រោងចក្រផលិតកង់ឡាន នៅខេត្តព្រះសីហនុ កាលពីឆ្នាំមុន។ រូបថត រដ្ឋបាលខេត្តព្រះសីហនុ
ខេត្តកំពង់ស្ពឺទទួលបានគម្រោងវិនិយោគច្រើនជាងគេរហូតដល់ទៅ ៩៥ គម្រោងក្នុងចំណោមគម្រោងវិនិយោគចំនួន ជិត៤០០ នៅក្នុងរយៈពេលមួយឆ្នាំចុងក្រោយដែលមានទុនវិនិយោគសរុបប្រមាណជាង ៧,៥ពាន់លានដុល្លារអាមេរិក។
ក្នុងរយៈពេល១ឆ្នាំ គិតចាប់ពីខែកញ្ញា ឆ្នាំ២០២៣ ដល់ខែសីហា ឆ្នាំ២០២៤ ដែលជាឆ្នាំដំបូងនៃរាជរដ្ឋាភិបាលដឹកនាំដោយលោកនាយករដ្ឋមន្ត្រី ហ៊ុន ម៉ាណែត ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងថ្មី និងគម្រោងពង្រីកផលិតកម្មចំនួន ៣៩១ គម្រោង មានទុនវិនិយោគប្រមាណជាង ៧,៥ពាន់លានដុល្លារអាមេរិក និងអាចបង្កើតការងារបានប្រមាណជាង ៣៤ ម៉ឺនកន្លែង។ នេះបើតាមសេចក្ដីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជាកាលពីថ្ងៃទី២៨ ខែសីហា។
ចំនួនគម្រោងវិនិយោគនេះបង្ហាញពីការកើនឡើងចំនួន ១៦៨ គម្រោង ខណៈទុនវិនិយោគក៏បានកើនឡើងចំនួន ៤៦៧២លានដុល្លារ ស្មើនឹងប្រមាណ១៦១ ភាគរយ ធៀបនឹងរយៈពេលដូចគ្នា១ឆ្នាំចុងក្រោយ។
ក្រុមប្រឹក្សាអភិវឌ្ឍន៍កម្ពុជាបានថ្លែងថា៖ «ការកើនឡើងយ៉ាងគំហុកនេះ គឺដោយសារវត្តមាននៃគម្រោងថ្មីនៅក្នុងវិស័យហេដ្ឋារចនាសម្ព័ន្ធ, វិស័យឧស្សាហកម្ម, វិស័យទេសចរណ៍ និងគម្រោងបង្កើតតំបន់សេដ្ឋកិច្ចពិសេស»។
ក្នុងចំណោមគម្រោងដែលលេចធ្លោរួមមានទាំងអាជីវកម្មសណ្ឋាគារផ្កាយ៥ មានបន្ទប់ចំនួន ២៨៧០ និងមជ្ឈមណ្ឌលពាណិជ្ជកម្ម នៅក្រុងព្រះសីហនុ ខេត្តព្រះសីហនុ ក្នុងទុនវិនិយោគប្រមាណ៥៧៤លានដុល្លារ និងអាចបង្កើតការងារបានចំនួន៣៨៦០កន្លែង។ លើសពីនេះក៏មានគម្រោងសាងសង់វារីអគ្គិសនីស្ទឹងមេទឹក មានអានុភាព១៥០ មេហ្គាវ៉ាត់ តាមរូបភាពសាងសង់ ប្រតិបត្តិការ និងផ្ទេរ (BOT) នៅស្ទឹងមេទឹក ស្រុកមណ្ឌលសីមា ខេត្តកោះកុង ក្នុងទុនវិនិយោគជាង ៤៤០លានដុល្លារផងដែរ។
បន្ថែមពីលើនេះ គម្រោងវិនិយោគនៅក្នុងតំបន់សេដ្ឋកិច្ចពិសេសក៏មានការកើនឡើងដែរ ដែលមានទឹកប្រាប់ជាង១ពាន់លានដុល្លារ និងបង្កើតការងារបានជាច្រើនពាន់កន្លែង។
ក្រុមប្រឹក្សាអភិវឌ្ឍន៍កម្ពុជាបញ្ជាក់ថា៖ «ក្នុងរយៈពេលពេញមួយឆ្នាំនេះ ប្រភពទុនវិនិយោគមកពីប្រទេសចិនឈរនៅលំដាប់លេខរៀងទី១ ដោយបានរួមចំណែក ៦០,៤៤ ភាគរយនៃទុនវិនិយោគសរុប ខណៈពេលដែលការវិនិយោគក្នុងស្រុកគ្របដណ្តប់ ៣២,៣១ ភាគរយនៃទុនវិនិយោគសរុប»។
បើគិតពីការវិនិយោគតាមវិស័យវិញ ឧស្សាហកម្មឈរលំដាប់ថ្នាក់ទី១ មាន ៥២ភាគរយ បន្ទាប់មកគឺហេដ្ឋារចនាសម្ព័ន្ធដែលមាន ៣៩ភាគរយ និងទេសចរណ៍ (៨ភាគរយ) ខណៈដែលវិស័យកសិកម្មមាន ២ភាគរយ។
លោក ហុង វណ្ណៈ អ្នកស្រាវជ្រាវផ្នែកសេដ្ឋកិច្ចនៅរាជបណ្ឌិត្យសភាកម្ពុជា ថ្លែងថា កំណើននៃគម្រោងវិនិយោគទាំងនេះបង្ហាញពីបរិបទថ្មីក្រោយកូវីដ១៩ និងក្នុងពេលមានវិបត្តិផ្សេងៗនៅបន្តកើតឡើងនៅលើពិភពលោក។
លោកថ្លែងថា៖ «ការហក់ឡើងនៃគម្រោងវិនិយោគនេះគឺជាមោទនភាពមួយរបស់យើងទាំងអស់គ្នា ដោយសារតែអ្នកវិនិយោគមើលឃើញពីសក្ដានុពល និងឱកាស សុខសន្តិភាព និងជាលទ្ធផលនៃការទូតសេដ្ឋកិច្ចរបស់រដ្ឋាភិបាល និងទំនាក់ទំនងរបស់កម្ពុជាជាមួយប្រទេសដៃគូ និងការប្រឹងប្រែងរបស់កម្ពុជាក្នុងការកែសម្រួលលក្ខខណ្ឌវិនិយោគ ការពង្រីកហេដ្ឋារចនាសម្ព័ន្ធ។ ទាំងអស់នេះធ្វើឲ្យវិនិយោគនៅកម្ពុជា»។
លោកបន្តថា គម្រោងវិនិយោគពីប្រទេសចិនមានចំនួនច្រើនជាងគេដោយសារតែឥទ្ធិពលនៃកិច្ចព្រមព្រៀងក្នុងតំបន់ និងកិច្ចព្រមព្រៀងពាណិជ្ជកម្មសេរីទ្វេភាគីនិងកិច្ចព្រមព្រៀងត្បូងពេជ្រជាដើម។
លោកកត់សម្គាល់ថា ការវិនិយោគចុងក្រោយដែលគួរឲ្យចាប់អារម្មណ៍ផងដែរនោះគឺការផលិតកងឡានដែលមានទុនវិនិយោគជិតដល់ខ្ទង់ពាន់លានដុល្លារ។
លោកថ្លែងថា៖ «ការវិនិយោគមិនថាពីបរទេស ឬដោយវិនិយោគិនក្នុងស្រុកនោះទេ មិនមែនកើតឡើងដោយចៃដន្យទេ។ បើរដ្ឋាភិបាលមិនខំប្រឹង នោះមិនមានអ្នកណាចាប់អារម្មណ៍ចង់វិនិយោគនៅកម្ពុជាទេ។ ដូច្នេះបានថា អ្វីៗគឺកើតចេញពីកិច្ចប្រឹងប្រែង ជាពិសេសទៅលើហេដ្ឋារចនាសម្ព័ន្ធទ្រទ្រង់ ការលើកទឹកចិត្ត និងច្បាប់វិនិយោគដែលមានលក្ខណៈផ្ដល់ឱកាសឲ្យវិនិយោគិនបោះទុនវិនិយោគនៅកម្ពុជា»៕
