ជំនួបពិភាក្សារវាងលោក ហួត ហាក់(ស្តាំ) ជាមួយលោក Mohammed Ismaeil A. Dahlwy កាលពីចុងសប្តាហ៍មុន។ ក្រសួងទេសចរណ៍
ផ្នែកឯកជនក្នុងវិស័យទេសចរណ៍កម្ពុជាមានជំនឿថា ជំនួបរវាងថ្នាក់ដឹកនាំក្រសួងទេសចរណ៍កម្ពុជា ជាមួយឯកអគ្គរាជទូតនៃប្រទេសអារ៉ាប៊ីសាអ៊ូឌីត ប្រចាំនៅកម្ពុជា នឹងជួយធ្វើឱ្យការផ្សព្វផ្សាយពីសក្តានុពលវិស័យទេសចរណ៍កម្ពុជាទៅកាន់ប្រទេសអារ៉ាប៊ីសាអ៊ូឌីត រួមទាំងប្រទេសនៅតំបន់អារ៉ាប់ទាំងមូល កាន់តែមានភាពទូលំទូលាយ និងប្រសើរជាងមុន។
រដ្ឋមន្ត្រីក្រសួងទេសចរណ៍កម្ពុជា លោក ហួត ហាក់ កាលពីថ្ងៃទី៩ ខែមករា ឆ្នាំ២០២៥ នៅស្តីការក្រសួងទេសចរណ៍ បានជួបពិភាក្សាជាមួយលោក Mohammed Ismaeil A. Dahlwy ឯកអគ្គរាជទូតនៃព្រះរាជាណាចក្រអារ៉ាប៊ីសាអ៊ូឌីតប្រចាំកម្ពុជា ដែលមាននិវេសនដ្ឋាននៅរដ្ឋធានីហាណូយ សាធារណរដ្ឋសង្គមនិយមវៀតណាម។
ជាកិច្ចចាប់ផ្តើម លោក ហួត ហាក់ បានវាយតម្លៃខ្ពស់ចំពោះទំនាក់ទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ចាប់តាំងពីការបង្កើតទំនាក់ទំនងការទូតក្នុងរយៈពេលជាង ១០ឆ្នាំកន្លងមក ហើយនាពេលខាងមុខឆាប់ៗរដ្ឋាភិបាលអារ៉ាប៊ីសាអ៊ូឌីត ក៏មានគម្រោងបើកដំណើរការស្ថានឯកអគ្គរាជទូតអារ៉ាប៊ីសាអ៊ូឌីត នៅក្នុងប្រទេសកម្ពុជា ដើម្បីពង្រឹងចំណងការទូត និងកិច្ចសហប្រតិបត្តិការទ្វេភាគី។ លោករដ្ឋមន្ត្រីក៏បានប្រាប់ភាគីអារ៉ាប៊ីសាអ៊ូឌីត អំពីការសម្រេចរបស់រដ្ឋាភិបាលកម្ពុជា កាលពីពេលថ្មីៗនេះអំពីបញ្ចុះតម្លៃទិដ្ឋាការអេឡិចត្រូនិក(e-Visa) ប្រភេទទេសចរ(T) ពី ៣៦ដុល្លារ មកនៅត្រឹម ៣០ដុល្លារ និងប្រភេទធម្មតា (E) ពី ៤២ ដុល្លារអាមេរិក មកនៅត្រឹម ៣៥ដុល្លារ។
ជាការឆ្លើយតប លោក Mohammed Ismaeil A. Dahlwy បានថ្លែងអំណរគុណចំពោះថ្នាក់ដឹកនាំក្រសួងទេសចរណ៍កម្ពុជាដែលបានជួបពិភាក្សាការងារដើម្បីជំរុញវឌ្ឍនភាពនៃកិច្ចសហប្រតិបត្តិការ និងការសហការក្នុងវិស័យទេសចរណ៍រវាងកម្ពុជា និងអារ៉ាប៊ីសាអ៊ូឌីត ឱ្យកាន់តែល្អប្រសើរ។
យោងតាមសេចក្តីប្រកាសព័ត៌មានរបស់ក្រសួងទេសចរណ៍ ក្នុងជំនួបខាងលើ ភាគីទាំង ២បានព្រមព្រៀងលើវិធីសាស្រ្តមួយចំនួនដើម្បីពង្រឹងកិច្ចសហប្រតិបត្តិការក្នុងវិស័យទេសចរណ៍ទ្វេភាគី មានដូចជា ការឯកភាពលើការពង្រឹងកិច្ចសហប្រតិបត្តិការទេសចរណ៍ឱ្យកាន់តែសកម្ម, ការឯកភាពបង្កើនកិច្ចសហប្រតិបត្តិការលើកិច្ចការទេសចរណ៍មូស្លីម(Muslim Friendly Tourism), ការឯកភាពពិនិត្យលទ្ធភាពរៀបចំកម្មវិធីដំណើរទស្សនកិច្ចស្វែងយល់(FAM Trip) ដោយមានការចូលរួមពីផ្នែកឯកជនក្នុងវិស័យទេសចរណ៍នៃប្រទេសទាំងពីរ, និងជំរុញការផ្សព្វផ្សាយសក្តានុពលទេសចរណ៍រវាងប្រទេសទាំងពីរឱ្យកាន់តែទូលំទូលាយបន្ថែមទៀត។
ទិន្នន័យក្រសួងទេសចរណ៍ ឱ្យដឹងថា ក្នុងឆ្នាំ២០២៤ ប្រទេសកម្ពុជាទទួលបានភ្ញៀវទេសចរអន្តរជាតិសរុបជាង ៦,៧លាននាក់ កើនឡើង ២២,៩ភាគរយបើធៀបនឹងឆ្នាំ២០២៣ ដោយកើនឡើង ១,៤ ភាគរយធៀបនឹងរយៈពេលដូចគ្នាក្នុងឆ្នាំ២០១៩(មុនវិបត្តិជំងឺកូវីដ-១៩)។ ក្នុងឆ្នាំ២០២៤ កម្ពុជាទទួលបានភ្ញៀវទេសចរអារ៉ាប៊ីសាអ៊ូឌីត ប្រមាណ ៤០០នាក់។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីលីន បានប្រាប់ភ្នំពេញប៉ុស្តិ៍ក្នុងថ្ងៃទី១៣ ខែមករា ថា កម្ពុជាពិតជាមានសក្តានុពលខ្ពស់ក្នុងការទាក់ទាញភ្ញៀវមកពីបណ្តាប្រទេសក្នុងតំបន់អារ៉ាប់ រួមទាំងអារ៉ាប៊ីសាអ៊ូឌីត ឱ្យមកកម្សាន្ត ព្រោះវិស័យទេសចរណ៍កម្ពុជា គឺមានភាពសម្បូរបែបទាំងទេសចរណ៍បែបវប្បធម៌ ប្រវត្តិសាស្រ្ត តំបន់ឆ្នេរសមុទ្រ តំបន់ទន្លេសាប និងជាពិសេសតំបន់អេកូទេសចរណ៍ដែលមិនសូវមាននៅក្នុងតំបន់អារ៉ាប់ រួមទាំងប្រទេសអារ៉ាប៊ីសាអ៊ូឌីត។
លោកស្រីបន្តថា បច្ចុប្បន្នកម្ពុជាមានជើងហោះហើរត្រង់ជាច្រើនជាមួយបណ្តាប្រទេសក្នុងតំបន់អារ៉ាប់ ដែលទាំងនេះគឺជាកម្លាំងចលករដ៏សំខាន់ក្នុងការបង្កើនភាពទាក់ទាញ និងជំរុញភ្ញៀវពីតំបន់អារ៉ាប់ឱ្យធ្វើដំណើរមកកម្សាន្តនៅកម្ពុជាកាន់តែច្រើន។
លោកស្រីថ្លែងថា៖«តាមរយៈការហោះហើរត្រង់នេះ គឺមិនត្រឹមតែភ្ញៀវតំបន់អារ៉ាប់ប៉ុណ្ណោះទេ ប៉ុន្តែក៏អាចមានមកពីប្រទេសផ្សេងៗផងដែរ។ ខ្ញុំមានសុទិដ្ឋិនិយមថា កម្ពុជានឹងទទួលបានភ្ញៀវទេសចរអារ៉ាប៊ីសាអ៊ូឌីត និងតំបន់អារ៉ាប កាន់តែច្រើននាពេលខាងមុខឆាប់ៗនេះ»។
លោកស្រីលើកឡើងទៀតថា បច្ចុប្បន្នក៏មានជនជាតិកម្ពុជាមួយចំនួនបានទៅដើរកម្សាន្តនៅប្រទេសអារ៉ាប៊ីសាអ៊ូឌីត និងតំបន់អារ៉ាប់ផងដែរ។ ភ្ញៀវទេសចរដែលទៅកម្សាន្តនៅទីនោះ គឺប្រៀបដូចជាការផ្សព្វផ្សាយឱ្យគេស្គាល់ពីកម្ពុជាកាន់តែច្រើនផងដែរ។
ប្រធានសមាគមទេសចរណ៍អាស៊ីប៉ាស៊ីហ្វិកប្រចាំកម្ពុជា(PATA) លោក ធួន ស៊ីណាន បានប្រាប់ថា ទីផ្សារតំបន់អារ៉ាប់ត្រូវបានចាត់ទុកថាមានកម្រិតខ្ពស់ ប៉ុន្តែសម្រាប់កម្ពុជាការទទួលបានភ្ញៀវមកពីបណ្តាប្រទេសនៅតំបន់អារ៉ាប់ គឺនៅមានកម្រិតតិចតួចបំផុត ហើយជនជាតិកម្ពុជាដែលធ្វើដំណើរទៅទីនោះក៏ចំនួនតិចតួចនៅឡើយ ប៉ុន្តែបើឆ្លងកាត់(ការប្តូរជើងយន្តហោះ) គឺមានចំនួនច្រើន។ លោកបន្តថា គ្រប់ការជួបពិភាក្សា នឹងផ្តល់ផលវិជ្ជមានសម្រាប់វិស័យទេសចរណ៍ និងកំណើនសេដ្ឋកិច្ចជាតិ។
លោកអះអាងថា៖«រយៈកាលកន្លងមកនេះយើងឃើញរដ្ឋមន្ត្រីក្រសួងទេសចរណ៍កម្ពុជាបានជួបពិភាក្សាជាមួយថ្នាក់ដឹកនាំ និងផ្នែកឯកជនក្នុងវិស័យទេសចរណ៍ជាច្រើនទាំងក្នុងស្រុក និងក្រៅស្រុក ដែលទាំងអស់នេះ គឺជាវិធីសាស្រ្តក្នុងការជំរុញឱ្យទំនាក់ទំនងកាន់តែមានភាពជិតស្និត ក៏ដូចជាកិច្ចការពាណិជ្ជកម្ម និងទេសចរណ៍មានកាន់តែច្រើន»៕
