លោកនាយករដ្ឋមន្រ្តី ហ៊ុន ម៉ាណែត ទទួលស្វាគមន៍ប្រធានក្រុមហ៊ុន Lee Li Holdings លោក Lee Q. Shim (ឆ្វេង) ក្នុងជំនួបនាថ្ងៃទី២ ខែកក្កដា នៅវិមានសន្តិភាព រាជធានីភ្នំពេញ។ ហ្វេសប៊ុកលោក ហ៊ុន ម៉ាណែត
ភ្នំពេញៈ ក្រុមហ៊ុនកាណាដា Lee Li Holdings កំពុងសម្លឹងមើលឱកាសវិនិយោគនៅកម្ពុជាលើវិស័យដែលមានសក្ដានុពលមួយចំនួន រួមមាន វិស័យឧស្ម័ននិងប្រេង, សុខាភិបាល, ការកែច្នៃចំណីអាហារ និងឡូជីស្ទីក (Logistics), យានយន្ត, និងមជ្ឈមណ្ឌលវាយតម្លៃទទួលស្គាល់សម្រាប់ការនាំចេញ។
ក្នុងជំនួបជាមួយលោកនាយករដ្ឋមន្រ្តី ហ៊ុន ម៉ាណែត នាថ្ងៃទី២ ខែកក្កដា លោក Lee Q. Shim ប្រធានក្រុមហ៊ុន Lee Li Holdings បានលើកឡើងថា ក្នុងដំណើរទស្សនកិច្ចរបស់លោកមកកាន់កម្ពុជាមានបំណេងស្វែងរកឱកាសវិនិយោគលើវិស័យសក្ដានុពលទាំង ៥នេះ ខណៈលោក ហ៊ុន ម៉ាណែត ស្វាគមន៍ចំពោះចំណាប់អារម្មណ៍របស់ក្រុមហ៊ុននេះក្នុងការស្វែងរកឱកាសវិនិយោគនៅកម្ពុជា។ នេះបើយោងតាមសេចក្ដីប្រកាសព័ត៌មានខុទ្ទកាល័យលោកនាយករដ្ឋមន្ត្រី នាថ្ងៃទី២ កក្កដា។
ក្នុងជំនួបនៅរាជធានីភ្នំពេញនេះ លោក ហ៊ុន ម៉ាណែត បានបញ្ជាក់ថា កម្ពុជាបានបង្កើតតំណាងសភាពាណិជ្ជកម្មកម្ពុជាចំនួនពីរនៅប្រទេសកាណាដា គឺនៅទីក្រុងតូរុនតូ (Toronto) និងទីក្រុងម៉ុងត្រេអាល់ (Montreal) ដើម្បីផ្សារភ្ជាប់ទំនាក់ទំនងពាណិជ្ជកម្មរវាងកម្ពុជា និង កាណាដា ក៏ដូចជាជួយសម្របសម្រួលការនាំចេញផលិតផលពីកម្ពុជាទៅកាន់កាណាដា និងពីកាណាដាមកកាន់កម្ពុជាផងដែរ។
លោកបន្តថា៖ «តាមរយៈដំណើរទស្សនកិច្ចនេះនឹងចូលរួមចំណែកបន្ថែមទៀតក្នុងការជំរុញទំនាក់ទំនងពាណិជ្ជកម្មរវាងប្រទេសទាំងពីរ កម្ពុជា-កាណាដា»។
លោក ហ៊ុន ម៉ាណែត លើកទឹកចិត្តឱ្យក្រុមហ៊ុននេះបន្តពិភាក្សាលម្អិតជាមួយក្រសួង ស្ថាប័នពាក់ព័ន្ធរបស់រាជរដ្ឋាភិបាលកម្ពុជា ដូចជាក្រសួងរ៉ែ និងថាមពល ក្រសួងពាណិជ្ជកម្ម និងក្រសួងសុខាភិបាល។
លោកនាយករដ្ឋមន្ត្រីបញ្ជាក់ថា រាជរដ្ឋាភិបាលកម្ពុជាតែងតែគាំទ្រដល់វិស័យឯកជន ដោយផ្តល់ការលើកទឹកចិត្ត និងជួយសម្របសម្រួលក្រុមហ៊ុន ដែលបោះទុនវិនិយោគនៅកម្ពុជាឱ្យទទួលបានជោគជ័យ និងមានការរីកចម្រើនធំធាត់។
លោក ជ័យ តិច អ្នកសិក្សាស្រាវជ្រាវការអភិវឌ្ឍសង្គម និងសេដ្ឋកិច្ច ប្រាប់ភ្នំពេញប៉ុស្តិ៍ថា ប្រទេសកាណាដាគឺជាប្រទេសមួយដែលបណ្ដាក់ទុនវិនិយោគនៅកម្ពុជាដ៏ធំមួយ។ សម្រាប់ការវិនិយោគផ្ទាល់ពីបរទេស (FDI) នៅឆ្នាំ ២០២១ ទុនវិនិយោគរបស់កាណាដាមានដល់ទៅ១,១ពាន់លានដុល្លារអាមេរិក។
លោកលើកឡើងថា ក្នុងរយៈពេល៤ខែដំបូងក្នុងឆ្នាំ ២០២៤នេះ ការនាំចេញរបស់កម្ពុជាទៅកាន់កាណាដាមានការកើនឡើង២៣,៨ ភាគរយស្មើនឹង ៣១១លានដុល្លារ បើធៀបនឹងរយៈពេល ៤ខែដូចគ្នា ក្នុងឆ្នាំ ២០២៣។ ទំនិញសំខាន់ៗដែលកម្ពុជានាំចេញទៅកាណាដាមានដូចជាសម្លៀកបំពាក់ ស្បែកជើង ទំនិញយួរដៃសម្រាប់ធ្វើដំណើរ និងគ្រឿងបង្គុំអេឡិចត្រូនិក ។ល។ ទំនិញដែលនាំចូលពីកាណាដាមកកម្ពុជាវិញមានដូចជាគ្រឿងម៉ាស៊ីន និងរថយន្ត។
លោក ជ័យ តិច ថ្លែងថា៖ «បំណងនៃការពង្រីកការវិនិយោគ និងការធ្វើពាណិជ្ជកម្មនៅក្នុងវិស័យទាំង៥ដែលបានលើកឡើងនេះ គឺពិតជាមានសារៈសំខាន់ណាស់ ពីព្រោះថាកាណាដាជាប្រទេសមួយដែលមានជំនាញបច្ចេកវិទ្យាខ្ពស់ ហើយអ៊ីចឹងទេ អាចចូលរួមចំណែកក្នុងការអភិវឌ្ឍហេដ្ឋារចនាសម្ព័ន្ធ ការជួយពង្រីកនូវពិពិធកម្មសេដ្ឋកិច្ចរបស់កម្ពុជាទាក់ទងនឹងថាមពលស្អាត ទូរគមនាគមន៍ កសិកម្ម។ល។»។
លោកបន្ថែមថា៖ «វិស័យឧស្ម័ន និងប្រេងនេះគឺយើងបានជាប់គាំង បន្ទាប់ពីមានការក្ស័យធនរបស់ក្រុមហ៊ុនមុនៗ។ ដូច្នេះ វាជាសញ្ញាមួយល្អក្នុងការអភិវឌ្ឍនូវវិស័យឧស្ម័ន និងប្រេងរបស់កម្ពុជា ហើយក៏ដូចជាវិស័យចំណីអាហារ ឡូជីស្ទីក ដោយសារកម្ពុជាយើងមានបញ្ហាមួយចំនួនទាក់ទងបញ្ហាឡូជីស្ទីកដែលជារបាំងមួយទាក់ទងនឹងការពង្រីកការវិនិយោគ ក៏ដូចជាការទាក់ទាញការវិនិយោគផ្ទាល់ពីបរទេសមកកម្ពុជា»។
ចំពោះបំណងវិនិយោគលើវិស័យយានយន្ត លោក ជ័យ តិច បញ្ជាក់ថា វាគឺជាការចូលរួមចំណែកមួយរបស់រាជរដ្ឋាភិបាលកម្ពុជាក្នុងការប្រែក្លាយប្រទេសកម្ពុជាក្លាយជាមណ្ឌលផលិត និងដំឡើងយានយន្តប្រចាំតំបន់។ លោកក៏បញ្ជាក់ពីសារៈសំខាន់នៃមជ្ឈមណ្ឌលវាយតម្លៃទទួលស្គាល់សម្រាប់ការនាំចេញ ដោយសារការនាំចេញទំនិញ ជាពិសេសកសិផល តម្រូវឱ្យមានការវាយតម្លៃ មានការទទួលស្គាល់ និងមានលក្ខណៈស្តង់ដារដើម្បីអាចនាំចេញទំនិញទៅបណ្ដាប្រទេសអឺរ៉ុប ឬសហរដ្ឋអាមេរិក និងកាណាដាជាដើម។
លោកថ្លែងថា៖ «នេះគឺជាចំណុចដែលល្អដែលយើងចង់ឃើញដើម្បីពង្រីកការវិនិយោគនិងពាណិជ្ជកម្ម និងកិច្ចសហប្រតិបត្តិការរវាងប្រទេសទាំងពីរ»៕
