ភ្នំពេញៈ មន្ត្រីជាន់ខ្ពស់បានអំពាវនាវដល់វិនិយោគិនសិង្ហបុរីដែលមានវត្តមានស្រាប់នៅកម្ពុជាពង្រីកការធ្វើអាជីវកម្មរបស់ខ្លួន និងជំរុញវិនិយោគិនដែលមានសក្ដានុពលរបស់ប្រទេសនេះពិចារណាជ្រើសរើសកម្ពុជាជាគោលដៅវិនិយោគបន្ទាប់។
ការអំពាវនាវនេះធ្វើឡើងដោយ លោក ជា វុទ្ធី អគ្គលេខាធិការគណៈកម្មាធិការវិនិយោគនៃក្រុមប្រឹក្សាអភិវឌ្ឍន៍កម្ពុជា (CDC) ក្នុងពិធីបើកកម្មវិធីពិព័រណ៍ធុរកិច្ចសិង្ហបុរី នាថ្ងៃទី១៦ ខែសីហា នៅរាជធានីភ្នំពេញ ដែលមានការចូលរួមពីវិនិយោគិន និងធុរជនសរុបប្រមាណ ១២០នាក់។
លោកលើកឡើងថា ប្រទេសសិង្ហបុរីគឺជាដៃគូពាណិជ្ជកម្ម និងវិនិយោគដ៏សំខាន់មួយរបស់កម្ពុជា។ លោកបានដកស្រង់ទិន្នន័យCDC ដែលបញ្ជាក់ថា ប្រភពទុនវិនិយោគពីសិង្ហបុរីស្ថិតក្នុងចំណោមប្រភពទុនវិនិយោគផ្ទាល់ពីបរទេសឈានមុខទាំង១០ បានបណ្ដាក់ទុនវិនិយោគសរុបប្រមាណ ៤០០លានដុល្លារអាមេរិក ក្នុងរយៈពេល៥ឆ្នាំកន្លងទៅនេះ។
លោក ជា វុទ្ធី លើកឡើងថា ការវិនិយោគរបស់សិង្ហបុរី បានដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ចកម្ពុជា ជាពិសេសក្នុងវិស័យកម្មន្តសាល អចលនទ្រព្យ និងបដិសណ្ឋារកិច្ច។ វត្តមានក្រុមហ៊ុនធំៗ ដូចជា Keppel Infrastructure និង Changi Airport International ក៏ដូចជាម៉ាកល្បីៗ ដូចជា Charles & Keith, Ya Kun និង 800super បានបង្ហាញថា ការវិនិយោគរបស់សិង្ហបុរីពិតជាបានជំរុញការអភិវឌ្ឍរបស់កម្ពុជា។
លោកអគ្គលេខាធិការបានលើកឡើងចំណុចមួយចំនួនដែលបានទាក់ទាញវិនិយោគិនសិង្ហបុរីមកបោះទីតាំងនៅកម្ពុជា ដូចជា កត្តាមូលដ្ឋានសេដ្ឋកិច្ចរឹងមាំរបស់កម្ពុជា, កម្លាំងពលកម្មវ័យក្មេងនិងមានជំនាញ, ទីតាំងយុទ្ធសាស្ត្រដែលស្ថិតនៅចំកណ្ដាលនៃមហាអនុតំបន់មេគង្គនិងតំបន់អាស៊ីអាគ្នេយ៍, និងកិច្ចព្រមព្រៀងពាណិជ្ជកម្មទ្វេភាគីនិងពហុភាគីជាមួយទីផ្សារធំៗ។
លោកថ្លែងថា៖ «វិនិយោគិនទទួលបានផលប្រយោជន៍ពីភាពងាយស្រួលក្នុងការប្រើប្រាស់ថាមពលស្អាត និងបៃតង ដោយប្រមាណ៥៧ភាគរយនៃការផ្គត់ផ្គង់អគ្គិសនីរបស់កម្ពុជា គឺទទួលបានពីប្រភពថាមពលកកើតឡើងវិញ»។
លោក ជា វុទ្ធី បន្ថែមថា រាជរដ្ឋាភិបាលបានវិនិយោគយ៉ាងច្រើននៅក្នុងគម្រោងហេដ្ឋារចនាសម្ព័ន្ធសំខាន់ៗដូចជា ផ្លូវល្បឿនលឿនភ្នំពេញ-ព្រះសីហនុ ដែលកំពុងប្រតិបត្តិការ និងគម្រោងនាពេលខាងមុខ ដូចជាផ្លូវល្បឿនលឿនភ្នំពេញ-បាវិត និងផ្លូវល្បឿនលឿនភ្នំពេញ-សៀមរាប-ប៉ោយប៉ែត ដែលតភ្ជាប់ពីកម្ពុជាទៅវៀតណាម និងថៃរៀងគ្នា ដែលនឹងជួយសម្រួលដល់ការអនុវត្តយុទ្ធសាស្ត្រ «ប្រទេសបូក» របស់អាជីវកម្ម។
លោកលើកឡើងថា កម្ពុជាបច្ចុប្បន្នមានតំបន់សេដ្ឋកិច្ចពិសេសចំនួន២៦ដែលកំពុងដំណើរការ ដោយបានស្រូបទាញគម្រោងវិនិយោគប្រមាណជាង ៧០០ ក្នុងទំហំទុនវិនិយោគសរុបប្រមាណជាង២៨ប៊ីលាន ដុល្លារអាមេរិក និងបង្កើតការងារបានជាង ១៨០ពាន់កន្លែង។
លោកលើកឡើងថា កម្មវិធីពិព័រណ៍នេះផ្ដល់ឱកាសដល់ធុរជនសិង្ហបុរីក្នុងការតាំងបង្ហាញផលិតផល និងសេវាកម្មប្រកបដោយនវានុវត្តន៍, ស្វែងរកកិច្ចសហការជាមួយដៃគូធុរកិច្ចកម្ពុជា, និងពង្រឹងទំនាក់ទំនងរវាងកម្ពុជា និងសិង្ហបុរីផងដែរ។
យោងតាមរបាយការណ៍អគ្គនាយកដ្ឋានគយ និងរដ្ឋាករកម្ពុជាបានឱ្យដឹងថា ក្នុងរយៈពេល៧ខែដើមឆ្នាំ២០២៤ ពីខែមករា ដល់ខែកក្កដា ការនាំចេញរបស់កម្ពុជាទៅកាន់ប្រទេសសិង្ហបុរីមានទំហំទឹកប្រាក់៥៩លានដុល្លារ កើនឡើង១២៦ភាគរយ ហើយការនាំចូលមាន៥១១លានដុល្លារ កើនឡើង១៧ភាគរយ ខណៈទំហំពាណិជ្ជកម្មរវាងប្រទេសទាំងពីរមាន៥៧០លានដុល្លារ កើនឡើង២៣ភាគរយ បើធៀបនឹងរយៈពេលដូចគ្នាក្នុងឆ្នាំ២០២៣៕