មន្ត្រីក្រសួងកសិកម្មពិនិត្យស្រូវនៅរោងម៉ាស៊ីនកិនស្រូវនៅខេត្តបាត់ដំបង កាលពីខែធ្នូ ឆ្នាំ២០២៤។ ក្រសួងកសិកម្ម
ការនាំចេញអង្កររបស់កម្ពុជានៅឆ្នាំ២០២៤ សម្រេចបាន ៦៥១ ៥២២ តោន ដែលគិតជាទឹកប្រាក់ស្មើនឹង ៤៩១.១៩លានដុល្លារ។ នេះបើយោងតាមសេចក្ដីប្រកាសព័ត៌មានរបស់សហព័ន្ធស្រូវអង្ករកម្ពុជា ដែលចេញផ្សាយនៅថ្ងៃទី១០ ខែមករា នេះ។
សេចក្ដីប្រកាសព័ត៌មានបញ្ជាក់ថា អង្ករទាំងនេះនាំចេញដោយក្រុមហ៊ុននាំចេញអង្ករចំនួន ៥៧ក្រុមហ៊ុន ទៅកាន់គោលដៅចំនួន ៦៨ ដែលក្នុងនោះគោលដៅបណ្តាប្រទេសនៅក្នុងតំបន់អឺរ៉ុបចំនួន ២៦ សម្រេចបានបានបរិមាណអង្ករ ៣២៧ ១៥៦ តោន គិតជាទឹកប្រាក់ចំនួន ២៥៣.១៨ លានដុល្លារ។
ចំណែកគោលដៅប្រទេសចិន ដែលរួមមានទាំងហុងកុង និងម៉ាកាវ មានទំហំ ១១៧ ៩២៥ តោន គិតជាទឹកប្រាក់ចំនួន ៧៥.៦៦ លានដុល្លារ។ ការនាំចេញទៅកាន់ប្រទេសក្នុងតំបន់អាស៊ាន ចំនួន៧ សម្រេចបាន ១២៧ ០៧៦ តោន គិតជាទឹកប្រាក់ចំនួន ៩២.៧០ លានដុល្លារ។
សម្រាប់ការនាំចេញទៅកាន់គោលដៅ ៣២ ប្រទេសផ្សេងទៀតដូចជា អាហ្វ្រិក មជ្ឈិមបូព៌ា អាមេរិក កាណាដា អូស្ត្រាលី ញ៉ូហ្សេឡេន សម្រេចបាន ៧៩ ៣៦៥ តោន គិតជាទឹកប្រាក់ចំនួន ៦៩.៥៤លានដុល្លារ។
ប្រភេទអង្ករក្រអូបនាំចេញបានច្រើនជាងគេរហូតដល់ ៧៦.១៥% នៃការនាំចេញសរុប ចំណែកប្រភេទអង្ករស ធម្មតា មាន ១៨.៧០% អង្ករចំហុយ ៣.១០% អង្ករសរីរាង្គចំនួន ១.៧៨% និងអង្ករផ្សេងៗចំនួន ០.២៧%។
សហព័ន្ធស្រូវអង្ករបញ្ជាក់ថា៖ «ប្រទេសកម្ពុជាក៏បាននាំចេញស្រូវសើម ៥ ១៨០ ១៥៥តោន គិតជាទឹកប្រាក់បានមានប្រមាណ ១ ៤៩៦ លានដុល្លារ ដែលក្នុងនោះ ៨៩% បាននាំចេញដោយឆ្លងកាត់ការស្នើសុំការបញ្ជាក់ឯកសារនាំចេញពីអាជ្ញាធរមានសមត្ថកិច្ច»។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា បានថ្លែងថា ការនាំចេញអង្ករឆ្នាំ២០២៤ធ្លាក់ចុះប្រមាណ១ភាគរយ ដោយសារតែជួបបញ្ហាពាក់ព័ន្ធនឹងការដឹកជញ្ជូនទៅអឺរ៉ុប ដូចជាកង្វះកុងតឺន័រ៕
