ឯកអគ្គរដ្ឋទូតហ្វីលីពីនប្រចាំកម្ពុជាលោកស្រី Flerida Ann Camille P. Mayo (ឆ្វេង) និងលោកនាយករដ្ឋមន្ត្រី ហ៊ុន ម៉ាណែត ចាប់ដៃគ្នាក្នុងជំនួបថ្ងៃទី១៦ ខែកក្កដា នៅរាជធានីភ្នំពេញ។ STPM
ភ្នំពេញៈ លោកនាយករដ្ឋមន្ត្រី ហ៊ុន ម៉ាណែត និងឯកអគ្គរដ្ឋទូតហ្វីលីពីនប្រចាំកម្ពុជា លោកស្រី Flerida Ann Camille P. Mayo បានពិភាក្សាគ្នាជំរុញការតភ្ជាប់ជើងហោះហើរត្រង់ឡើងវិញពីទីក្រុងសេប៊ូនៃប្រទេសហ្វីលីពីនមកកាន់ខេត្តសៀមរាប ដើម្បីជំរុញវិស័យទេសចរណ៍។
ភាគីទាំងពីរក៏បានពិភាក្សាគ្នាជំរុញកំណើនទំហំពាណិជ្ជកម្ម និងការនាំចេញផលិតផលកសិកម្មផងដែរ។
ការពិភាក្សានេះធ្វើឡើងក្នុងជំនួបរវាងលោក ហ៊ុន ម៉ាណែត និងលោកស្រី Mayo កាលពីថ្ងៃទី១៦ កក្កដា នៅរាជធានីភ្នំពេញ។
សេចក្តីប្រកាសព័ត៌មានបង្ហោះក្នុងបណ្ដាញសង្គមលោកនាយករដ្ឋមន្ត្រីនាថ្ងៃទី១៦ កក្កដា បញ្ជាក់ថា៖ «[ភាគីទាំងពីរ] បានពិភាក្សាលើវិស័យសេដ្ឋកិច្ច និងពាណិជ្ជកម្ម តាមរយៈការខិតខំបន្ថែមទៀតលើការជំរុញកំណើនទំហំពាណិជ្ជកម្ម ការនាំចេញផលិតផលកសិកម្ម, ការជំរុញវិស័យទេសចរណ៍តាមរយៈការតភ្ជាប់ជើងហោះហើរត្រង់ឡើងវិញពីទីក្រុងសេប៊ូ ប្រទេសហ្វីលីពីន មកកាន់ខេត្តសៀមរាប, វិស័យអប់រំ និងវិស័យសំណង់»។
លោក ជ័យ តិច អ្នកសិក្សាស្រាវជ្រាវការអភិវឌ្ឍសង្គម និងសេដ្ឋកិច្ច ប្រាប់ភ្នំពេញប៉ុស្តិ៍ថា ការដែលហ្វីលីពីន និងកម្ពុជាគឺជាសមាជិកអាស៊ាន និងសមាជិកនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) អាចនឹងបង្កឱ្យមានភាពងាយស្រួលក្នុងការធ្វើកិច្ចសហប្រតិបត្តិការពាណិជ្ជកម្ម និងសេដ្ឋកិច្ច។
លោកថ្លែងថា៖ «ការតភ្ជាប់ជើងហោះហើរដោយផ្ទាល់ពីសេប៊ូមកសៀមរាបគឺជារឿងល្អមួយ នៅក្នុងការនាំយកនូវអ្នកទេសចរ ពីព្រោះសេប៊ូ និងសៀមរាបគឺជាទីក្រុងសំខាន់ដូចគ្នារវាងប្រទេសទាំងពីរ ជាពិសេសគឺទំនាក់ទំនងផ្នែកទេសចរណ៍នេះ ដែលនឹងអាចនាំយកនូវភ្ញៀវទេសចរហ្វីលីពីនមកលេងទឹកដីកម្ពុជាបន្ថែមទៀត»។
លោកបន្តថា ប្រទេសទាំងពីរនៅមានសក្ដានុពលមួយចំនួនដែលត្រូវធ្វើកិច្ចសហប្រតិបត្តិការធ្វើពាណិជ្ជកម្ម និងវិនិយោគជាមួយគ្នា ជាពិសេសក្នុងវិស័យស្រូវអង្ករ ដោយសារប្រទេសហ្វីលីពីនជាប្រទេសដែលនាំចូលអង្ករដ៏ច្រើន។ លោកថា៖ «សម្រាប់ការនាំចេញពីកម្ពុជាគឺទាក់ទងទៅនឹងអង្ករគឺជាទំនិញដែលត្រូវនាំចេញទៅហ្វីលីពីនដែលមានសក្ដានុពល ពីព្រោះទីផ្សារហ្វីលីពីនគឺមានទំហំធំ»។
លោក ជ័យ តិច ថ្លែងថា ហ្វីលីពីនក៏មានសក្ដានុពលនៃការវិនិយោគនៅកម្ពុជាទៅលើការបង្កើតរោងចក្រកែច្នៃចំណីអាហារ ឃ្លាំងស្តុកស្រូវអង្ករ និងម៉ាស៊ីនកិនស្រូវដែលមានបច្ចេកវិទ្យាទំនើបតាមស្តង់ដារអន្តរជាតិដើម្បីនាំចេញទៅប្រទេសរបស់ខ្លួន។
ក្នុងជំនួបនេះ លោកស្រី Mayo បានបង្ហាញនូវការប្ដេជ្ញាចិត្ត និងការខិតខំប្រឹងប្រែងបន្តពង្រឹង និងពង្រីកទំនាក់ទំនង និងកិច្ចសហប្រតិបត្តិការហ្វីលីពីន-កម្ពុជាឱ្យ-កាន់តែរឹងមាំបន្ថែមទៀត នៅក្នុងអាណត្តិបេសកកម្មការទូតរបស់លោកស្រី ខណៈលោក ហ៊ុន ម៉ាណែត ជឿជាក់ថា ក្នុងបេសកកម្មការទូតរបស់លោកស្រី ទំនាក់ទំនងរវាងប្រទេសទាំងពីរនឹងកាន់តែត្រូវបានបន្តពង្រឹង និងពង្រីកបន្ថែមទៀត។
លោក ហ៊ុន ម៉ាណែត បញ្ជាក់ថា ក្រសួង ស្ថាប័នពាក់ព័ន្ធនៃរាជរដ្ឋាភិបាលកម្ពុជា បានត្រៀមខ្លួនរួចជាស្រេចក្នុងការធ្វើការយ៉ាងជិតស្និទ្ធជាមួយលោកស្រីឯកអគ្គរដ្ឋទូតដើម្បីពង្រឹង និងពង្រីកទំនាក់ទំនង និងកិច្ចសហប្រតិបត្តិការនៃប្រទេសទាំងពីរ ឱ្យកាន់តែរឹងមាំ និងរីកចម្រើនបន្ថែមទៀត។
ភាគីទាំងពីរក៏បានពិភាក្សាអំពីការបន្តកិច្ចសហប្រតិបត្តិការលើវិស័យការពារជាតិ និងសន្តិសុខជាតិ ដូចជាការធ្វើលំហាត់រួមគ្នា ការបណ្ដុះបណ្ដាល និងការប្រយុទ្ធប្រឆាំងនឹងបទល្មើសឆ្លងដែន។
លោក ជ័យ តិច ថ្លែងថា ប្រទេសហ្វីលីពីនគឺជាប្រទេសដែលមានជំនាញច្រើនទៅលើប្រព័ន្ធបច្ចេកវិទ្យា សំណង់ ការកសាងហេដ្ឋារចនាសម្ព័ន្ធបាន ក៏ដូចជាផ្នែកសន្តិសុខជាតិ។
លោកថា៖ «នៅហ្វីលីពីនមានកងទ័ពជើងទឹកដែលមានបទពិសោធន៍ច្រើនដែលយើងអាចធ្វើសមយុទ្ធរួមគ្នាដើម្បីទទួលបាននូវបទពិសោធន៍បន្ថែមទៀតទាក់ទងទៅនឹងសន្តិសុខដែនទឹក»៕
