![](https://pppkhmer.sgp1.digitaloceanspaces.com/image/main/20248/30_8_2024_30_8_2024_wensheng_chen.jpg)
លោក Wensheng Chen ប្រធានក្រុមហ៊ុនចិន Jiangxi Provincial Building Material Group ថ្លែងក្នុងកិច្ចប្រជុំថ្ងៃទី២៩ សីហា នៅក្រុមប្រឹក្សាអភិវឌ្ឍន៍កម្ពុជា (CDC) នៅភ្នំពេញ។ CDC
ភ្នំពេញៈ ក្រុមហ៊ុនចិន Jiangxi Provincial Building Material Group បានបង្ហាញចំណាប់អារម្មណ៍បណ្ដាក់ទុនវិនិយោគបង្កើតរោងចក្រផលិតស៊ីម៉ងត៍នៅកម្ពុជា ខណៈមន្ត្រីកម្ពុជាលើកឡើងថា គម្រោងនេះនឹងរួមចំណែកជំរុញការអភិវឌ្ឍឧស្សាហកម្មកម្ពុជា។
កាលពីថ្ងៃទី២៩ ខែសីហា លោក Wensheng Chen ប្រធានក្រុមហ៊ុននេះបានដឹកនាំគណៈប្រតិភូវិនិយោគចិនមកធ្វើទស្សនកិច្ចសិក្សាស្វែងយល់ពីបរិយាកាស និងកាលានុវត្តភាពវិនិយោគនៅកម្ពុជា និងបានជួបជាមួយថ្នាក់ដឹកនាំ និងមន្ត្រីនៃក្រុមប្រឹក្សាអភិវឌ្ឍន៍កម្ពុជា (CDC)។
សេចក្ដីប្រកាសព័ត៌មានCDCនាថ្ងៃទី២៩ សីហា បានដកស្រង់សំដី លោក Wensheng Chen ថ្លែងក្នុងជំនួបនេះថា៖ «[ក្រុមហ៊ុននេះ] គឺជាក្រុមហ៊ុនវិនិយោគក្នុងវិស័យផលិតស៊ីម៉ងត៍នៅចិន ហើយគោលបំណងនៃដំណើរទស្សនកិច្ចនៅកម្ពុជានាពេលនេះគឺដើម្បីសិក្សាស្វែងយល់បន្ថែមអំពីបរិយាកាសវិនិយោគនៅកម្ពុជា ពិសេស គិតគូរពីគម្រោងបង្កើតរោងចក្រផលិតស៊ីម៉ងត៍នៅកម្ពុជា»។
លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា (CIB) នៃCDC បានស្វាគមន៍ចំពោះគម្រោងវិនិយោគនេះ ដោយលោកបញ្ជាក់ថា៖ «[គម្រោងនេះ] នឹងរួមចំណែកជំរុញការអភិវឌ្ឍឧស្សាហកម្មកម្ពុជា ពិសេស វិស័យសំណង់។
បានស្នើឱ្យក្រុមហ៊ុននេះត្រូវមានការគិតគូរពីការចូលរួមកាត់បន្ថយការបំពុលបរិស្ថានជាអតិបរមា តាមរយៈការប្រើប្រាស់បច្ចេកវិទ្យាទំនើប ក៏ដូចជាការប្រើប្រាស់ថាមពលស្អាត។
សេចក្ដីប្រកាសព័ត៌មានបញ្ជាក់ថា៖ «ថ្នាក់ដឹកនាំ និងមន្ត្រីទាំងអស់របស់CIB រង់ចាំដោយក្តីរីករាយក្នុងការផ្តល់កិច្ចសម្រួលគ្រប់បែបយ៉ាងជូនក្រុមហ៊ុនក្នុងការបណ្ដាក់ទុនវិនិយោគនៅកម្ពុជា»។
ក្នុងជំនួបនេះ លោក ជា វុទ្ធី បានលើកឡើងពីតួនាទី និងភារកិច្ចរបស់CDC ក្នុងការជំរុញទាក់ទាញការវិនិយោគឯកជន និងបានធ្វើការកត់សម្គាល់ពីកំណើនខ្ពស់នៃរំហូរវិនិយោគចិនមកកម្ពុជា។
លោកបន្ថែមថា បច្ចុប្បន្នកម្ពុជាមានច្បាប់ស្តីពីវិនិយោគប្រកបដោយភាពបើកចំហ មានតម្លាភាព និងអាចប៉ាន់ប្រមាណទុកជាមុនបាន ដោយសារកត្តាសន្តិភាព ស្ថិរភាព នយោបាយ និងភាពអំណោយផលនៃច្បាប់ និងបទប្បញ្ញត្តិពាក់ព័ន្ធនឹងការវិនិយោគរបស់កម្ពុជា។
របាយការណ៍CDC បានឱ្យដឹងថា ក្នុងរយៈពេល១ឆ្នាំចុងក្រោយនេះ ពីខែកញ្ញា ឆ្នាំ២០២៣ ដល់ខែសីហា ឆ្នាំ២០២៤ CDCបានអនុម័តគម្រោងថ្មី និងគម្រោងពង្រីកផលិតកម្មចំនួន ៣៩១ គម្រោង មានទុនវិនិយោគប្រមាណជាង ៧,៥ពាន់លានដុល្លារអាមេរិក ដែលអាចបង្កើតការងារបានប្រមាណជាង ៣៤ ម៉ឺនកន្លែង។
របាយការណ៍បន្តថាក្នុងរយៈពេល១ឆ្នាំនេះ ប្រភពទុនវិនិយោគមកពីប្រទេសចិនឈរនៅលំដាប់លេខរៀងទី១ ដោយបានរួមចំណែកប្រមាណ ៦០ភាគរយនៃទុនវិនិយោគសរុប ខណៈដែលការវិនិយោគក្នុងស្រុកគ្របដណ្តប់ប្រមាណ ៣២ ភាគរយនៃទុនវិនិយោគសរុប៕