ទិដ្ឋភាពយន្តហោះនៅក្នុងបរិវេណអាកាសយានដ្ឋានអន្តរជាតិភ្នំពេញ។ ហ៊ឹន ពិសី
អ្នកដំណើរជាតិ និងអន្តរជាតិសរុបជាង ៦ លាននាក់បានធ្វើដំណើរឆ្លងកាត់អាកាសយានដ្ឋានអន្តរជាតិទាំង ៣ របស់កម្ពុជាកាលពីឆ្នាំ២០២៤ ដោយកើនឡើងជាង ២០ ភាគរយបើធៀបនឹងរយៈពេលដូចគ្នាក្នុងឆ្នាំ ២០២៣ ខណៈចំនួនជើងហោះហើរសរុបមានជិត ៦ ម៉ឺនជើង ពីក្រុមហ៊ុនអាកាសចរណ៍ក្នុងស្រុក និងអន្តរជាតិចំនួន ៣១។
របាយការណ៍វឌ្ឍនភាពវិស័យដឹកជញ្ជូនតាមផ្លូវអាកាសរបស់រដ្ឋលេខាធិការដ្ឋានអាកាសចរណ៍ស៊ីវិលកម្ពុជា ឱ្យដឹងថា វិស័យដឹកជញ្ជូនតាមផ្លូវអាកាសរបស់អាកាសយានដ្ឋានអន្តរជាតិទាំង ៣ របស់កម្ពុជា(អាកាសយានដ្ឋានអន្តរជាតិភ្នំពេញ សៀមរាប និងខេត្តព្រះសីហនុ) កាលពីឆ្នាំ ២០២៤ បានកើនឡើងគួរឱ្យកត់សម្គាល់ ដោយទទួលបានជើងហោះហើរចេញ-ចូល(ទ្វេទិស) សរុប ៥៨ ៣៥៤ កើនឡើង ១៤ ភាគរយបើធៀបនឹងឆ្នាំ ២០២៣ និងអ្នកដំណើរឆ្លងកាត់ចេញ-ចូល(ទ្វេទិស) មានចំនួន ៦ ២៤១ ៨៤២ នាក់ កើនឡើង ២២ ភាគរយ។ ចំណែកទំនិញដឹកជញ្ជូនតាមផ្លូវអាកាសចេញ-ចូល(ទ្វេទិស) មាន ៧៧ ៧៥២តោន កើនឡើង ៤០ ភាគរយ។
រដ្ឋលេខាធិការ និងជាអ្នកនាំពាក្យនៃរដ្ឋលេខាធិការដ្ឋានអាកាសចរណ៍ស៊ីវិល លោក ស៊ីន ចាន់សិរីវុត្ថា បានប្រាប់ភ្នំពេញប៉ុស្តិ៍ក្នុងថ្ងៃទី២៤ ខែមករា ថា បន្ទាប់ពីធ្លាក់ចុះយ៉ាងគំហុកស្ទើរដល់សូន្យនាអំឡុងឆ្នាំ២០២០-២០២១ ដោយសារការរីករាលដាលជំងឺកូវីដ១៩ វិស័យដឹកជញ្ជូនតាមផ្លូវអាកាសកម្ពុជា បានចាប់ផ្តើមកម្រើកឡើងវិញជាបណ្តើរៗតាំងពីដើមឆ្នាំ២០២២ ជាមួយនឹងកំណើនជាមធ្យមជាង ១០ភាគរយរៀងរាល់ឆ្នាំ។
សម្រាប់ឆ្នាំ ២០២៥ នេះតាមការព្យាករ គឺចំនួនជើងហោះហើរឆ្លងកាត់អាកាសយានដ្ឋានអន្តរជាតិទាំង ៣ នឹងអាចកើនលើសឆ្នាំ ២០២៤។
បច្ចុប្បន្នមានក្រុមហ៊ុនអាកាសចរណ៍ក្នុងស្រុកចំនួន ៤ និងអន្តរជាតិចំនួន ២៧ កំពុងធ្វើប្រតិបត្តិការចុះចតនៅអាកាសយានដ្ឋានអន្តរជាតិទាំង ៣ របស់កម្ពុជា។
លោកបានថ្លែងថា៖«ការព្យាករនេះ គឺយើងឈរលើមូលដ្ឋានបែបវិទ្យាសាស្រ្តនៃកំណើនរយៈពេលប៉ុន្មានឆ្នាំចុងក្រោយនេះ ដែលនិន្នាការធ្វើដំណើររបស់ភ្ញៀវ បន្ទាប់ពីវិបត្តិជំងឺកូវីដ១៩ និងការងើបឡើងវិញនៃវិស័យទេសចរណ៍ពិភពលោក។ បច្ចុប្បន្នរដ្ឋាភិបាលកម្ពុជា ក៏កំពុងខិតខំកសាងហេដ្ឋារចនាសម្ព័ន្ធ ក៏ដូចជាពង្រឹង និងពង្រីកការផ្សព្វផ្សាយអំពីសក្តានុពលវិស័យទេសចរណ៍កម្ពុជាទៅកាន់គោលដៅជាច្រើននៅលើពិភពលោក»។
លោកបានបន្ថែមថា៖«យើងរំពឹងថា វិស័យដឹកជញ្ជូនតាមផ្លូវអាកាសកម្ពុជា នឹងមានកំណើនបន្ថែមទៀត ដោយបច្ចុប្បន្នមានការស្នើសុំតភ្ជាប់គោលដៅថ្មីៗ ព្រមទាំងសំណើនៃការបង្កើនជើងហោះហើរជាបន្តបន្ទាប់»។
លោកប្រាប់ទៀតថា សកម្មភាពនៃការពង្រីកចំនួនជើងហោះហើររបស់ក្រុមហ៊ុនជាតិ និងអន្តរជាតិដែលកំពុងមានប្រតិបត្តិកានៅកម្ពុជាកំពុងបោះជំហានទៅមុខគួរឱ្យកត់សម្គាល់ ដោយថ្មីៗនេះក្រុមហ៊ុនអាកាសចរណ៍ជាតិ Air Cambodia ក៏បានបើកផ្លូវហោះហើរថ្មីរបស់ខ្លួនរវាង ភ្នំពេញ-កោះភូគុក ចំនួន ៣ ជើងក្នុង ១សប្តាហ៍ផងដែរ។
លោកបានអះអាងថា៖«ក្រៅពីវឌ្ឍនភាពខាងលើ នៅខែកុម្ភៈខាងមុខ កម្ពុជានឹងទទួលជើងហោះហើរថ្មីមួយទៀតរបស់ក្រុមហ៊ុនអាកាសចរណ៍ឥណ្ឌា IndiGo ដែលហោះហើរត្រង់រវាងទីក្រុងកុលកាតា-សៀមរាប-កុលកាតា (Kolkata - Siem Reap- Kolkata)។ តាមរយៈជើងហោះហើរនេះ យើងរំពឹងថានឹងមានភ្ញៀវឥណ្ឌា ព្រមទាំងភ្ញៀវបរទេសផ្សេងទៀតចូលមកកម្ពុជាកាន់តែច្រើន»។
អ្នកនាំពាក្យខាងលើបានលើកឡើងទៀតថា អាកាសយានដ្ឋានអន្តរជាតិតេជោ(ភ្នំពេញថ្មី) ដែលគ្រោងនឹងបើកដំណើរការជាផ្លូវការនាអំឡុងខែកក្កដា ខាងមុខ នឹងជួយសម្រួលឱ្យការធ្វើដំណើរតាមផ្លូវអាកាសនៅកម្ពុជាកាន់តែមានភាពងាយស្រួលថែម ១កម្រិតទៀត។
កម្ពុជា-ឥណ្ឌា បានបង្កើតឆ្នាំទស្សនាកម្ពុជា-ឥណ្ឌា លើកដំបូងក្នុងឆ្នាំ ២០២៤ ដើម្បីជំរុញការទស្សនាប្រទេសទាំងពីរ។ បច្ចុប្បន្ន ប្រទេសទាំងពីរមានជើងហោះហើរត្រង់រវាងទីក្រុងភ្នំពេញ និងទីក្រុងញូវដែលី ដែលប្រតិបត្តិការដោយក្រុមហ៊ុន Air Cambodia តាំងពីខែមិថុនា ឆ្នាំ២០២៤។
លោក ខៀវ ធី ប្រធានសមាគមមគ្គុទ្ទេសក៍ទេសចរអង្គរ បាននិយាយថា បើទោះបីចំនួនជើងហោះហើរ និងភ្ញៀវធ្វើដំណើរតាមផ្លូវអាកាសមកកម្ពុជា(អាកាសយានដ្ឋានអន្តរជាតិខេត្តសៀមរាប) មិនទាន់មានចំនួនច្រើនដូចមុនឆ្នាំ ២០២០ ប៉ុន្តែនេះជាសញ្ញាបញ្ជាក់ពីការងើបឡើងវិញនៃវិស័យទេសចរណ៍កម្ពុជា។
សក្តានុពល និងភាពសម្បូរបែបនៃតំបន់ទេសចរណ៍ ព្រមជាមួយនឹងការផ្សព្វផ្សាយកាន់តែទូលំទូលាយ នឹងជួយទាក់ទាញអ្នកវិនិយោគ ជាពិសេសភ្ញៀវទេសចរបរទេសកាន់តែច្រើនឱ្យធ្វើដំណើរមកកម្សាន្តនៅកម្ពុជា។
លោកបានអះអាងថា៖«ការតភ្ជាប់ជើងហោះហើរត្រង់ពីទីក្រុងសំខាន់ៗនៅក្រៅមកកម្ពុជា គឺប្រាកដជាធ្វើឱ្យភ្ញៀវទេសចរអន្តរជាតិធ្វើដំណើរមកកម្ពុជាកាន់តែច្រើន។ ភាគច្រើននៃភ្ញៀវតាមផ្លូវអាកាសមកកាន់ខេត្តសៀមរាប គឺជាអ្នកទេសចរ»។
ទិន្នន័យក្រសួងទេសចរណ៍ឱ្យដឹងថា ក្នុងឆ្នាំ ២០២៤ កម្ពុជាទទួលបានភ្ញៀវបរទេសសរុប ៦,៧ លាននាក់ កើនឡើង ២២,៩ ភាគរយបើធៀបនឹងឆ្នាំ២០២៣ និងកើនឡើង ១,៤ភាគរយធៀបនឹងឆ្នាំ២០១៩។ ភ្ញៀវបរទេសដែលធ្វើដំណើរមកកម្ពុជាច្រើនជាងគេ គឺជនជាតិថៃ វៀតណាម ចិន ឡាវ និងអាមេរិក៕
