លោកនាយករដ្ឋមន្ត្រី ហ៊ុន ម៉ាណែត ចុះជួបសំណេះសំណាលជាមួយក្រុមកម្មករ។ រូបថត STPM
ភ្នំពេញៈ អស់រយៈពេលជិត ២ ទសវត្សរ៍មកហើយដែលខ្ញុំធ្វើការនៅកាសែត ភ្នំពេញ ប៉ុស្តិ៍ ទទួលបន្ទុកជាការីនិពន្ធព័ត៌មានសេដ្ឋកិច្ច ដែលសរសេររាយការណ៍អំពីសេដ្ឋកិច្ចប្រទេសកម្ពុជា រឿងរ៉ាវ និងព្រឹត្តិការណ៍សេដ្ឋកិច្ចទាំងឡាយក្នុងតំបន់ និងពិភពលោកដែលពាក់ព័ន្ធនឹងកម្ពុជា។ ជាមួយគ្នានេះដែរ ខ្ញុំក៏បានមើលឃើញពីការរីកចម្រើននៃសេដ្ឋកិច្ចដ៏គួរឱ្យកត់សម្គាល់ និងការធ្វើសមាហរណកម្មរបស់កម្ពុជាទៅក្នុងខ្សែច្រវាក់តម្លៃក្នុងតំបន់ និងសកលលោកក្នុងរយៈពេលជិត ២ ទសវត្សរ៍កន្លង មកនេះ។
ពេលដែលខ្ញុំបានចូលបម្រើការងារនៅកាសែត ភ្នំពេញ ប៉ុស្តិ៍ កាលពីឆ្នាំ ២០០៨ កាសែតដែលមានអាយុកាលជាង ៣ ទសវត្សរ៍មួយនេះ ដែលបានបានប្រែក្លាយពីកាសែតចេញ ផ្សាយប្រចាំ ២ សប្តាហ៍ម្ដង ទៅ ជាកាសែតចេញផ្សាយប្រចាំថ្ងៃ។ ខ្ញុំពិតជាមានមោទនភាពដែលបានចូលរួមជាសមាជិកម្នាក់ក្នុងចំណោមសមាជិក ៤ នាក់ផ្សេងទៀតនៅក្នុងក្រុមព័ត៌មានផ្នែកសេដ្ឋកិច្ចនេះ។
តើវិស័យអ្វីខ្លះដែលបានជួយគាំទ្រកំណើនសេដ្ឋកិច្ចកម្ពុជាក្នុងរយៈពេលជាង ២ ទសវត្សរ៍មកទល់បច្ចុប្បន្ន?
ប្រទេសកម្ពុជា មានកំណើន សេដ្ឋកិច្ចយ៉ាងខ្លាំងក្នុងរយៈពេលប៉ុន្មានទសវត្សរ៍កន្លងមកនេះ ដោយកំណើនជាមធ្យម ៧ ភាគរយក្នុង ១ ឆ្នាំ និងគាំទ្រដោយវិស័យសំខាន់ៗចំនួន ៤ ដូចជា កសិកម្ម កាត់ដេរ ទេសចរណ៍ និងសំណង់។ សម្រាប់ឧស្សាហកម្មកាត់ដេរតំណាងឱ្យប្រហែល ៨០ ភាគរយនៃការនាំចេញសរុបរបស់ប្រទេសកម្ពុជា ដូចនេះ ឧស្សាហកម្មកាត់ដេរក៏ធ្វើឱ្យកម្ពុជាក្លាយជាប្រទេសនាំចេញសម្លៀកបំពាក់ឈានមុខគេមួយផងដែរ។
ទន្ទឹមនឹងនោះ ឧស្សាហកម្មទេសចរណ៍ក៏បានកំពុងរួមចំណែកយ៉ាងច្រើនដល់កំណើន សេដ្ឋកិច្ចផងដែរ ដោយមានកំណើនខ្ពស់នៃលំហូរភ្ញៀវទេសចរបរទេសជារៀងរាល់ឆ្នាំ។ ដោយឡែកសម្រាប់វិស័យសំណង់ និងអចលនទ្រព្យបានកើនឡើងខ្លាំង នៅមុនពេលមានវិបត្តិហិរញ្ញវត្ថុពិភពលោកកាលពីឆ្នាំ ២០០៨ ដោយសារលំហូរទុនពីកូរ៉េខាងត្បូង និងចិន និងបន្ទាប់មកមុនការផ្ទុះរីករាលដាលនៃជំងឺកូវីដ ១៩។
កាលពីឆ្នាំមុន យោងតាមមូលនិធិរូបិយវត្ថុអន្តរជាតិ សេដ្ឋកិច្ចរបស់កម្ពុជាបានកើនឡើង ៥,៣ ភាគរយនៅឆ្នាំ ២០២៣ ដែលជំរុញដោយការងើបឡើង វិញនៃវិស័យទេសចរណ៍ និងប្រតិបត្តិការនាំចេញមិនមែនកាត់ដេរដ៏រឹងមាំ។ កំណើននេះគាំទ្រដោយការស្ទុះងើបឡើងវិញនៃវិស័យទេសចរណ៍ និងវិស័យផលិតកម្ម ខណៈដែលអតិផរណាមានកម្រិត ៣ ភាគរយ។ យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា (CDC) ក្នុងឆ្នាំ ២០២៣ កម្ពុជាទទួលបានគម្រោងវិនិយោគចំនួន ២៦៨ ជាមួយនឹងទុនវិនិយោគជិត ៤,៩ ពាន់លានដុល្លារ កើនឡើងជិត ៥០ ភាគរយធៀបនឹងចំនួនត្រឹមតែ ៤ ពាន់លានដុល្លារកាលពីឆ្នាំ ២០២២។
សេដ្ឋកិច្ចកម្ពុជានៅឆ្នាំនេះត្រូវបានព្យាករថា នឹងសម្រេចបានក្នុងរង្វង់ ៦,៦ ភាគរយ ដែលនាំឱ្យផលិតផលក្នុងស្រុកសរុបបច្ចុប្បន្នមានប្រមាណ ១៤២,៩៥៧ ពាន់លានរៀល ស្មើនឹងប្រមាណ ៣៥,១៦៨ ពាន់លានដុល្លារ ខណៈផលិតផលក្នុងស្រុកសរុបសម្រាប់មនុស្សម្នាក់ត្រូវបានគេរំពឹងថានឹងកើនឡើងដល់ ២ ០៧១ ដុល្លារ បើធៀបនឹង ១ ៩១៧ ដុល្លារក្នុងឆ្នាំ ២០២៣។ នេះបើយោងតាមក្រសួងសេដ្ឋកិច្ច និងហិរញ្ញវត្ថុ។
CDC បានអនុម័តគម្រោងវិនិយោគសរុបចំនួន ២៦៨ ដែលមានទុនវិនិយោគសរុបជិត ៥ ពាន់លានដុល្លារអាមេរិក កើនឡើងជាង ២០ ភាគរយធៀបនឹងរយៈពេលដូចគ្នាកាលពីឆ្នាំមុន ហើយត្រូវបានគេរំពឹងថានឹងបង្កើតការងារបានប្រហែល ៣០៧ ០០០ កន្លែង។
កម្ពុជាជាប្រទេសឈរនៅជួរមុខនៃការវិនិយោគផ្ទាល់ពីបរទេស (FDI) នៅក្នុងតំបន់អាស៊ីអាគ្នេយ៍ ដោយរំពឹងថានឹងមានលំហូរចូលមូលធននៅឆ្នាំ ២០២៤ ដ៏រឹងមាំដែលត្រូវបានជំរុញដោយការស្ទុះងើបឡើងវិញនៃសេដ្ឋកិច្ចដ៏រឹងមាំ។ មូលនិធិរូបិយវត្ថុអន្តរជាតិ (IMF) ព្យាករថាកំណើនសេដ្ឋកិច្ចរបស់កម្ពុជា នឹងកើនឡើងដល់ ៦,១ ភាគរយនៅឆ្នាំក្រោយ ដូចដែលបានបង្ហាញនៅក្នុងបញ្ជីតាមដាន FDI Standouts Watchlist ប្រចាំឆ្នាំពី fDi Intelligence ដែលជាផ្នែកវិភាគឧស្សាហកម្មរបស់ក្រុមហ៊ុន Financial Times (FT) Group Ltd ដែលបានចេញផ្សាយកាលពីពាក់កណ្តាលខែធ្នូ។
ប្រទេសកម្ពុជាបានប្រឈម មុខនឹងវិបត្តិហិរញ្ញវត្ថុសកលកាលពីឆ្នាំ ២០០៨
ដោយសារកម្ពុជាជាប្រទេស មួយដែលទទួលបានកំណើនដ៏ខ្លាំងក្នុងរយៈពេលប៉ុន្មានជាង ២ ទសវត្សរ៍មកនេះ ខ្ញុំក៏បានមើល ឃើញពីបញ្ហាប្រឈមនៃសេដ្ឋកិច្ចផងដែរ ចាប់តាំងពីពាក់កណ្តាលឆ្នាំ ២០០៧ មក សេដ្ឋកិច្ចពិភពលោកបានឆ្លងកាត់ដំណាក់កាលដ៏លំបាកមួយ ដែលពោរពេញទៅដោយបញ្ហាប្រឈមបណ្ដាលឡើងដោយវិបត្តិឥណទានសកល ការកើនឡើងសម្ពាធអតិផរណា និងហានិភ័យដែលពាក់ព័ន្ធជាមួយនឹងការធ្លាក់ចុះសេដ្ឋកិច្ចសកលយ៉ាងខ្លាំង។
កាលពីឆ្នាំ ២០០៨ សេដ្ឋកិច្ចពិភពលោក បានទទួលរងផលប៉ះពាល់ដោយវិបត្តិហិរញ្ញវត្ថុ ឬវិបត្តិសេដ្ឋកិច្ចសកលដែលបានបណ្ដាលពីអាមេរិកដោយសារតែវិបត្តិកម្ចីទិញលំនៅឋាន។
ប៉ុន្តែកំណើនសេដ្ឋកិច្ចរបស់កម្ពុជានៅតែរឹងមាំកាលពីឆ្នាំ ២០០៨ ខណៈដែលផ្អែកតាមការព្យាករកំណើន GDP របស់កម្ពុជាដោយ IMF ក្នុងអត្រា ៦,៥ ភាគរយក្នុងឆ្នាំ ២០០៨ និងមានកំណើនត្រឹមតែ ០,១ ភាគរយក្នុងឆ្នាំ ២០០៩។
ក្នុងនាមជាប្រទេសដែលតូច និងសេដ្ឋកិច្ចបើកចំហ កម្ពុជាងាយទទួលរងផលប៉ះពាល់ជាពិសេសពាក់ព័ន្ធទៅនឹងតម្លៃទំនិញរបស់សេដ្ឋកិច្ចពិភពលោក ហើយដោយសារតែការពឹងផ្អែកទាំងស្រុងលើប្រភពថាមពលដែលផ្គត់ផ្គង់ពីខាងក្រៅ ការកើនឡើងនៃតម្លៃប្រេងឥន្ធនៈពិភពលោក និងងាយទទួលរងនូវការកើនឡើងនៃអតិផរណា។
ការកើនឡើងតម្លៃម្ហូបអាហារអន្តរជាតិក៏បានជំរុញឱ្យតម្លៃក្នុងស្រុកកើនឡើងផងដែរ ដោយជំរុញឱ្យអត្រាអតិផរណារបស់កម្ពុជា កើនឡើងយ៉ាងខ្លាំងចំនួន ២៥,៧ ភាគរយ កាលពីខែឧសភាក្នុងឆ្នាំ ២០០៨ មុនពេលធ្លាក់ចុះមកនៅត្រឹម ១៣,៥ ភាគរយ កាលពីខែធ្នូ ឆ្នាំ ២០០៨។
នៅក្នុងពេលមានវិបត្តិនោះដែរ ធនាគារជាតិនៃកម្ពុជា (NBC) បានធានាស្ថិរភាពម៉ាក្រូសេដ្ឋកិច្ច និងស្ថិរភាពហិរញ្ញវត្ថុ។ NBC បានចូលរួមយ៉ាងសកម្មក្នុងកិច្ចខិតខំប្រឹងប្រែងរបស់រដ្ឋាភិបាលក្នុងការអនុម័តកញ្ចប់វិធានការតម្រង់ទិសគោលនយោបាយទាន់ពេលវេលាដើម្បីកម្រិតសម្ពាធអតិផរណា។ ការធ្វើឱ្យប្រសើរឡើងនូវទំនុកចិត្តលើគោលនយោបាយរបស់រដ្ឋាភិបាល និងលើប្រព័ន្ធធនាគារបានជំរុញឱ្យទុនបម្រុងបរទេសរបស់កម្ពុជា កើនឡើងដល់ ២,២ ពាន់លានដុល្លារអាមេរិក កាលពីចុងឆ្នាំនោះ។
ជាមួយគ្នានោះដែរ វិធានការជាកញ្ចប់រឹតបន្តឹងជាបន្តបន្ទាប់ត្រូវបានដាក់ចេញដើម្បីទប់ស្កាត់សកម្មភាពឥណទានដែលបានកើនឡើងខ្ពស់ និងបានបន្ថយ ល្បឿនមូលដ្ឋានរូបិយវត្ថុដែល កើនឡើង រួមទាំងការបង្កើនតម្រូវការទុនបម្រុងដែលកំណត់ ដោយច្បាប់ពី ៨ ភាគរយ ទៅ ១៦ ភាគរយ និងការអំពាវនាវដល់ធនាគារទាំងអស់ឱ្យកំណត់ការផ្តល់ប្រាក់កម្ចីរបស់ពួកគេទៅលើវិស័យសំណង់ និងអចលនទ្រព្យ។
ដើម្បីឆ្លើយតបទៅនឹងវិបតិ្តសេដ្ឋកិច្ចនាពេលនោះ បើយោង តាមស្ថាប័ន CDRI រដ្ឋាភិបាលបានដាក់ចេញនូវឧបករណ៍គោលនយោបាយម៉ាក្រូសេដ្ឋកិច្ច ដែលសម្របសម្រួលដោយក្រុមត្រួតពិនិត្យតម្លៃស្ថិតក្រោមការគាំទ្រពីគណៈកម្មាធិការទទួល បន្ទុកគោលនយោបាយសេដ្ឋកិច្ច និងហិរញ្ញវត្ថុ។ គោលនយោបាយសារពើពន្ធដ៏រឹងមាំបានលើកលែងពន្ធនាំចូលលើផលិតផលសំខាន់ៗមួយចំនួន បាន ផ្តល់ការឧបត្ថម្ភធន និងបានបន្តការគ្រប់គ្រងយ៉ាងតឹងរ៉ឹងលើការចំណាយសាធារណៈ។
ទាក់ទងទៅនឹងគោលនយោបាយរូបិយវត្ថុ ការកើនឡើងតម្លៃប្រេងឥន្ធនៈ និងអាហារបានបណ្ដាលឱ្យតម្រូវការប្រាក់ដុល្លារកើនឡើង។ បើគ្មានការអន្តរាគមន៍ទាន់ពេលវេលាពី NBC នោះទេ សម្ពាធអតិផរណានឹងត្រូវបានកើនឡើងដោយការ រួមបញ្ចូលគ្នានៃការធ្លាក់តម្លៃប្រាក់រៀល និងការប្រែប្រួលអត្រាប្តូរប្រាក់។ ទោះបីជាមានអន្តរាគមន៍ដែលធានាស្ថិរភាពអត្រាប្តូរប្រាក់ក៏ដោយ ក៏ឥទ្ធិពលការប្រែប្រួលអត្រាការប្រាក់នៅតែកើតឡើងដដែល។
ឧបសគ្គសេដ្ឋកិច្ចមួយទៀតកើតចេញពីវិបត្តិសុខភាព និងសង្គ្រាមរវាងប្រទេសរុស្ស៊ី និងអ៊ុយក្រែន
បន្ទាប់ពីវិបត្តិហិរញ្ញវត្ថុពិភពលោកកាលពីឆ្នាំ ២០០៨ យើងបានមើលឃើញថា ប្រទេសកម្ពុជាបានទទួលបានកំណើន សេដ្ឋកិច្ចខ្ពស់ដោយសារតែការត្រឡប់មកវិញនៃលំហូរការវិនិយោគផ្ទាល់បរទេស (FIDs) លើគ្រប់វិស័យ ជាពិសេសវិស័យកាត់ដេរ និងវាយនភណ្ឌ ទេសចរណ៍ វិស័យសំណង់ និងវិស័យអចលនទ្រព្យ ជាពិសេសលំហូរការវិនិយោគមកពីប្រទេសចិន មុនពេលការរីករាលដាលជំងឺកូវីដ ១៩ កាលពីឆ្នាំ ២០២០។
ទិន្នន័យចុងក្រោយបំផុតនៅ ក្នុងជំរឿនសេដ្ឋកិច្ចឆ្នាំ ២០២២ ដែលបានចេញផ្សាយកាលពីខែមករា ឆ្នាំ ២០២៤ ក្នុងចំណោមគ្រឹះស្ថាន និងសហគ្រាសដែលរងផលប៉ះពាល់ដោយការរីករាលដាលជំងឺកូវីដ ១៩ គឺមានចំនួន ៥៨៧ ៧៩៣ (៣៤,៨ភាគរយ) បានរាយការណ៍ពីប្រាក់ចំណូលទាបកាលពីឆ្នាំ ២០២២; ចំនួន ៤៣ ៣ ៧០៣ (២៦,៦ ភាគរយ) បានរាយការណ៍ពីការចំណាយកាន់តែខ្ពស់; ចំនួន ២១២ ៧៦០ (១២,៦ភាគរយ) បានរាយការណ៍ការធ្លាក់ចុះតម្រូវការទីផ្សារ និងចំនួន ១៥៣ ៨៧៨ (៩,១ភាគរយ) បានរាយការណ៍ពីការខ្វះខាតដើមទុនបង្វិល។
ដើម្បីឆ្លើយតបទៅនឹងស្ថានការណ៍នោះ រដ្ឋាភិបាលកាលពីថ្ងៃទី ២២ ខែធ្នូ ឆ្នាំ ២០២២ បានដាក់ចេញ «ក្របខ័ណ្ឌយុទ្ធសាស្ត្រ និងកម្មវិធីសម្រាប់ការស្តារសេដ្ឋកិច្ចក្នុងបរិបទនៃការរស់នៅជាមួយជំងឺកូវីដ ១៩ ក្នុងគន្លងប្រក្រតីភាពថ្មីឆ្នាំ ២០២១-២០២៣» ដែលមានគោលបំណងជំរុញកំណើនសេដ្ឋកិច្ចសង្គមប្រកបដោយភាពធន់ក្នុងរយៈពេលមធ្យម និងវែង។ ឯកសារនេះជាមូលដ្ឋានដ៏សំខាន់ និងជាផែនទីបង្ហាញផ្លូវសម្រាប់ការអនុវត្តបន្ទាន់ និងក្នុងរយៈពេលមធ្យម នៃយុទ្ធសាស្ត្ររបស់រដ្ឋាភិបាល និងសកម្មភាពជាក់លាក់។
NBC បានឱ្យដឹងថា នៅកម្ពុជាប្រសិទ្ធភាពនៃគោលនយោបាយសុខភាព និងការគ្រប់គ្រងការរីករាលដាលជំងឺកូវីដ ១៩ ដោយរដ្ឋាភិបាលបានធានាឱ្យមានសកម្មភាពសេដ្ឋកិច្ចក្នុងស្រុកឡើងវិញកាលពីឆ្នាំ ២០២២។ ការដាក់ចេញវិធានការសេដ្ឋកិច្ច និងហិរញ្ញវត្ថុជាបន្តបន្ទាប់ ជាពិសេសក្របខ័ណ្ឌយុទ្ធសាស្ត្រ និងកម្មវិធីសម្រាប់ការស្ដារសេដ្ឋកិច្ចក្នុងបរិបទនៃការរស់នៅជាមួយជំងឺកូវីដ ១៩ តាមគន្លងប្រក្រតីភាពថ្មីកាលពីឆ្នាំ ២០២១-២០២៣ និងការបន្ធូរបន្ថយបទប្បញ្ញត្តិក្នុងវិស័យធនាគារបានគាំទ្រ និងពន្លឿនការស្ទុះងើបឡើងវិញសេដ្ឋកិច្ចកម្ពុជា។
បើយោងតាមក្រសួងសង្គមកិច្ច អតីតយុទ្ធជន និងយុវនីតិសម្បទា បានឱ្យដឹងកាលពីថ្ងៃទី ៥ ខែធ្នូ ឆ្នាំ ២០២៣ ថា រដ្ឋាភិបាលបានត្រៀមថវិកាជាង ១,៣០៥ ពាន់លានដុល្លារ សម្រាប់គម្រោងការគាំពារសង្គមចំនួន ៥ ហើយក្នុងអំឡុងពេលការរីករាលដាលជំងឺកូវីដ ១៩ រដ្ឋាភិបាលបានចំណាយថវិកាចំនួន ១,២១៣ ពាន់លានដុល្លារ ដើម្បីជួយផ្គត់ផ្គង់ចំនួន ៦៩៨,៥៨៥ គ្រួសារគិតត្រឹមថ្ងៃទី ២៤ ខែតុលា ឆ្នាំ ២០២៣។ ហើយចាប់ពីខែធ្នូ ឆ្នាំ ២០២២ ដល់ខែកក្កដា ឆ្នាំ ២០២៣ ទឹកប្រាក់ចំនួន ៤៤ លានដុល្លារត្រូវបានចំណាយដើម្បីជួយដល់ ៤៩៥ ៣០៧ គ្រួសារដែលស្ថិតក្នុងហានិភ័យដោយសារអតិផរណាខ្ពស់។
ជាមួយគ្នានេះដែរ រដ្ឋាភិបាលបានបញ្ចេញថវិកាចំនួន ២៥០ លានដុល្លារអាមេរិក សម្រាប់កម្ចីផ្ទាល់ពីធនាគារសហគ្រាសធុនតូច និងមធ្យមកម្ពុជា ភីអិលស៊ី (SME Bank) កាលពីឆ្នាំ២០២៣ សម្រាប់វិស័យអាទិភាពសំខាន់ៗដូចជា កសិកម្ម និងអេកូទេសចរណ៍។ ក្នុងរយៈពេល ៣ ឆ្នាំកន្លងមកនេះ គិតត្រឹមដើមឆ្នាំ ២០២៤ ធនាគារ SME បានពង្រីកកម្ចីដល់សហគ្រាសប្រមាណ ៣ ២០០ ដែល មានទំហំទឹកប្រាក់ប្រហែល ៤៩០ លានដុល្លារ។
លើសពីនោះទៅទៀត រដ្ឋាភិបាលក៏បានបង្កើតសាជីវកម្មធានាឥណទានកម្ពុជាកាលពីថ្ងៃទី ១ ខែកញ្ញា ឆ្នាំ ២០២០ និងផែនការធានាការស្ទុះងើបឡើងរបស់អាជីវកម្មដែលមានទឹកប្រាក់ចំនួន ២០០ លានដុល្លារ ត្រូវបានចាប់ផ្តើមដំណើរការកាលពីថ្ងៃទី ២៩ ខែមីនា ឆ្នាំ ២០២១។ គិតត្រឹមថ្ងៃទី ៣០ ខែវិច្ឆិកា ឆ្នាំ ២០២៣ សាជីវកម្មធានាឥណទានកម្ពុជា បានចេញលិខិតបញ្ជាក់ការធានាឥណទាន (LG) សរុបចំនួន ១ ៨៨០ សម្រាប់ប្រាក់កម្ចីដែលមានតម្លៃ ១៥៩,៦៩ លានដុល្លារ ដើម្បីគាំទ្រដល់ SMEs ដែលបានរងផលប៉ះពាល់ដោយការរីករាលដាលជំងឺកូវីដ១៩ ក្នុងរយៈពេលប៉ុន្មានឆ្នាំថ្មីៗនេះ។
ផែនការប្រកបដោយមហិច្ឆតារបស់ប្រទេសកម្ពុជា
កាលពីថ្ងៃទី ២៤ ខែសីហា ឆ្នាំ ២០២៣ លោក ហ៊ុន ម៉ាណែត ដែលទើបជាប់ឆ្នោតជានាយករដ្ឋមន្ត្រីថ្មីក្នុងរដ្ឋសភានីតិកាលទី៧ បានដាក់ចេញយុទ្ធសាស្ត្របញ្ចកោណដំណាក់កាលទី ១ រយៈពេល ៥ ឆ្នាំ សំដៅប្រែក្លាយកម្ពុជាទៅជាប្រទេសមានប្រាក់ចំណូលមធ្យមកម្រិតខ្ពស់ត្រឹមឆ្នាំ ២០៣០ និងជាប្រទេសមានចំណូលខ្ពស់ត្រឹមឆ្នាំ ២០៥០។
លោក ហ៊ុន ម៉ាណែត បានថ្លែងក្នុងពិធីដាក់ឱ្យដំណើរយុទ្ធសាស្ត្រនេះថា ក្នុងរយៈពេល ២៥ ឆ្នាំកន្លងមកនេះ កម្ពុជាបានផ្តោតលើការកសាងប្រទេសឡើងវិញក្នុងសម័យក្រោយសង្គ្រាម។ រយៈពេល ២៥ ឆ្នាំខាងមុខ នឹងក្លាយជាវដ្តថ្មីមួយ ទៀត ដើម្បីកសាងប្រទេសប្រកបដោយភាពរឹងមាំ ដើម្បីក្លាយជាប្រទេសមានប្រាក់ចំណូលខ្ពស់ត្រឹមឆ្នាំ ២០៥០។ យុទ្ធសាស្ត្រនេះមាន ៥ ដំណាក់កាល។ ទី១ នឹងមានអាទិភាពចំនួន ៥ គឺផ្លូវថ្នល់ មនុស្ស ទឹក ភ្លើង និងបច្ចេកវិទ្យា។
លោកបញ្ជាក់ថា យុទ្ធសាស្ត្របញ្ចកោណដំណាក់កាលទី១ រយៈពេល ៥ ឆ្នាំនេះ នឹងធានាកំណើនសេដ្ឋកិច្ចដែលមានភាពធន់នឹងវិបត្តិ បង្កើតការងារ កាត់បន្ថយភាពក្រីក្រ កែលម្អអភិបាលកិច្ច និងស្ថាប័នសាធារណៈ និងធានាការអភិវឌ្ឍសេដ្ឋកិច្ចសង្គមប្រកបដោយចីរភាព។
ថ្មីៗនេះ រដ្ឋាភិបាលកម្ពុជា ក៏បានដាក់ឱ្យដំណើរការផែនទីបង្ហាញផ្លូវរយៈពេល ១០ ឆ្នាំខាងមុខ នៃផែនការមេស្តីពីប្រព័ន្ធដឹកជញ្ជូន និងភ័ស្តុភារកម្ពុជា ឆ្នាំ ២០២៣-២០៣៣ បានផ្តល់អាទិភាពដល់គម្រោងចំនួន ១៧៤ ដែលមានតម្លៃវិនិយោគតាមការប៉ាន់ប្រមាណចំនួន ៣៦,៦៧៩ ពាន់លានដុល្លារ។
ក្នុងចំនួននោះគម្រោងផ្លូវថ្នល់មានចំនួន ៩៤ គម្រោងផ្លូវដែកចំនួន ៨ គម្រោងដឹកជញ្ជូនតាមផ្លូវទឹកចំនួន ២៣ គម្រោងដឹកជញ្ជូនតាមសមុទ្រមានចំនួន ២០ គម្រោងដឹកជញ្ជូនតាមផ្លូវអាកាសចំនួន ១០ គម្រោងប្រព័ន្ធភ័ស្តុភារចំនួន ១៥ និងគម្រោងអភិវឌ្ឍន៍ហេដ្ឋារចនាសម្ព័ន្ធចំនួន ៤ ផ្សេងទៀត។
ក្នុងចំណោមគម្រោងអភិវឌ្ឍន៍ទាំងនេះ ប្រហែល ៩០ ជាគម្រោងអភិវឌ្ឍន៍រយៈពេលខ្លី និងមធ្យម និង ៩១ ទៀតជាគម្រោងអភិវឌ្ឍន៍រយៈពេលវែង។ គម្រោងទាំងនេះត្រូវបានតភ្ជាប់គ្រប់មធ្យោបាយដឹកជញ្ជូន និងបានតភ្ជាប់ទៅមជ្ឈមណ្ឌលភ័ស្ដុភារផងដែរ។
ខ្ញុំក្នុងនាមជាការីនិពន្ធព័ត៌មានសេដ្ឋកិច្ចប្រចាំសារព័ត៌មាន ភ្នំពេញ ប៉ុស្តិ៍ ទាំងភាសារខ្មែរ និងអង់គ្លេស សង្ឃឹមថា តាមរយៈអត្ថបទដែលសារព័ត៌មានដែល មានវ័យចំណាស់មួយនេះបាន ចេញផ្សាយអស់រយៈពេលជាង ៣ ទសវត្សរ៍កន្លងមកនេះនឹងនៅតែមានគុណតម្លៃសម្រាប់អ្នកអាន អ្នកស្រាវជ្រាវ បណ្តាធុរជន វិនិយោគិន និងសាធារណជនដើម្បីយកទៅធ្វើជាឯកសារយោងរបស់ខ្លួនតទៅថ្ងៃអនាគតរបស់អស់លោកអ្នក៕
