អតិថិជនកំពុងធ្វើប្រតិបត្តិការផ្ទេរប្រាក់នៅក្នុងសាខាមួយកន្លែងរបស់គ្រឹះស្ថានមីក្រូហិរញ្ញវត្ថុ អម្រឹត។ សហការី
ធនាគារមកពីកោះតៃវ៉ាន់ សាយណូផេក(Bank SinoPac) បានក្លាយជាម្ចាស់ភាគហ៊ុនចំនួន ៨០ភាគរយ របស់គ្រឹះស្ថានមីក្រូហិរញ្ញវត្ថុ អម្រឹត ម.ក ជាផ្លូវការ បន្ទាប់ពីអាជ្ញាធរអាណាព្យាបាលពាក់ព័ន្ធរបស់ស្ថាប័នទាំងពីរបានព្រមព្រៀងគ្នារួចរាល់។ Bank SinoPac នឹងឈានទៅកាន់កាប់ភាគហ៊ុន ១០០ភាគរយរបស់ អម្រឹត នៅរយៈពេលយ៉ាងតិច ២ ឆ្នាំបន្ទាប់។
Bank SinoPac បានក្លាយទៅជាភាគទុនិកធំរបស់ អម្រឹត បន្ទាប់ពីអតីតភាគទុនិកធំរបស់ អម្រឹត គឺស្ថាប័ន Advans បានលក់ភាគហ៊ុនរបស់ខ្លួនទាំងស្រុងក្នុងទឹកប្រាក់ ៥៥០ លានដុល្លារទៅឱ្យ Bank SinoPac។
ជាមួយគ្នានេះភាគទុនិកសំខាន់ចំនួន ២ ទៀតរបស់ អម្រឹត គឺសារជីវកម្មហិរញ្ញវត្ថុអន្តរជាតិ(IFC) ដែលជាក្រុមហ៊ុនវិនិយោគរបស់ធនាគារពិភពលោក និងធនាគារវិនិយោគនៃប្រទេសហូឡង់(FMO) ក៏បានធ្វើការលក់ភាគហ៊ុនរៀងៗខ្លួនចំនួនពាក់កណ្តាល ហើយចំពោះភាគហ៊ុនដែលនៅសល់នឹងត្រូវបានកាត់បន្ថយជាបន្តបន្ទាប់សម្រាប់រយៈពេលយ៉ាងហោចណាស់ ២ឆ្នាំទៅមុខ ដើម្បីធានាឱ្យបានការផ្លាស់ប្តូរភាគទុនិកថ្មីដោយរលូននៅក្នុងគ្រឹះស្ថានមីក្រូហិរញ្ញវត្ថុ អម្រឹត។ បន្ទាប់មក Bank SinoPac នឹងកាន់កាប់ភាគហ៊ុនចំនួន ១០០ ភាគរយតែម្តងនៅក្នុង អម្រឹត។
Bank SinoPac គឺជាធនាគារពាណិជ្ជដ៏ធំមួយ ជាមួយនឹងប្រតិបត្តិការអាជីវកម្មរបស់ខ្លួននៅកោះតៃវ៉ាន់ និងនៅតាមបណ្តាប្រទេស និងតំបន់មួយចំនួនទៀតដូចជា ប្រទេសចិន ទីក្រុងហុងកុង ប្រទេសវៀតណាម និងសហរដ្ឋអាមេរិក។
ការទិញយកភាគហ៊ុននៅក្នុង អម្រឹត នេះ គឺជាផែនការវិនិយោគមួយរបស់ Bank SinoPac ក្នុងការពង្រីកប្រតិបត្តិការអាជីវកម្មរបស់ខ្លួនបន្ថែមទៀតចូលទៅកាន់តំបន់អាស៊ីអាគ្នេយ៍ ដែលជាតំបន់ត្រូវបានចាត់ទុកថាកំពុងមានការកើនឡើងសក្តានុពលនៃការអភិវឌ្ឍ។
អម្រឹត គឺជាស្ថាប័នហិរញ្ញវត្ថុឈានមុខគេមួយនៅក្នុងប្រទេសកម្ពុជា ដែលមានប្រតិបត្តិការអាជីវកម្មនៅតាមសាខាចំនួន ១៥០ និងកំពុងបម្រើសេវាហិរញ្ញវត្ថុជូនអតិថិជនរបស់ខ្លួនច្រើនជាង ៦៣ ម៉ឺននាក់។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី១៦ ខែមករាថា ការទិញ-លក់ភាគហ៊ុនរបស់គ្រឹះស្ថានហិរញ្ញវត្ថុ គឺជារឿងធម្មតា និងតែងកើតមានជារឿយៗនៅគ្រប់ប្រទេសលើពិភពលោក ដូច្នេះគេមិនអាចវាយតម្លៃថា ស្ថានភាពនៅក្នុងគ្រឹះស្ថាននោះបែបណាឡើយ។
លោកបន្តថា ទោះយ៉ាងណាសម្រាប់ប្រតិបត្តិការទិញយកភាគហ៊ុនរបស់គ្រឹះស្ថានមីក្រូហិរញ្ញវត្ថុ អម្រឹត ពីសំណាក់គ្រឹះស្ថានហិរញ្ញវត្ថុលំដាប់ពិភពលោកបែបនេះ គឺគេអាចវាយតម្លៃពីស្ថានភាពវិស័យហិរញ្ញវត្ថុនៅកម្ពុជាថា មានភាពល្អប្រសើរ ព្រោះមុននឹងសម្រេចចិត្តទិញយកភាគហ៊ុនដ៏ច្រើនមកគ្រប់គ្រងដោយខ្លួនឯងបែបនេះ គឺថ្នាក់ដឹកនាំ Bank SinoPac ប្រាកដជាបានបញ្ជូនអ្នកជំនាញល្បីៗមកធ្វើការសិក្សា និងវាយតម្លៃច្រើនដងទៅលើប្រតិបត្តិការរបស់ អម្រឹត ក៏ដូចជាស្ថានភាពសេដ្ឋកិច្ចក្នុងប្រទេសកម្ពុជាផងដែរ។
លោកបានថ្លែងបថា៖«ការមកដល់របស់ម្ចាស់ភាគហ៊ុនថ្មី គឺគេអាចនឹងចាក់បញ្ចូលទុនបន្ថែមទៅក្នុងគ្រឹះស្ថាន អម្រឹត ដើម្បីពង្រីកទីផ្សារ និងបង្កើនទំនុកចិត្តទៅដល់អតិថិជន ដែលចំណុចនេះនឹងជួយឱ្យទុនវិនិយោគបរទេសនៅកម្ពុជាមានកាន់តែច្រើន។ ចំណុចនេះក៏នឹងជួយបង្កើនទំនុកចិត្តដល់អ្នកវិនិយោគ/ក្រុមហ៊ុន ដែលមានសម្ព័ន្ធភាពជាមួយ Bank SinoPac ឱ្យចូលមកបណ្តាក់ទុននៅកម្ពុជាកាន់តែច្រើនបន្ថែមទៀត»។
លោកប្រាប់ទៀតថា នៅពេលគ្រឹះស្ថានហិរញ្ញវត្ថុបរទេសចូលមករកស៊ីនៅកម្ពុជាកាន់តែច្រើន វាក៏នឹងបង្កភាពងាយស្រួលទៅអ្នកវិនិយោគបរទេសដែលចង់ផ្ទេរទុនរបស់ខ្លួនមកវិនិយោគនៅកម្ពុជាផងដែរ។
គេហទំព័ររបស់ អម្រឹត ឱ្យដឹងថា Bank SinoPac បានចាត់ទុកកម្ពុជា ជាប្រទេសដែលមានសេដ្ឋកិច្ចកំពុងរីកលូតលាស់ខ្លំាង រួមជាមួយនឹងប្រជាជនវ័យក្មេងប្រកបដោយថាមពល ដែលបានផ្តល់នូវសក្តានុពលដ៏ធំសម្រាប់ Bank SinoPac ហើយស្ថាប័នមួយនេះចង់ក្លាយជាចំណែកមួយនៃការអភិវឌ្ឍរបស់ប្រទេសកម្ពុជា។
ការចាប់ដៃគូ និងទិញយកភាគហ៊ុននៅក្នុង អម្រឹត ពីសំណាក់ Bank SinoPac មិនត្រឹមតែបានពង្រីកវត្តមានរបស់ខ្លួននៅក្នុងតំបន់អាស៊ីអាគ្នេយ៍តែប៉ុណ្ណោះទេ ប៉ុន្តែថែមទាំងបានជំរុញការប្តេជ្ញាចិត្តរបស់ខ្លួនក្នុងការចូលរួមគាំទ្រ លើកកម្ពស់ជីវភាពរបស់ប្រជាជននៅក្នុងសហគមន៍ និងបានបង្កើតនូវឱកាសសម្រាប់រយៈពេលវែងផ្សេងៗទៀតជាច្រើនដល់វិបុលភាព និងសុខមាលភាពនៃការរស់នៅរបស់ប្រជាជនកម្ពុជា។
Bank SinoPac បានអះអាងថា៖«Bank SinoPac នឹងបន្តកិច្ចសហប្រតិបត្តិការក្នុងភាពជាដៃគូជាមួយភាគទុនិកទាំង ២ ផ្សេងទៀតរបស់ អម្រឹត នោះគឺ ស្ថាប័ន IFC និង FMO។ ស្ថាប័នទាំង ២ បានដើរតួនាទីឈានមុខយ៉ាងសំខាន់លើការវិនិយោគប្រកបដោយការទទួលខុសត្រូវ និងបរិយាបន្នហិរញ្ញវត្ថុ។ ជាមួយនឹងការចូលរួមរបស់ស្ថាប័នទាំងអស់ខាងលើ ពួកយើងនឹងបន្តរក្សាឱ្យបាននូវស្តង់ដារដ៏ខ្ពស់មួយលើការការពារអតិថិជន និងធ្វើការពង្រីកលទ្ធភាពរបស់ អម្រឹត ក្នុងការអនុវត្តគោលការណ៍នៃការការពារបរិស្ថាន សង្គម និងអភិបាលកិច្ច (ESG) ដោយផ្តោតលើវិស័យអាទិភាពមួយចំនួនរបស់ពួកយើងក្នុងការផ្តល់សេវាហិរញ្ញវត្ថុប្រកបដោយនិរន្តរភាព បរិយាបន្ន និងមានភាពឆ្លាតវៃ»។
លោក ដុស ឌីន អគ្គនាយករបស់ អម្រឹត បាននិយាយថា៖«ខ្ញុំមានពិតជាមានសេចក្តីរីករាយ និងសូមធ្វើការស្វាគមន៍ជាផ្លូវការសម្រាប់ការមកដល់ប្រទេសកម្ពុជារបស់ Bank SinoPac ដែលបានក្លាយជាភាគទុនិកធំថ្មីរបស់ អម្រឹត។ Bank SinoPac គឺជាអ្នកផ្តល់ប្រាក់កម្ចីមួយរបស់ អម្រឹត អស់រយៈពេលជាច្រើនឆ្នាំមកហើយ ដែលកន្លងមកស្ថាប័នទាំង ២ មានទំនាក់ទំនងល្អយ៉ាងជិតស្និតជាមួយគ្នាក្នុងភាពជាដៃគូ និងបានទទួលស្គាល់នូវគុណតម្លៃរបស់គ្នាជាយូរមកហើយ»។
លោកបានបន្ថែមថា៖«គ្រប់ភាគីពាក់ព័ន្ធទាំងអស់នៅក្នុងការផ្លាស់ប្តូរភាគទុនិកនេះ បានដាក់ទិសដៅការងារជាអាទិភាពធ្វើយ៉ាងណាឱ្យការផ្ទេរភាគហ៊ុននេះធ្វើឡើងដោយរលូន និងធានាថាប្រតិបត្តិការអាជីវកម្មរបស់ អម្រឹត នឹងនៅបន្តដំណើរការជាធម្មតា។ សម្រាប់រយៈពេលទៅខាងមុខទៀត អម្រឹត នឹងធ្វើការពង្រឹងភាពរឹងមាំរបស់ខ្លួនជាមួយ Bank SinoPac ដើម្បីបន្តការអភិវឌ្ឍប្រកបដោយនិរន្តរភាព និងការទទួលខុសត្រូវខ្ពស់ផ្នែកសង្គម។ ខ្ញុំពិតជាមានក្តីរំភើបណាស់ ចំពោះគ្រប់លទ្ធភាពនៅក្នុងការបង្កើតឱកាសផ្សេងៗ តាមរយៈការរួមបញ្ចូលគ្នារវាងចំណេះ ជំនាញ និងបទពិសោធរបស់ Bank SinoPac ជាមួយនឹងធនធានមនុស្ស និងបណ្តាញទំនាក់ទំនងរបស់ អម្រឹត»៕
