កម្មករកំពុងលើកដាក់អង្ករនៅរោងម៉ាស៊ីនមួយ នាពេលកន្លងមក។ ហេង ជីវ័ន
ភ្នំពេញៈ ប្រធានក្រុមប្រឹក្សាភិបាលនៃសហព័ន្ធស្រូវអង្ករកម្ពុជា (CRF) បានថ្លែងថា ក្រុមហ៊ុននាំចេញអង្ករធំជាងគេរបស់ប្រទេសអូស្ត្រាលី SunRice Group នឹងធ្វើការបំពេញទស្សនកិច្ចសិក្សាធ្វើការនាំចេញអង្ករក្រអូប និងសរីរាង្គនាពេលឆាប់ៗនេះ ដើម្បីយកទៅធ្វើការនាំចេញទៅកាន់ប្រទេសអូស្ត្រាលី និងទិសដៅផ្សេងៗទៀតដែលខ្លួនមាន។
លោក សុង សារ៉ន ប្រធានក្រុមប្រឹក្សាភិបាលនៃសហព័ន្ធស្រូវអង្ករកម្ពុជា (CRF) និងប្រធានអគ្គនាយកក្រុមហ៊ុន Amru Rice (Cambodia) បានជួបប្រជុំដោយផ្ទាល់ជាមួយអគ្គនាយកក្រុមហ៊ុន SunRice Group លោក Paul Serra បន្ទាប់ពីលោកអគ្គនាយករូបនេះបានជួបជាមួយលោកនាយករដ្ឋមន្ត្រី ហ៊ុន ម៉ាណែត កាលពីថ្ងៃទី៤ខែមីនា កន្លងទៅនេះ។
លោកបានថ្លែងថា៖ «ខ្ញុំមានឱកាសបានប្រជុំជាមួយអគ្គនាយកក្រុមហ៊ុន SunRice Group កាលពីថ្ងៃទី ៥ ដោយយើងបានពិភាក្សាអំពីសក្តានុពលនៃវិស័យស្រូវអង្ករកម្ពុជា។ យើងបានអញ្ជើញគាត់មកបំពេញទស្សនកិច្ចនៅប្រទេសកម្ពុជា ដើម្បីពិនិត្យលទ្ធភាពក្នុងការធ្វើការនាំចេញកែច្នៃជាពិសេសអង្ករសរីរាង្គ។ ក្នុងនោះ លោកអគ្គនាយកបានសន្យាជាមួយខ្ញុំថា គាត់នឹងមកទស្សនកិច្ចនៅកម្ពុជាយើងនាពេលឆាប់ៗនេះដើម្បីជជែកពិភាក្សាឱ្យបានលម្អិតបន្ថែមទៀត»។
លោកបានសង្កត់ធ្ងន់ទៀតថា៖ «ក្នុងជំនួបនោះដែរ គាត់បានប្រាប់ខ្ញុំថា ក្រុមហ៊ុនគាត់ចាប់អារម្មណ៍ធ្វើការនាំចេញនូវប្រភេទអង្ករក្រអូបនិងអង្ករសរីរាង្គពីប្រទេសកម្ពុជា ដោយគាត់មានផែនការថានឹងនាំចេញពីយើងប្រមាណ ២០០ តោន នូវប្រភេទអង្ករសរីរាង្គសាកល្បងសិន ប៉ុន្តែយើងអាចមានសក្តានុពលជាមួយក្រុមហ៊ុនច្រើនជាពិសេសពង្រីកការនាំចេញរបស់ក្រុមហ៊ុនគាត់ដែលមានស្រាប់ និងគាត់អាចមកធ្វើការវិនិយោគមកស្រុកខ្មែរយើង»។
លោក Paul Serra នាយកប្រតិបត្តិក្រុមហ៊ុន SunRice Group កាលពីថ្ងៃទី ៥ ពេលជួបសម្តែងការគួរសម និងពិភាក្សាការងារ ជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នាទីក្រុងមែលប៊ន ប្រទេសអូស្ត្រាលី នៅព្រឹកថ្ងៃចន្ទ ទី ៤ ខែមីនា ឆ្នាំ ២០២៤ នេះ។
លោក Paul ជម្រាបលោកនាយករដ្ឋមន្ត្រីថា ក្រុមហ៊ុនលោកជាក្រុមហ៊ុនអូស្ត្រាលី ទី១ ដែលបាននាំអង្ករពីកម្ពុជាមកកាន់ប្រទេសអូស្ត្រាលី និងប្រទេសនូវែលសេឡង់។
លោកសម្គាល់ឃើញថា កម្ពុជាមានសក្ដានុពលលើវិស័យកសិកម្ម ដោយអង្ករកម្ពុជាមានកេរ្តិ៍ឈ្មោះល្បីល្បាញលើសកលលោក ហើយកម្ពុជាក៏មានគុណសម្បត្តិប្រកួតប្រជែងខ្ពស់លើកម្លាំងពលកម្មវ័យក្មេង ស្ថិរភាពនៃតម្លៃអគ្គិសនី ជាមួយហេដ្ឋារចនាសម្ព័ន្ធដឹកជញ្ជូនប្រទាក់ក្រឡា និងឡូជីស្ទិកល្អប្រសើរផងដែរ។
លោកថា៖ «ផ្អែកលើសក្ដានុពលទាំងនេះ ក្រុមហ៊ុនលោកមានបំណងពង្រឹង និងពង្រីកទំនាក់ទំនងបន្ថែមទៀតជាមួយកម្ពុជាលើវិស័យកសិកម្ម ដោយផ្តោតលើឧស្សាហកម្មកែច្នៃអង្ករ។ ក្នុង នោះក្រុមហ៊ុនបង្ហាញបំណងវិនិយោគលើការបង្កើតរោងចក្រកែច្នៃអង្ករ ពិសេសអង្ករសរីរាង្គ សម្រាប់នាំចេញទៅក្រៅ ប្រទេស»។
លោកបានលើកឡើងថា៖ «បច្ចុប្បន្ន រាជរដ្ឋាភិបាលបានដាក់ចេញគោលនយោបាយដាក់ពង្រាយមន្ត្រីជំនាញកសិកម្មនៅតាមមូលដ្ឋានឃុំ សង្កាត់ទូទាំងប្រទេស ដើម្បីគាំទ្រប្រជាកសិករដល់មូលដ្ឋាន លើផ្នែកបច្ចេកទេស សំដៅបង្កើនផលិតភាពផលិតផលកសិកម្មនៅតាមមូលដ្ឋាន»។
លោកថារាជរដ្ឋាភិបាលកម្ពុជា ក៏បានបញ្ជាក់ជូននាយកប្រតិបត្តិក្រុមហ៊ុនអំពីការយកចិត្តទុកដាក់របស់រាជរដ្ឋាភិបាលលើការពង្រីកហេដ្ឋារចនាសម្ព័ន្ធដឹកជញ្ជូន និងប្រព័ន្ធឡូជីស្ទិក និងគោលនយោបាយអភិវឌ្ឍន៍វិស័យថាមពលអគ្គិសនីនៅកម្ពុជា។ លើសពីនោះ លោកនាយករដ្ឋមន្ត្រីក៏បានលើកទឹកចិត្តឱ្យក្រុមហ៊ុនទស្សនកិច្ចនៅកម្ពុជា ដើម្បីស្វែងរកឱកាសវិនិយោគបន្ថែមទៀតដោយពិភាក្សាជាមួយក្រសួងស្ថាប័នពាក់ព័ន្ធរបស់កម្ពុជា។
ទិន្នន័យរបស់សហព័ន្ធស្រូវអង្ករកម្ពុជា (CRF) បង្ហាញថា ក្នុងឆ្នាំ ២០២៣ កម្ពុជាបាននាំចេញអង្ករទៅទីផ្សារអន្តរជាតិសរុប ៦៥៦ ៣២៣ តោន កើនឡើង ៣ ភាគរយបើធៀបនឹងឆ្នាំ ២០២២ ចំណែកទឹកប្រាក់ប្រមូលបានមានចំនួន ៤៦៦ លានដុល្លារ កើនឡើង ១៣ ភាគរយ។ អង្ករកម្ពុជាត្រូវបាននាំចេញទៅកាន់គោលដៅចំនួន ៦១ ប្រទេស/ដែនដី តាមរយៈក្រុមហ៊ុន នាំចេញចំនួន ៦៣។
បើយោងតាមរបាយការណ៍ដដែល ការនាំចេញអង្ករទៅប្រទេសចិន និងតំបន់រដ្ឋបាលស្វយ័តហុងកុង មានបរិមាណ ២១២ ៧៥៦ តោន គិតជាប្រាក់ ១៣៨ លានដុល្លារ,ប្រទេសនៅទ្វីបអឺរ៉ុប (២៦ ប្រទេស)ចំនួន ២៦៤ ៦៨៣ តោន ស្មើនឹង ១៩១ លានដុល្លារ ប្រទេសសមាជិកអាស៊ាន (៧ ប្រទេស) ៩៣ ៣៧៦ តោន ស្មើនឹង ៦២លានដុល្លារ និងទៅគោលដៅផ្សេងទៀតនៅអាហ្រ្វិក មជ្ឈិមបូព៌ា (២៦ ប្រទេស) បានចំនួន ៨៥ ៥០៨ តោន ស្មើទឹកប្រាក់ ៧៦ លានដុល្លារ។
ជាមួយគ្នានេះដែរ ទន្ទឹមនឹងការនាំចេញអង្ករនេះ ប្រទេសកម្ពុជាក៏បានធ្វើការនាំចេញស្រូវចំនួន ៤ ៣៨៧ ៣៦៣តោន ដែលគិតជាទឹកប្រាក់ប្រមាណ ១,៣២ ពាន់លានដុល្លារផងដែរ ក្នុងនោះ ៦៤ ភាគរយបាននាំចេញដោយឆ្លងកាត់ការស្នើសុំការបញ្ជាក់ឯកសារនាំចេញពីអាជ្ញាធរមានសមត្ថកិច្ច។ បរិមាណនាំចេញស្រូវ បានកើនឡើងប្រមាណ ២៦,៥ ភាគរយ និងទឹកប្រាក់នោះក៏បានកើនឡើងប្រហែល ៥៦,៦៩ ភាគរយ បើធៀបឆ្នាំ ២០២២៕
