![](https://pppkhmer.sgp1.digitaloceanspaces.com/image/main/20247/16_7_2024_hong_kong_chief.jpg)
លោក ចន លី (John Lee) នាយកប្រតិបត្តិទីក្រុងហុងកុង នឹងមកបំពេញទស្សនកិច្ចនៅប្រទេសកម្ពុជានាចុងខែកក្កដានេះ។ រូបថត Xinhua
នាយកប្រតិបត្តិទីក្រុងហុងកុង លោក ចន លី (John Lee) នឹងមកបំពេញទស្សនកិច្ចនៅកម្ពុជានាចុងខែកក្កដានេះដើម្បីពង្រីកឱកាសធុរកិច្ចរវាងកម្ពុជានិងទីក្រុងហុងកុង ស្របពេលដែលទំហំពាណិជ្ជកម្មរវាងហុងកុងនិងកម្ពុជាកំពុងកើនឡើងស្រាប់។
លោក ចន លី គឺជានាយកប្រតិបត្តិថ្មីរបស់ហុងកុងដែលជាប់បានឆ្នោតឡើងជំនួសលោកស្រី ខារី ឡាំ កាលពីឆ្នាំមុន។ លោកគ្រោងនឹងបំពេញទស្សនកិច្ចនៅកម្ពុជាដោយជួបជាមួយភាគីពាក់ព័ន្ធសំខាន់ៗក្នុងវិស័យធុរកិច្ច ដូចជាលោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១នៃក្រុមប្រឹក្សាអភិវឌ្ឍន៍កម្ពុជា និងលោក គិត ម៉េង ប្រធានសភាពាណិជ្ជកម្មកម្ពុជានៅថ្ងៃទី៣១ ខែកក្កដានេះ។
យោងតាមប្រព័ន្ធផ្សព្វផ្សាយហុងកុង RTHK ដែលផ្សាយនៅថ្ងៃអង្គានេះ លោក ចន លី នឹងដឹកនាំប្រតិភូមកពីវិស័យជំនួញ ពាណិជ្ជកម្ម ច្បាប់ ភស្តុភា និងនវានុវត្តន៍ មកកម្ពុជា និងទៅកាន់ប្រទេសឡាវ និងវៀតណាមផងដែរ។
RTHK បានស្រង់សម្ដីលោក លី ដែលថ្លែងថា៖ «ខ្ញុំនឹងបញ្ជាក់អំពីសារៈសំខាន់នៃកិច្ចសហប្រតិបត្តិការរបស់យើងជាមួយប្រទេសទាំងនេះ។ ខ្ញុំនឹងនិយាយអំពីវិស័យធុរកិច្ចនិងកិច្ចការក្នុងរង្វង់នយោបាយដែលទីក្រុងហុងកុងនឹងមានសម្រាប់ប្រទេសទាំងនេះ ក៏ដូចជាកាលានុវត្តភាពក្នុងវិស័យនានា»។
លោកថា លោកនឹងព្យាយាមសុំការគាំទ្រពីប្រទេសកម្ពុជា វៀតណាមនិងឡាវ ដើម្បីឲ្យហុងកុងអាចចូលរួមជាសមាជិកកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ដែលនឹងធ្វើឲ្យហុងកុងក្លាយជាឈ្នាប់ដ៏សំខាន់ និង ជាទីក្រុងដែលបន្ថែមតម្លៃដ៏សំខាន់។ កិច្ចព្រមព្រៀង RCEPបានចូលជាធរមានកាលពីដើមឆ្នាំ២០២២។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ភ្នំពេញប៉ុស្តិ៍នៅថ្ងៃនេះថា ជំនួបរវាងសភាពាណិជ្ជកម្មកម្ពុជាជាមួយប្រតិភូមកពីហុងកុង នឹងធ្វើឡើងក្រោមប្រធានបទ«ការតភ្ជាប់បែបទំនើបដើម្បីឆ្ពោះទៅរកភាពជោគជ័យ៖ ភាពជាដៃគូរវាងហុងកុង-កម្ពុជា ក្នុងការជំរុញវិបុលភាពទៅវិញទៅមក និងការអភិវឌ្ឍសេដ្ឋកិច្ច»។
លោកថា សភាពាណិជ្ជកម្មកម្ពុជានិងពាណិជ្ជករហុងកុងមានទំនាក់ទំនងជាមួយគ្នាយូរឆ្នាំដែរហើយ។ បច្ចុប្បន្ននេះ ទំនាក់ទំនងរវាងហុងកុងនិងកម្ពុជាមានភាពល្អប្រសើរទាំងផ្នែកពាណិជ្ជកម្ម និងនយោបាយ ហើយហុងកុងជាផ្នែកមួយនៃប្រទេសចិន និងជាច្រកសេដ្ឋកិច្ចដ៏សំខាន់សម្រាប់កម្ពុជា។
លោកថ្លែងថា៖ «កន្លងមកការជួញដូរវាងហុងកុងនិងកម្ពុជា យើងឃើញថាមានភាពល្អប្រសើរ ហើយចំនួនអ្នកវិនិយោគពីហុងកុងមកកម្ពុជាក៏ច្រើនគួរសមដែរ ដែលធ្វើឲ្យទំនាក់ទំនងកាន់តែល្អប្រសើរ»។
គិតត្រឹម៦ខែដើមឆ្នាំ២០២៤នេះ ទំហំពាណិជ្ជកម្មរវាងកម្ពុជានិងទីក្រុងហុងកុងមានទំហំជាង ៣០០លានដុល្លារ មានកំណើន ៥៤,៣ភាគរយធៀបទៅនឹងទំហំពាណិជ្ជកម្មក្នុងរយៈពេលដូចគ្នាកាលពីឆ្នាំមុនដែលមានជាង ១៩៤លានដុល្លារ។ នេះបើតាមអគ្គនាយកដ្ឋានគយនិងរដ្ឋាករកម្ពុជា៕