ការហោះហើរត្រង់ជាផ្លូវការរបស់ ក្រុមហ៊ុនអាកាសចរណ៍ វៀតណាម អ៊ែរឡាញ រវាងទីក្រុងហាណូយ និងរាជធានីភ្នំពេញ ត្រូវបានបើកសម្ពោធក្រោមអធិបតីភាពដ៏ខ្ពង់ខ្ពស់ឯកឧត្តម តូ ឡឹម ប្រធានរដ្ឋនៃសាធារណរដ្ឋសង្គមនិយមវៀមណាម។ សហការ
ភ្នំពេញ ថ្ងៃទី១៣ ខែកក្កដា ឆ្នាំ២០២៤ -- ស្របពេលនឹងដំណើរទស្សនកិច្ចរបស់ឯកឧត្តម តូ ឡឹម ប្រធានរដ្ឋនៃសាធារណរដ្ឋសង្គមនិយមវៀតណាម មកកាន់ព្រះរាជាណាចក្រកម្ពុជា ក្រុមហ៊ុនអាកាសចរណ៍ វៀតណាម អ៊ែរឡាញ បានប្រកាសបើកជាផ្លូវការជើងហោះហើរត្រង់រវាងទីក្រុងហាណូយ និងរាជធានីភ្នំពេញ។
ក្រុមហ៊ុនអាកាសចរណ៍ បានចុះហត្ថលេខាលើកិច្ចព្រមព្រៀងសហប្រតិបត្តិការជាមួយដៃគូសំខាន់ៗក្នុងប្រទេសកម្ពុជា ដើម្បីជំរុញការអភិវឌ្ឍវិស័យអាកាសចរណ៍ និងទេសចរណ៍រវាងប្រទេសទាំងពីរ។
ឯកឧត្ដម សុខ សូកេន រដ្ឋមន្ត្រីក្រសួងទេសចរណ៍មានប្រសាសន៍ក្នុងពេលបើកសម្ពោធជើងហោះហើរនោះថា៖ «តាងនាមឱ្យក្រសួងទេសចរណ៍នៃព្រះរាជាណាចក្រកម្ពុជា និងក្នុងនាមខ្លួនខ្ញុំផ្ទាល់ ខ្ញុំពិតជាមានសេចក្តីសោមនស្សរីករាយដែលបានចូលរួមក្នុងពិធីបើកជើងហោះហើរហាណូយ-ភ្នំពេញ របស់ក្រុមហ៊ុនអាកាសចរណ៍វៀតណាម និងការចុះហត្ថលេខាលើអនុស្សរណៈនៃការយោគយល់សម្រាប់កម្មវិធីផ្សព្វផ្សាយទេសចរណ៍ កម្ពុជា-វៀតណាម «ប្រទេសពីរ គោលដៅមួយ» ដ៏មានអត្ថន័យយ៉ាងជ្រាលជ្រៅនាពេលនេះ»។
ឯកឧត្ដមបានអបអរសាទរចំពោះការបើកឱ្យមានជើងហោះហើរតភ្ជាប់រវាងទីក្រុងទាំងពីរ និងការចុះអនុស្សរណៈរវាងក្រុមហ៊ុនអាកាសចរណ៍កម្ពុជា អង្គរ អ៊ែរ និងក្រុមហ៊ុន Vietnam Airline JSC សមាគមទេសចរណ៍កម្ពុជា (CATA) និងក្រុមហ៊ុនទេសចរណ៍ Saigontourist Group។ ជើងហោះហើរថ្មីនេះនឹងចាប់ផ្ដើមបើកដំណើរការនៅថ្ងៃទី ២៧ ខែតុលា ឆ្នាំ២០២៤ ដែលមានការហោះហើរចំនួន ៤ជើងក្នុងមួយសប្ដាហ៍រៀងរាល់ថ្ងៃចន្ទ ពុធ សុក្រ និងថ្ងៃអាទិត្យ ដោយប្រើប្រាស់យន្តហោះ Airbus A321។
នាបច្ចុប្បន្ននេះ អ្នកដំណើរពីទីក្រុងហាណូយ ទៅរាជធានីភ្នំពេញត្រូវផ្លាស់ប្តូរជើងយន្តហោះនៅទីក្រុងវៀងចន្ទន៍ ប្រទេសឡាវ តាមរយៈសេវាកម្មអាកាសចរណ៍ឥណ្ឌូចិន។
ជើងហោះហើរថ្មីនេះ នឹងនាំឱ្យចំនួនការហោះហើរសរុបរបស់ក្រុមហ៊ុនអាកាសចរណ៍ វៀតណាម អ៊ែរឡាញ រវាងប្រទេសវៀតណាម និងប្រទេសកម្ពុជា កើនឡើងចំនួនប្រាំជើងនៅចុងខែតុលានេះ គិតរួមទាំងការហោះហើរត្រង់ចំនួនបួនគឺ ហាណូយ-ហូជីមិញ-ភ្នំពេញ និង ហាណូយ-ហូជីមិញ-សៀមរាប ព្រមទាំងជើងហោះហើរមួយទៀតជាមួយឥណ្ឌូចិន។ ចំនួនការហោះហើរសរុបរវាងប្រទេសទាំងពីរនឹងឡើងដល់ ៨៦ ដង ក្នុងមួយសប្តាហ៍។
លោក ដាង ង៉ុកហៅ ប្រធានក្រុមប្រឹក្សាភិបាលនៃក្រុមហ៊ុនអាកាសចរណ៍វៀតណាម ថ្លែងសន្ទរកថានៅថ្ងៃបើកសម្ពោធការហោះហើរត្រង់រវាងក្រុងហាណូយ និងរាជធានីភ្នំពេញ។ សហការី
ការហោះហើរវៀតណាម-កម្ពុជាបានស្ថិតក្នុងចំណោមជើងហោះហើរដំបូងដែលបានដំណើរការដោយក្រុមហ៊ុន អាកាសចរណ៍ វៀតណាម អ៊ែរឡាញ កាលពី ៣១ ឆ្នាំមុន។ ការពង្រីកជើងហោះហើរទៅកាន់កម្ពុជាតែងតែជាយុទ្ធសាស្ត្រចម្បងសម្រាប់ក្រុមហ៊ុនអាកាសចរណ៍ដែលឆ្លុះបញ្ចាំងពីទំនាក់ទំនងយ៉ាងជិតស្និទ្ធរវាងប្រទេសជិតខាងទាំងពីរ។
ការពង្រីកបណ្តាញហោះហើរកាន់តែទូលំទូលាយរបស់ក្រុមហ៊ុនអាកាសចរណ៍វៀតណាម អ៊ែរឡាញ ក្នុងតំបន់ឥណ្ឌូចិននេះ បានផ្តល់នូវអត្ថប្រយោជន៍ផ្នែកប្រតិបត្តិការយ៉ាងសំខាន់។
ជើងហោះហើរថ្មីនេះ ត្រូវបានរំពឹងទុកថានឹងអាចទាក់ទាញភ្ញៀវទេសចរ ដែលមានបំណងធ្វើដំណើរទៅកាន់ប្រទេសវៀតណាម និងប្រទេសផ្សេងៗទៀតនៅក្នុងតំបន់ រួមមានប្រទេសជប៉ុន កូរ៉េ និងបណ្តាប្រទេសប៉ែកអឺរ៉ុប ដោយសាតែមានជើងហោះហើរច្រើន និងពេលវេលាផ្លាស់ប្តូរជើងយន្តហោះកាន់តែងាយស្រួល។
លោក ដាង ង៉ុកហៅ ប្រធានក្រុមប្រឹក្សាភិបាលនៃក្រុមហ៊ុនអាកាសចរណ៍វៀតណាមបានមានប្រសាសន៍ថា៖ «ជើងហោះហើរត្រង់ថ្មីនេះបានត្រៀមខ្លួនរួចជាស្រេចដើម្បីផ្តល់នូវទំនាក់ទំនងតភ្ជាប់កាន់តែប្រសើរឡើងរវាងប្រទេសវៀតណាម និងកម្ពុជា។ ក្នុងនាមជាក្រុមហ៊ុនអាកាសចរណ៍ ក្រុមហ៊ុន វៀតណាមអ៊ែរឡាញ បានប្តេជ្ញាចិត្តក្នុងការផ្តល់នូវប្រតិបត្តិការប្រកបដោយ សុវត្ថិភាព និងប្រសិទ្ធភាពនៃសេវាកម្មក្នុងប្រទេសកម្ពុជា»។
ការចុះហត្ថលេខាលើអនុស្សរណៈនៃការយោគយល់រវាងអាកាសចរណ៍ វៀតណាម អ៊ែរឡាញ និងក្រុមហ៊ុនអាកាសចរណ៍កម្ពុជាអង្គរ អ៊ែរ។ សហការី
លោក ង៉ុកហៅ បានថ្លែងថា៖ «យើងនឹងបន្តពង្រីកបណ្តាញរបស់យើង បង្កើនកិច្ចសហប្រតិបត្តិការ ធ្វើឱ្យការប្រកួតប្រជែងកាន់តែប្រសើរឡើង និងផ្តល់នូវសេវាកម្មដែលមានគុណភាពដែលជាទីពេញចិត្តដល់អ្នកដំណើរ។ គោលដៅរបស់យើងគឺជួយគាំទ្រដល់ការអភិវឌ្ឍសេដ្ឋកិច្ច សង្គម និងវប្បធម៌ ព្រមទាំងជំរុញទំនាក់ទំនងសហប្រតិបត្តិការរវាងប្រទេសទាំងពីរ»។
អស់រយៈពេលជាង ៣ ទសវត្សកន្លងមកនេះ ក្រុមហ៊ុនអាកាសចរណ៍ វៀតណាម អ៊ែរឡាញ ទទួលបានអ្នកដំណើរជិត ៨,២ លាននាក់ និងដឹកជញ្ជូនទំនិញចំនួន ២៨ ៤០០ តោននៅលើជើងហោះហើរជាង ៨១០០០ រវាងប្រទេសវៀតណាម និងកម្ពុជា។
កម្ពុជាបានក្លាយជាប្រទេសដែលតំណាងឱ្យទីផ្សារដ៍សំខាន់មួយសម្រាប់វិស័យអាកាសចរណ៍ និងទេសចរណ៍។
ក្នុងរយៈពេល ៣០ ឆ្នាំកន្លងមកនេះ ទីផ្សារអាកាសចរណ៍រវាងប្រទេសទាំងពីរ បានទទួលនូវកំណើននៃអ្នកដំណើរតាមផ្លូវអាកាសកើនឡើងដ៏គួរឱ្យកត់សម្គាល់ គឺ ២៤ភាគរយ ជារៀងរាល់ឆ្នាំ ដោយមានអ្នកដំណើរប្រហែល ៤៥ម៉ឺននាក់។ នៅក្នុងឆ្នាំ២០២៣ ប្រទេសវៀតណាមបានក្លាយជាប្រភពអ្នកទេសចរធំទី២មកកាន់ប្រទេសកម្ពុជា ដែលមានភ្ញៀវទេសចរ ជាង១លាននាក់ ខណៈអ្នកទេសចរកម្ពុជាទៅកាន់វៀតណាមមានចំនួនជាង៤០ម៉ឺននាក់ និងជាប់ចំណាត់ថ្នាក់ទី៨ក្នុងចំណោមទីផ្សារអន្តរជាតិ៕
ការចុះហត្ថលេខាលើអនុស្សរណៈនៃការយោគយល់សម្រាប់កម្មវិធីផ្សព្វផ្សាយទេសចរណ៍ កម្ពុជា-វៀតណាម «ប្រទេសពីរ គោលដៅមួយ»។ សហការី
