![](https://pppkhmer.sgp1.digitaloceanspaces.com/image/main/20246/19_6_2024_19_6_2024_nbc_governor_chea_serey_and_chia_der_jiun_managing_director_of_mas.jpg)
លោកស្រី ជា សិរី ទេសាភិបាល ធនាគារជាតិនៃកម្ពុជា និងលោកស្រី ជា សិរី ទេសាភិបាល ធនាគារជាតិនៃកម្ពុជា លើកបង្ហាញគម្រោងច្រករបៀងតម្លាភាពហិរញ្ញវត្ថុ (FTC) កាលពីថ្ងៃទី១៨ ខែមិថុនា ក្នុងពិធីមួយនៅ Istana ប្រទេសសិង្ហបុរី ។ STPM
ភ្នំពេញ៖ ធនាគារជាតិនៃកម្ពុជា (NBC) និងអាជ្ញាធររូបិយវត្ថុសិង្ហបុរី (MAS) បានប្រកាសរួមគ្នាអំពីការចាប់ផ្តើមគម្រោងច្រករបៀងតម្លាភាពហិរញ្ញវត្ថុ (FTC)។
ការប្រកាសនេះធ្វើឡើងនៅថ្ងៃទី១៨ ខែមិថុនា ក្នុងពិធីមួយនៅ Istana ប្រទេសសិង្ហបុរី ដោយមានការចូលរួមពីលោក ឡូរ៉េន វ៉ុង នាយករដ្ឋមន្រ្តីសិង្ហបុរី និងលោក ហ៊ុន ម៉ាណែត នាយករដ្ឋមន្រ្តីកម្ពុជា ដែលជាផ្នែកមួយនៃដំណើរទស្សនកិច្ចផ្លូវការរបស់លោកទៅកាន់ប្រទេស សិង្ហបុរី ចាប់ពីថ្ងៃទី១៨ ដល់ថ្ងៃទី១៩ ខែមិថុនា ឆ្នាំ២០២៤។
យោងតាមការចេញផ្សាយរបស់ប្រព័ន្ធផ្សព្វផ្សាយរួម បានបង្ហាញថា៖ «FTC មានគោលបំណងជំរុញពាណិជ្ជកម្ម និងសេវាកម្មហិរញ្ញវត្ថុឆ្លងកាត់ព្រំដែនរវាងសហគ្រាសធុនតូច និងមធ្យម (SMEs) ក្នុងប្រទេសសិង្ហបុរី និងកម្ពុជា តាមរយៈហេដ្ឋារចនាសម្ព័ន្ធឌីជីថលកាន់តែងាយស្រួល និងឆាប់រហ័ស»។
ថ្នាល FTC ជួយសម្រួលដល់លទ្ធភាពទទួលបានទិន្នន័យកាន់តែប្រសើរឡើងសម្រាប់ស្ថាប័នហិរញ្ញវត្ថុដែលចូលរួម ធ្វើឱ្យការវាយតម្លៃហានិភ័យឥណទានមានភាពត្រឹមត្រូវជាងមុន និងបង្កើនលទ្ធភាពទទួលបានហិរញ្ញប្បទានសម្រាប់ពាណិជ្ជកម្មសហគ្រាសធុនតូច និងមធ្យម (SMEs)។ FTC ត្រូវបានបង្កើតនិងគ្រប់គ្រងដោយ Proxtera Pte Ltd។
លោក ជៀ ដឺ ចាយអិន នាយកគ្រប់គ្រងអាជ្ញាធររូបិយវត្ថុសិង្ហបុរី បានថ្លែងថា៖ «ការចាប់ផ្តើមគម្រោង FTC រវាងគ្រឹះស្ថានហិរញ្ញវត្ថុនៅកម្ពុជា និងសិង្ហបុរី នឹងគាំទ្រដល់លទ្ធភាពនៃការទទួលបានសេវាហិរញ្ញវត្ថុកាន់តែប្រសើរសម្រាប់សហគ្រាសធុនតូច និងមធ្យម តាមរយៈការផ្លាស់ប្តូរ ទិន្នន័យហិរញ្ញវត្ថុរបស់សហគ្រាសធុនតូច និងមធ្យមនៅលើហេដ្ឋារចនាសម្ព័ន្ធឌីជីថល FTC»។
លោកបន្ដថា៖ «ការណ៍នេះនឹងផ្តល់កាលានុវត្តភាពដល់សហគ្រាសធុនតូច និងមធ្យម និងគ្រឹះស្ថានហិរញ្ញវត្ថុដែល ចូលរួមក្នុងគម្រោង»។
គំនិតផ្តួចផ្តើមច្រករបៀងតម្លាភាពហិរញ្ញវត្ថុ (FTC) បានស្វាគមន៍ការចូលរួមពីស្ថាប័នហិរញ្ញវត្ថុលេចធ្លោក្នុងប្រទេសកម្ពុជា និងសិង្ហបុរី។
ពីប្រទេសកម្ពុជា ស្ថាប័នដែលបានចូលរួម មានដូចជា ធនាគារអេស៊ីលីដា ធនាគារហ្វីលីព ធនាគារស្ថាបនា ធនាគារវីង ធនាគារវឌ្ឍនៈអាស៊ីចំកាត់។
ប្រទេសសិង្ហបុរីត្រូវបានតំណាងដោយធនាគារ ANEXT គ្រឹះស្ថាន Liquid Groupt Pte Ltd និងគ្រឹះស្ថាន Sing Investment & Finance Limited។
លោកស្រី ជា សិរី ទេសាភិបាល ធនាគារជាតិនៃកម្ពុជា បានថ្លែងថា៖ «គម្រោង FTC ជាចក្ខុវិស័យរួមរវាងធនាគារជាតិនៃកម្ពុជា និងអាជ្ញាធររូបិយវត្ថុសិង្ហបុរី ដើម្បីគាំទ្រលំហូរព័ត៌មានសម្រាប់អាជីវកម្ម ជាពិសេសសហគ្រាសធុនតូចនិងមធ្យម តាមរយៈពង្រឹងគុណភាព ទិន្នន័យហិរញ្ញវត្ថុប្រកបដោយតម្លាភាពនិងទំនុកចិត្តសម្រាប់ការផ្តល់សេវាហិរញ្ញវត្ថុរវាងប្រទេសកម្ពុជា និងសិង្ហបុរី ដែលនឹងផ្តល់លទ្ធភាពសហគ្រាសធុនតូចនិងមធ្យមក្នុងការទទួលបានសេវាហិរញ្ញវត្ថុកាន់តែប្រសើរ»។
លោកស្រីបានបន្ថែមថា៖ «ការដាក់ឱ្យដំណើរការគម្រោង FTC បញ្ជាក់ពីការប្តេជ្ញាចិត្តរបស់ធនាគារកណ្តាលទាំងពីរក្នុងការផ្លាស់ប្តូរជាវិជ្ជមានក្នុងការជំរុញពាណិជ្ជកម្ម និងសេវាហិរញ្ញវត្ថុ ព្រមទាំងរួមចំណែកអភិវឌ្ឍសេដ្ឋកិច្ចប្រកបដោយចីរភាព»។
កិច្ចសហការនេះមានគោលបំណងលើកកម្ពស់ការតភ្ជាប់ពាណិជ្ជកម្ម និងផ្តល់ឱ្យសហគ្រាសធុនតូច និងមធ្យមនូវការចូលទៅកាន់បណ្តាញពាណិជ្ជកម្មឌីជីថលកាន់តែទូលំទូលាយ ជំរុញកំណើនសេដ្ឋកិច្ចនៅក្នុងប្រទេសទាំងពីរ។
ប្រតិបត្តិការដំបូងក្រោមក្របខ័ណ្ឌ FTC កំពុងដំណើរការរួចហើយ។ ឧទាហរណ៍ ក្រុមហ៊ុន Sing Investments & Finance Limited កំពុងផ្តល់ហិរញ្ញប្បទានដល់សហគ្រាសធុនតូច និងមធ្យមសិង្ហបុរី ដូចជា JR Group សម្រាប់ការទិញវត្ថុធាតុដើម និងទំនិញពីសហគ្រាសធុនតូច និង មធ្យមកម្ពុជា។
Liquid Group Pte Ltd កំពុងសម្របសម្រួលការត្រួតពិនិត្យការទូទាត់ជារូបិយប័ណ្ណបរទេសទាក់ទងនឹងពាណិជ្ជកម្មនេះ។
នៅកម្ពុជា ធនាគារស្ថាបនា ភីអិលស៊ី កំពុងប្រើប្រាស់ FTC ដើម្បីផ្តល់ហិរញ្ញប្បទានដល់សហគ្រាសធុនតូច និងមធ្យមកម្ពុជា រួមទាំងក្រុមហ៊ុន Comin Khmer Company Ltd ជាក្រុមហ៊ុននាំចូលសម្ភារសំណង់ពីសហគ្រាសធុនតូច និងមធ្យមសិង្ហបុរីនានា។
លោក តែ តាំងប៉ ប្រធានសហព័ន្ធសមាគមសហគ្រាសធុនតូច និងមធ្យមកម្ពុជា (Fasmec) មិនអាចទាក់ទងសុំការអត្ថាធិប្បាយបានទេ នៅថ្ងៃទី១៩ ខែមិថុនានេះ។
ដំណាក់កាលអនាគតនៃគំនិតផ្តួចផ្តើម FTC នឹងពង្រីកខ្លួនជាមួយស្ថាប័នហិរញ្ញវត្ថុ និងប្រតិបត្តិការជាច្រើនទៀត ដោយមានផែនការស្វែងរកហិរញ្ញវត្ថុបៃតង និងហិរញ្ញវត្ថុពាណិជ្ជកម្ម។
ការពង្រីកនេះមានគោលបំណងពង្រឹងបន្ថែមទៀតនូវសមត្ថភាពពាណិជ្ជកម្មរវាងប្រទេសទាំងពីរ។ គំនិតផ្តួចផ្តើម FTC គឺផ្អែកលើអនុស្សរណៈនៃការយោគយល់គ្នា (MoU) ដែលបានចុះហត្ថលេខារវាង MAS និង NBC ក្នុងខែកក្កដា ឆ្នាំ២០២៣។
លោក សុខ ចាន់ នាយកផ្នែកបរិយាបន្នហិរញ្ញវត្ថុ និងទំនាក់ទំនងសាធារណៈ និងជាអ្នកនាំពាក្យសមាគមធនាគារនៅកម្ពុជា បានឱ្យដឹងថា សមាគមគាំទ្រនូវគំនិតផ្តួចផ្តើមរបស់រាជរដ្ឋាភិបាលកម្ពុជា និងសិង្ហបុរី ក្នុងការជួយគាំទ្រដល់សហគ្រាសធុនតូច និងមធ្យមនៅកម្ពុជា ក្នុងដោះដូរពាណិជ្ជកម្មឆ្លងព្រំដែននៃប្រទេសទាំងពីរ។
លោក ចាន់បានប្រាប់ភ្នំពេញប៉ុស្ដិ៍ថា៖ «ថ្នាលច្រករបៀងតម្លាភាពហិរញ្ញវត្ថុនេះ ជួយឱ្យមានការតភ្ជាប់រវាង SMEs នៃប្រទេសទាំងពីរ តាមរយៈប្រព័ន្ធធនាគារ។ ក្នុងន័យនេះ គ្រឹះស្ថានហិរញ្ញវត្ថុចូលរួម នឹងចូលរួមសម្របសម្រួលដល់ការទូទាត់ ផ្តល់ឥណទានចេញលិខិតធានា (Letter of Credit) ពីធនាគារ ការប្រតិបត្តិការនានា ទាក់ទងនិងការដោះដូរទំនិញក្នុងផ្លេតហ្វមរបស់ SMEs»៕