២៣ ធ្លាក់ចុះ ១៧ ភាគរយ ពី ១ ឆ្នាំទៅ ១ ឆ្នាំ។
មុខទំនិញសំខាន់ៗនៅក្នុងពាណិជ្ជកម្មទ្វេភាគី រួមមាន សម្លៀកបំពាក់ ស្បែកជើង កង់ ទំនិញធ្វើដំណើរ ថ្នាំជក់ អង្ករ គ្រឿងអគ្គិសនី គ្រឿងបន្លាស់រថយន្ត ជ័រកៅស៊ូ ស្ករ ចំណីសត្វ ប្លាស្ទិក យានជំនិះ និងក្រដាស។
យោងតាមទិន្នន័យរបស់ក្រសួងទេសចរណ៍ កម្ពុជាបានស្វាគមន៍ភ្ញៀវទេសចរអារ៉ាប់រួមចំនួន ១៩២ នាក់កាលពីឆ្នាំមុន កើនឡើង ៥៦ ភាគរយ ធៀបនឹងឆ្នាំមុនចំនួន ១២៣ នាក់៕
