ផ្លែស្វាយចន្ទីនៅក្នុងចម្ការមួយក្នុងខេត្តកំពង់ធំ។ សហការី
កម្ពុជារកប្រាក់បានជាង ១,១ ពាន់លានដុល្លារពីការនាំចេញគ្រាប់ស្វាយចន្ទីឆៅ(Raw)ទៅទីផ្សារអន្តរជាតិ នៅក្នុងឆ្នាំ ២០២៤ ដោយកើនឡើងជាង ២៦ ភាគរយបើធៀបនឹងឆ្នាំ២០២៣ ក្នុងនោះទីផ្សារប្រទេសវៀតណាម បានទទួលទិញជាង ៩៧ ភាគរយ។ បញ្ហាទុនបង្វិលនៅតែជាឧបសគ្គដែលធ្វើឱ្យកម្ពុជាបន្តនាំចេញគ្រាប់ឆៅ។ នេះបើយោងតាមសមាគមស្វាយចន្ទីកម្ពុជា(សសក)។
របាយការណ៍ផ្លូវការរបស់សមាគមស្វាយចន្ទីកម្ពុជា ឱ្យដឹងថា ក្នុងឆ្នាំ ២០២៤ កម្ពុជាប្រមូលផលគ្រាប់ស្វាយចន្ទីឆៅ បានសរុបប្រមាណ ៨៥០ ០០០តោន ក្នុងនោះការនាំចេញគ្រាប់ឆៅទៅក្រៅប្រទេសមានចំនួន ៨១៥ ០០០តោន កើនឡើង ២១ ភាគរយបើធៀបនឹងឆ្នាំ២០២៣។ បើគិតជាប្រាក់ គឺមានប្រមាណ ១,១៥ ពាន់លានដុល្លារ កើនឡើង ២៦,១៥ភាគរយ។
ប្រទេសវៀតណាម ដែលមានទុនបង្វិល រោងចក្រកែច្នៃ និងឃ្លាំងស្តុកច្រើន គឺនៅតែជាប្រភពសំខាន់ជាងគេ ដែលប្រមូលទិញគ្រាប់ស្វាយចន្ទីឆៅពីកម្ពុជា ដោយមានបរិមាណប្រហែល ៧៩៥ ០០០ តោន ឬស្មើនឹង ៩៧,៥៤ ភាគរយនៃបរិមាណការនាំចេញគ្រាប់ស្វាយចន្ទីឆៅសរុបរបស់កម្ពុជា។
ប្រធានសមាគមស្វាយចន្ទីកម្ពុជា លោក អួន ស៊ីឡុត បានប្រាប់ភ្នំពេញប៉ុស្តិ៍ក្នុងថ្ងៃទី២២ ខែមករាថា ផលិតកម្មស្វាយចន្ទីកម្ពុជា ក្នុងឆ្នាំ២០២៤ បានបង្ហាញពីភាពវិជ្ជមានច្រើនគួរឱ្យកត់សម្គាល់ ដោយមានកំណើនទាំងបរិមាណទិន្នផល និងតម្លៃនៅលើទីផ្សារអន្តរជាតិ។ បច្ចុប្បន្នផលិតកម្មស្វាយចន្ទីកម្ពុជា អាចចាត់ទុកថាមានសក្តានុពលបន្ទាប់ពីវិស័យស្រូវអង្ករ។
លោកបន្តថា វៀតណាម គឺជាទីផ្សារចម្បងជាងគេដែលបានស្រូបយកគ្រាប់ស្វាយចន្ទីឆៅពីកម្ពុជាប្រមាណ ៧៩៥ ០០០ តោនក្នុងឆ្នាំ ២០២៤ ខណៈអ្នកបញ្ជាទិញមកពីចិន និងឥណ្ឌា ត្រូវការតែគ្រាប់ស្វាយចន្ទីស្ងួតមានគុណភាពល្អប៉ុណ្ណោះ។
លោកបាននិយាយថា៖«ទីផ្សារនាំចេញគ្រាប់ស្វាយចន្ទីឆៅមានសញ្ញាវិជ្ជមានច្រើននៅក្នុងឆ្នាំ ២០២៤ ដោយការលក់បានកើនឡើងទាំងបរិមាណ និងតម្លៃ ដែលធ្វើឱ្យវិស័យស្វាយចន្ទី ហាក់ឈានមុខគេទី២ បន្ទាប់ពីស្រូវ អង្ករ។ បើតាមការប្រមូលទិន្នន័យរបស់យើងឃើញថា ស្វាយចន្ទី(ឆៅ)អាចរកចំណូលបាន ១ ១៥០ លានដុល្លារចាក់ចូលក្នុងចរន្តសេដ្ឋកិច្ចជាតិ។ នេះជាសញ្ញាមួយល្អសម្រាប់វិស័យកសិកម្មនៅកម្ពុជា ដែលភាគីពាក់ព័ន្ធទាំងអស់គួរពិចារណាឡើងវិញក្នុងកាវិនិយោគមកលើវិស័យនេះ ព្រោះវិស័យនេះបានបង្កើតការងារច្រើនដល់ប្រជាកសិករ»។
លោកបានប្រាប់ទៀតថា ផលិតកម្មស្វាយចន្ទីកំពុងទទួលបានការយកចិត្តទុកដាក់យ៉ាងខ្លាំងពីរដ្ឋាភិបាល តាមរយៈការបង្កើតគោលនយោបាយជាតិស្តីពីស្វាយចន្ទី ២០២២-២០២៧ ដែលបានធ្វើឱ្យគ្រឹះស្ថានហិរញ្ញវត្ថុមួយចំនួនចាប់ផ្តើមផ្តល់កម្ចីក្នុងអត្រាការប្រាក់អនុគ្រោះទៅដល់អ្នកដាំដុះស្វាយចន្ទី។ ទោះយ៉ាងណាចំនួនប្រាក់កម្ចីដែលគ្រឹះស្ថានហិរញ្ញវត្ថុបានផ្តល់ឱ្យអ្នកនៅក្នុងវិស័យស្វាយចន្ទី នៅមានកម្រិតតិចតួចនៅឡើយ។
លោក ស៊ីឡុត បាននិយាយថា៖«បើទោះបីមានការសហការផ្តល់កម្ចីក្នុងអត្រាការប្រាក់អនុគ្រោះក៏ដោយ ក៏លក្ខខណ្ឌនៃប្រាក់កម្ចីមានភាពស៊ាំញាំដែលធ្វើឱ្យសហគ្រាសកែច្នៃស្វាយចន្ទីក្នុងស្រុក មិនអាចរកទុនបង្វិលដើម្បីទិញគ្រាប់ស្តុកទុកសម្រាប់កែច្នៃ ។ ហេតុដូចនេះបានធ្វើឱ្យគ្រាប់ស្វាយចន្ទីឆៅ ៩៥ ភាគរយ ត្រូវបាននាំចេញទៅក្រៅប្រទេស»។
យោងតាម សសក នៅកម្ពុជាបច្ចុប្បន្នអាចមានផ្ទៃដីដាំដុះស្វាយចន្ទីប្រហែល ៧០០ ០០០ ហិកតា ក្នុងនោះផ្ទៃដីប្រមូលផលមានប្រមាណ ៥៨០ ១១៧ ហិកតា ក្រៅពីនោះជាផ្ទៃដីដាំដុះថ្មី។ ស្វាយចន្ទីមានដាំនៅស្ទើគ្រប់ខេត្ត ប៉ុន្តែភាគច្រើននៅក្នុងខេត្តកំពង់ធំ ក្រចេះ រតនគិរី ស្ទឹងត្រែង កំពង់ចាម ត្បូងឃ្មុំ ព្រះវិហារ សៀមរាប ឧត្តរមានជ័យ កំពង់ឆ្នាំង និងខេត្តមណ្ឌលគិរី។
ដើម្បីជំរុញការនាំចេញគ្រាប់ស្វាយចន្ទី(កែច្នៃរួច)ទៅទីផ្សារអន្តរជាតិ កាលពីថ្ងៃទី២០ ខែមករា ឆ្នាំ២០២៥ នៅទីក្រុងកូជី ប្រទេសជប៉ុន លោក សំហេង បូរ៉ា រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងារជំរុញការនាំចេញ បានជួបពិភាក្សាការងារជាមួយ លោក Takashi Inoue នាយកប្រតិបត្តិក្រុមហ៊ុន Inoue Calcium Corporation នៅទីស្នាក់ការកណ្តាលរបស់ក្រុមហ៊ុននៅទីក្រុងកូជី ប្រទេសជប៉ុន ដោយមានការចូលរួមពី កញ្ញា សឿន សុធីតា ដែលជាសហស្ថាបនិកសិប្បកម្មស្វាយចន្ទីស្ទឹងត្រែង ផងដែរ។
ជំនួបនេះធ្វើឡើងក្នុងគោលបំណងដើម្បីពង្រីកសក្តានុពលនៃការនាំចេញគ្រាប់ស្វាយចន្ទីរបស់កម្ពុជាទៅកាន់ទីផ្សារជប៉ុន និងការសិក្សាពីយុទ្ធសាស្ត្រ ស្ដីពីការពង្រីកទីផ្សារ ដោយក្រុមហ៊ុន Inoue Calcium Corporation បានទទួលគ្រាប់ស្វាយចន្ទី (trial shipment ) ជាលើកដំបូងពីសិប្បកម្មស្វាយចន្ទីស្ទឹងត្រែង។
ក្នុងឱកាសនោះ ក្រុមការងារជំរុញការនាំចេញ នៃក្រសួងពាណិជ្ជកម្មបានបញ្ជាក់ពីការប្តេជ្ញាចិត្តក្នុងការផ្តល់ការគាំទ្រយ៉ាងសកម្ម ដើម្បីបង្កើនឱកាសពាណិជ្ជកម្ម និងការជំរុញភាពជាដៃគូឱ្យកាន់តែរឹងមាំ ដើម្បីជំរុញកំណើនសេដ្ឋកិច្ចប្រកបដោយចីរភាពសម្រាប់ផលិតផលកសិកម្មរបស់កម្ពុជា ជាពិសេសវិស័យនាំចេញគ្រាប់ស្វាយចន្ទី។
បើយោងតាម លោក ស៊ីឡុត គិតរហូតដល់ពេលនេះកម្ពុជាមានសហគ្រាសកែច្នៃស្វាយចន្ទី ចំនួន ៥២ ក្នុងនោះ ៦ ជារោងចក្រធុនមធ្យម (សមត្ថភាពផលិត ៧ ០០០ តោន ទៅ ១៤០ ០០០ តោន ក្នុងមួយឆ្នាំ)។ ចំណែក ៤៨ សហគ្រាសផ្សេងទៀតជាសិប្បកម្មលក្ខណៈគ្រួសារតូចៗ មិនមានផលិតកម្មពេញ ១ឆ្នាំឡើយ៕
