សំណង់អគារខ្ពស់ៗជាច្រើនក្នុងរាជធានីភ្នំពេញ។ សហការី
វិស័យអចលនទ្រព្យនៅកម្ពុជាក្នុងឆ្នាំ ២០២៥ នេះត្រូវបានព្យាករណ៍នឹងមានស្ថានភាពប្រហាក់ប្រហែលឆ្នាំ ២០២៤ ដោយតម្លៃអាចស្ថិតនៅទ្រឹង ប៉ុន្តែសម្រាប់តម្រូវការអចលនទ្រព្យជាប្រភេទដីធ្លីសម្រាប់ការវិនិយោគក្នុងវិស័យឧស្សាហកម្ម នឹងមានភាពល្អប្រសើរជាងឆ្នាំមុន។
ឆ្លើយតបនឹងការសាកសួររបស់ភ្នំពេញប៉ុស្តិ៍ក្នុងកម្មវិធី «Fearless Forecast 2025» ដែលរៀបចំដោយក្រុមហ៊ុនអចលនទ្រព្យ CBRE Cambodia កាលពីព្រឹកថ្ងៃទី១៤ ខែមករា លោកស្រី គឹម គិនកេសា នាយិកាក្រុមហ៊ុនអចលនទ្រព្យ CBRE Cambodia (Kinkesa Kim, Managing Director of CBRE Cambodia) បានប្រាប់ថា តាមការព្យាករណ៍នៅក្នុងឆ្នាំ ២០២៥ នេះស្ថានភាពទូទៅរបស់វិស័យអចលនទ្រព្យនៅកម្ពុជា គឺអាចមានសភាពប្រហាក់ប្រហែលនឹងឆ្នាំ ២០២៤ ដោយអចលនទ្រព្យប្រភេទលំនៅឋាន អគារការិយាល័យ ផ្សារទំនើប មជ្ឈមណ្ឌលពាណិជ្ជកម្ម នឹងមានតម្រូវការល្អជាងឆ្នាំ ២០២៤ បន្តិច ប៉ុន្តែសម្រាប់តម្លៃអាចរក្សានៅដដែល។
លោកស្រីបន្តថា ទោះយ៉ាងណាអ្វីដែលនឹងមានសញ្ញាវិជ្ជមានសម្រាប់ឆ្នាំ ២០២៥ នេះ គឺតម្រូវការអចលនទ្រព្យនៅក្នុងវិស័យឧស្សាហកម្ម។
លោកស្រីបានថ្លែងថា៖«ខ្ញុំគិតថាអចលនទ្រព្យក្នុងផ្នែកឧស្សាហកម្មនឹងមានការរីកចម្រើនមុនគេ ហើយនឹងមានរយៈពេលយូរទៅមុខ។ និន្នាការនេះគឺមិនមែនសម្រាប់តែកម្ពុជាមួយប៉ុណ្ណោះទេ គឺសម្រាប់ប្រទេសជិតខាងដូចជា វៀតណាម ថៃ និងម៉ាឡេស៊ី ផងដែរ»។
លោកស្រីបានប្រាប់ទៀតថា ទាក់ទងនឹងការវិនិយោគពីក្រៅប្រទេស គឺចាប់កម្រើកឡើងវិញខ្លះៗតាំងពីចុងឆ្នាំ ២០២៤ មក ដោយបច្ចុប្បន្នគេសង្កេតឃើញមានកំណើនតម្រូវការដីសម្រាប់សាងសង់រោងចក្រ និងតំបន់សេដ្ឋកិច្ចពិសេសជាដើម។ ភាពវិជ្ជមានទាំងអស់នេះ គឺទទួលបានពីភាពមិនចុះសម្រុងគ្នារវាងមហាអំណាចសេដ្ឋកិច្ចពិភពលោកអាមេរិក និងប្រទេសចិន។
ប្រធានសមាគមអចលនទ្រព្យសកល និងជាប្រធានសម្ព័ន្ធក្រុមហ៊ុន SAM SN Group លោក សំ សុខនឿន(The President of the Global Real Estate Association and Chairman of the Board of SAM SN Group, Mr. Sam Soknoeun) បាននិយាយថា ក្នុងឆ្នាំ ២០២៤ ក៏ដូចជាឆ្នាំ ២០២៥ គឺត្រូវការអចលនទ្រព្យមានច្រើនសម្រាប់តែតម្រូវការក្នុងវិស័យឧស្សាហកម្មប៉ុណ្ណោះ ដូចជាតម្រូវការដីសម្រាប់សាងសង់រោងចក្រ/សហគ្រាស សួនឧស្សាហកម្ម តំបន់សេដ្ឋកិច្ចពិសេស ឬក៏ឃ្លាំងស្តុកផ្សេងៗ។
លោកបានថ្លែងថា៖«ស្ថានភាពវិស័យអចលនទ្រព្យក្នុងឆ្នាំ ២០២៥ អាចប្រសើរជាងឆ្នាំ ២០២៤ ដោយផ្នែកតែប៉ុណ្ណោះជាពិសេសដីធ្លីក្នុងវិស័យឧស្សាហកម្ម ចំណែកអចលនទ្រព្យផ្នែកលំនៅឋាន គឺអាចនៅទ្រឹងដូចឆ្នាំ ២០២៤ ព្រោះតែការផ្គត់ផ្គង់លើសតម្រូវការ»។ វិស័យអចលនទ្រព្យក្នុងឆ្នាំ ២០២៥ នឹងនៅតែមិនទាន់ប្រសើរដូចឆ្នាំមុនឆ្នាំ ២០១៩។
ដើម្បីចូលរួមចំណែកជំរុញសម្ទុះវិស័យអចលនទ្រព្យឱ្យកម្រើកឡើងវិញ ក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី៣១ ខែធ្នូ ឆ្នាំ ២០២៤ បានចេញនូវសេចក្តីជូនដំណឹងមួយស្តីពី«ការលើកលែងនិងអនុគ្រោះពន្ធប្រថាប់ត្រា លើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យសម្រាប់អ្នកទិញលំនៅឋាន និង/ឬផ្ទេរកម្មសិទ្ធិជាលើកដំបូង (First-Time Home Buyer) ដែលត្រូវអនុវត្តចាប់ពីថ្ងៃទី១ ខែមករា ឆ្នាំ ២០២៥ រហូតដល់ថ្ងៃទី៣១ ខែធ្នូ ឆ្នាំ ២០២៥» បានសរសេរថា ដើម្បីជួយសម្រួលដល់ប្រជាពលរដ្ឋទិញលំនៅឋានពីក្រុមហ៊ុនអភិវឌ្ឍន៍លំនៅឋានដែលមានលក្ខណៈជាបុរី ឬអគារសហកម្មសិទ្ធិ (ខុនដូ) និងជួយដល់វិស័យអចលនទ្រព្យបន្ថែមទៀត ក្រសួងសេដ្ឋកិច្ចនិងហិរញ្ញវត្ថុ មានកិត្តិយសសូមជូនដំណឹងដល់ម្ចាស់អចលនទ្រព្យ និងសាធារណជន អំពីការលើកលែងនិងអនុគ្រោះពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យសម្រាប់អ្នកទិញលំនៅឋាន និង/ឬផ្ទេរកម្មសិទ្ធិជាលើកដំបូង (First-Time Home Buyer) មួយចំនួន៕
