ភ្នំពេញ៖ របាយការណ៍ថ្មីៗពីក្រុមហ៊ុនក្រេឌីត យូរ៉ូ ខេមបូឌា ខូ អិលធីឌី (CBC) បង្ហាញពីទិដ្ឋភាពចម្រុះនៃទីផ្សារឥណទានរបស់កម្ពុជា ជាមួយនឹងសមិទ្ធផលឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួន បង្ហាញពីកំណើនជាវិជ្ជមាន ខណៈឥណទានលក្ខណៈបុគ្គលប្រើប្រាស់សម្រាប់អាជីវកម្មខ្នាតតូច មានការថយចុះ។
លទ្ធផលដែលបានចេញផ្សាយនៅក្នុងត្រីមាសទី២ ឆ្នាំ២០២៤ ចាប់ពីខែមេសាដល់ខែមិថុនា បង្ហាញពីនិន្នាការប្រែប្រួលនៅតាមវិស័យ និងតំបន់ផ្សេងៗគ្នា ដូចជា ខ្ពង់រាប ឆ្នេរសមុទ្រ វាលទំនាប និងទន្លេសាប។
របាយការណ៍សន្ទស្សន៍ឥណទានបុគ្គលសម្រាប់ត្រីមាសទី២ ឆ្នាំ២០២៤ បង្ហាញពីការកើនឡើងទាំងសមតុល្យ ឥណទាន និងចំនួនគណនីឥណទាន។
ចំនួនគណនីឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួនសរុបមានការកើនឡើងគួរសម ចំនួន ៤,៧៥ភាគរយដែលនាំឱ្យចំនួនគណនីសរុបមានចំនួន ១,៩២ លានគណនីនៅចុងខែមិថុនា។ សមតុល្យសរុបកើនឡើង ០,៦៧ភាគរយ ឈានដល់ ១៥,៣១ ប៊ីលានដុល្លារអាមេរិកនៅត្រីមាសទី២នេះ។
កំណើននេះបានកើតឡើងដោយកម្មវិធីកម្ចីអចលនទ្រព្យ និងប័ណ្ណឥណទាន ដែលឃើញមានការកើនឡើង ១៧ភាគរយ និង ១៥ភាគរយ រៀងគ្នាពីត្រីមាសមុន។ ទោះយ៉ាងណាក៏ដោយ កម្មវិធីហិរញ្ញវត្ថុផ្ទាល់ខ្លួនបានធ្លាក់ចុះ ២ភាគរយ។
លោក អឿ សុធារ័ត្ន នាយកប្រតិបត្តិនៃ CBC បានឱ្យដឹងថា៖ «តម្រូវការពាក្យស្នើសុំឥណទានបុគ្គលសម្រាប់ប្រើប្រាស់ផ្ទាល់ខ្លួនមានការថយចុះ ប៉ុន្តែសមិទ្ធផលឥណទានលក្ខ ណៈបុគ្គលសម្រាប់ប្រើប្រាស់ផ្ទាល់ខ្លួននៅតែវិជ្ជាមាន ជាមួយនឹងចំនួនគណនី និងសមតុល្យកម្ចីក្នុងត្រីមាសទីមួយ នេះ បើប្រៀបធៀបនឹងត្រីមាសមុន»។
ទោះបីជាមានកំណើននេះក៏ដោយ គុណភាពនៃប្រាក់កម្ចីលក្ខណៈបុគ្គលសម្រាប់ប្រើប្រាស់ផ្ទាល់ខ្លួនបានបង្ហាញពីសញ្ញានៃការថមថយ។
លោក សុធារ័ត្ន បាននិយាយថា គុណភាពឥណទានមានការធ្លាក់ចុះ ជាមួយនឹងការ កើនឡើងនៃអនុបាតនៃគណនីប្រាក់កម្ចីជាមួយនឹងការសងយឺត ៣០ថ្ងៃហួសកាលបរិច្ឆេទកំណត់ពី ៦,០៣ភាគរយ ក្នុងត្រីមាសទីមួយក្នុងឆ្នាំ២០២៤ មក ៦,២២ភាគរយក្នុងត្រីមាសនេះ។
លោកបានបន្ថែមទៀតថា គុណភាពឥណទានមានការធ្លាក់ចុះ ជាមួយនឹងការ កើនឡើងនៃអនុបាតនៃគណនីប្រាក់កម្ចីជាមួយនឹងការសងយឺត ៣០ថ្ងៃហួសកាលបរិច្ឆេទកំណត់ពី ៦,០៣% ក្នុងត្រី មាសទីមួយក្នុងឆ្នាំ២០២៤ មក ៦.២២% ក្នុងត្រីមាសនេះ។
ផ្ទុយទៅវិញ របាយការណ៍សន្ទស្សន៍លក្ខណៈបុគ្គលប្រើប្រាស់សម្រាប់អាជីវកម្មខ្នាតតូច បង្ហាញពីការធ្លាក់ចុះចំពោះចំនួនគណនីឥណទាន តែមានការកើនឡើងចំពោះសមតុល្យឥណទាន។
ចំនួនគណនីឥណទានលក្ខណៈបុគ្គលប្រើប្រាស់សម្រាប់អាជីវកម្មខ្នាតតូចសរុបមានការថយចុះចំនួន ១,៧ភាគរយ ដែលនាំឱ្យចំនួនគណនីសរុបមានចំនួន ១,៨៦ លានគណនី។ សមតុល្យសរុបកើនឡើង ០,១ភាគរយឈានដល់ ៣៤,២២ ប៊ីលានដុល្លារអាមេរិក នៅត្រីមាសទី២នេះ។
កម្មវិធីឥណទានអាជីវកម្មខ្នាតតូចបានថយចុះ ៧ភាគរយ ជាមួយនឹងការធ្លាក់ចុះយ៉ាងខ្លាំងនៃកម្ចីមូលធន ហិរញ្ញវត្ថុទ្រព្យសកម្ម និងពាក្យស្នើសុំកម្ចីសំណង់។
កម្ចីមូលធនបានធ្លាក់ចុះ ១១ភាគរយ ហិរញ្ញវត្ថុទ្រព្យសកម្ម ៩ភាគរយ និងសំណង់ ១៤,២ភាគរយ។ ប្រភេទតែមួយគត់ដែលបានឃើញកំណើនគឺឥណទានកសិកម្មជាមួយនឹងការកើនឡើង ២,៧ភាគរយ។
លោក សុធារ័ត្ន បានថ្លែងថា៖ «តម្រូវការពាក្យរស្នើសុំឥណទានលក្ខណៈបុគ្គលប្រើប្រាស់សម្រាប់អាជីវកម្មខ្នាតតូចមានការថយចុះ ជាមួយនឹង ដំណើរការឥណទានលក្ខណៈបុគ្គលប្រើប្រាស់សម្រាប់អាជីវកម្មខ្នាតតូចក៏មានការថយចុះ។ ប៉ុន្តែសមិទ្ធផលឥណទានលក្ខណៈបុគ្គលប្រើប្រាស់សម្រាប់អាជីវកម្មខ្នាតតូចនៅតែមានភាពវិជ្ជាមាន ជាមួយនឹងចំនួនសមតុល្យធ្លាក់ចុះ ០,១ភាគរយនៅក្នុងត្រីមាសទី២នេះ»។
លោកបានបន្ថែមទៀតថា គុណភាពឥណទានមានការធ្លាក់ចុះ ជាមួយនឹងការកើនឡើង នៃអនុបាតនៃគណនីប្រាក់កម្ចីជាមួយនឹងការសងយឺត ៣០ថ្ងៃហួសកាលបរិច្ឆេទកំណត់ពី ៧,៨ភាគរយ ក្នុងត្រីមាសទី១ ក្នុងឆ្នាំ២០២៤ មក ៨,៣ភាគរយ ក្នុងត្រីមាសនេះ។
របាយការណ៍បានគូសបញ្ជាក់ពីភាពខុសគ្នាក្នុងតំបន់យ៉ាងសំខាន់ក្នុងការអនុវត្តឥណទាន។
សម្រាប់ឥណទានផ្ទាល់ខ្លួន តំបន់ខ្ពង់រាបបានឃើញការកើនឡើងខ្ពស់បំផុត ៤៦ភាគរយ ខណៈពេលដែលតំបន់ឆ្នេរនាំមុខក្នុងកម្មវិធីកម្ចីអចលនទ្រព្យកើនឡើង ២៩ភាគរយ។
នៅលើផ្នែកអាជីវកម្មខ្នាតតូច តំបន់ខ្ពង់រាបបានជួបប្រទះការថយចុះយ៉ាងខ្លាំងនៃពាក្យសុំកម្ចីសំណង់ ដែលបានធ្លាក់ចុះ ៦៥,៥ភាគរយ។
ទោះបីជាមានបញ្ហាប្រឈមក្នុងការផ្តល់ប្រាក់កម្ចីអាជីវកម្មខ្នាតតូចក៏ដោយ តំបន់មួយចំនួនបានបង្ហាញពីកំណើនវិជ្ជមាននៅក្នុងសមតុល្យប្រាក់កម្ចីប្រើប្រាស់ផ្ទាល់ខ្លួន ដូចជាទន្លេសាប ដែលបានកត់ត្រាការកើនឡើង ២,៥ភាគរយ៕