កម្ពុជា-វៀតណាម ក្នុងកិច្ចប្រជុំនៅទីស្នាក់ការក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី ៦ ខែមីនា។ CDC
ភ្នំពេញៈ ការធ្វើធុរកិច្ច និងទំហំពាណិជ្ជកម្មទ្វេភាគីកម្ពុជា និងវៀតណាមនឹងមានភាពកាន់តែប្រសើរថែមទៀត ខណៈតំណាងសមាគមសហព័ន្ធធុរកិច្ចវៀតណាម-កម្ពុជា (VCBA) សន្យាសហការជាមួយអាជ្ញាធរកម្ពុជា ក្នុងការផ្សព្វផ្សាយពីសក្តានុពលវិនិយោគនៅកម្ពុជាទៅកាន់វិនិយោគិននៅវៀតណាម។
ការអះអាងនេះត្រូវបានធ្វើឡើងដោយលោក លេង រិទ្ធី ប្រធានសមាគម VCBA ក្នុងឱកាសដែលលោកដឹកនាំតំណាងក្រុមហ៊ុនចំនួន ១៦ (ភាគច្រើនមានប្រតិបត្តិការវិនិយោគក្នុងប្រទេសកម្ពុជា) ទៅជួបពិភាក្សាការងារជាមួយលោក ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជានៅទីស្នាក់ការក្រុមប្រឹក្សាអភិវឌ្ឍន៍កម្ពុជា (CDC) កាលពីថ្ងៃទី ៦ ខែមីនា។
លោក លេង រិទ្ធី បានលើកឡើងថា VCBA កំពុងមានការចាប់អារម្មណ៍យ៉ាងខ្លាំងចំពោះការអភិវឌ្ឍដ៏ឆាប់រហ័សរបស់កម្ពុជា ពិសេសការខិតខំរបស់រាជរដ្ឋាភិបាលកម្ពុជានីតិកាលថ្មី ខណៈកន្លងមកលោក និងក្រុមហ៊ុនជាសមាជិក VCBA ក៏បានចែករំលែកបទពិសោធន៍នៃការវិនិយោគលើវិស័យកសិកម្ម ដូចជាស្រូវអង្ករ និងកៅស៊ូ ទៅដល់ប្រជាកសិករ និងវិនិយោគិនកម្ពុជាមួយចំនួន។
លោកបន្តថា តាមរយៈកិច្ចសហការល្អជាមួយ CDC គឺ VCBA សន្យាថានឹងជួយធ្វើការផ្សព្វផ្សាយពីសក្តានុពលវិនិយោគនៅកម្ពុជាទៅក្រុមវិនិយោគិនវៀតណាមឱ្យចូលមកបណ្តាក់ទុនផ្ទាល់នៅកម្ពុជាកាន់តែច្រើន។
លោកបានថ្លែងថា៖ «VCBA នឹងព្យាយាមចូលរួមសហការជាមួយក្រុមប្រឹក្សាអភិវឌ្ឍន៍កម្ពុជាក្នុងការផ្សព្វផ្សាយសក្តានុពលរបស់ប្រទេសកម្ពុជាទៅកាន់វិនិយោគិននៅវៀតណាមដើម្បីទាក់ទាញពួកគេឱ្យចូលមកធ្វើការបណ្តាក់ទុនវិនិយោគលើវិស័យផ្សេងៗ ជាពិសេសវិស័យកសិកម្មនៅកម្ពុជា»។
ជាការឆ្លើយតប លោក ស៊ុន ចាន់ថុល បានថ្លែងអំណរគុណចំពោះវិនិយោគិនទាំងអស់ដែលបានដាក់ទុនវិនិយោគនៅកម្ពុជា ហើយកម្ពុជារំពឹងនឹងទទួលបានការពង្រីកវិនិយោគពីក្រុមហ៊ុននានាដែលមានស្រាប់នៅកម្ពុជាបន្ថែមទៀត។
លោក ចាន់ថុល លើកឡើងទៀតថា បច្ចុប្បន្នកម្ពុជាគឺជាទីតាំងដ៏មានសក្តានុពលសម្រាប់ការវិនិយោគនៅលើគ្រប់វិស័យ ជាក់ស្តែងកម្ពុជាជាប្រទេសមានសុខសន្តិភាព មានស្ថិរភាពសេដ្ឋកិច្ចល្អ មានច្បាប់វិនិយោគអំណោយផល និងមានហេដ្ឋារចនាសម្ព័ន្ធដឹកជញ្ជូនល្អប្រសើរផងដែរ។
សមាគមសហព័ន្ធធុរកិច្ចវៀតណាម-កម្ពុជា ត្រូវបានបង្កើតឡើងក្នុងឆ្នាំ ២០១៨ ដោយគិតមកដល់ពេលនេះមានសមាជិកជាង ១០០ ក្រុមហ៊ុន។ VCBA មានគោលបំណងរួមចំណែកគាំពារវិស័យធុរកិច្ចវៀតណាម-កម្ពុជា អភិវឌ្ឍវិស័យធនធានមនុស្ស អប់រំ បណ្តុះបណ្តាលវិជ្ជាជីវៈ និងពាណិជ្ជកម្ម។
ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា លោក ជា ចាន់ដារ៉ា បានប្រាប់ ភ្នំពេញ ប៉ុស្តិ៍ថា ក្នុងនាមប្រទេសមានព្រំដែនជាប់គ្នា និងមានទំនាក់ទំនងការទូតល្អ គឺសកម្មភាពនៃការនាំចេញ នាំចូលទំនិញ និងការចូលមកបណ្តាក់ទុនផ្ទាល់នៅកម្ពុជាពីសំណាក់វិនិយោគិនវៀតណាម បានកើនឡើងជាបន្តបន្ទាប់។
លោកបន្តថា សម្រាប់សកម្មភាពដឹកជញ្ជូនឆ្លងព្រំដែនគឺមានជាប្រចាំ ដោយទំនិញកម្ពុជានាំទៅវៀតណាមភាគច្រើនលើសលប់ជាផលិតកម្មកសិកម្មដូចជា ស្រូវ, កៅស៊ូ, ស្វាយចន្ទី, ដំឡូងមី ពោត ចេក ស្វាយ ថ្នាំជក់ និងធនធានធម្មជាតិ រីឯទំនិញវៀតណាមនាំមកវិញ គឺមានផលិតផលចម្រុះជាច្រើនរាប់តាំងពីចំណីអាហារ ផលិតផលប្រើប្រាស់ប្រចាំថ្ងៃ គ្រឿងម៉ាស៊ីន គ្រឿងអេឡិចត្រូនិកអគ្គិសនី ជីគីមី និងសម្ភារសំណង់ ជាដើម។
លោកប្រាប់ទៀតថា៖ «សម្ទុះនៃការនាំចេញ-នាំចូលទំនិញរវាងប្រទេសទាំង ២ បានកើនឡើងជាបន្តបន្ទាប់ ហើយចំនួនវិនិយោគិនវៀតណាមចូលមកបើកអាជីវកម្មនៅកម្ពុជា ក៏នឹងបន្តកើនឡើងផងដែរ»។
ក្នុងឆ្នាំ ២០២៣ ការនាំចេញនាំចូលទំនិញរវាងប្រទេសទាំង ២ មានទឹកប្រាក់សរុប ៦,៥៨ ពាន់លានដុល្លារ កើនឡើង ៧,៣ ភាគរយ បើធៀបឆ្នាំ ២០២២។ ក្នុងចំនួនខាងលើគឺការនាំចេញរបស់កម្ពុជា មានចំនួន ២,៩៧ ពាន់លានដុល្លារ កើន ៣៧,១ ភាគរយ និងទំនិញវៀតណាមនាំមកកម្ពុជា ៣,៦១ ពាន់លានដុល្លារ ធ្លាក់ចុះ ៨,៩ ភាគរយ។ យោងតាមតួលេខខាងលើ គឺជញ្ជីងពាណិជ្ជកម្មកម្ពុជាមានឱនភាពប្រមាណ ៦៣៩,៦២ លានដុល្លារ ខណៈឆ្នាំ ២០២២ មានរហូតដល់ ១,៨ ពាន់លានដុល្លារ។ នេះបើតាមអគ្គនាយកដ្ឋានគយ និងរដ្ឋាករកម្ពុជា៕
