លោក Jason Fong ប្រធានការិយាល័យគ្រួសារសកល FamilyOfficeHK Global Head Jason Fong ថ្លែងទៅកាន់ទស្សនិកជនក្នុងដំណើរទស្សនកិច្ចមកកាន់ប្រទេសកម្ពុជាកាលពីថ្មីៗកន្លងទៅនេះ។ សហការី
ហុងកុងត្រូវបានទទួលស្គាល់ជាយូរមកហើយថាជាគោលដៅចម្បងសម្រាប់ការិយាល័យគ្រួសារ ដោយផ្តល់នូវការរួមបញ្ចូលគ្នា ដែលមិនអាចប្រៀបផ្ទឹមបាននៃសេវាកម្មវិជ្ជាជីវៈ ទីតាំងយុទ្ធសាស្ត្រ និងគោលនយោបាយពន្ធដ៏អំណោយផល។
សម្រាប់គ្រួសារកម្ពុជាមានទ្រព្យសម្បត្តិស្តុកស្តម្ភ ដែលមានគោលដៅធានារក្សាបានកេរដំណែលមរតក និងបង្កើនទ្រព្យសម្បត្តិរបស់ពួកគេ ទីក្រុងហុងកុង បានស្ដែងពីបរិយាកាសដ៏ល្អរួមបញ្ចូលគ្នានូវជំនាញជាសកលជាមួយនឹងអត្ថប្រយោជន៍ពិសេសក្នុងតំបន់។
ការិយាល័យគ្រួសារ គឺជាក្រុមហ៊ុនគ្រប់គ្រងទ្រព្យសម្បត្តិឯកជនដែលបម្រើបុគ្គលមានទ្រព្យសម្បត្តិស្ដុកស្ដម្ភបំផុត (UHNWI) ឬគ្រួសារដែលគ្រប់គ្រងការវិនិយោគ ហិរញ្ញវត្ថុ និងកិច្ចការផ្ទាល់ខ្លួនផ្សេងទៀត រួមទាំងការផ្ទេរតំណែងបន្តមរតកទៅកាន់អ្នកជំនាន់ក្រោយផងដែរ។
ការិយាល័យគ្រួសារផ្តល់ជូននូវសេវាកម្មជាច្រើនរួមមាន ការគ្រប់គ្រងការវិនិយោគ ការធ្វើផែនការអចលនទ្រព្យ សេវាពន្ធដារ ការគ្រប់គ្រងគម្រោងសប្បុរសធម៌ និងការរៀបចំកែច្នៃជាពិសេសសម្របតាមតម្រូវការគ្រួសារដែលទទួលសេវាកម្ម។
ក្នុងបទសម្ភាសន៍ថ្មីៗនេះជាមួយកាសែតភ្នំពេញប៉ុស្តិ៍ លោក Jason Fong ប្រធានថ្នាក់ដឹកនាំសកលនៃការិយាល័យគ្រួសារ FamilyOfficeHK ជាក្រុមការងារដែលខិតខំប្រឹងប្រែងលើកកម្ពស់អាជីវកម្មការិយាល័យគ្រួសារ ក្រោមភ្នាក់ងារជំរុញការវិនិយោគផ្ទាល់ពីបរទេសនៃតំបន់រដ្ឋបាលពិសេសរដ្ឋាភិបាលហុងកុង HKSAR Invest Hong Kong (InvestHK) បាននិយាយអំពីដំណើរទស្សនកិច្ចរបស់លោកមកកាន់ប្រទេសកម្ពុជានាពេលថ្មីៗនេះ។
លោកបានមានប្រសាសន៍ថា៖ «ដំណើរកម្សាន្តរបស់ខ្ញុំពិតជាមានផ្លែផ្កាមិនគួរឱ្យជឿ។ ខ្ញុំបានជួបពិភាក្សាជាមួយមនុស្សជាច្រើនពីសមាគម និងក្រុមហ៊ុននានា នៅវិទ្យាស្ថាន និងចែករំលែកការយល់ដឹងអំពីប្រវត្តិសាស្ត្រដ៏យូរអង្វែងរបស់ហុងកុងជាមួយការិយាល័យគ្រួសារ ដែលអនុញ្ញាតឱ្យយើងអាចប្រមូលទ្រព្យសម្បត្តិជាហិរញ្ញវត្ថុសំខាន់ៗសម្រាប់ការវិនិយោគនោះទេ ប៉ុន្តែថែមទាំងអាចប្រមូលនូវបទពិសោធន៍ និងចំណេះដឹងដ៏សម្បូរបែបផងដែរ»។
យោងតាមលោក Fong ឧស្សាហកម្មសេវាកម្មហិរញ្ញវត្ថុរបស់ហុងកុងមានភាពរឹងមាំ ដោយមានអ្នកជំនាញផ្នែកហិរញ្ញវត្ថុចំនួន ២៦៧០០០នាក់ សម្រាប់បម្រើការគាំទ្រការិយាល័យគ្រួសារចំនួន ២៧០០។ តួលេខនេះមានន័យថា ជាសមាមាត្រ អ្នកជំនាញចំនួន ៩៩នាក់ អាចបម្រើការជូនការិយាល័យគ្រួសារនីមួយៗ ដែលលើសពីអ្វីដែលម្ចាស់ធនធានអាចស្វែងរកបាននៅកន្លែងណាផ្សេងទៀតក្នុងពិភពលោក មិនថាលក្ខខណ្ឌកម្រិតនៃការគាំទ្រផ្នែកវិជ្ជាជីវៈ ធនាគារ ការគ្រប់គ្រងមូលនិធិ គណនេយ្យ សេវាកម្មប្រឹក្សាផ្នែកច្បាប់ និងពន្ធដារជាដើម។
លោក Fong បានឱ្យដឹងទៀតថា៖ «ក្នុងអំឡុងពេលធ្វើដំណើរ ខ្ញុំបានចែករំលែកព័ត៌មាននេះជាមួយភ្ញៀវខ្មែររបស់ខ្ញុំ ហើយពួកគាត់មានចំណាប់អារម្មណ៍ចូលចិត្តលក្ខខណ្ឌទាំងនេះ។ ការិយាល័យគ្រួសារមិនមែនគ្រាន់តែជាការវិនិយោគដើម្បីលុយប៉ុណ្ណោះទេ វាគឺអំពីភាពប្រាកដប្រជា ការធានា និងការអនុលោមតាមច្បាប់ដែលហុងកុងផ្តល់ឱ្យ។ លើសពីនេះ វាមានអត្ថប្រយោជន៍បន្ថែមនៃសកម្មភាពសប្បុរសធម៌ ដែលការិយាល័យគ្រួសារជាច្រើនចង់ចូលរួម នៅពេលដែលពួកគេបានស្ថាបនាការិយាល័យគ្រួសាររបស់ខ្លួននៅក្រុងហុងកុង»។
លោក Jason Fong ប្រធានការិយាល័យគ្រួសារសកល ដែលជាក្រុមការងារខ្នះខ្នែងលើកស្ទួយការវិនិយោគការិយាល័យគ្រួសារ ស្ថិតក្រោមទីភ្នាក់ងារផ្សព្វផ្សាយការវិនិយោគផ្ទាល់ពីបរទេសនៃតំបន់រដ្ឋបាលពិសេសហុងកុង។ សហការី
លោក Fong បានកត់សម្គាល់ថា អ្វីដែលកំណត់ថាទីក្រុងហុងកុងខុសពីកន្លែងនានាដូចជា សិង្ហបុរី នោះគឺជាវិធីសាស្ត្រដ៏អំណោយផល។ ខណៈពេលដែលសិង្ហបុរីផ្តោតលើការទាក់ទាញប្រាក់បញ្ញើជាសាច់ប្រាក់ ហុងកុងមិនចាប់អារម្មណ៍តែមួយគត់ក្នុងការគ្រប់គ្រងសាច់ប្រាក់របស់ម្ចាស់ធនធាននោះទេ។ ម្ចាស់ទ្រព្យសម្បត្តិអាចរក្សាទុកប្រាក់នៅក្នុងប្រទេសកម្ពុជា ឬកន្លែងណាផ្សេងទៀតក្នុងពិភពលោក។
លោកបានឱ្យដឹងទៀតថា៖ «នៅក្នុងខែមេសាឆ្នាំនេះ អាជ្ញាធររូបិយវត្ថុសិង្ហបុរី (MAS) បានបើកដំណើរការវេទិកាឌីជីថលហៅថា ការសហការគ្នាចែករំលែងព័ត៌មាននៃការលាងលុយកខ្វក់ និងករណីហិរញ្ញប្បទានភេរវកម្ម (Collaborative Sharing of Money Laundering/Terrorism Financing (ML/TF) Information and Cases (COSMIC) ដោយសហការជាមួយធនាគារពាណិជ្ជធំៗចំនួន ៦ នៅក្នុងប្រទេសសិង្ហបុរី»។
លោកបានបន្ថែមថា ខណៈពេលដែលភាពចាំបាច់នៃវេទិកានេះមានគោលបំណងបង្កើនការចែករំលែកព័ត៌មានដើម្បីប្រយុទ្ធប្រឆាំងនឹងសកម្មភាពលាងលុយកខ្វក់ និងគ្រប់គ្រងដោយអាជ្ញាធររូបិយវត្ថុសិង្ហបុរី កិច្ចការសហការគ្នាចែករំលែងព័ត៌មាននៃការលាងលុយកខ្វក់ និងករណីហិរញ្ញប្បទានភេរវកម្ម បានបង្កើនការព្រួយបារម្ភក្នុងចំណោមបុគ្គលមានតម្លៃទ្រព្យសម្បត្តិច្រើននៅក្នុងតំបន់ ដែលជាអ្នកផ្តល់តម្លៃលើភាពឯកជនរបស់ពួកគេ។
លោក Fong បានគូសបញ្ជាក់ថា បុគ្គលមានតម្លៃទ្រព្យសម្បត្តិស្ដុកស្ដុម្ភ ជាច្រើនយល់ឃើញថា វិធានការតឹងរ៉ឹងទាំងនេះ មិនត្រឹមតែរំលោភលើឯកជនភាពផ្ទាល់ខ្លួនប៉ុណ្ណោះទេ ប៉ុន្តែថែមទាំងបង្ហាញការសង្ស័យលើសុចរិតភាពរបស់ពួកគេក្នុងការគ្រប់គ្រងទ្រព្យសម្បត្តិផងដែរ។
លោកមានប្រសាសន៍ទៀតថា៖ «ហុងកុងគោរពការរក្សាការសម្ងាត់ ហើយសិទ្ធិក្នុងការការពារឯកជនភាពត្រូវបានចែងនៅក្នុងបទបញ្ញត្តិទិន្នន័យផ្ទាល់ខ្លួន (PDPO) ដែលជាច្បាប់ការពារទិន្នន័យដ៏ទូលំទូលាយបំផុតមួយរបស់អាស៊ី។ មិនដូចការអនុវត្តលើវេទិកាឌីជីថលកណ្តាលដូចជា ចែករំលែងព័ត៌មាននៃការលាងលុយកខ្វក់ និងករណីហិរញ្ញប្បទានភេរវកម្ម របស់សិង្ហបុរីទេ យើងរក្សាឯករាជ្យភាពនៃប្រព័ន្ធហិរញ្ញវត្ថុរបស់យើង»។
លោក Fong បានសង្កត់ធ្ងន់ថា ទោះជាទ្រព្យសម្បត្តិរបស់អ្នកស្ថិតនៅទីណាក៏ដោយ អាទិភាពសំខាន់សម្រាប់ការបង្កើតការិយាល័យគ្រួសារនៅហុងកុង គឺជាសមត្ថភាពរបស់ទីក្រុងក្នុងការគ្រប់គ្រងទ្រព្យសម្បត្តិសកលរបស់គ្រួសារ រួមទាំងការវិនិយោគ និងកេរដំណែលមរតករបស់ពួកគេ។ មិនថាវាជាអគារនៅក្នុងប្រទេសបាហាម៉ាស ឬទ្រព្យសម្បត្តិដែលគ្រប់គ្រងនៅកន្លែងផ្សេងទៀតនោះទេ។ វាមានលក្ខខណ្ឌទទួលយកបានទាំងអស់ ដោយអ្នកមិនចាំបាច់ផ្លាស់ប្តូរទីតាំងផលប័ត្រទៅហុងកុងទេ។
នៅក្រោមក្របខណ្ឌ «ប្រទេសមួយ ប្រព័ន្ធពីរ» ទីក្រុងហុងកុងមានទីតាំងតែមួយគត់ដែលវិនិយោគិនអាចផ្ទេរដើមទុនដោយស្របច្បាប់ និងដោយសេរី។ បុគ្គលម្នាក់ៗអាចទទួលបានបទពិសោធន៍នៃការតភ្ជាប់គ្មានដែនកំណត់ ហើយព័ត៌មានអាចហូរចូល និងចេញពីទីក្រុងដោយគ្មានដែនកំណត់។
លោក Jason Fong ប្រធានការិយាល័យគ្រួសារសកល នៅការិយាល័យរបស់លោកឯក្រុងហុងកុង។ សហការី
លោកបានចង្អុលបង្ហាញថា ប្រព័ន្ធផ្លូវដែកល្បឿនលឿនរបស់ហុងកុង និងទំនាក់ទំនងហិរញ្ញវត្ថុដ៏រឹងមាំជាមួយប្រទេសចិនដីគោក បានដាក់ទីក្រុងនេះថាជាមូលដ្ឋានដ៏ល្អសម្រាប់អ្នកវិនិយោគអន្តរជាតិ រួមទាំងប្រជាជនកម្ពុជាផងដែរ ដែលស្វែងរកការដាក់ទុនលើឱកាសដ៏ធំនៅក្នុងប្រទេសចិន និងតំបន់មហាឈូងសមុទ្រ Greater Bay។
យោងតាមលោក Fong កត្តាសំខាន់ក្នុងការអំពាវនាវរបស់ហុងកុងគឺបរិយាកាសពន្ធដែលងាយស្រួលសម្រាប់អាជីវកម្មរបស់ខ្លួន ដែលដាក់ពន្ធផ្ទាល់តែ ៣ ប៉ុណ្ណោះ ដោយមិនគ្របដណ្ដប់លើភាគលាភ ឬពន្ធមរតក ព្រមទាំងផ្តល់ប្រាក់ឧបត្ថម្ភ និងការកាត់កងជាច្រើនដើម្បីកាត់បន្ថយប្រាក់ចំណូលជាប់ពន្ធ។
លើសពីនេះ លោកបាននិយាយថា ប្រព័ន្ធរបស់ហុងកុងផ្តល់នូវអត្ថប្រយោជន៍ដ៏គួរឱ្យទាក់ទាញ ដូចជាការលើកលែងពន្ធលើប្រាក់ចំណេញសម្រាប់មូលនិធិ ដែលផ្តល់ដោយឯកជននៅលើដីគោក និងក្រៅប្រទេសលើប្រតិបត្តិការទ្រព្យសម្បត្តិ ក្នុងករណីលក្ខខណ្ឌមួយចំនួនត្រូវបានបំពេញ។
លោកបានបន្ថែមថា ទីក្រុងនេះត្រូវបានគេស្គាល់ថាជារដ្ឋាភិបាលប្រកបដោយប្រសិទ្ធភាព និងស្ថិរភាព ដោយលោកកត់សម្គាល់ថា នេះជាការអំពាវនាវដល់គ្រួសារកម្ពុជា ដែលបានឃើញផ្ទាល់ភ្នែកនូវអត្ថប្រយោជន៍នៃសន្តិភាព និងសន្តិសុខនៅហុងកុងផងដែរ។
ភាពរឹងមាំផ្នែកច្បាប់ និងបទប្បញ្ញត្តិទាំងនេះ រួមផ្សំជាមួយនឹងសេវាកម្មហិរញ្ញវត្ថុ និងវិជ្ជាជីវៈដែលមិនអាចប្រៀបផ្ទឹមបានរបស់ទីក្រុង ធ្វើឱ្យហុងកុងក្លាយជាទីតាំងដ៏ល្អសម្រាប់ការិយាល័យគ្រួសារកម្ពុជា និងអ្នកវិនិយោគទូទាំងពិភពលោក ដែលស្វែងរកមូលដ្ឋានប្រកបដោយស្ថេរភាព ប្រសិទ្ធភាព និងមានលក្ខណៈជាសកលសម្រាប់ការគ្រប់គ្រង និងបង្កើនទ្រព្យសម្បត្តិរបស់ពួកគេ៕
