ទិដ្ឋភាពភ្ញៀវដើរកម្សាន្តនៅតាមប្រាសាទក្នុងខេត្តសៀមរាប។ ភ្នំពេញប៉ុស្តិ៍
ជនបរទេសជិត ៤,៣ លាននាក់បានធ្វើដំណើរចូលមកប្រទេសកម្ពុជាក្នុងរយៈពេល ៨ ខែដើមឆ្នាំ ២០២៤ កើនឡើងជាង ២០ ភាគរយបើធៀបនឹងរយៈពេលដូចគ្នាឆ្នាំ២០២៣ ក្នុងនោះភ្ញៀវធ្វើដំណើរតាមផ្លូវគោកមានចំនួនជិត ២/៣ នៃចំនួនភ្ញៀវសរុប។
ទិន្នន័យក្រសួងទេសចរណ៍ ដែលចេញផ្សាយចុងសប្តាហ៍មុន បានឱ្យដឹងថា ចន្លោះពីខែមករា ដល់ខែសីហា ឆ្នាំ ២០២៤ មានភ្ញៀវបរទេសចំនួន ៤ ២៩១ ០៥៨ នាក់ បានចូលមកប្រទេសកម្ពុជា កើនឡើង ២២,៥ ភាគរយ បើធៀបរយៈពេលដូចគ្នាឆ្នាំ ២០២៣ ដែលមានចំនួន ៣ ៥០១ ៩៨១ នាក់។ ក្នុងចំណោមភ្ញៀវខាងលើ គឺភ្ញៀវមកពីប្រទេសថៃ មានច្រើនជាងគេ គឺ ១,៣៤ លាននាក់, វៀតណាម ៨៦៨ ៤៤៥ នាក់, ចិន ៥៣៨ ៨៣៤ នាក់, ឡាវ ២៤២ ១០៤ នាក់។ ក្រៅពីនោះក៏មានជនជាតិអាមេរិក កូរ៉េខាងត្បូង ឥណ្ឌូនេស៊ី បារាំង ចក្រភពអង់គ្លេស និងជប៉ុន ជាដើម។
យោងតាមរបាយការណ៍ ក្នុងចំណោមភ្ញៀវបរទេសទាំងអស់ គឺអ្នកធ្វើដំណើរតាមផ្លូវគោក មានចំនួន ២,៧ លាននាក់ ផ្លូវអាកាស ១,៥៤ លាននាក់ , ចំណែកផ្លូវទឹក ៥៣ ៧៧៨ នាក់។
លោក ខៀវ ធី ប្រធានសមាគមមគ្គុទ្ទេសក៍ទេសចរអង្គរ បានប្រាប់ភ្នំពេញប៉ុស្តិ៍ នាថ្ងៃទី៣០ ខែកញ្ញាថា ភ្ញៀវបរទេសដែលមកដើរកម្សាន្តនៅប្រទេសកម្ពុជា ពិសេសក្នុងខេត្តសៀមរាបក្នុងពេលបច្ចុប្បន្នគឺមានចំនួនតិចនៅឡើយបើធៀបទៅនឹងមុនការលេចឡើងវត្តមានជំងឺកូវីដ១៩។ មូលហេតុ គឺអាចដោយសារស្ថានភាពសេដ្ឋកិច្ចពិភពលោកមិនទាន់ល្អ លក្ខខណ្ឌនៃការធ្វើដំណើរ នៅមានភាពស្មុគស្មាញ ការចំណាយខ្ពស់ និងការផ្សព្វផ្សាយមិនទាន់ទូលំទូលាយ។
លោកលើកឡើងទៀតថា ភ្ញៀវបរទេសដែលមកកម្សាន្តតាមតំបន់ទេសចរណ៍នានាក្នុងប្រទេសកម្ពុជា ពិសេសតំបន់ប្រាសាទអង្គរវត្ត នាពេលនេះ គឺមានចម្រុះសាសន៍ដោយមិនមែនភាពច្រើនតែជាជនជាតិចិន ដូចមុនឆ្នាំ២០១៩ ដែលជាពេលប្រទេសកម្ពុជាទទួលបានភ្ញៀវបរទេសច្រើនជាកំណត់ត្រានោះឡើយ។ សម្រាប់មូលហេតុដែលតួលេខភ្ញៀវបរទេសចូលមកកម្ពុជាភាគច្រើនតាមផ្លូវគោក គឺដោយសារតែភាគច្រើនជា ភ្ញៀវជនជាតិថៃ និងវៀតណាម។
ឆ្នាំ២០១៩ គឺជាពេលដែលកម្ពុជាទទួលបានភ្ញៀវអន្តរជាតិច្រើនបំផុត ដោយមានចំនួន ៦ ៦១០ ៥៩២ នាក់ កើនឡើង ៦,៦ ភាគរយធៀបឆ្នាំ ២០១៨។
លោកបាននិយាយថា៖«ខ្ញុំមានសុទិដ្ឋិនិយមថាវិស័យទេសចរណ៍កម្ពុជា នឹងមានសម្ទុះឡើងវិញចាប់ពីរដូវកាលភ្ញៀវច្រើន(High Season)នេះតទៅ ខណៈអាជ្ញាធរក៏បានដាក់ចេញនូវវិធានការថ្មីៗ និងការផ្សព្វផ្សាយជាបន្តបន្ទាប់ដើម្បីពង្រឹង និងពង្រីកទីផ្សារឱ្យកាន់តែធំ»។
ទោះយ៉ាងណា លោកក៏បានជំរុញឱ្យអាជ្ញាធរ និងផ្នែកឯកជនទាំងអស់ត្រូវរួមគ្នាឱ្យកាន់តែសកម្មថែមទៀតដើម្បីបង្កើនសក្តានុពលទាក់ទាញភ្ញៀវបរទេសឱ្យចូលមកកម្សាន្តនៅកម្ពុជាកាន់តែច្រើន ព្រោះវិស័យទេសចរណ៍អាចនាំចំណូលចូលជាតិបានច្រើនរយលានដុល្លារក្នុង ១ ឆ្នាំៗ។
អាជីវករលក់វត្ថុអនុស្សាវរីយ៍ និងប្តូរប្រាក់នៅផ្សារកណ្តាល ខេត្តសៀមរាប លោក ជាក់ សេរី បានប្រាប់ថា ទោះបីការគម្រាមកំហែងពីជំងឺកូវីដ១៩ បានបញ្ចប់ ប៉ុន្តែបញ្ហាសេដ្ឋកិច្ចសកល និងជម្លោះរវាងប្រទេសមួយចំនួនបានធ្វើឱ្យវិស័យទេសចរណ៍កម្ពុជា នៅមិនទាន់មានភាពល្អប្រសើរដូចមុនអំឡុងឆ្នាំ២០២០ ឡើយ។ បច្ចុប្បន្នអាជីវកម្មរបស់លោកក៏ដូចជាអ្នកផ្សេងទៀត គឺមានភាពស្ងប់ស្ងាត់ដូចគ្នា។
លោកបន្តថា៖«ទោះយ៉ាងណា យើងមានក្តីរំពឹងថា អ្វីៗនឹងមានភាពល្អប្រសើរចាប់ពីបុណ្យភ្ជុំបិណ្ឌនេះតទៅ។ កំណើនភ្ញៀវទេសចរ ពិសេសជនបរទេស នឹងចូលរួមចំណែកយ៉ាងច្រើនសម្រាប់គ្រប់សកម្មភាពសេដ្ឋកិច្ចកម្ពុជា»។
កាលពីឆ្នាំ ២០២៣ កម្ពុជាទទួលបានភ្ញៀវទេសចរបរទេសចំនួន ៥,៤៥ លាននាក់ កើនឡើង ១៣៩,៥ ភាគរយ បើធៀបនឹងឆ្នាំ ២០២២ ចំណែកប្រាក់ដែលរកបានពីវិស័យទេសចរណ៍បរទេស ក្នុងឆ្នាំ ២០២៣ គឺមានប្រមាណ ៣,០៤ ពាន់លានដុល្លារ កើនឡើង ១១៥ ភាគរយពីចំនួន ១,៤១ ពាន់លានដុល្លារកាលពីឆ្នាំ ២០២២។ នេះបើតាមក្រសួងទេសចរណ៍៕
