![](https://pppkhmer.sgp1.digitaloceanspaces.com/image/main/20247/15_7_2024_byd_cambodia.jpg)
រថយន្តអគ្គិសនីរបស់ចិន BYD ដាក់តាំងបង្ហាញនៅក្នុង Showroom នៅរាជធានីភ្នំពេញ។ BYD Cambodia
ក្រុមហ៊ុនផលិតរថយន្តអគ្គិសនីរបស់ចិន BYD ដែលជាគូប្រជែងដ៏ចម្បងរបស់ក្រុមហ៊ុន Tesla របស់សហរដ្ឋអាមេរិក គ្រោងនឹងបើករោងចក្រដំឡើងរថយន្តអគ្គិសនីនៅកម្ពុជានាពេលខាងមុខនេះ ដែលមានសមត្ថភាពដំឡើងបាន ២ម៉ឺនគ្រឿងក្នុងមួយឆ្នាំសម្រាប់នាំចេញ និងផ្គត់ផ្គង់ទីផ្សារក្នុងស្រុក។
គម្រោងនេះត្រូវបានបង្ហាញនៅក្នុងជំនួបរវាងលោកនាយករដ្ឋមន្ត្រី ហ៊ុន ម៉ាណែត និងលោក Liu Xueliang អគ្គនាយកក្រុមហ៊ុន BYD Asia Pacific Auto Sales Division នៅវិមានសន្តិភាព នៅថ្ងៃទី១៥ ខែកក្កដានេះ។ នេះបើតាមព័ត៌មាននៅលើបណ្ដាញសង្គមរបស់លោកនាយករដ្ឋមន្ត្រី។
ទំព័រហ្វេសប៊ុកលោក ហ៊ុន ម៉ាណែត សរសេរថា៖ «ក្រុមហ៊ុន BYD Asia Pacific Auto Sales Division មានគម្រោងសាងសង់រោងចក្រដំឡើងយានយន្តអគ្គិសនីនៅកម្ពុជា ដែលអាចមានសមត្ថភាពដំឡើងរថយន្តចំនួន ២០ ០០០គ្រឿងក្នុងមួយឆ្នាំ សម្រាប់ផ្គត់ផ្គង់ទីផ្សារក្នុងស្រុក និងនាំចេញទីផ្សារអន្តរជាតិ»។
មិនមានព័ត៌មានលម្អិតថាតើ ក្រុមហ៊ុននេះនឹងចាប់ផ្ដើមសាងសង់រោងចក្រដំឡើងរថយន្តរបស់ខ្លួននៅពេលណាទេ ប៉ុន្តែ បើតាមការលើកឡើងរបស់លោក ហ៊ុន ម៉ាណែត កាលពីចុងខែមិថុនាកន្លងទៅ ក្រុមហ៊ុននេះនឹងចាប់ផ្ដើមដំណើរការរោងចក្ររបស់ខ្លួនក្នុងពេលអនាគតដ៏ខ្លីខាងមុខ។
ក្រុមហ៊ុន BYD កំពុងមានឥទ្ធិពលនៅលើទីផ្សាររថយន្តអគ្គិសនីនៅលើពិភពលោក ដោយបានយកឈ្នះក្រុមហ៊ុនដ៏ល្បីរបស់សហរដ្ឋអាមេរិកគឺ Tesla ទៅលើតួលេខនៃការលក់រថយន្តនៅក្នុងត្រីមាសចុងក្រោយនៃឆ្នាំ ២០២៣ ដោយក្រុមហ៊ុននេះលក់រថយន្តអគ្គិសនីសុទ្ធបានចំនួន ៥២៦ ០០០ គ្រឿង ធៀបទៅនឹងក្រុមហ៊ុន Tesla ដែលលក់បានតែ ៤៨៤ ៥០០ នៅក្នុងរយៈពេលដូចគ្នា។ ប៉ុន្តែ បើគិតជាចំនួនលក់សរុបប្រចាំឆ្នាំ២០២៣ ក្រុមហ៊ុន Tesla នៅតែនាំមុខ BYD ដដែល។
លោក ហុង វណ្ណៈ អ្នកស្រាវជ្រាវផ្នែកសេដ្ឋកិច្ចនៅរាជបណ្ឌិត្យសភាកម្ពុជាបានថ្លែងថា ការដែលក្រុមហ៊ុន BYD ដែលកំពុងងើបឡើងនៅលើទីផ្សាររថយន្តអគ្គិសនីនៅលើពិភពលោក គ្រោងបោះទុនបង្កើតរោងចក្រដំឡើងរថយន្តនៅកម្ពុជា មិនមែនកើតឡើងដោយចៃដន្យនោះទេ គឺច្បាស់ជាក្រុមហ៊ុននេះបានសិក្សាមុនថា នឹងអាចនាំចេញរថយន្តទៅប្រទេសជិតខាងនៃកម្ពុជា។ ការបង្កើតរោងចក្រនេះក៏ស្របទៅនឹងគោលនយោបាយរបស់រដ្ឋាភិបាលផងដែរ ដែលចង់ឃើញក្រុមហ៊ុនធំៗផលិតនិងនាំចេញរថយន្តពីកម្ពុជា។
លោកថា៖ «ប្រសិនបើការបង្កើតរោងចក្រដំឡើងរថយន្តនេះក្លាយជាការពិតមែន នោះវានឹងរួមចំណែកដល់មុខមាត់របស់ប្រទេសកម្ពុជាមួយកម្រិត និងផ្ដល់ផលប្រយោជន៍ផ្នែកសេដ្ឋកិច្ចដូចជា ការសាងសង់រោងចក្រដំឡើង ចំណូលបានពីពន្ធ និងការបង្កើតការងារជូនដល់ប្រជាពលរដ្ឋកម្ពុជា»។
ពាក់ព័ន្ធនឹងឱកាសការងារ និងជំនាញក្នុងចំណោមពលរដ្ឋកម្ពុជា លោក ហុង វណ្ណៈ យល់ថា កម្ពុជាមានធនធានមនុស្សដែលមានជំនាញជាច្រើនក្នុងរយៈពេលប៉ុន្មានឆ្នាំចុងក្រោយនេះ។ ទោះបីជារោងចក្រដំឡើងរថយន្តទាមទារជំនាញបច្ចេកទេសខ្ពស់ក៏ដោយ លោកថា កម្ពុជាក៏មានធនធានមនុស្សសម្រាប់ជំនាញនោះ បន្ថែមទៅលើការងារដែលមិនត្រូវការជំនាញ។
លោកនិយាយថា៖ «យ៉ាងហោចណាស់កម្ពុជានឹងទទួលបានការងារក្នុងកម្រិតបច្ចេកទេសមធ្យម កម្រិតទាប និងការងារដែលមិនចាំបាច់មានជំនាញក្នុងរោចក្រសហគ្រាស។ ដូច្នេះរោងចក្រនេះចូលរួមបង្កើតការងារដល់ពលរដ្ឋកម្ពុជា»។
លោកបន្តថា ផលប្រយោជន៍មួយទៀតថា គឺការផលិតឬដំឡើងរថយន្តនៅក្នុងប្រទេសកម្ពុជា អាចធ្វើការតម្លៃលក់នៅក្នុងទីផ្សារក្នុងស្រុកធូរថ្លៃជាងតម្លៃរថយន្តដែលនាំចូល។
គិតត្រឹម ៦ ខែឆ្នាំ២០២៤នេះ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគទុន ១៩០ គម្រោង មានទុនវិនិយោគសរុបប្រមាណ ៣,២ ពាន់លានដុល្លារ ដែលមានកំណើន ៧៧ ភាគរយធៀបនឹងរយៈពេលដូចគ្នាកាលពីឆ្នាំមុន បានកើនឡើង ជាពិសេសក្នុងវិស័យឧស្សាហកម្មនិងសហគ្រាស បង្កើតការងារថ្មីបានជាង ១៦,៨ម៉ឺនកន្លែង។
លោក កត្តា អ៊ន អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈបានថ្លែងថា ការបើករោងចក្រដំឡើងរថយន្តអគ្គិសនីរបស់ក្រុម BYD នឹងបន្ថែមឱកាសការងារសម្រាប់យុវជនកម្ពុជា។
លោកនិយាយថា៖ «ការផលិតរថយន្តប្រើប្រាស់ថាមពលអគ្គិសនីនេះ ក៏ជាការចូលរួមចំណែកការអភិវឌ្ឍឧស្សាហកម្មនៅកម្ពុជាផង និងផ្ដល់ឱកាសដល់យុវជនកម្ពុជាជាច្រើនដែលអាចចូលធ្វើការនៅក្រុមហ៊ុននេះ ជាពិសេសយុវជនដែលកំពុងរៀនវិជ្ជាជីវៈបច្ចេកទេសដែលជាកម្មវិធីរបស់រាជរដ្ឋាភិបាលក្នុងការផ្ដល់ឲ្យយុវជនមានជំនាញមួយច្បាស់លាស់មួយក្នុងជីវិតពិតជាមានឱកាសចូលធ្វើការនៅតាមរោងចក្រសហគ្រាសនៅកម្ពុជា ជាពិសេសរោងចក្រផលិតរថយន្តប្រើប្រាស់ថាមពលអគ្គិសនី»។
កាលពីសប្ដាហ៍មុន រាជរដ្ឋាភិបាលបានបានដាក់ចេញគោលនយោបាយជាតិស្តីពីការអភិវឌ្ឍវិស័យយានយន្តអគ្គិសនី២០២៤-២០៣០ ដោយកំណត់គោលដៅឲ្យមានការប្រើប្រាស់យានយន្តអគ្គិសនីចំនួន ៧៧ម៉ឺគ្រឿង ក្នុងនោះរថយន្តអគ្គិសនីរំពឹងថានឹងមាន៣ម៉ឺនគ្រឿង។
បច្ចុប្បន្ននេះ កម្ពុជាមានរថយន្តអគ្គិសនីចំនួន ១ ៦១៤ គ្រឿងគិតត្រឹមខែមិថុនា ឆ្នាំ២០២៤នេះ។ ប៉ុន្តែ ចំនួននៃការចុះបញ្ជីរថយន្តអគ្គិសនីកើនឡើង ៥០៨ ភាគរយនៅក្នុងរយៈពេល ៦ ខែនៃឆ្នាំនេះធ្ៀបទៅនឹងរយៈពេលដូចគ្នាកាលពីឆ្នាំមុន៕