![](https://pppkhmer.sgp1.digitaloceanspaces.com/image/main/20247/19_7_2024_img_5122.jpg)
ស្ថាបនិកយូនីកា អ្នកស្រី ឡឹប ម៉ារី ។ រូបថត ហុង រស្មី
ភ្នំពេញ៖ ស្របពេលអ្នកម្ដាយមានការមមាញឹកក្នុងកិច្ចការងារ និងអាជីវកម្មផ្សេងៗ អាហារចម្អិនស្រាប់បែបងាយៗកាន់តែពេញនិយម។
នៅក្នុងតម្រូវការវិស័យជលផល ដែលប្រជាជនកម្ពុជាម្នាក់ទទួលទានត្រីជាមធ្យម ៥០ គីឡូក្រាមក្នុងមួយឆ្នាំ សហគ្រិនស្ត្រីម្នាក់កំពុងដឹកនាំការផ្លាស់ប្តូរទម្លាប់ត្រូវចម្អិនជាមុន មកជាអាហារឆ្អិនស្រាប់។
ការវិវត្តន៍នេះ ដឹកនាំដោយសហគ្រាស យូនីកា ប្រកបដោយភាពច្នៃប្រឌិត មិនត្រឹមតែកែប្រែទម្លាប់អ្នកប្រើប្រាស់ប៉ុណ្ណោះទេ ប៉ុន្តែថែមទាំងពង្រឹងសេដ្ឋកិច្ចនៃសហគមន៍មូលដ្ឋានផងដែរ។
ស្ថាបនិកយូនីកា អ្នកស្រី ឡឹប ម៉ារី បានឱ្យដឹងថា ក្រៅពីជម្រើសអាហារទាន់ចិត្ដបែបបស្ចឹមប្រទេស ផលិតផលកែច្នៃក្នុងស្រុក ដែលទទួលបានវិញ្ញាបនបត្រនិមិត្ដសញ្ញាគុណភាពផល ផលិតផលជលផលកម្ពុជា (CQS) រួមទាំងផលិតផលកែច្នៃអំពីត្រីរបស់សហគ្រាសយូនីកា ជាទំនុកចិត្ដអាហារសម្រាប់កុមារ។
ស្រីបាននិយាយថា៖ «ម៉ាក់ៗសម័យឥឡូវមានការមមាញឹកច្រើន ដែលការចម្អិនអាហារសម្រាប់កូនៗទាមទារពេលវេលា។ ដូច្នេះ យើងបានជជែកជាមួយម្ចាស់គម្រោង និងធ្វើការជជែកជាមួយវិទ្យាស្ថានបច្ចេកវិទ្យាកម្ពុជា (ICT) ធ្វើការស្រាវជ្រាវដើម្បីកែច្នៃពីទម្លាប់ត្រូវចម្អិនជាមុន មកជាអាហារឆ្អិនស្រាប់»។
អ្នកស្រី ម៉ារី បានឱ្យដឹងថា៖ «នៅពេលផលិតផលកម្ពុជាត្រូវបាននាំយកទៅតាំងបង្ហាញនៅក្រៅប្រទេស លោកអ្នកនឹងមើលឃើញថា ប្រទេសជាច្រើនបានលោតចេញពីទម្លាប់ត្រូវចម្អិនជាមុន មកជាអាហារឆ្អិនស្រាប់ហើយ»។
ម្ចាស់សហគ្រាស យូនីកា រូបនេះ បានបន្ថែមថា ដើម្បីធ្វើការប្រកួតប្រជែងជាមួយបណ្ដាប្រទេសដទៃ កម្ពុជាត្រូវតែអភិវឌ្ឍខ្លួន។
ផលិតផលសំខាន់ៗរបស់ យូនីកា រួមមាន ត្រីងៀត ប្រហុក ត្រីប្រឡាក់ និងត្រីឆ្អើល ដែលផ្តោតលើអ្នកប្រើប្រាស់លំដាប់ខ្ពស់នៅក្នុងទីក្រុងភ្នំពេញ និងក្រៅប្រទេស។
បង្កើតឡើងក្នុងឆ្នាំ២០១៤ សហគ្រាស យូនីកា បានចាប់ផ្តើមជាអាជីវកម្មខ្នាតតូចដែលមានគោលបំណងជួយដល់ក្រុមនេសាទស្ត្រីនៅក្នុងខេត្តពោធិសាត់។
ប៉ុន្មានឆ្នាំមកនេះ វាបានរីកចម្រើនដល់ផ្គត់ផ្គង់ផលិតផលជលផលកែច្នៃដល់នៅម៉ាត ហ្គ្រីនណាត លក់រាយក្នុងរាជធានីភ្នំពេញ និងទីផ្សារក្នុងស្រុកផ្សេងទៀត។
សហគ្រាសនេះចែកចាយត្រីកែច្នៃជាមធ្យម ៦០០ គីឡូក្រាមក្នុងមួយខែនៅឆ្នាំ២០២១ និងបានកើនឡើង ៥០ ទៅ ៧០ភាគរយនាពេលបច្ចុប្បន្នទៅកាន់ទីផ្សារចំនួន ២០ ក្នុងរាជធានី ដោយមានផែនការពង្រីកបន្ថែមទៀត។
![](https://pppkhmer.sgp1.cdn.digitaloceanspaces.com/image/main/20247/19_7_2024_img_5082.jpg)
ផលិតផលសំខាន់ៗរបស់ យូនីកា រួមមាន ត្រីងៀត ប្រហុក ត្រីប្រឡាក់ និងត្រីឆ្អើល ដែលផ្តោតលើអ្នកប្រើប្រាស់លំដាប់ខ្ពស់នៅក្នុងទីក្រុងភ្នំពេញ និងក្រៅប្រទេស។ រូបថត ហុង រស្មី
ការរីកចម្រើនរបស់យូនីកា ត្រូវបានជំរុញដោយគម្រោង CAPFISH ដែលផ្តល់ជំនួយបច្ចេកទេសក្នុងផ្នែកដូចជាសុវត្ថិភាពចំណីអាហារ ការវេចខ្ចប់ និងម៉ាកយីហោ។
សហគ្រាសបានកែលម្អកន្លែងលាងដៃ បន្ទប់វេចខ្ចប់ និងបណ្តុះបណ្តាលបុគ្គលិក ហើយអ្នកផ្គត់ផ្គង់លើការអនុវត្តសុវត្ថិភាពចំណីអាហារ។
កិច្ចខិតខំប្រឹងប្រែងទាំងនេះបានឈានទៅដល់ការសម្រេចបាននូវវិញ្ញាបនបត្រ (CQS) ពេញលេញ និងការវិភាគគ្រោះថ្នាក់ និងចំណុចត្រួតពិនិត្យសំខាន់ៗ (HACCP) ដែលនាំទៅដល់ការទទួលបានផលសេដ្ឋកិច្ចយ៉ាងសំខាន់។
និមិត្ដសញ្ញាគុណភាពផល ផលិតផលជលផលកម្ពុជា (CQS) ដែលគ្រប់គ្រងដោយនាយកដ្ឋានជលផល និងការត្រួតពិនិត្យគុណភាពក្រោយការប្រមូលផល (DFPTQ) គឺជាឧបករណ៍សំខាន់ក្នុងការផ្លាស់ប្តូរនេះ។
គាំទ្រដោយសហភាពអឺរ៉ុប (EU) និង UNIDO និមិត្ដសញ្ញា CQS បង្កើនសុវត្ថិភាព និងគុណភាពនៃផលិតផលនេសាទ ជំរុញកំណើនប្រកបដោយនិរន្តរភាព និងការប្រកួតប្រជែងរបស់កម្ពុជាទាំងក្នុងទីផ្សារក្នុងស្រុក និងអន្តរជាតិ។
វិញ្ញាបនបត្រនេះស្របតាមស្តង់ដាសុវត្ថិភាពចំណីអាហារសកល ដែលជួយសម្រួលដល់ការចូលទៅកាន់ទីផ្សារអន្តរជាតិ ជាពិសេសសហភាពអឺរ៉ុប។
អ្នកស្រី ម៉ារី បាននិយាយថា៖ «សហគ្រាសបានឃើញការកើនឡើង ២០ភាគរយ នៃការលក់ ប្រាក់ចំណូលកើនឡើង ៣០ភាគរយ និងកំណើនការងារ ៥០ភាគរយ បង្កើតឱកាសសេដ្ឋកិច្ចសំខាន់ៗសម្រាប់ដៃគូរបស់ខ្លួនតាមខ្សែសង្វាក់តម្លៃ»។
លោក សេតធី ស៊ីថារ៉ាម៉ា ថមបាធូ ប្រធានទីប្រឹក្សាបច្ចេកទេសរបស់អង្គការអភិវឌ្ឍន៍ឧស្សាហកម្មរបស់អង្គការសហប្រជាជាតិ UNIDO បានឱ្យដឹងថា គម្រោងរបស់ CAPFISH-Capture មាន៣កម្រិតផ្សេងៗ គឺការកសាងសមត្ថភាពស្ថាប័នតាមរយៈការបង្កើតឱ្យមានគតិយុត្ដិ ការគាំទ្រផ្ទាល់ដល់សហគ្រាសឯកជន ក៏ដូចជាការស្រាវជ្រាវ និងអភិវឌ្ឍលើបច្ចេកវិទ្យា និងនវានុវត្ដន៍។
លោកបាននិយាយថា សហគ្រាសយូនីកា មានភាពវិសេសរបស់ខ្លួន ដែលទទួលយកនូវផលិតផលកែច្នៃតូចៗនៅតាមសហគមន៍នៃបណ្ដាខេត្ដជុំវិញបឹងទន្លេសាបដើម្បីដាក់លក់នៅផ្សារទំនើប។
នេះគឺជាការផ្សារភ្ជាប់រវាងខ្សែចង្វាក់តម្លៃ ដោយសារស្ដ្រី ក៏ដូចជាក្រុមផលិតផលិតផលជលផលតូចៗមិនមានលទ្ធភាពយកផលិតផលរបស់ខ្លួនមកលក់ដោយផ្ទាល់នោះទេ។ ដូច្នេះ យូនីកា ជាអ្នកផ្សារភ្ជាប់កិច្ចការទាំងនេះ។
លោក ថមបាធូ បានថ្លែងថា៖ «គម្រោងរបស់យូនីកា នេះ យើងធ្វើតាមរយៈថ្នាលស្រាវជ្រាវបច្ចេកវិទ្យា និងនវានុត្ដន៍របស់វិទ្យាស្ថាន ICT ដើម្បីបង្កើតផលិតផលថ្មីៗ»។
![](https://pppkhmer.sgp1.cdn.digitaloceanspaces.com/image/main/20247/19_7_2024_img_5026.jpg)
ផលិតផលរបស់សហគ្រាសយូនីកា ទទួលស្គាល់ពីនិមិត្ដសញ្ញាបញ្ជាក់គុណភាព CQS ដែលអាចនាំយកទៅលក់នៅតាមផ្សារទំនើប។
ចក្ខុវិស័យរបស់អ្នកស្រី ម៉ារី គឺពង្រីកលើសពីភាពជោគជ័យនៃអាជីវកម្ម ក្នុងការផ្តល់សិទ្ធិអំណាចដល់ស្ត្រីក្នុងវិស័យនេសាទ។
អ្នកស្រីបន្តថា៖ «ដោយនាំយកផលិតផលត្រីកែច្នៃមកទីផ្សារទីក្រុងភ្នំពេញ សហគ្រាសយូនីកា បានជំរុញការលក់សម្រាប់ក្រុមស្ត្រីកែច្នៃត្រីនៅខេត្តពោធិ៍សាត់ និងខេត្តសៀមរាប»។
សហការជាមួយសហករណ៍កសិកម្ម និងសហគមន៍នេសាទ យូនីកា ផ្តោតលើការលើកកម្ពស់អនាម័យ និងស្តង់ដាគុណភាពអនាម័យ។
ការរីកចម្រើនរបស់សហគ្រាសគឺបង្ហាញឱ្យឃើញនៅក្នុងវត្តមានទីផ្សារដែលកំពុងពង្រីករបស់ខ្លួន ដោយកើនឡើងពីទីផ្សារចំនួន ១២ ក្នុងឆ្នាំ ២០២១ ដល់ ២០ ក្នុងឆ្នាំ ២០២៣ និងការកើនឡើង ៣០ភាគរយ នៃការលក់។
អ្នកស្រីបាននិយាយថា៖ «អនាគតមើលទៅមានសក្តានុពលសម្រាប់ យូនីកា ជាមួយនឹងផែនការដើម្បីប្រើប្រាស់ការគាំទ្រការស្រាវជ្រាវ និងការអភិវឌ្ឍន៍របស់គម្រោង CAPFISH-Capture ដើម្បីធ្វើពិពិធកម្មជួរផលិតផល»។
អ្នកស្រី ម៉ារី បានបន្ដថា៖ «កិច្ចសហការជាមួយអ្នកសិក្សានៅតាមសាកលវិទ្យាល័យក្នុងទីក្រុងភ្នំពេញ នឹងស្វែងយល់ពីផលិតផលត្រីដែលត្រៀមរួចជាស្រេចថ្មីៗ រួមមានត្រីងៀត និងត្រីឆ្អើល»។
យូនីកា បានចុះហត្ថលេខាលើកិច្ចព្រមព្រៀងជាមួយទីផ្សារ Makro និង Lucky Supermarket និង AEON ខណៈពេលដែលកំពុងសាកល្បងផលិតផលជាមួយអ្នកទិញនៅក្នុងប្រទេសកូរ៉េ និងនូវែលសេឡង់ផងដែរ។
សម្លឹងឆ្ពោះទៅមុខ យូនីកា គ្រោងនឹងប្រើប្រាស់ការគាំទ្រការស្រាវជ្រាវ និងការអភិវឌ្ឍន៍របស់ CAPFISH-Capture តាមរយៈវេទិកាបច្ចេកវិទ្យាអាហារ ការស្រាវជ្រាវ និងការបង្កើតថ្មី (FTRIP)។
គំនិតផ្តួចផ្តើមនេះពាក់ព័ន្ធនឹងការសហការជាមួយបញ្ញាវន្ដមកពីសាកលវិទ្យាល័យក្នុងទីក្រុងភ្នំពេញដើម្បីធ្វើការស្រាវជ្រាវលើត្រីងៀតឆ្អិនស្រាប់ និងស្វែងយល់ពីផលិតផលត្រីឆ្អើលថ្មីៗ ក្នុងគោលបំណងធ្វើពិពិធកម្មខ្សែផលិតផលរបស់យូនីកា។
ទំនាក់ទំនងរវាងក្រុមតូចៗនៃអ្នកកែច្នៃជលផល និងផ្សារទំនើបសហគមន៍ តាមរយៈគំនិតផ្តួចផ្តើមរបស់ យូនីកា បង្ហាញពីគំរូនៃការអភិវឌ្ឍន៍ប្រកបដោយនិរន្តរភាព និងការពង្រឹងអំណាច។
លោក ចាយ ជីម ប្រធាននាយកដ្ឋានកសិឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ផលិតផលកសិកម្មមានច្រើនដែលអាចកែច្នៃបាន។ ជាក់ស្ដែង ការកែច្នៃផលិតផលពីត្រី ដែលប្រជាជនកម្ពុជាចូលចិត្ដទទួលទានត្រី។
លោក ជីម បានថ្លែងថា៖ «ផលិតផលកែច្នៃដែលត្រូវបានវេចខ្ចប់ជាស្រេចនេះបានជួយកាត់បន្ថយពេលវេលាចម្អិនឱ្យនៅតិចបំផុត។ ដូច្នេះ យើងត្រូវផលិតផលកែច្នៃសម្រាប់តម្រូវការអ្នកប្រើប្រាស់។ សហគ្រាសយូនីកា គឺជាគំរូសម្រាប់ការអភិវឌ្ឍគុណភាពចំណីអាហារ»។
លោកបាននិយាយថា សហគ្រាសនេះគាំទ្រដល់សហគមន៍ចិញ្ចឹមត្រី រួចធ្វើការកែច្នៃវេចខ្ចប់ផលិតផលឆៅ រហូតដល់ផលិតផលសម្រេច ដែលអាចទទួលទានភ្លាមៗ៕