![](https://pppkhmer.sgp1.digitaloceanspaces.com/image/main/20248/19_8_2024_18_3_2024_3_story_2.jpg)
សកម្មភាពលើកដាក់ទំនិញនៅផែស្វយ័តក្រុងព្រះសីហនុកន្លងមក។ ហុង មិនា
ភ្នំពេញៈ ក្នុងរយៈពេល ៧ខែក្នុងឆ្នាំ២០២៤ ពីខែមករា ដល់ខែកក្កដា ការនាំចេញទំនិញរបស់កម្ពុជាទៅកាន់ប្រទេសកូរ៉េខាងត្បូងគិតជាទឹកប្រាក់មានជាង ១៨៧លានដុល្លារ កើន ១៤ភាគរយ ខណៈការនាំចូលពីប្រទេសនេះមានជាង ២៩១លានដុល្លារ កើន ៣,២ភាគរយ បើធៀបរយៈពេលដូចគ្នាក្នុងឆ្នាំ២០២៣។ នេះបើយោងតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា។
របាយការណ៍បានឱ្យដឹងថា ក្នុងរយៈពេល៧ ខែនេះ ទំហំពាណិជ្ជកម្មរវាងប្រទេសទាំងពីរមានជាង ៤៧៩លានដុល្លារ កើន ៧,២ភាគរយធៀបរយៈពេលដូចគ្នាក្នុងឆ្នាំ២០២៣។
ក្នុងរយៈពេល ៧ខែដំបូងក្នុងឆ្នាំ ២០២៣ ទំហំពាណិជ្ជកម្មរវាងប្រទេសទាំងពីរមានជាង ៤៤៧លានដុល្លារ ដែលក្នុងនោះការនាំចេញទៅកាន់ប្រទេសនេះមានជាង ១៦៤លានដុល្លារ ហើយការនាំចូលមានជាង ២៨២លានដុល្លារ។
ក្នុងជំនួបជាមួយលោកនាយករដ្ឋមន្ត្រី ហ៊ុន ម៉ាណែត កាលពីសប្តាហ៍មុន លោក ផាក ជុងវុក (Park Jung-Wook) ឯកអគ្គរដ្ឋទូតកូរ៉េខាងត្បូងប្រចាំកម្ពុជាបានកោតសរសើរកិច្ចខិតខំប្រឹងប្រែងរបស់លោក ហ៊ុន ម៉ាណែត ក្នុងការធ្វើឱ្យកាន់តែប្រសើរឡើងបរិយាកាសអំណោយផលដល់ការវិនិយោគនៅកម្ពុជាតាមរយៈការដាក់ចេញនូវគោលនយោបាយលើកទឹកចិត្ត និងយន្តការសម្របសម្រួលដើម្បីបង្កើនទំនុកចិត្តនិងជោគជ័យរបស់វិនិយោគិនកូរ៉េខាងត្បូងដែលបណ្ដាក់ទុននៅកម្ពុជា។ នេះបើយោងតាមបណ្ដាញសង្គមលោកនាយករដ្ឋមន្ត្រី។
បណ្ដាញសង្គមនេះបានដកស្រង់សំដីលោក Park Jung-Wook ថា វិនិយោគិនកូរ៉េខាងត្បូងមានការចាប់អារម្មណ៍ចំពោះប្រទេសកម្ពុជា បន្ទាប់ពីដំណើរទស្សនកិច្ចផ្លូវការរបស់លោក ហ៊ុន ម៉ាណែត ទៅកាន់កូរ៉េខាងត្បូងកាលពីខែឧសភា, សិក្ខាសាលា, និងវេទិកាធុរកិច្ចជាបន្តបន្ទាប់។
បណ្ដាញសង្គមដដែលបន្តថា៖ «ឯកឧត្ដមឯកអគ្គរដ្ឋទូត [លោក Park Jung-Wook] បានប្ដេជ្ញាខិតខំប្រឹងប្រែងជំរុញទំនាក់ទំនងសាធារណរដ្ឋកូរ៉េ-កម្ពុជាឱ្យកាន់តែរីកចម្រើនថែមទៀត តាមរយៈកិច្ចសម្របសម្រួលយ៉ាងជិតស្និទ្ធជាមួយនឹងក្រសួង-ស្ថាប័នពាក់ព័ន្ធរបស់កម្ពុជា ដើម្បីអនុវត្តប្រកបដោយប្រសិទ្ធភាពនូវកិច្ចព្រមព្រៀង និងគំនិតផ្ដួចផ្ដើមនានា ដែលបានសម្រេចក្នុងដំណើរទស្សនកិច្ចផ្លូវការខាងលើ»។
ទំនាក់ទំនងរវាងប្រទេសទាំងពីរត្រូវបានតម្កើងកម្រិតដល់ «ភាពជាដៃគូយុទ្ធសាស្ត្រ» ក្នុងអំឡុងពេលដំណើរទស្សនកិច្ចលោក ហ៊ុន ម៉ាណែត ទៅកាន់កូរ៉េខាងត្បូង។
ថ្លែងក្នុងពិធីបើកវេទិកាធុរកិច្ចរវាងកម្ពុជា និងកូរ៉េខាងត្បូង នៅទីក្រុងសេអ៊ូល (Seol) ប្រទេសកូរ៉េខាងត្បូង កាលខែឧសភា លោក ហ៊ុន ម៉ាណែត បានកត់សម្គាល់ពីការកើនឡើងនៃវត្តមានគម្រោងវិនិយោគ និងសហគ្រាសពាណិជ្ជកម្មកូរ៉េ ទាំងតូច ទាំងធំនៅកម្ពុជា ហើយពាណិជ្ជកម្មទ្វេភាគីបានកើនឡើងលើស ១ ពាន់លានដុល្លារអាមេរិក ក្នុងឆ្នាំ ២០២៣ ដោយគ្រប់ដណ្ដប់វិស័យវាយនភណ្ឌ ផលិតផលធ្វើដំណើរ កង់ គ្រឿងបន្លាស់អេឡិចត្រូនិក កសិកម្ម និងការកែច្នៃផលិតផលកសិកម្ម។
លោកថ្លែងថា៖ «ក្រុមហ៊ុនកូរ៉េបាន និងកំពុងដើរតួនាទីជាតួអង្គគន្លឹះ ក្នុងទិដ្ឋភាពសេដ្ឋកិច្ចរបស់កម្ពុជា។ ការចូលរួមរបស់ក្រុមហ៊ុនកូរ៉េនៅលើវិស័យចម្រុះ ដូចជា កម្មន្តសាល អចលនទ្រព្យ ហេដ្ឋារចនាសម្ព័ន្ធ កសិកម្ម និងសេវាកម្មហិរញ្ញវត្ថុ បាន និងកំពុងជួយជំរុញកំណើនសេដ្ឋកិច្ច និងពន្លឿនការអភិវឌ្ឍវិស័យឧស្សាហកម្មនៅកម្ពុជា»។
លោក ស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជា (CDC) បានលើកឡើងអំពីសក្ដានុពលវិជ្ជមានរបស់កម្ពុជា រួមមាន សុខសន្តិភាព និងស្ថិរភាពនយោបាយ, លំនឹងម៉ាក្រូសេដ្ឋកិច្ច, កម្លាំងពលកម្មវ័យក្មេងដែលរួចរាល់សម្រាប់បរិវត្តកម្មឌីជីថល, ការគាំទ្រពីរដ្ឋាភិបាលដល់ការរីកលូតលាស់វិស័យធុរកិច្ចឯកជន, បែបបទនៃការវិនិយោគមានភាពបត់បែន និងអនុគ្រោះ, និងហេដ្ឋារចនាសម្ព័ន្ធអន្តរមធ្យោបាយដែលបាន និងកំពុងអភិវឌ្ឍឱ្យកាន់តែមានភាពសម្បូរបែប និងប្រទាក់ក្រឡាគ្នា។
ក្នុងកិច្ចពិភាក្សាស្តីពី «បរិយាកាសសេដ្ឋកិច្ច និងកាលានុវត្តភាពធុរកិច្ច នៅកម្ពុជា» កាលពីដើមខែសីហា លោកឧបនាយករដ្ឋមន្ត្រី ស៊ុន ចាន់ថុល បានបញ្ជាក់អំពីចក្ខុវិស័យ និងបេសកកម្មរបស់CDC ក្នុងការផ្សព្វផ្សាយអំពីបច្ចុប្បន្នភាពបរិយាកាសវិនិយោគ និងកាលានុវត្តភាពនៃការធ្វើធុរកិច្ចនៅកម្ពុជាទៅកាន់ពិភពលោក សំដៅគោះទ្វារទាក់ទាញវិនិយោគិនឱ្យងាកមកពិចារណា និងសិក្សាស្វែងយល់បន្ថែមពីឱកាសក្នុងការមកបណ្ដាក់ទុនវិនិយោគផងដែរ៕