ភ្នំពេញៈ បើទោះបីជាដំណាំស្រូវខ្លះកំពុងតែជួបប្រទះការប្រែប្រួលអាកាសធាតុ និងសត្វល្អិតបំផ្លាញមួយចំនួនយ៉ាងណាក៏ដោយ ក៏បញ្ហាទាំងនោះមិនបង្កផលប៉ះពាល់ទៅដល់ផលិតកម្មស្រូវ និង ការនាំចេញស្រូវអង្ករនោះដែរក្នុងឆ្នាំ២០២៤នេះ។
ការបង្កបង្កើនផលដំាណំាស្រូវក្នុងឆ្នាំនេះ បាននឹងកំពុងជួបប្រទះនូវបញ្ហាមួយចំនួនដូចជា សត្វល្អិតបំផ្លាញ គ្រោះទឹកជំនន់ គ្រោះរាំងស្ងួត និងកសិករខ្លះប្រើប្រាស់ថ្នាំកសិកម្មមិនត្រឹមត្រូវតាមការណែនាំជាដើម។ ទោះយ៉ាងណា អនុរដ្ឋលេខាធិការ និងជាអ្នកនាំពាក្យ ក្រសួងកសិកម្ម រុក្ខាប្រមាញ់ និងនេសាទ លោក ឃឹម ហ្វីណង់ បានលើកឡើងថា កត្តាទាំងអស់នេះមិនបង្កផលប៉ះពាល់ដល់ផលិតកម្ម និងបរិមាណនាំចេញស្រូវ ឬអង្ករបស់កម្ពុជានោះឡើយ។
លោកមានប្រសាសន៍ថា៖ «យើងមិនមានការព្រួយបារម្ភពាក់ព័ន្ធនឹងការធ្លាក់ចុះនៃផលិតកម្មស្រូវ ហើយនឹងការនាំចេញអង្កររបស់យើងទេ។ យើងឃើញថា ផលប៉ះពាល់វាមាន ប៉ុន្តែវាស្ថិតក្នុងកម្រិតមួយតិចតួចនៅឡើយ។ មិនថា ការប៉ះពាល់ពីរុយស ឬក៏គ្រោះទឹកជំនន់ទេ គិតជាភាគរយ គឺតិចទេ»។
លោកបន្ថែមថា៖ «ផលប៉ះពាល់វាខុសពីការខូចខាត។ ផលប៉ះពាល់មានតែការខូតខាត យើងអត់ទាន់សន្និដ្ឋានបានទេ។ ដូចប៉ុន្មានថ្ងៃនេះ មានគ្រោះរាំងស្ងួត បើវាបន្តអត់ភ្លៀង អាហ្នឹងបានឈានដល់ដំណាក់កាលខូចខាត។ បើតាមការព្យាការណ៍នឹងមានភ្លៀងធ្លាក់នៅប៉ុន្មានថ្ងៃខាងមុខនេះ។ ដូច្នេះយើងនឹងតាមមើលដូចគ្នា»។
លោកបន្តថា នាពេលបច្ចុប្បន្ននេះ មន្រ្តីរបស់ក្រសួងកសិកម្មកំពុងតែចុះធ្វើកិច្ចអន្តរាគមន៍នូវគ្រប់ទីកន្លែង ដែលមានផលប៉ះពាល់ពីការប្រែប្រួលអាកាសធាតុ និងការបំផ្លាញពីសត្វល្អិតចង្រៃទាំងនោះ។
លោកបញ្ជាក់ថា៖ «ហើយក្រសួងក៏កំពុងតែបន្តការតាមដានមើល។ គ្រាន់តែយើងគិតថា វាមិនប៉ះពាល់ដល់បរិមាណនាំចេញនោះទេ ដោយសារតែ ផលប៉ះពាល់ និងការខូចខាតមានទំហំតិច ហើយយើងបានបង្កើនផលិតកម្មយើងតាំងពីដើមឆ្នាំរួចទៅហើយ»។
កម្ពុជាបាននាំចេញអង្ករចំនួន ៣៧៩ ៥៤៦ តោន គិតជាទឹកប្រាក់បានចំនួន ២៨០លានដុល្លារសហរដ្ឋអាមេរិក ក្នុងរយៈពេល៧ខែ នៃឆ្នាំ ២០២៤នេះ។ ការនាំចេញនោះគឺធ្វើឡើងតាមរយៈក្រុមហ៊ុននាំចេញអង្ករចំនួន ៥៣ក្រុមហ៊ុន ទៅកាន់គោលដៅចំនួន ៦៤។ ក្នុងនោះទៅកាន់បណ្តាប្រទេសនៅក្នុងតំបន់អឺរ៉ុបចំនួន ២៦ ដែលមានបរិមាណអង្ករចំនួន ១៨៦ ៣៧៧តោន គិតជាទឹកប្រាក់ចំនួន ១៤៤.៩២លានដុល្លារសហរដ្ឋអាមេរិក។
ក្រៅពីនោះ នាំចេញទៅកាន់ប្រទេសចិន រួមទាំង ហុងកុង និង ម៉ាកាវ ចំនួន ៧៧ ២០៤តោន គិតជាទឹកប្រាក់ចំនួន ៤៨.២៨លានដុល្លារសហរដ្ឋអាមេរិក, ប្រទេសក្នុងអាស៊ាន រួមទាំង ទីម័រខាងកើត ចំនួន ៧ប្រទេសបានបរិមាណចំនួន ៧៧ ៩៣៣ តោន គិតជាទឹកប្រាក់ចំនួន ៥៣.៥៨លានដុល្លារសហរដ្ឋអាមេរិក និងទៅកាន់គោលដៅ ២៨ប្រទេសផ្សេងទៀតមាន អាហ្វ្រិក មជ្ឈឹមបូព៌ា អាមេរិក កាណាដា អូស្ត្រាលី ញ៉ូហ្សេឡេន ។ល។ បានចំនួន ៣៨ ០៣២ តោន គិតជាទឹកប្រាក់ចំនួន ៣៣.១៩លានដុល្លារសហរដ្ឋអាមេរិក។
លើសពីនោះ ប្រទេសកម្ពុជាក៏បាននាំចេញស្រូវចំនួន ២ ៧១១ ១៧៩តោនទៅកាន់ប្រទេសជិតខាង ដែលគិតជាទឹកប្រាក់បានប៉ាន់ប្រមាណជាង ៧៨៤,៦០លានដុល្លារសហរដ្ឋអាមេរិក។ ក្នុងនោះ ៨០.៥០ភាគរយ បាននាំចេញដោយឆ្លងកាត់ការស្នើសុំការបញ្ជាក់ឯកសារនាំចេញពីអាជ្ញាធរមានសមត្ថកិច្ច។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក សុទ្ធ គឹមកុលមុនី បានឱ្យដឹងថា ក្រៅពីរងគ្រោះដោយសារតែជំនន់ទឹកភ្លៀងនាពេលកន្លងមកថ្មីៗនេះ ខេត្តមួយចំនួនក៏កំពុងតែទទួលរងផលប៉ះពាល់ពីគ្រោះរាំងស្ងួតផងដែរ។ ក្នុងនោះ ខេត្តដែលប៉ះពាល់ធ្ងន់ធ្ងរខ្លាំងមាន ខេត្តបន្ទាយមានជ័យ និងខេត្តឧត្តរមានជ័យ។
លោកបន្តថា ខេត្តបន្ទាយមានជ័យ មកដល់ពេលនេះ ដំណាំស្រូវដែលប៉ះពាល់សរុបមាន ២៧ ០៣៣ហិកតា ដែលបណ្តាលឱ្យខូចខាតសរុបចំនួន ២ ៥២៣ហិកតា លើផ្ទៃដីបង្កបង្កើនផលសរុបទូទាំងខេត្តចំនួន ២៧០ ១៦២ហិកតា។ លើសពីនោះ ដំណាំពោតសរុប ៤៦១ហិកតាក៏ត្រូវបានប៉ះពាល់ និងខូចចំនួន ២២៣ហិកតាផងដែរ។
លោកបញ្ជាក់ថា៖ «ខាងមន្ទីរធនធានទឹក និងជំនាញអាជ្ញាធរពាក់ព័ន្ធកំពុងជួយអន្តរាគមន៍។ នៅតំបន់ណាដែលមានទឹក គឺបូមដាក់។ ក្នុងរយៈពេល ៤ ឬ ៥ថ្ងៃនេះ ប្រសិនបើពុំមានភ្លៀងធ្លាក់ទេ តំបន់ដែលអត់មានប្រភពទឹក គឺអាចនឹងប៉ះពាល់ និងខូចខាតបន្តកើនឡើងទៀត។ តែក្នុងរយៈពេលនេះ បើមានភ្លៀងធ្លាក់នឹងអាចជួយសង្រ្គោះស្រូវបានប្រសើរឡើងវិញខ្លះ»។
រីឯ នៅខេត្តឧត្តរមានជ័យវិញ ផ្ទៃដីដំណាំស្រូវសរុបចំនួន ៤ ៣៩១ហិកតា ស្មើនឹង២១,៩២ភាគរយលើផ្ទៃដីបង្កបង្កើនផលសរុប ២០ ០៣០ហិកតារងផលប៉ះពាល់ និងខូតទាំងស្រុងចំនួន ៥៩០ហិកតា។ មន្រ្តីអាជ្ញាធរពាក់ព័ន្ធក៏បានបូមទឹកសង្រ្គោះស្រូវបានចំនួន ៨០០ហិកតាផងដែរ៕