![](https://pppkhmer.sgp1.digitaloceanspaces.com/image/main/20247/11_7_2024_a_cashew_nut_processing_factory_in_kampong_thom_province_in_november.jpg)
កម្មករពិនិត្យគ្រាប់ស្វាយចន្ទី ក្រោយកែច្នៃរួចនៅក្នុងរោងចក្រមួយ ក្នុងខេត្តកំពង់ធំ។ ហុង មិនា
ភ្នំពេញ៖ គ្រាប់ស្វាយចន្ទីឆៅរបស់កម្ពុជាត្រូវបាននាំចេញក្នុងបរិមាណដ៏ច្រើនបំផុតក្នុងឆមាសទី១ ឆ្នាំ២០២៤ ដែលមានតម្លៃជិត ១ ពាន់លានដុល្លារ ដែលបានលើសតម្លៃសរុបសម្រាប់ឆ្នាំ ២០២៣ រួចហើយ។
ការកើនឡើងនេះ មានចំនួនប្រហែលមួយភាគបីនៃតម្លៃនាំចេញកសិផលសរុបរបស់កម្ពុជា ដោយដាក់ចំណាត់ថ្នាក់គ្រាប់ស្វាយចន្ទីជាផលិតផលកសិកម្មខ្ពស់បំផុតរបស់ប្រទេស។
លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ការនាំចេញគ្រាប់ស្វាយចន្ទីភាគច្រើនជាទម្រង់ឆៅ។
លោកបានប្រាប់ភ្នំពេញប៉ុស្ដិ៍ថា៖ «គោលដៅនៃការកែច្នៃសម្រាប់នាំចេញគឺជាអាទិភាពសំខាន់របស់ក្រសួង ដើម្បីធានាថា យើងអាចបន្ថែមតម្លៃមុនពេលត្រូវបាននាំចេញ»។
លោកបន្ដថា ការងារនេះទាមទារការរៀបចំ ត្រៀមខ្លួន តាំងពីហេដ្ឋារចនាសម្ព័ន្ធកែច្នៃ ផ្លូវដឹក ក៏ដូចជាមធ្យោបាយផ្សេងៗ ដែលលោកសង្ឃឹមថា នៅពេលខាង កម្ពុជានឹងអាចជំរុញឱ្យកាន់តែទូលំទូលាយ ធ្វើយ៉ាងណាដើម្បីឱ្យរក្សាតម្លៃនៅក្នុងស្រុក។
លោក ហ្វីណង់ បាននិយាយថា ៩៤ភាគរយនៃកសិផលនាំចេញរបស់កម្ពុជា ឆ្ពោះទៅកាន់ទីផ្សារសំខាន់ៗ៣គឺ៖ វៀតណាម ដូចជា ស្រូវ គ្រាប់ស្វាយចន្ទី ដំឡូងមី ស្វាយស្រស់ នៅប្រទេសថៃ រួមមាន ដំឡូងមី ស្វាយស្រស់ ម្ទេស កន្ទក់ និងប្រទេសចិន ដែលមានចេក អង្ករ ដំឡូងមី ស្វាយ និងមៀន។
កសិផលកម្ពុជាកំពុងត្រូវប៉ាន់ និងមានកំណើននាំចេញគួរឱ្យកត់សម្គាល់ ក្រៅពីស្រូវ ស្វាយចន្ទី និងដំឡូងមី ស្វាយស្រស់ ដំណាប់ស្វាយ ទុរេន គ្រាប់ពោត មៀនស្រស់ ម្រេច និងម្ទេសស្រស់។
អ្នកនាំពាក្យក្រសួងកសិកម្មបានបន្ថែមថា គិតត្រឹម៦ខែដំបូងនៃឆ្នាំ២០២៤ បរិមាណនាំចេញកសិផលពីកម្ពុជាកើនឡើង ៥៧ភាគរយ ធៀបនឹងរយៈពេលដូចគ្នាក្នុងឆ្នាំ២០២៣ ដែលភាគច្រើនដោយសារកំណើននៃការនាំចេញដំឡូងមី គ្រាប់ស្វាយចន្ទី និងស្រូវ។
ទោះបីស្ថិតក្នុងចំណោមប្រទេសផលិតគ្រាប់ស្វាយចន្ទីលំដាប់កំពូលទាំង១០ នៅលើពិភពលោកក៏ដោយ ក៏ប្រទេសកម្ពុជាបច្ចុប្បន្នកែច្នៃគ្រាប់ស្វាយចន្ទីតែ១០ភាគរយប៉ុណ្ណោះ។ នេះបើយោងតាមទីភ្នាក់ងារ USAID ។
នៅសល់ ៩០ភាគរយត្រូវបាននាំចេញឆៅ ជាចម្បងទៅប្រទេសវៀតណាម ដែលគ្រាប់ត្រូវបានកែច្នៃ និងលក់ក្នុងតម្លៃខ្ពស់ក្នុងទីផ្សារនាំចេញ។
![](https://pppkhmer.sgp1.cdn.digitaloceanspaces.com/image/main/20247/11_7_2024_18_3_2024_agricultural_officials_experts_out_of_frame_inspected.jpg)
ដំណាំផ្លែចន្ទីនៅក្នុងខេត្តកំពង់ចាម កាលពីឆ្នាំមុន។ រូបថត ក្រសួងកសិកម្ម
យោងតាមសមាគមគ្រាប់ស្វាយចន្ទីកម្ពុជា នៅឆ្នាំ២០២៣ កម្ពុជារកចំណូលបានប្រមាណ ៨៣៧ លានដុល្លារពីការនាំចេញគ្រាប់ស្វាយចន្ទី ៦៥៦០០០ តោន។
ក្នុងឆ្នាំ២០២២ កម្ពុជាបាននាំចេញគ្រាប់ស្វាយចន្ទីឆៅប្រមាណ ៦៧ម៉ឺនតោន ដែលមានតម្លៃ ១,០៧៧ ពាន់លានដុល្លារ ដោយទីផ្សារសំខាន់ៗមានប្រទេសវៀតណាម ជប៉ុន និងចិន។
នេះបានកត់សម្គាល់ការថយចុះពីបរិមាណ ១,១ លានតោនកាលពីឆ្នាំ២០២១ ដោយសារតែលក្ខខណ្ឌអាកាសធាតុខ្លាំងប៉ះពាល់ដល់ផលិតកម្ម។
រាជរដ្ឋាភិបាលកម្ពុជាចាប់អារម្មណ៍លើការបង្កើនសមត្ថភាពកែច្នៃក្នុងស្រុកដើម្បីបង្កើនតម្លៃបន្ថែមដល់ការនាំចេញរបស់ពួកគេ។
គោលនយោបាយជាតិស្តីពីគ្រាប់ស្វាយចន្ទីសម្រាប់ឆ្នាំ ២០២២-២០២៧ ដែលដាក់ចេញដោយក្រសួងពាណិជ្ជកម្ម មានគោលបំណងដំណើរការកែច្នៃយ៉ាងតិច ២៥ភាគរយ នៃទិន្នផលគ្រាប់ស្វាយចន្ទីរបស់ប្រទេសនៅត្រឹមឆ្នាំ២០២៧។
ការវិនិយោគសំខាន់ៗកំពុងត្រូវបានធ្វើឡើងដើម្បីគាំទ្រដល់ការផ្លាស់ប្តូរនេះ រួមទាំងកិច្ចសហប្រតិបត្តិការជាមួយក្រុមហ៊ុនជប៉ុនដូចជា Mirarth Holdings Inc និង Top Planning Japan Co Ltd ដើម្បីបង្កើនសមត្ថភាពកែច្នៃនៅក្នុងខេត្តកំពង់ធំ។
ទោះបីជាមានបញ្ហាប្រឈម ដូចជាការប្រកួតប្រជែងពីផលិតផលវៀតណាម និងការប្រែប្រួលអាកាសធាតុក៏ដោយ ក៏ឧស្សាហកម្មគ្រាប់ស្វាយចន្ទីរបស់កម្ពុជាខិតខំប្រឹងប្រែងបន្តដើម្បីបង្កើនគុណភាព និងប្រសិទ្ធភាពក្នុងការកែច្នៃ និងការនាំចេញ៕