កំពុងផែស្វយ័តខេត្តព្រះសីហនុ។ ហុង មិនា
ភ្នំពេញៈ ខណៈសេដ្ឋកិច្ចពិភពលោកកាន់តែប្រសើរ ការនាំចេញទំនិញរបស់កម្ពុជាទៅចក្រភពអង់គ្លេស (UK) រយៈពេល ២ ខែដើមឆ្នាំ ២០២៤ នេះ មានកំណើនជាង ២៥ ភាគរយ ដោយមានទឹកប្រាក់ជិត ១៣៦ លានដុល្លារ ធៀបនឹងជាង ៩៥ លានដុល្លារ នារយៈពេលដូចគ្នាកាលពីឆ្នាំមុន។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជា (GDCE)។
ចក្រភពអង់គ្លេសគឺជាដៃគូពាណិជ្ជកម្មសំខាន់មួយរបស់កម្ពុជា ដោយប្រទេសនេះជាប់ចំណាត់ថ្នាក់ជាដៃគូពាណិជ្ជកម្មឈានមុខគេទី ៨ បន្ទាប់ពីប្រទេសចិន វៀតណាម អាមេរិក ថៃ ជប៉ុន ឥណ្ឌូនេស៊ី និងកាណាដា។
កម្ពុជាទទួលបានអត្ថប្រយោជន៍ពីគម្រោងពាណិជ្ជកម្មប្រទេសកំពុងអភិវឌ្ឍន៍ (DCTS) របស់ចក្រភពអង់គ្លេស ចាប់តាំងពីខែមេសា ឆ្នាំ ២០២៣។ ស្ថិតក្រោមផែនការនេះ កម្ពុជាទទួលបានអត្ថប្រយោជន៍ពីប្រព័ន្ធអនុគ្រោះពន្ធពាណិជ្ជកម្ម (GSP) របស់ចក្រភពអង់គ្លេស ដែលផ្តល់លទ្ធភាពចូលទីផ្សារចក្រភពអង់គ្លេសដោយការនាំចេញរួចពន្ធ និងមិនកំណត់កូតា។
យោងតាមទិន្នន័យពី GDCE កម្ពុជាបាននាំចេញទំនិញតម្លៃជិត ១៣៦ លានដុល្លារទៅចក្រភពអង់គ្លេស ក្នុងចន្លោះពីខែមករា-ខែកុម្ភៈ ឆ្នាំ ២០២៤ កើនឡើង ២៥,១ ភាគរយបើធៀបនឹងជាង ៩៥ លានដុល្លារ ខណៈការនាំចូលសរុបមានចំនួន ៦,៨៥ លានដុល្លារធ្លាក់ចុះ ៤៧,៩ ភាគរយធៀបនឹង ១៣,១៥ លានដុល្លារ។
សម្រាប់ពាណិជ្ជកម្មទ្វេភាគីសម្រេចបាន ១៤២,៦៧ លានដុល្លារកើនឡើង ១៧,២ ភាគរយធៀបនឹង ១២១,៦៩ លានដុល្លារក្នុងរយៈពេលដូចគ្នាកាលពីឆ្នាំមុន។ ចំនួននេះធ្វើឱ្យកម្ពុជាទទួលបានអតិរេកពាណិជ្ជកម្មជាមួយចក្រភពអង់គ្លេស ១២៨,៩៧ លានដុល្លារ។
លោក លី ឃុនថៃ ប្រធានសមាគមស្បែកជើងកម្ពុជា បានប្រាប់ថា កំណើនការនាំចេញទៅចក្រភពអង់គ្លេសកំពុងឆ្លុះបញ្ចាំងពីភាពប្រសើរឡើងនៃសេដ្ឋកិច្ចពិភពលោក ខណៈការនាំចេញសម្លៀកបំពាក់ ស្បែកជើង និងកាបូបធ្វើដំណើរទៅចក្រភពអង់គ្លេសបានធ្លាក់ចុះកាលពីឆ្នាំមុន។
លោកថ្លែងថា៖«នៅឆ្នាំ ២០២៤ ខ្ញុំមានសុទិដ្ឋិនិយមថា ការនាំចេញរបស់កម្ពុជាទៅទីផ្សារអន្តរជាតិ រួមទាំងចក្រភពអង់គ្លេសនឹងមានភាពវិជ្ជមាន ព្រោះយើងអាចមើលឃើញពីភាពប្រសើរឡើងមួយចំនួននៃការនាំចេញរបស់យើងទៅកាន់ទីផ្សារសំខាន់ៗជាច្រើនដូចជា ចក្រភពអង់គ្លេស អាមេរិក និងទីផ្សារជាច្រើនផ្សេងទៀត»។
លោក ហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា បានឱ្យដឹងថា ដោយសារចក្រភពអង់គ្លេសជាផ្នែកមួយនៃអឺរ៉ុប ដូច្នេះទំនិញមួយចំនួនដែលកម្ពុជានាំចេញទៅចក្រភពអង់គ្លេសក៏អាចចូលទៅក្នុងទីផ្សារអឺរ៉ុបផងដែរ។
លោកថ្លែងថា៖«ចក្រភពអង់គ្លេសគឺជាប្រទេសអភិវឌ្ឍន៍ និងមានវិស័យឧស្សាហកម្មរីកចម្រើន ដូច្នេះទំនិញភាគច្រើនដែលកម្ពុជានាំចេញទៅចក្រភពអង់គ្លេសគឺជាផលិតផលក្នុងវិស័យវាយនភណ្ឌ និងកសិកម្ម»។
លោកបញ្ជាក់ថា៖«កាលពីឆ្នាំមុន យើងទទួលបានប្រព័ន្ធអនុគ្រោះពន្ធដែលផ្តល់ដោយចក្រភពអង់គ្លេសមកកម្ពុជាសម្រាប់ផលិតផលមួយចំនួន ដូច្នេះការណ៍នេះជួយបង្កើនការនាំចេញពីកម្ពុជាទៅចក្រភពអង់គ្លេសឱ្យកាន់តែខ្ពស់សម្រាប់ឆ្នាំនេះ»។
លោកស្រី Rt Hon. Anne Marie Trevelyan រដ្ឋមន្ត្រីអង់គ្លេសទទួលបន្ទុកតំបន់ឥណ្ឌូប៉ាស៊ីហ្វិក បានមកបំពេញទស្សនកិច្ចនៅកម្ពុជាកាលពីថ្ងៃទី ២ ដល់ថ្ងៃទី ៤ ខែមីនា ដើម្បីពង្រឹងកិច្ចសហប្រតិបត្តិការលើវិស័យមួយចំនួនដូចជា ពាណិជ្ជកម្ម ការអភិវឌ្ឍ សេដ្ឋកិច្ច និងការអប់រំ។
ក្នុងដំណើរទស្សនកិច្ចនេះ លោកស្រី Trevelyan បានជួបជាមួយលោក អូន ព័ន្ធមុនីរ័ត្ន មន្ត្រីក្រសួងសេដ្ឋកិច្ច និងហិរញ្ញវត្ថុកម្ពុជា ដោយពិភាក្សាពីរបៀបដែលចក្រភពអង់គ្លេសកំពុងគាំទ្រការអភិវឌ្ឍប្រកបដោយចីរភាពនៅកម្ពុជា រួមទាំងហេដ្ឋារចនាសម្ព័ន្ធបៃតងផងដែរ។
លោកស្រីបាននិយាយថា៖«ខ្ញុំមានសេចក្តីសោមនស្សរីករាយដែលបានមកបំពេញទស្សនកិច្ចជាលើកដំបូងនៅកម្ពុជា ដែលជាប្រទេសមួយមានប្រវត្តិសាស្ត្របុរាណមិនគួរឱ្យជឿ ហើយបានជម្នះការលំបាកថ្មីៗបន្ថែមទៀត ដើម្បីក្លាយជាប្រទេសមានសេដ្ឋកិច្ចលូតលាស់រហ័សនៅតំបន់។ ទំនាក់ទំនងទ្វេភាគីរវាងចក្រភពអង់គ្លេស និងកម្ពុជាកំពុងរីកចម្រើនលើវិស័យជាច្រើន ហើយយើងប្តេជ្ញាគាំទ្រកម្ពុជានៅដំណាក់កាលបន្ទាប់នៃដំណើរការអភិវឌ្ឍន៍។ ខ្ញុំរង់ចាំស្តាប់បន្ថែមទៀតអំពីរបៀបដែលភាពជាដៃគូវិនិយោគរបស់ចក្រភពអង់គ្លេសកំពុងដំណើរការសម្រាប់ប្រទេសកម្ពុជា និងតួនាទីការអប់រំរបស់ចក្រភពអង់គ្លេសក្នុងការអភិវឌ្ឍទេពកោសល្យនៅទីនេះ»។
បច្ចុប្បន្នការនាំចេញភាគច្រើនរបស់កម្ពុជាទៅចក្រភពអង់គ្លេសរួមមាន សម្លៀកបំពាក់ ស្បែកជើង កាបូប កង់ ផលិតផលកសិកម្ម ខណៈចក្រភពអង់គ្លេសនាំចូលមកកម្ពុជាវិញ មានដូចជារថយន្ត គ្រឿងយន្ត ឧបករណ៍អគ្គិសនី និងគ្រឿងបង្គុំអេឡិចត្រូនិក។ នេះបើយោងតាម GDCE៕
