លោក គង់ វិបុល អគ្គនាយកនៃអគ្គនាយកដ្ឋានពន្ធដារដឹកនាំកិច្ចប្រជុំកាលពីថ្ងៃទី១៥ ខែសីហា។ រូបថត GDT
អគ្គនាយកដ្ឋានពន្ធដារប្រមូលចំណូលពន្ធអាករគ្រប់ប្រភេទបាន ២១៥៥,២៤ លានដុល្លារក្នុងរយៈពេល ៧ ខែឆ្នាំ២០២៤ នេះ ស្មើនឹង៥១,៧៦ ភាគរយនៃផែនការនៅក្នុងច្បាប់ស្តីពីហិរញ្ញវត្ថុសម្រាប់ការគ្រប់គ្រងប្រចាំឆ្នាំ២០២៤។ នេះបើតាមសេចក្ដីប្រកាសព័ត៌មានរបស់អគ្គនាយកដ្ឋានពន្ធដារចេញផ្សាយនៅថ្ងៃនេះ។
សេចក្ដីប្រកាសព័ត៌មានក៏បានបញ្ជាក់ដែរថា នៅក្នុងខែកក្កដាកន្លងទៅ ចំណូលពន្ធអាករគ្រប់ប្រភេទដែលអគ្គនាយកដ្ឋានពន្ធដារប្រមូលបានជាក់ស្តែង តាមប្រព័ន្ធគ្រប់គ្រងទិន្នន័យចំណូលអនឡាញរបស់អគ្គនាយកដ្ឋានមានប្រមាណ ២៣៧,២៣ លានដុល្លារ ឬស្មើនឹង ៥,៧០ភាគរយ នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៤។
ក្នុងរយៈពេល ៧ខែ ឆ្នាំ២០២៤ នេះដែរ អគ្គនាយកដ្ឋានក៏បានទទួលចុះបញ្ជីក្រុមហ៊ុនដោយជោគជ័យចំនួន ៦ ១៨៤ សហគ្រាស ក្នុងនោះចុះតាមថ្នាល CamDX មានចំនួន ៥ ៧៤៧ សហគ្រាស។
សម្រាប់ខែកក្កដា អគ្គនាយកដ្ឋានពន្ធដារបានពិនិត្យនិងអនុម័តការស្នើសុំចុះបញ្ជីពន្ធដារចំនួន ១១៩៩ សហគ្រាស ដែលក្នុងនោះការចុះបញ្ជីជោគជ័យមានចំនួន ១០៤០ សហគ្រាស ហើយក្នុងចំណោមក្រុមហ៊ុនចុះបញ្ជីជោគជ័យ មាន៩៦៣ សហគ្រាសធ្វើឡើងតាមថ្នាល CamDX។
ក្រៅពីលទ្ធផលនៃការប្រមូលចំណូលពន្ធនេះ អគ្គនាយកដ្ឋានបានឲ្យដឹងដែរថា ស្ថាប័ននេះបានធ្វើការពាក់ព័ន្ធនឹងកិច្ចសហការជាមួយវិស័យពាក់ព័ន្ធ ការផ្សព្វផ្សាយសៀវភៅណែនាំស្តីពីបែបបទនិងនីតិវិធីនៃការធ្វើសវនកម្មពន្ធដារ និងសៀវភៅពាក់ព័ន្ធសម្រាប់មន្ត្រីពន្ធដារនិងអ្នកជាប់ពន្ធក៏ដូចជាសាធារណជន។
សម្រាប់រយៈពេលសេសសល់នៃឆ្នាំ២០២៤នេះ អគ្គនាយកដ្ឋានពន្ធដារនឹងបន្តពង្រឹងប្រសិទ្ធភាពនៃការគ្រប់គ្រង និងការប្រមូលចំណូលពន្ធ ជាពិសេសវិធានការពាក់ព័ន្ធនឹងអាករពិសេសសម្រាប់វិស័យភេសជ្ជៈ អត្រាអាករពិសេសសម្រាប់ផលិតផលថ្នាំជក់ និងការចែកចាយថ្នាំជក់ក្នុងស្រុក និងកិច្ចការពាក់ព័ន្ធជាច្រើនទៀត។
អគ្គនាយកដ្ឋានពន្ធដាក៏នឹងបន្តពង្រឹងតម្លាភាព និងគណនេយ្យភាពនៃការបង់ពន្ធរបស់សហគ្រាសក្នុងវិស័យផលិតស្រាបៀរ និងភេសជ្ជៈគ្មានជាតិសុរា ដោយបន្តពង្រឹងការបំពាក់កាមេរ៉ាសុវត្ថិភាពនៅតាមរោងចក្រផលិតស្រាបៀរ និងភេសជ្ជៈគ្មានជាតិសុរាឱ្យបានរួចរាល់គ្រប់សហគ្រាស និងការចុះត្រួតពិនិត្យឧបករណ៍វាស់ចំណុះ (Flowmeter) ក្នុងខ្សែច្រវាក់ផលិតកម្មដល់ទីតាំង ដោយថ្នាក់ដឹកនាំរបស់អគ្គនាយកដ្ឋានពន្ធដារ៕
