​ធនាគារ ឈីហ្វ ដាក់​ឱ្យ​ប្រើប្រាស់​គណនី​កុមារ “Chief Child Account” ដើម្បី​លើក​កម្ពស់​ចំណេះ​ដឹង​ផ្នែក​ហិរញ្ញ​វត្ថុ​សម្រាប់​កុមារ​

ធនាគារពាណិជ្ជ ឈីហ្វ (ខេមបូឌា) ម.ក បានដាក់ឱ្យប្រើប្រាស់គណនីកុមារ (Chief Child Account) ដែលជាគណនីសន្សំ ក្នុងគោលបំណងផ្តល់ឱ្យកុមារដែលមានអាយុក្រោម ១៨ឆ្នាំ យល់ដឹង និងរៀនសូត្រអំពីការគ្រប់គ្រងហិរញ្ញវត្ថុតាំងពីនៅវ័យក្មេង។ គំនិតផ្តួចផ្តើមនេះគឺជាផ្នែកមួយនៃការប្តេជ្ញាចិត្តយ៉ាងទូលំទូលាយរបស់ធនាគារក្នុងការលើកកម្ពស់ចំណេះដឹងហិរញ្ញវត្ថុ ក្នុងចំណោមកុមារនៅប្រទេសកម្ពុជា។

បណ្ឌិត សឿង ម៉ូរ៉ារិទ្ធ ប្រធាននាយកប្រតិបត្តិនៃធនាគារ ឈីហ្វ បានសង្កត់ធ្ងន់លើសារៈសំខាន់នៃការផ្តល់ចំណេះដឹងហិរញ្ញវត្ថុតាំងពីកុមារភាពនេះថា ៖«យើងជឿជាក់ថា ការបង្រៀនពីជំនាញហិរញ្ញវត្ថុតាំងពីកុមារភាព គឺជាកត្តាដ៏សំខាន់មួយសម្រាប់ជំរុញទម្លាប់គ្រប់គ្រងហិរញ្ញវត្ថុ ប្រកបដោយការទទួលខុសត្រូវ។ គណនីកុមារ (Chief Child Account) នេះ គឺត្រូវបានរៀបចំឡើងដើម្បីផ្តល់នូវសុវត្ថិភាព និងបង្កើនទឹកប្រាក់សម្រាប់ការសន្សំរបស់កុមារ ខណៈដែលឪពុកម្តាយអាចគ្រប់គ្រងហិរញ្ញវត្ថុរបស់កូនៗប្រកបដោយប្រសិទ្ធភាព»។

អត្រាការប្រាក់ប្រកួតប្រជែង និងលក្ខខណ្ឌមានភាពបត់បែន

គណនីកុមារ (Chief Child Account) ផ្តល់អត្រាការប្រាក់រហូតដល់ ៣,៧% សម្រាប់គណនីជាប្រាក់ដុល្លារ។ គណនីនេះដំណើរការជាគណនីសន្សំ ដោយមិនចាំបាច់ប្រើប្រាស់កាត ATM ដើម្បីធានាថា ឪពុកម្តាយ ឬអាណាព្យាបាល មានការគ្រប់គ្រងបានពេញលេញលើការហិរញ្ញវត្ថុរបស់កូនៗ។ លើសពីនេះ សៀវភៅធនាគារត្រូវបានផ្តល់ជូនក្នុងអំឡុងពេលបើកគណនីដែលផ្តល់ភាពងាយស្រួលក្នុងការតាមដានរាល់ប្រតិបត្តិការទាំងឡាយ។

ការបង្កកគណនីនេះគឺមានរយៈពេល ៦ខែ ហើយការដាក់ប្រាក់និងការផ្ទេរប្រាក់គឺគ្មានដែនកំណត់ ដែលត្រូវបានធ្វើឡើងដោយមាតាបិតា ឬអាណាព្យាបាល។ ការប្រាក់ត្រូវបានគណនាជារៀងរាល់ថ្ងៃ និងបញ្ចូលទៅក្នុងគណនីកុមារប្រចាំខែដែលធ្វើឱ្យកើនទឹកប្រាក់ក្នុងគណនីសម្រាប់ការសន្សំរយៈពេលវែង។

ជំរុញឱ្យមានការទទួលខុសត្រូវផ្នែកហិរញ្ញវត្ថុ

ធនាគារ ឈីហ្វ ចាត់ទុកគណនីកុមារ (Chief Child Account) ជាគណនីដ៏សំខាន់មួយសម្រាប់ជំរុញដល់ការទទួលខុសត្រូវផ្នែកហិរញ្ញវត្ថុតាំងពីកុមារភាព។ តាមរយៈការផ្តល់ឱ្យកុមារនូវជម្រើសសន្សំ ដែលមានរចនាសម្ព័ន្ធ និងសុវត្ថិភាព ខណៈដែលមាតាបិតាអាចបង្រៀនគោលការណ៍ហិរញ្ញវត្ថុសំខាន់ៗ ចំពោះបុត្រធីតា ដូចជាគុណតម្លៃនៃការសន្សំ និងសារៈសំខាន់នៃការធ្វើផែនការសម្រាប់ពេលអនាគត ជាដើម។

តាមរយៈគណនីកុមារនេះ ធនាគារ ឈីហ្វ បន្តគាំទ្រគំនិតផ្តួចផ្តើម ការអប់រំផ្នែកហិរញ្ញវត្ថុនៅក្នុងប្រទេសកម្ពុជា ដោយផ្តល់ឱ្យមនុស្សជំនាន់ក្រោយជាមួយនឹងរបៀបរបបដែលត្រូវការសម្រាប់ភាពជោគជ័យផ្នែកហិរញ្ញវត្ថុរយៈពេលវែង។

សម្រាប់អតិថិជនដែលមានចំណាប់អារម្មណ៍លើផលិតផលនេះ សូមអញ្ជើញទៅកាន់សាខាធនាគារ ឈីហ្វ ដែលនៅជិតលោកអ្នកបំផុត ដើម្បីទទួលបានព័ត៌មានបន្ថែម៕