លោក Yamaguchi Natsuo សមាជិកព្រឹទ្ធសភាជប៉ុន (ឆ្វេង) និងលោក ហ៊ុន សែន ប្រធានព្រឹទ្ធសភាកម្ពុជា ចាប់ដៃគ្នាក្នុងជំនួបថ្ងៃទី១៦ កក្កដា នៅរាជធានីភ្នំពេញ។ ហ្វេសប៊ុកលោក ហ៊ុន សែន
ភ្នំពេញៈ លោក ហ៊ុន សែន ប្រធានព្រឹទ្ធសភា ចង់ឱ្យក្រុមហ៊ុនជប៉ុនបង្កើនការវិនិយោគបន្ថែមទៀតនៅកម្ពុជាដើម្បីជំរុញកំណើនសេដ្ឋកិច្ច ដោយលោកកត់សម្គាល់ថា វិនិយោគរបស់ក្រុមហ៊ុនជប៉ុននៅកម្ពុជានៅមានកម្រិតនៅឡើយ។
សេចក្តីប្រកាសព័ត៌មានបង្ហោះក្នុងបណ្ដាញសង្គមលោក ហ៊ុន សែន នាថ្ងៃទី១៦ កក្កដា បញ្ជាក់ថា៖ «ទោះបីជាមានការផ្តល់ជំនួយ[ជប៉ុន]ច្រើនពិតមែនប៉ុន្តែសម្តេចតេជោ [លោក ហ៊ុន សែន] សង្កេតឃើញថា ការវិនិយោគរបស់ក្រុមហ៊ុនជប៉ុននៅកម្ពុជាគឺនៅមានកម្រិតនៅឡើយ។ សម្ដេចចង់ឱ្យក្រុមហ៊ុនជប៉ុនបង្កើនការវិនិយោគបន្ថែមទៀតនៅកម្ពុជាដើម្បីជំរុញ កំណើនសេដ្ឋកិច្ចកម្ពុជា»។
លោក ហ៊ុន សែន ថ្លែងដូច្នេះក្នុងជំនួបជាមួយលោក Yamaguchi Natsuo សមាជិកព្រឹទ្ធសភាជប៉ុន និងជាប្រធានគណបក្ស Komeito នាថ្ងៃទី១៦ កក្កដា នៅវិមានព្រឹទ្ធសភា រាជធានីភ្នំពេញ។
លោកថ្លែងថា រាជរដ្ឋាភិបាលកម្ពុជាកំពុងរៀបចំបរិយាកាសវិនិយោគឱ្យកាន់តែប្រសើរឡើង ហើយថាជប៉ុនបានជួយកម្ពុជាក្នុងវិស័យហេដ្ឋារចនាសម្ព័ន្ធទាំងផ្លូវគោក និងផ្លូវទឹក ដែលបច្ចុប្បន្នកំពង់ផែស្វយ័តកម្ពុជាកំពុងឈានទៅដល់ការពង្រីកសមត្ថភាពសម្រាប់ការចូលចតនាវាខ្នាតធំ។
សេចក្ដីប្រកាសព័ត៌មានបានឱ្យដឹងថា៖ «ចំពោះការជំរុញវិនិយោគជប៉ុនមកកម្ពុជា ឯកឧត្ដម Yamaguchi នឹងពាំនាំខ្លឹមសារនេះទៅដល់រដ្ឋាភិបាលជប៉ុន និងជាពិសេស ទៅរដ្ឋមន្ត្រីសាធារណការជប៉ុន ដែលជាសមាជិកគណបក្ស Komeito ដើម្បីកសាងហេដ្ឋារចនាសម្ព័ន្ធតភ្ជាប់នៅកម្ពុជា ឱ្យបានច្រើន និងសម្បូរបែបថែមទៀត ដែលជាកត្តាសំខាន់សម្រាប់អ្នកវិនិយោគ»។
ប្រភពដដែលបន្តថា លោក Yamaguchi បានបង្ហាញមោទនភាពដែលជប៉ុន និងកម្ពុជាឈានទៅដល់ការបង្កើតទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយ កាលពីឆ្នាំ២០២៣។ ទំនាក់ទំនងនេះបាននាំឱ្យកិច្ចសហប្រតិបត្តិការទ្វេភាគីកម្ពុជា-ជប៉ុន ត្រូវបានពង្រីកទៅដល់វិស័យយោធា សន្តិសុខ សេដ្ឋកិច្ច ពាណិជ្ជកម្ម វិនិយោគ ឌីជីថល ការប្រែប្រួលអាកាសធាតុ ជាដើម។
បើតាមសេចក្តីប្រកាសព័ត៌មាន លោក Yamaguchi បានបញ្ជាក់ថា បច្ចុប្បន្នមានប្រជាជនជប៉ុនកំពុងរស់នៅក្នុងប្រទេសកម្ពុជាប្រមាណ ៤ ០០០នាក់ រីឯប្រជាជនកម្ពុជារស់នៅក្នុងប្រទេសជប៉ុនមានចំនួនប្រមាណ ២ម៉ឺននាក់។
លោកថា ក្រៅពីទំនាក់ទំនងពាណិជ្ជកម្ម ទំនាក់ទំនងរវាងប្រជាជន និងប្រជាជនកម្ពុជា-ជប៉ុន នឹងចូលរួមចំណែកពង្រឹងទំនាក់ទំនងទ្វេភាគីកម្ពុជា-ជប៉ុន ឱ្យកាន់តែរឹងមាំបន្ថែមទៀតផង៕
