លោក ស៊ូ សុជាតិ ឡើងថ្លែងមុនពិធីចុះកិច្ចព្រមព្រៀងលើកិច្ចសហប្រតិបត្តិការ រវាង SERC និង IFC។ ហ៊ឹន ពិសី
ទីផ្សារហិរញ្ញវត្ថុកម្ពុជាត្រូវបានរំពឹងថា នឹងឆ្ពោះទៅមុខកាន់តែលឿនបន្ថែមទៀត បន្ទាប់ពីនិយ័តករមូលបត្រកម្ពុជា(SERC) និងសាជីវកម្មហិរញ្ញវត្ថុអន្តរជាតិ (IFC) បានចុះកិច្ចព្រមព្រៀងសហប្រតិបត្តិការគ្នាដើម្បីរួមចំណែកកសាងនូវប្រព័ន្ធអេកូឡូស៊ីទីផ្សារឱ្យកាន់តែរឹងមាំ និងធានាបាននូវកំណើនប្រកបដោយចីរភាព។ នេះបើតាម លោក ស៊ូ សុជាតិ អគ្គនាយក SERC។
ពិធីចុះហត្ថុលេខាត្រូវធ្វើឡើងក្នុងថ្ងៃទី២២ ខែមករា នៅសណ្ឋាគារ រ៉ាហ្វិល ឡឺ រ៉ូយ៉ាល់ រវាងលោក ស៊ូ សុជាតិ អគ្គនាយក SERC (Sou Socheat, Delegate of the royal Government in Charge as Director General of the Securities and Exchange Regulator of Cambodia)និងលោក Tom Ceusters ប្រធានទទួលបន្ទុកផ្នែកផ្សារមូលបត្រ និងវិនិយោគនៃ IFC។ ក្នុងពិធីនេះក៏មានការចូលរួម
អគ្គនាយក SERC លោក ស៊ូ សុជាតិ បានថ្លែងថា កិច្ចសហការនេះបានធ្វើឡើងក្នុងកាលៈទេសៈដ៏សំខាន់មួយ ដោយសារទីផ្សារឧបករណ៍និស្សន្ទនៅប្រទេសកម្ពុជាមានសក្ដានុពលយ៉ាងធំធេងក្នុងការរួមចំណែកដល់កំណើនហិរញ្ញវត្ថុរបស់ប្រទេស។
ការផ្តល់ឧបករណ៍ហិរញ្ញវត្ថុប្រកបដោយភាពច្នៃប្រឌិតសម្រាប់ការគ្រប់គ្រងហានិភ័យ និងការធ្វើពិពិធកម្មការវិនិយោគ នឹងជួយឱ្យទីផ្សារហិរញ្ញវត្ថុកម្ពុជាកាន់តែមានភាពរឹងមាំ ហើយវានឹងដើរតួនាទីយ៉ាងសំខាន់ក្នុងការជួយអភិវឌ្ឍន៍សេដ្ឋកិច្ចជាតិផងដែរ។
លោកបានថ្លែង0ថា៖«កិច្ចព្រមព្រៀងរវាងនិយ័តករមូលបត្រកម្ពុជា និងសាជីវកម្មហិរញ្ញវត្ថុអន្តរជាតិ បង្ហាញពីផែនការដ៏ទូលំទូលាយមួយ ដើម្បីធានាបាននូវកំណើនប្រកបដោយចីរភាព។ គំនិតផ្តួចផ្តើមនេះស្របតាមគោលដៅរបស់ប្រទេសកម្ពុជាក្នុងការក្លាយជាអ្នកចូលរួមប្រកួតប្រជែង និងគួរឱ្យទុកចិត្តនៅក្នុងប្រព័ន្ធអេកូឡូស៊ីហិរញ្ញវត្ថុសកល»។
ទោះយ៉ាងណា លោក សុជាតិ អះអាងថា ក្នុងដំណើរឆ្ពោះទៅមុខ គឺតម្រូវឱ្យមានការគិតគូរដោយប្រុងប្រយ័ត្ន មានក្របខ័ណ្ឌរឹងមាំ និងការកសាងសមត្ថភាពបន្ថែម។
យោងតាមកិច្ចព្រមព្រៀង IFC នឹងចូលរួមជួយការកសាងសមត្ថភាពជាបន្តបន្ទាប់ដល់បុគ្កលនិយ័តកម្ម និងអ្នកចូលរួមទីផ្សារជាមួយនឹងជំនាញចាំបាច់ នៃទីផ្សារនិស្សន្ទ, ការពង្រឹងក្របខ័ណ្ឌច្បាប់និងហិរញ្ញវត្ថុរបស់កម្ពុជា ដោយធានាថា អនុលោមតាមស្តង់ដាអន្តរជាតិ ហើយកិច្ចព្រមព្រៀងនេះក៏កំណត់ដំណាក់កាលសម្រាប់ទីផ្សារនិស្សន្ទដែលរួមចំណែកដល់ស្ថិរភាពហិរញ្ញវត្ថុរបស់កម្ពុជា និងគោលដៅសេដ្ឋកិច្ចទូលំទូលាយនៃការជំរុញការបង្កើតថ្មី តម្លាភាព និងភាពធន់នៅក្នុងទីផ្សារ។
លោក សុជាតិ បានបញ្ជាក់ថា៖«កិច្ចព្រមព្រៀងនេះលើសពីឯកសារមួយ វាតំណាងឱ្យការប្តេជ្ញាចិត្តរួមគ្នារបស់យើង ដើម្បីសម្រេចបាននូវវឌ្ឍនភាពដ៏មានន័យ និងយូរអង្វែង។ នៅពេលដែលគម្រោងនេះចាប់ផ្តើមដំណើរការជាផ្លូវការ ការប្តេជ្ញាចិត្តពីទាំង SERC និង IFC មានគោលបំណងផ្តល់នូវអត្ថប្រយោជន៍សម្រាប់ការអភិវឌ្ឍទីផ្សារនិស្សន្ទ និងសេដ្ឋកិច្ចកម្ពុជា»។
បើយោងតាម SERC ដំណើរការនៃការជួញដូរឧបករណ៍និស្សន្ទ ត្រូវបានដាក់ឱ្យដំណើរការដំបូងនៅឆ្នាំ ២០១៧ ដោយទំហំនៃការជូញដូរនៅពេលនោះមានប្រមាណ ៤ លានដុល្លារ។ រហូតដល់ឆ្នាំ២០២៣ ដំណើរការជួញដូរឧបករណ៍និស្សន្ទបានកើនឡើងដល់ ៣០០ លានដុល្លារ។
ការជួញដូរឧបករណ៍និស្សន្ទ ត្រូវបានបែងចែកជា ៦ ប្រភេទ និងមានសរុបជាង ២៤៩ ផលិតផល។ ផលិតផលឧបករណ៍និស្សន្ទទាំង ៦ ប្រភេទ រួមមាន Forex (ការជួញដូររូបិយប័ណ្ណ) កិច្ចសន្យាលក់ពង្រីកថ្លៃលោហធាតុមានតម្លៃ កិច្ចសន្យាលក់ពង្រីកថ្លៃប្រេងឆៅ កិច្ចសន្យាលក់ពង្រីកថ្លៃ commodity កិច្ចសន្យាលក់ពង្រីកថ្លៃសន្ទស្សន៍ និងកិច្ចសន្យាលក់ពង្រីកថ្លៃមូលបត្រកម្មសិទ្ធិ៕
