មន្ត្រីមន្ទីរកសិកម្មខេត្តមណ្ឌលគិរីបណ្តុះបណ្តាលកសិករឱ្យពង្រីកផ្ទៃដីដាំដុះដំណាំកាហ្វេបន្ថែមទៀត កាលពីខែឧសភា។ រូបថត មន្ទីរកសិកម្មខេត្តមណ្ឌលគិរី
មណ្ឌលគិរីៈ មន្ទីរកសិកម្មខេត្តមណ្ឌលគិរីកំពុងតែជំរុញ និងបង្កើនការបណ្តុះបណ្តាលកសិករឱ្យពង្រីកផ្ទៃដីដាំដុះដំណាំកាហ្វេបន្ថែមទៀត ក្រោយពេលដែលគ្រាប់កាហ្វេរ៉ូប៊ូស្តាខេត្តមណ្ឌលគីរីត្រូវបានវាយតម្លៃថា ជា«កាហ្វេរ៉ូប៊ូស្តាប្រណិត» (Fine Robusta) ជាលើកដំបូង ពីវិទ្យាស្ថានវាយតម្លៃគុណភាពកាហ្វេអន្តរជាតិCQI (Coffee Quality Institute) នាពេលថ្មីៗនេះ។
លោក សុង ឃាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរីបានឱ្យដឹងថា នាពេលបច្ចុប្បន្ននេះ ផ្ទៃដីដំណាំកាហ្វេនៅក្នុងខេត្តមណ្ឌលគិរីមានជាង៥០០ហិកតា។ ក្នុងនោះផ្ទៃដីដែលប្រមូលផលបានមានតែ៣៤៦ហិកតាប៉ុណ្ណោះ ដែលផ្តល់ទិន្នផលមធ្យម២,០៩៦តោនក្នុង១ហិកតា។
ក្រោយពេលដែលកាហ្វេរ៉ូប៊ូស្តាខេត្តមណ្ឌលគីរីត្រូវបានវាយតម្លៃជាប់ ជាកាហ្វេរ៉ូប៊ូស្តាប្រណិតតាមរយៈការដាក់ពាក្យរបស់ក្រុមហ៊ុនខូហ្វីនោះមក មន្ទីរកសិកម្មខេត្តបានកំពុងតែជំរុញលើកទឹកចិត្តឱ្យកសិករធ្វើការដាំដុះដំណាំកាហ្វេនេះបន្ថែមទៀត ដើម្បីផ្គត់ផ្គង់ទីផ្សារ។ មន្ទីរកសិកម្ម និងក្រុមហ៊ុនខូហ្វីបានបន្តសហការគ្នាធ្វើការរៀបចំបណ្តុះ បណ្តាលតម្រង់ទិសដល់កសិករ ក្នុងការដាំដុះ ថែទាំ និងប្រមូលផលកាហ្វេនេះ។
លោកមានប្រសាសន៍ថា៖«នាពេលបច្ចុប្បន្ននេះ យើងកំពុងតែបណ្តុះបណ្តាលកសិករឱ្យខិតខំពង្រីកផ្ទៃដីបន្ថែមដែរ ចំពោះដីដែលកបនឹងការហ្វេនេះ។ យើងកំពុងតែខិតខំ ព្រោះកាហ្វេនេះកំពុងតែមានសក្តានុពល និងកំពុងតែមានតម្លៃដែលពលរដ្ឋអាចរកចំណូលបានល្អ»។
លោកក៏បានឱ្យដឹងផងដែរថា ផ្ទៃដំណាំកាហ្វេក៏មានការកើនឡើងជាបន្តបន្ទាប់ផងដែរ។ នៅក្នុងឆ្នាំ២០២៣ដំណាំកាហ្វេមានផ្ទៃដីសរុបចំនួន៥២៥ហិកតា ដែលមានកសិករចំនួន៣៦៥គ្រួសារ។ ផ្ទៃដីដាំដុះនេះមានការកើនឡើងលើសពីឆ្នាំ២០២២ចំនួន១៧៤ហិកតា។
លោកបន្ថែមថា ទិន្នផលប្រមូលបានសរុបប្រមាណជា៧២៥តោនក្នុងមួយឆ្នាំ ខណៈពេលដែលដំណាំកាហ្វេខ្លះកំពុងតែស្ថិតក្នុងដំណាក់កាលលួតលាស់។ ទិន្នផលនោះភាគច្រើនត្រូវបានក្រុមហ៊ុនខូហ្វី និងក្រុមហ៊ុនតូចៗផ្សេងៗទៀតប្រមូលទិញពីកសិករផ្ទាល់ តាមការសម្របសម្រួលពីមន្ទីរកសិកម្ម។
ក្នុងនោះកាហ្វេស្រស់លេខ១តម្លៃខ្ទង់៣ពាន់រៀលក្នុង១គីឡូក្រាម, កាហ្វេលេខ២ តម្លៃប្រហែលចន្លោះពី ២ពាន់ ទៅ២ ៥០០រៀល និងលេខ៣តម្លៃជាង១ពាន់ ទៅ២ពាន់រៀលក្នុង១គីឡូក្រាម។
គ្រាប់កាហ្វេរ៉ូប៊ូស្តាខេត្តមណ្ឌលគីរី កែច្នៃដោយក្រុមហ៊ុនខូហ្វីទទួលបាននូវការវាយតម្លៃថាជាកាហ្វេរ៉ូប៊ូស្តាប្រណីត ជាលើកដំបូងនៅក្នុងប្រវត្តិសាស្រ្ត ពីវិទ្យាស្ថានវាយតម្លៃគុណភាពកាហ្វេអន្តរជាតិ ដែលជាស្ថាប័នវាយតម្លៃគុណភាពកាហ្វេពិភពលោក។
ដើម្បីអាចទទួលបានវិញ្ញាបនប័ត្រជាកាហ្វេរ៉ូប៊ូស្តាប្រណីត អ្នកជំនាញកាហ្វេពីវិទ្យាស្ថានCQI បានវាយតម្លៃយ៉ាងម៉ត់ចត់ទៅលើកត្តាផ្សេងៗ រួមមាន៖ ក្លិន រសជាតិ អាស៊ីត សំបក និងតុល្យភាពរបស់កាហ្វេ។ តាមរយៈការផលិតនឹងកែច្នៃដែលប្រកបទៅដោយភាពច្នៃប្រឌិត និងប្រកាន់ភ្ជាប់នូវគុណភាព និងអនាម័យ ខូហ្វី បានកំណត់ស្តង់ដារថ្មីមួយសម្រាប់ឧស្សាហកម្មកាហ្វេកម្ពុជា និងបង្ហាញពីសមត្ថភាពក្នុងការផលិត និងកែច្នៃកាហ្វេរ៉ូប៊ូស្តាមណ្ឌលគីរី ទៅកាន់ទីផ្សារពិភពលោក។ នេះបើយោងតាមក្រុមហ៊ុនខូហ្វី។
លោកសុង ឃាងបានសំដែងការរីករាយថា៖«នេះជាសមទ្ធិផលថ្មីនេះ ដែលបង្ហាញពីមោទនភាពសម្រាប់ប្រទេសយើងដែលផលិតបាននូវកាហ្វេប្រកបដោយគុណភាព ហើយចូលរួមផ្គត់ផ្គង់ក្នុងស្រុកផង និងអាចមានលទ្ធភាពឈានទៅលក់នៅក្រៅប្រទេស ដែលអាចរកចំណូលដល់កសិករផងដែរ»។
អ្នកស្រី ផ្លឹក ភីរុំ តំណាងបណ្តាញសហគមន៍ជនជាតិដើមភាគតិចពូនងក្នុងខេត្តមណ្ឌលគិរីមិនទាន់បានដឹងពីការវាយតម្លៃទទួលស្គាល់គុណភាព កាហ្វេខេត្តមណ្ឌលគិរី ជាកាហ្វេរ៉ូប៊ូស្តាប្រណិតនោះទេ។ ទោះយ៉ាងណាលោកស្រីសង្កេតឃើញថា នាពេលបច្ចុប្បន្ននេះមានពលរដ្ឋជនជាតិដើមភាគតិចកាន់តែច្រើនចាប់អារម្មណ៍ដាំដំណាំកាហ្វេជាលក្ខណៈគ្រួសារ។
លោកស្រីថ្លែងថា៖«ខ្ញុំឃើញមានជនជាតិដើមយើងដាំកាន់តែច្រើន។ គ្រួសារខ្លះ ដាំ១ ឬ២ហិកតាក៏មាន ទៅតាមតម្រូវការទីផ្សារ។ អ្នកខ្លះ ឃើញកំពុងតែបណ្តុះកាហ្វេផងដែរ»៕
