ម្រេចខ្មៅកម្ពុជា ៣០តោនរបស់ ក្រុមហ៊ុន Sela Pepper បានទៅដល់ប្រទេសចិនកាលពីខែមេសា។ Sela Pepper
ភ្នំពេញៈ ក្នុងរយៈពេល៧ខែដើមឆ្នាំនេះ ពីខែមករា ដល់ខែកក្កដា កម្ពុជានាំចេញទំនិញទៅកាន់សហរដ្ឋអាមេរិកគិតជាទឹកប្រាក់មានជាង៥,៥ពាន់លានដុល្លារ កើន៦,៤ភាគរយ ខណៈការនាំចេញទៅចិនមានជាង៩៧៥លានដុល្លារ កើន១៩,៧ភាគរយ បើធៀបរយៈពេលដូចគ្នាក្នុងឆ្នាំមុន។ នេះបើយោងតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា។
ចំពោះការនាំចូលវិញ របាយការណ៍បានឱ្យដឹងថា ក្នុងរយៈពេល៧ខែនេះ ទំនិញកម្ពុជាដែលនាំចូលពីសហរដ្ឋអាមេរិកគិតជាទឹកប្រាក់មានជាង១៥៤លានដុល្លារ កើន៨,៩ភាគរយ ខណៈ ទំនិញកម្ពុជានាំចូលពីចិនមានជាង៧,៧ពាន់លានដុល្លារ កើនឡើង២៣,៤ភាគរយ បើធៀបរយៈពេលដូចគ្នាក្នុងឆ្នាំមុន។
ចំពោះទំហំពាណិជ្ជកម្ម (នាំចេញបូកនាំចូល) រវាងកម្ពុជា និងចិនក្នុងរយៈពេលនេះគិតជាទឹកប្រាក់មានជាង៨,៧ពាន់លានដុល្លារ កើន២៣ភាគរយ ហើយទំហំពាណិជ្ជកម្មកម្ពុជា និងសហរដ្ឋអាមេរិកមានជាង៥,៦ពាន់លានដុល្លារ កើន៦,៥ភាគរយ បើធៀបនឹងរយៈពេលដូចគ្នាក្នុងឆ្នាំមុន។
របាយការណ៍បន្តថា ក្នុងរយៈពេល៧ខែដើមឆ្នាំនេះ ការនាំចេញទំនិញរបស់កម្ពុជាទៅកាន់ប្រទេសនានាមានជាង១៤ពាន់លានដុល្លារ កើន១៤ភាគរយ បើធៀបនឹងរយៈពេលដូចគ្នាក្នុងឆ្នាំមុន។
ដោយឡែក ចំពោះការនាំចេញរបស់កម្ពុជាទៅវៀតណាមក្នុងរយៈពេល៧ខែនេះមានជាង២,២ពាន់លានដុល្លារ កើន៣៧,៧ភាគរយ, ការនាំចូលវិញមានជាង២,៤ពាន់លានដុល្លារ កើន១២,៩ភាគរយ ខណៈទំហំពាណិជ្ជកម្មរវាងប្រទេសទាំងពីរមាន៤,៦ពាន់លានដុល្លារ កើន២៣,៥ភាគរយ បើធៀបនឹងរយៈពេលដូចគ្នាក្នុងឆ្នាំមុន។
ចំពោះការនាំចេញរបស់កម្ពុជាទៅថៃក្នុងរយៈពេលនេះមានជាង៤៩៩លានដុល្លារ ធ្លាក់ចុះ៦,៤ភាគរយ, ការនាំចូលវិញមាន១,៩ពាន់លានដុល្លារ កើន១៣,៤ភាគរយ ខណៈទំហំពាណិជ្ជកម្មរវាងប្រទេសទាំងពីរមាន២,៤ពាន់លានដុល្លារ កើន៨,៦ភាគរយ បើធៀបនឹងរយៈពេលដូចគ្នាក្នុងឆ្នាំមុន។
បើតាមរបាយការណ៍ដដែល ទំនិញដែលកម្ពុជានាំចេញខ្ពស់ជាងគេក្នុងរយៈពេល៧ខែនេះគឺសម្លៀកបំពាក់ និងគ្រឿងបន្ទាប់បន្សំដែលធ្វើឡើងពីក្រណាត់ចាក់ដោយម្ជុលពីរ ឬមួយ ដែលមានតម្លៃ៣,៤ពាន់លានដុល្លារ កើន១៤,១ភាគរយ បើធៀបនឹងរយៈពេលដូចគ្នាក្នុងឆ្នាំមុន៕
