សិក្ខាសាលា និងវគ្គបណ្តុះបណ្តាលរយៈពេល ១០ថ្ងៃ ស្តីពី «ការធ្វើសវនកម្មប្រព័ន្ធគ្រប់គ្រង» ធ្វើឡើងពីថ្ងៃទី១៩ ដល់ថ្ងៃទី៣០ ខែសីហា រៀបចំដោយមជ្ឈមណ្ឌលផលិតភាពជាតិកម្ពុជា (NPCC)។ សហការី
ភ្នំពេញ៖ មជ្ឈមណ្ឌលផលិតភាពជាតិកម្ពុជា (NPCC) នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានចាប់ផ្តើមសិក្ខាសាលា និងវគ្គបណ្តុះបណ្តាលរយៈពេល ១០ថ្ងៃ ស្តីពី «ការធ្វើសវនកម្មប្រព័ន្ធគ្រប់គ្រង» ក្នុងគោលបំណងជំរុញផលិតភាព និងការប្រកួតប្រជែងរបស់សហគ្រាសកម្ពុជា។
កម្មវិធីដែលប្រព្រឹត្តទៅពីថ្ងៃទី១៩ ដល់ថ្ងៃទី៣០ ខែសីហា គូសបញ្ជាក់អំពីតួនាទីសំខាន់ដែលសវនកម្មមានប្រសិទ្ធភាពក្នុងការធានាការអនុលោមតាមស្តង់ដាអន្តរជាតិ និងការកែលម្អដំណើរការនៃធុរកិច្ចនៅកម្ពុជា។
ក្នុងពិធីបើកសិក្ខាសាលា លោក ភោគ សុវណ្ណរិទ្ធ រដ្ឋលេខាធិការក្រសួង និងជានាយក APO ប្រចាំកម្ពុជា បានលើកឡើងពីការប្តេជ្ញាចិត្តរបស់ក្រសួងក្នុងការកសាងហេដ្ឋារចនាសម្ព័ន្ធគុណភាពជាតិដ៏រឹងមាំ។
លោកកត់សម្គាល់ថា ហេដ្ឋារចនាសម្ព័ន្ធនេះមានសារៈសំខាន់សម្រាប់ការជំរុញកំណើនសេដ្ឋកិច្ចរបស់ប្រទេស ដោយធានាថា សហគ្រាសក្នុងស្រុកអាចបំពេញតាមស្តង់ដាអន្តរជាតិ ដូចជា ISO 9001, ISO 22000, ISO 14001 និង ISO 45001។
លោក សុវណ្ណរិទ្ធ បញ្ជាក់ថា៖ «សហគ្រាសសិប្បកម្មដែលអនុវត្តប្រព័ន្ធគ្រប់គ្រងពុំអាចប្រកាសដោយខ្លួនឯងថា អនុវត្តដោយជោគជ័យ ឬអនុលោមតាមស្តង់ដា ១០០ភាគរយបានទេ។ ប៉ុន្តែ សវនករឯករាជ្យ អាចដើរតួនាទីសំខាន់ ប្រកាសថា ក្រុមហ៊ុនបានអនុលោមតាម Requirements របស់ស្តង់ដាបានកម្រិតណា»។
លោកបានបន្ថែម ថា៖ «សវនករឯករាជ្យខាងក្រៅ ពិតជាសំខាន់ តែក៏ពឹងលើ សវនករខាងក្នុង (Internal auditor) លើការ តាម ដាន វាយ តម្លៃប្រសិទ្ធភាពនៃការ អនុវត្តប្រព័ន្ធទាំងមូលនៅក្នុងក្រុមហ៊ុនផងដែរ។ ជាលទ្ធផល របាយការណ៍សវនកម្មច្បាស់លាស់ និងសុក្រឹត នឹងជួយក្រុមហ៊ុនកែ លម្អជាបន្តបន្ទាប់នូវប្រព័ន្ធឬកម្មវិធីឬប្រតិបត្តិការនានានាំទៅរកផលិតភាពកាន់តែខ្ពស់»។
គោលបំណងចម្បងរបស់សិក្ខាសាលា រួមមានការបង្កើនសមត្ថភាពមន្ត្រីសាធារណៈក្នុងការលើកកម្ពស់ការអនុវត្តប្រព័ន្ធគ្រប់គ្រងអន្តរជាតិ ការពង្រឹងសមត្ថភាពបុគ្គលិក NPCC ក្នុងការផ្តល់សេវាសវនកម្ម និងការពង្រីកក្រុមអ្នកប្រឹក្សា និងគ្រូបណ្តុះបណ្តាលដែលមានសមត្ថភាព។
កិច្ចខិតខំប្រឹងប្រែងទាំងនេះត្រូវបានមើលឃើញថាជាគន្លឹះក្នុងការធានាថា សហគ្រាសកម្ពុជាមិនត្រឹមតែអាចអនុវត្តប៉ុណ្ណោះទេ ថែមទាំងអាចរក្សាបាននូវស្តង់ដាខ្ពស់នៃការអនុវត្តការគ្រប់គ្រងផងដែរ។
លោក អ៊ុំ សេរីវុទ្ធ ប្រធានមជ្ឈមណ្ឌលផលិតភាពជាតិ (NPCC) នៃក្រសួងឧស្សាហកម្ម បានពន្យល់យ៉ាងលម្អិតអំពីគោលដៅនៃសិក្ខាសាលាក្នុងអំឡុងពេលសុន្ទរកថារបស់លោក។
លោកបាននិយាយថា៖ «សិក្ខាសាលានេះមានគោលបំណងជួយក្រុមហ៊ុន សហគ្រាសផលិត និងអ្នកផ្តល់សេវាឱ្យយល់ពីសារៈសំខាន់នៃសវនកម្មគ្រប់គ្រងប្រព័ន្ធ»។
លោកបានពន្យល់ថា៖ «ផលិតភាពក៏មានន័យថា ការគ្រប់គ្រងប្រព័ន្ធមួយដោយប្រើប្រាស់ធាតុចូល និងធនធាន និងធាតុចេញ ឱ្យមានប្រសិទ្ធភាព នៃអង្គភាពមួយ»។
លោកបានលើកឡើងពីកិច្ចខិតខំប្រឹងប្រែងជាបន្តបន្ទាប់របស់ NPCC ក្នុងការលើកកម្ពស់ផលិតភាពនៅទូទាំងប្រទេសតាមរយៈគំនិតផ្តួចផ្តើមផ្សេងៗ រួមទាំងសិក្ខាសាលាបណ្តុះបណ្តាល សេវាប្រឹក្សាយោបល់ និងសន្និសីទជាតិ និងអន្តរជាតិ។
លោក សេរីវុទ្ធ បានឱ្យដឹងថា៖ «កន្លងមក NPCC បានបំពេញជោគជ័យនូវគម្រោងរបស់អង្គការផលិតភាពអាស៊ីជាច្រើន ជាពិសេស គម្រោងក្រុមហ៊ុនគំរូ ISO9001:2015, ISO22000:2005 LEAN ដែលភាគច្រើនក្រុមហ៊ុន សហគ្រាសចូលរួមគម្រោងនេះ សុទ្ធតែទទួលជោគជ័យមួយកម្រិតទៀត នៃអាជីវកម្មរបស់ពួកគេ»។
លោកបានបន្ដថា៖ «យើងក៏រៀបចំវគ្គបណ្តុះបណ្តាល ដូចជាប្រព័ន្ធគ្រប់គ្រងបរិស្ថានជាដើម ទៅដល់ក្រុមហ៊ុន សហគ្រាស សិប្បកម្ម កន្លងមកផងដែរ»។
យ៉ាងណាមិញ ការធ្វើសវនកម្មគ្រប់គ្រងប្រព័ន្ធគឺជាតម្រូវការចាំបាច់នៅក្នុងក្រុមហ៊ុន សហគ្រាស ដែល បានអនុវត្តប្រព័ន្ធស្តង់ដារអន្តរជាតិ ដើម្បីធានានូវការអនុវត្តត្រឹមត្រូវ និងមានប្រសិទ្ធភាពតាមរយៈការផ្ទៀងផ្ទាត់នៃការធ្វើសនវកម្ម។
សិក្ខាសាលានេះក៏នឹងទទួលបានអត្ថប្រយោជន៍ពីជំនាញរបស់អ្នកជំនាញម៉ាឡេស៊ីមកពីអង្គការផលិតភាពអាស៊ី (APO) ដែលមានបទពិសោធន៍ច្រើនក្នុងការធ្វើសវនកម្មបែបនេះ៕
