![](https://pppkhmer.sgp1.digitaloceanspaces.com/image/main/20247/11_7_2024_electric_vehicle.jpg)
អ្នកបើកបររថយន្តអគ្គិសនីកំពុងបញ្ចូលកម្លាំងអគ្គិសនីនៅស្ថានីយក្នុងក្រសួងសាធារណៈការ និងដឹកជញ្ជូន។ រូបថត ក្រសួងសាធារណៈការ
កម្ពុជាដាក់ចេញគោលនយោបាយជាតិស្ដីពីការអភិវឌ្ឍវិស័យយានយន្តអគ្គិសនីឆ្នាំ ២០២៤-២០៣០ ដោយកំណត់គោលដៅប្រើប្រាស់យានយន្តអគ្គិសនីឲ្យបាន ៧៧ម៉ឺនគ្រឿងនៅឆ្នាំ២០៣០ ដើម្បីរួមចំណែកដល់ការកាត់បន្ថយផលប៉ះពាល់ទៅលើបរិស្ថាន និងចាប់យកឱកាសថ្មីក្នុងការជំរុញសន្ទុះនៃការធ្វើពិពិធកម្មមូលដ្ឋានសេដ្ឋកិច្ច។
បើតាមគោលនយោបាយជាតិដែលផ្សព្វផ្សាយនៅថ្ងៃនេះ នៅឆ្នាំ២០៣០ កម្ពុជាមានគោលដៅជំរុញការចុះបញ្ជីប្រើប្រាស់រថយន្តអគ្គិសនីឱ្យបាន ៣ម៉ឺនគ្រឿង ដែលក្នុងនោះ ២ម៉ឺន ៥ពាន់គ្រឿងជារថយន្តប្រភេទគ្រួសារឬទេសចរណ៍ និង ៥ពាន់គ្រឿងសម្រាប់សកម្មភាពអាជីវកម្ម។
ក្រៅពីនេះ ក៏មានការកំណត់ការប្រើប្រាស់ទោចក្រយានយន្ត (ម៉ូតូនិងកង់) ឲ្យបាន ៧២ម៉ឺនគ្រឿង និងត្រីចក្រយានយន្តអគ្គិសនីសុទ្ធចំនួន ២ម៉ឺនគ្រឿង។ សរុបយានយន្តទាំង៣ប្រភេទ គឺ៧៧ម៉ឺនគ្រឿង។
ឯកសារគោលនយោបាយបញ្ជាក់ថា៖ «ដោយសារការអភិវឌ្ឍវិស័យយានយន្តអគ្គិសនីនៅកម្ពុជាស្ថិតនៅក្នុងដំណាក់កាលដំបូង ការ កសាងប្រព័ន្ធអេកូឡូស៊ីនៃយានយន្តអគ្គិសនីប្រកបដោយប្រសិទ្ធភាព ការឆ្លើយតបនិងស័ក្តិសិទ្ធិភាព ទាមទារ ឱ្យមានការយកចិត្តទុកដាក់ខ្ពស់និងការចូលរួមយ៉ាងសកម្មពីក្រសួង ស្ថាប័នពាក់ព័ន្ធ រួមទាំងវិស័យឯកជន និងផ្តោតលើទិដ្ឋភាពទាំងការផ្គត់ផ្គង់ ការដំឡើង ការចែកចាយ ការប្រើប្រាស់យានយន្តអគ្គិសនី បច្ចេកវិទ្យា និងការកសាងហេដ្ឋារចនាសម្ព័ន្ធគាំទ្រពាក់ព័ន្ធ ជាពិសេសការសាងសង់ស្ថានីយបញ្ចូលថាមពល និងការ គ្រប់គ្រងសំណល់និងផលប៉ះពាល់ដល់បរិស្ថាន»។
ឯកសារដដែលបញ្ជាក់ថា៖ «តាមរយៈការដាក់ចេញគោលនយោបាយជាតិនេះ រាជរដ្ឋាភិបាលបានបង្ហាញពីការប្តេជ្ញាចិត្តនិងជំនឿយ៉ាងមុតមាំ ក្នុងការអភិវឌ្ឍប្រព័ន្ធអេកូឡូស៊ី វិស័យយានយន្តអគ្គិសនីនៅកម្ពុជា សំដៅប្រែក្លាយជាប្រទេសដែលលើកកម្ពស់ការប្រើប្រាស់យានយន្ត អគ្គិសនីនារយៈពេលមធ្យមនិងវែងខាងមុខ ដើម្បីជំរុញការអភិវឌ្ឍកម្ពុជាប្រកបដោយចីរភាព ដោយថ្លឹងថ្លែង ទាំងទិដ្ឋភាពសេដ្ឋកិច្ច សង្គម និងបរិស្ថាន»។
លោកនាយករដ្ឋមន្ត្រី ហ៊ុន ម៉ាណែត បានថ្លែងនៅក្នុងបុព្វកថានៃគោលនយោបាយជាតិនេះថា វិស័យយានយន្តអគ្គិសនីនៅកម្ពុជាគឺជាកិច្ចការបន្ទាន់និងចាំបាច់ ដើម្បីត្រៀមខ្លួនឈោងចាប់យកកាលានុវត្តភាពថ្មីៗក្នុងការចូលរួមជំរុញសន្ទុះនៃការធ្វើពិពិធកម្មមូលដ្ឋានសេដ្ឋកិច្ច ដើម្បីបង្កើតចន្ទល់ថ្មីៗនៃកំណើន និងការធ្វើបរិវត្តកម្មឆ្ពោះទៅរកឧស្សាហកម្មដែលមានតម្លៃបន្ថែមខ្ពស់ជាងមុនដូចជា ការកែច្នៃ ការផលិតគ្រឿងអេឡិចត្រូនិក ការផ្តុំនិងការដំឡើងយានយន្ត និងឧស្សាហកម្មដែលប្រើប្រាស់បច្ចេកវិទ្យាកាន់អឡិចត្រូនិកកាន់តែទំនើប។
លោកថា៖ «[ទាំងនេះ] បង្ហាញពីការប្តេជ្ញាចិត្តរបស់រាជរដ្ឋាភិបាលក្នុងការចូលរួមដោះស្រាយបញ្ហាការប្រែប្រួលអាកាសធាតុ ជាពិសេសការសម្រេចបាននូវអព្យាក្រឹតកាបូននៅឆ្នាំ២០៥០។
យោងតាមលោក ផន រឹម អ្នកនាំពាក្យក្រសួងសាធារណការ និងដឹកជញ្ជូន គិតត្រឹមដំណាច់ខែមិថុនា កម្ពុជាមានយានយន្តអគ្គិសនីដែលបានចុះបញ្ជីចំនួន ២.៩៦៨គ្រឿង ក្នុងនោះរថយន្តមានចំនួន ១.៦១៤គ្រឿង ត្រីចក្រយានយន្តចំនួន ៤៤០គ្រឿង និងទោចក្រយានយន្តចំនួន ៩១៤គ្រឿង។
សម្រាប់ការចុះបញ្ជីយានយន្តអគ្គិសនីនៅក្នុងរយៈពេល ៦ ខែដំបូងនៃឆ្នាំ២០២៤នេះ រថយន្តអគ្គិសនីបានកើនឡើងរហូតដល់ទៅ ៥០៨ភាគរយ ទោចក្រយានយន្តអគ្គិសនីកើនឡើង ៣៨០ភាគរយ ប៉ុន្តែចំនួនត្រីចក្រយានយន្តអគ្គិសនីថយចុះ ២៩ភាគរយ ធៀបទៅនឹង ៦ខែឆ្នាំមុន៕