![](https://pppkhmer.sgp1.digitaloceanspaces.com/image/main/20249/11_9_2024_prime_minister_hun_manet_met_with_a_us_business_delegation_on_september_10_in_phnom_penh.jpg)
លោកនាយករដ្ឋមន្ត្រី ហ៊ុន ម៉ាណែត ជូបជាមួយគណៈប្រតិភូធុរកិច្ចអាមេរិក នាថ្ងៃទី១០ កញ្ញា នៅភ្នំពេញ។ STPM
ភ្នំពេញៈ ក្រុមហ៊ុនអាមេរិកបង្ហាញចំណាប់អារម្មណ៍ក្នុងការនាំចេញផលិតផលកសិកម្មរបស់កម្ពុជាទៅកាន់ទីផ្សារសហរដ្ឋអាមេរិក។ លោកនាយករដ្ឋមន្ត្រី ហ៊ុន ម៉ាណែត ស្វាគមន៍ចំពោះចំណាប់អារម្មណ៍នេះ និងលើកទឹកចិត្តដល់ក្រុមហ៊ុនទាំងនេះឱ្យពិភាក្សាលម្អិតបន្ថែមទៀតជាមួយក្រសួង-ស្ថាប័នពាក់ព័ន្ធរបស់កម្ពុជា។
ការបង្ហាញចំណាប់អារម្មណ៍នេះធ្វើឡើងក្នុងជំនួបរវាងលោក ហ៊ុន ម៉ាណែត និងគណៈប្រតិភូធុរកិច្ចអាមេរិកដែលមានក្រុមហ៊ុនចំនួន៥ កាលពីថ្ងៃទី១០ កញ្ញា នៅរាជធានីភ្នំពេញ។
យោងតាមបណ្តាញសង្គមលោកនាយករដ្ឋមន្ត្រីនាថ្ងៃដដែលនេះបានឱ្យដឹងថា ដំណើរបេសកកម្មធុរកិច្ចរបស់គណៈប្រតិភូធុរកិច្ចអាមេរិកនៅកម្ពុជានេះមានគោលបំណងស្វែងរកកាលានុវត្តភាពវិនិយោគ និងភ្ជាប់ទំនាក់ទំនងជាមួយដៃគូធុរកិច្ចនៅកម្ពុជា ដើម្បីនាំចេញផលិតផលកសិកម្មរបស់កម្ពុជាទៅកាន់ទីផ្សារសហរដ្ឋអាមេរិក ដែលរួមមានអង្ករ ស្វាយចន្ទី ម្រេច និងស្វាយក្រៀម ជាដើម។
បណ្តាញសង្គមបញ្ជាក់ថា៖ «សម្ដេចធិបតីបានស្វាគមន៍ចំពោះចំណាប់អារម្មណ៍របស់ក្រុមហ៊ុនអាមេរិក ក្នុងការស្វែងរកឱកាសវិនិយោគ និងការនាំចេញផលិតផលកសិកម្មរបស់កម្ពុជាទៅកាន់ទីផ្សារសហរដ្ឋអាមេរិក»។
លោក ហ៊ុន ម៉ាណែត បានបញ្ជាក់ពីការយកចិត្តទុកដាក់ និងអាទិភាពរបស់រាជរដ្ឋាភិបាល ចំពោះវិស័យកសិកម្ម ដូចជា កញ្ចប់លើកទឹកចិត្តផ្នែកពន្ធសម្រាប់វិស័យកសិកម្ម, ការធ្វើទំនើបកម្មវិស័យកសិកម្ម, ការដាក់ពង្រាយមន្ត្រីបច្ចេកទេសកសិកម្មនៅតាមមូលដ្ឋាន, ព្រមទាំងការបង្កើតសហគមន៍កសិកម្មទំនើប និងប្រព័ន្ធភស្តុភារកម្មនិងហេដ្ឋារចនាសម្ព័ន្ធសំដៅចូលរួមកាត់បន្ថយថ្លៃដើម និងបង្កើនសមត្ថភាពប្រកួតប្រជែងនៃផលិតផលកសិកម្មរបស់កម្ពុជា។
លោកបានលើកទឹកចិត្តដល់គណៈប្រតិភូធុរកិច្ចអាមេរិកឱ្យបន្តផ្សារភ្ជាប់ទំនាក់ទំនង និងពិភាក្សាលម្អិតបន្ថែមទៀត ជាមួយក្រសួង-ស្ថាប័នពាក់ព័ន្ធរបស់កម្ពុជា ដើម្បីចាប់យកឱកាសវិនិយោគ និងធុរកិច្ចក្នុងវិស័យកសិកម្ម អប់រំ និងវិស័យសក្ដានុពលផ្សេងៗទៀតនៅកម្ពុជា។
បណ្តាញសង្គមដដែលបញ្ជាក់ថា ក្រុមហ៊ុនមួយនៅសហរដ្ឋអាមេរិកបានសម្រេចបង្កើតការិយាល័យតំណាងរបស់ខ្លួន នៅក្នុងប្រទេសកម្ពុជា ដើម្បីផ្តល់ការសម្របសម្រួលជូននិស្សិតកម្ពុជា ដែលមានបំណងចង់បន្តការសិក្សានៅសហរដ្ឋអាមេរិកផងដែរ។
ក្នុងរយៈពេល ៨ខែដំបូងក្នុងឆ្នាំ២០២៤ ទំហំពាណិជ្ជកម្មរវាងកម្ពុជា និងសហរដ្ឋអាមេរិក មានជាង៦,៩ពាន់លានដុល្លារ កើនឡើង១០ភាគរយ។ ក្នុងនោះ ការនាំចេញមានជាង៦,៧ពាន់លានដុល្លារ កើនឡើង១០ភាគរយ ខណៈការនាំចូលពីសហរដ្ឋអាមេរិកមានជាង១៧៣លានដុល្លារ កើន៨ភាគរយ បើធៀបរយៈពេលដូចគ្នាក្នុងឆ្នាំ២០២៣។ នេះបើយោងតាមរបាយការណ៍អគ្គនាយកដ្ឋានគយនិងរដ្ឋាករកម្ពុជា៕