កម្មករកំពុងលឺអង្ករ ដាក់លើរថយន្ត។ អង្ករ គឺជាទំនិញសក្តានុពលមួយរបស់កម្ពុជាសម្រាប់នាំទៅទីផ្សារប្រទេសចិន។ ភ្នំពេញប៉ុស្តិ៍
ចំណងការទូតដ៏រឹងមាំបានធ្វើឱ្យទឹកប្រាក់នៃការផ្លាស់ប្តូរទំនិញរវាងប្រទេសកម្ពុជា និងសាធារណរដ្ឋចិន កើនដល់កម្រិតខ្ពស់បំផុតកាលពីឆ្នាំ ២០២៤ គឺប្រមាណជាង ១៥ ពាន់លានដុល្លារ ដោយចំនួននេះស្មើនឹងជិត ៣០ ភាគរយនៃទំហំពាណិជ្ជកម្មសរុបរបស់កម្ពុជាក្នុងឆ្នាំ ២០២៤ ដែលមាន ៥៤,៧៤ ពាន់លានដុល្លារ។ វិនិយោគិនចិន ក៏ជាអ្នកនាំមុខគេក្នុងការបណ្តាក់ទុនផ្ទាល់នៅកម្ពុជា(FDI)ផងដែរ។
ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា(GDCE) ឱ្យដឹងថា ក្នុងឆ្នាំ ២០២៤ សកម្មភាពនៃការនាំចូល នាំចេញទំនិញរវាងប្រទេសកម្ពុជា និងចិន មានទឹកប្រាក់សរុប ១៥,១៩ ពាន់លានដុល្លារ កើនឡើង ២៣,៨ ភាគរយបើធៀបនឹងឆ្នាំ ២០២៣ ដែលមានចំនួន ១២,២៦ ពាន់លានដុល្លារ។
ក្នុងចំនួននេះ គឺទំនិញចិននាំមកកម្ពុជា មានចំនួន ១៣,៤៤ ពាន់លានដុល្លារ កើនឡើង ២៤,៦ ភាគរយ ចំណែកទំនិញកម្ពុជានាំទៅប្រទេសចិន ១,៧៥ ពាន់លានដុល្លារ កើន ១៨,៤ ភាគរយ។
ផ្អែកតាមទិន្នន័យខាងលើ គឺជញ្ជីងពាណិជ្ជកម្មកម្ពុជាក្នុងឆ្នាំ ២០២៤ មានឱនភាពប្រមាណ ១១,៦៩ ពាន់លានដុល្លារ ខណៈកាលពីឆ្នាំ ២០២៣ មានចំនួន ៩,៣១ ពាន់លានដុល្លារ។
សេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា(CDC) កាលពីថ្ងៃទី១៣ ខែមករា បង្ហាញថា ក្នុងឆ្នាំ ២០២៤ មានគម្រោងវិនិយោគចំនួន ៤១៤ ដែលមានទុនវិនិយោគសរុបប្រមាណ ៦,៩ ពាន់លានដុល្លារ ត្រូវបានអនុម័តដោយក្រុមប្រឹក្សាអភិវឌ្ឍន៍កម្ពុជា។ ការវិនិយោគមកពីសាធារណរដ្ឋប្រជាមានិតចិន ស្ថិតនៅលំដាប់លេខរៀងទី១ ដោយមានទុនវិនិយោគប្រមាណ ៤៩,៨២ ភាគរយនៃចំនួនទុនវិនិយោគក្នុងឆ្នាំ ២០២៤។
អនុប្រធានសមាគមពាណិជ្ជកម្មកម្ពុជា-ចិន លោក ឡោ វិចិត្រ បានប្រាប់ភ្នំពេញប៉ុស្តិ៍ក្នុងថ្ងៃទី១៤ ខែមករា ថា កំណើនពាណិជ្ជកម្មទ្វេភាគីកម្ពុជា ចិន កើតឡើងដោយសារកត្តាមួយចំនួនដូចជា ភាពល្អប្រសើរនៃទំនាក់ទំនងការទូត តម្រូវការវត្ថុធាតុដើមពីប្រទេសចិនសម្រាប់យកទៅផលិត/កែច្នៃដើម្បីនាំចេញទៅលក់នៅទីផ្សារអន្តរជាតិ។
លោកបន្តថា ក្រៅពីវត្ថុធាតុដើម កម្ពុជាក៏បាននាំចូលម៉ាស៊ីនស្វ័យប្រវត្តិថ្មីៗជាច្រើនពីប្រទេសចិនមកបំពាក់នៅតាមរោងចក្រដើម្បីធ្វើឱ្យចង្វាក់ផលិតកម្មមានដំណើរការកាន់តែល្អ ផលិតបានច្រើន និងមានគុណភាពល្អជាងមុន។ ផលិតផលគ្រឿងម៉ាស៊ីនកំពុងចូលរួមចំណែកយ៉ាងច្រើនក្នុងការជួយលើកកម្ពស់សមត្ថភាពផលិតកម្មនៅកម្ពុជា។
លោកនិយាយថា៖«លើសពីនេះទៀត បញ្ហាជម្លោះពាណិជ្ជកម្មរវាងប្រទេសចិន និងអាមេរិក ដែលឈានដល់ការដំឡើងពន្ធគយជាមួយគ្នា ក៏ជាចំណែកមួយជួយជំរុញឱ្យរោងចក្រមួយចំនួននៅប្រទេសចិនមើលឃើញពីឱកាសក្នុងការបង្វែររោងចក្ររបស់ខ្លួនមកបោះទីតាំងនៅកម្ពុជា ដែលជាប្រទេសមានទំនាក់ទំនងផ្នែកនយោបាយ និងទីផ្សារល្អជាមួយប្រទេសជាច្រើនលើពិភពលោក»។
ភាគច្រើននៃទំនិញកម្ពុជានាំទៅប្រទេសចិន ជាផលិតផលកសិកម្ម គ្រឿងសង្ហារឹម គ្រឿងអលង្ការ និងផលិតផលវាយនភណ្ឌ ចំណែកទំនិញដែលប្រទេសចិននាំមកកម្ពុជា មានដូចជា វត្ថុធាតុដើមសម្រាប់រោងចក្រ/សហគ្រាស ផលិតផលប្រើប្រាស់ប្រចាំថ្ងៃ អាហារ/ភេសជ្ជៈ រថយន្ត គ្រឿងម៉ាស៊ីន គ្រឿងសំណង់ គ្រឿងអគ្គិសនី អេឡិចត្រូនិក ឱសថ ... និងជីកសិកម្ម។ល។
ទាក់ទងនឹងការវិនិយោគរបស់ចិននៅកម្ពុជា លោក វិចិត្រ បានអះអាងថា ចំនួននេះនឹងបន្តកើនឡើងថែមទៀតពេលពេលអនាគត។ នៅពេលវិនិយោគិនចិន ចូលមកបើកអាជីវកម្មនៅកម្ពុជាកាន់តែច្រើន ការនាំចូលវត្ថុធាតុដើម ឬគ្រឿងផ្សំពីប្រទេសចិនមកកម្ពុជាក៏នឹងកើនឡើងដែរ។
ទោះយ៉ាងណា លោក វិចិត្រ បានជំរុញឱ្យរដ្ឋាភិបាល និងផ្នែកឯកជនកម្ពុជាត្រូវតែខិតខំអភិវឌ្ឍន៍វិស័យសក្តានុពលរបស់ខ្លួន ពិសេសវិស័យកសិកម្មឱ្យកាន់តែខ្លាំងបន្ថែមទៀត ដើម្បីលើកកម្ពស់សមត្ថភាពនាំចេញទៅទីផ្សារប្រទេសចិន។ ការកសាងហេដ្ឋារចនាសម្ព័ន្ធក៏មានភាពចាំបាច់ផងដែរ។
លោកបានបញ្ជាក់ថា៖«ការខិតខំរបស់រដ្ឋាភិបាលកម្ពុជាលើការកសាងហេដ្ឋារចនាសម្ព័ន្ធថ្មីៗ នឹងក្លាយជាមេដែកឆក់ទាញអ្នកវិនិយោគបរទេស ពិសេសជនជាតិចិនឱ្យចូលមកវិនិយោគនៅកម្ពុជាកាន់តែច្រើន»។
អនុប្រធានសភាពាណិជ្ជកម្មកម្ពុជា លោក លឹម ហេង បាននិយាយថា ក្នុងនាមជាប្រទេសកំពុងអភិវឌ្ឍន៍ កម្ពុជាបាននាំចូលទំនិញជាច្រើនពីប្រទេសចិនមកបំពេញតម្រូវការក្នុងស្រុក និងបង្កើនសមត្ថភាពនាំចេញទំនិញទៅទីផ្សារអន្តរជាតិ។
លោកបន្តថា ឱនភាពជញ្ជីងពាណិជ្ជកម្មកម្ពុជាជាមួយប្រទេសចិន គឺមិនមែនជាចំណុចដែលគួរឱ្យបារម្ភទេ ព្រោះទំនិញដែលកម្ពុជានាំចូលពីប្រទេសចិនភាគច្រើនគឺជាវត្ថុធាតុដើមក្នុងវិស័យវាយនភណ្ឌ ដែលបម្រើឱ្យការកែច្នៃសម្រាប់នាំចេញទៅលក់នៅទីផ្សារមានសក្តានុពលដូចជា អាមេរិក កាណាដា និងតំបន់អឺរ៉ុប ជាដើម។
លោកបានថ្លែងថា៖«ប្រទេសចិនគឺជាប្រភពផ្គត់ផ្គង់វត្ថុធាតុដើមសំខាន់ៗឱ្យរោងចក្រនៅកម្ពុជា សម្រាប់កែច្នៃ និងនាំចេញទៅទីផ្សារអន្តរជាតិ។ កំណើនរោងចក្រនៅកម្ពុជា នឹងធ្វើឱ្យទំហំពាណិជ្ជកម្មរវាងប្រទេសទាំង ២ បន្តកើនឡើងខ្ពស់បន្ថែមទៀត»។
លោកលើកឡើងទៀតថា កិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិន(CCFTA) ក៏ជាកម្លាំងចលករក្នុងការទាក់ទាញវិនិយោគិនចិនកាន់តែច្រើនឱ្យចូលមកវិនិយោគ ឬចាប់ដៃគូជាមួយវិនិយោគិនក្នុងស្រុក ដើម្បីផលិតទំនិញនាំទៅប្រទេសចិនវិញ។
ដើម្បីជំរុញកិច្ចសហប្រតិបត្តិការផ្នែកពាណិជ្ជកម្ម កាលពីថ្ងៃទី៥-១០ ខែវិច្ឆិកា ឆ្នាំ ២០២៤ ក្រសួងពាណិជ្ជកម្ម និងផ្នែកឯកជនកម្ពុជា បាននាំយកផលិតផលគុណភាពខ្ពស់របស់កម្ពុជាជាង ១០០ មុខ ទៅចូលរួមក្នុងព្រឹត្តិការណ៍«ពិព័រណ៍ទំនិញនាំចូលអន្តរជាតិចិន លើកទី៧» នៅក្នុងទីក្រុងសៀងហៃ សាធារណរដ្ឋប្រជាមានិតចិន ដែលមានប្រទេសចូលរួមសរុបចំនួន ១៦០ប្រទេស។
ក្រសួងពាណិជ្ជកម្ម បានឱ្យដឹងថា ក្រសួងបាននាំយកផលិតផលដែលមានគុណភាពខ្ពស់របស់កម្ពុជាជាង ១០០មុខ រួមមាន អង្ករ គ្រាប់ស្វាយចន្ទី សម្ភារធ្វើដំណើរ និងកាបូប ផលិតផលសម្គាល់ភូមិសាស្រ្តទំនិញ ទឹកឃ្មុំ កាហ្វេ ដំណាប់ស្វាយ តែម្រេច តែ ទឹកជ្រលក់ម្រេច ម្សៅប្រហុក ស្ករត្នោត ទឹកស្ករត្នោត ស្ករគ្រាប់ត្នោត មីកញ្ចប់ មីជាតិ សម្ភារកែច្នៃសំណល់ប្លាស្ទិក ។ល។ ដើម្បីចូលរួមដាក់តាំងបង្ហាញក្នុងព្រិត្តិការណ៍នេះ៕
