កម្លាំងសន្តិសុខឯកជនកំពុងបំពេញការងារនៅរោងចក្រ ១ កន្លែង។ សហការី
បន្ទាប់ពីមានការរីកដុះដាលយ៉ាងច្រើនកាលពីពេលកន្លងមក(មុនវត្តមានជំងឺកូវីដ១៩) ក្រុមហ៊ុនផ្តល់សេវាសន្តិសុខឯកជនចំនួន ២៦ ត្រូវបានក្រសួងមហាផ្ទៃសម្រេចលុបឈ្មោះមិនឱ្យមានប្រតិបត្តិការ បន្ទាប់ពីក្រុមហ៊ុនទាំងអស់នោះបានប្រកាសក្ស័យធន។
អ្នកសេដ្ឋកិច្ចយល់ថា បញ្ហាគឺដោយសារតែការធ្វើតាមគ្នា ការធ្លាក់ចុះប្រាក់ចំណូល និងកំណើនការប្រើប្រាស់កាមេរ៉ាសុវត្ថិភាព។
រដ្ឋមន្ត្រីក្រសួងមហាផ្ទៃ លោក ស សុខា កាលពីថ្ងៃទី២៧ ខែមករា ឆ្នាំ២០២៥ បានផ្ញើលិខិតមួយទៅរដ្ឋមន្ត្រីក្រួងពាណិជ្ជកម្ម ដោយសរសេរថា ក្រសួងមហាផ្ទៃបានពិនិត្យស្រាវជ្រាវលើក្រុមហ៊ុនផ្តល់សេវាសន្តិសុខឯកជនចំនួន ២៦ ក្រុមហ៊ុន ដែលបានស្នើសុំការអនុញ្ញាតប្រកបអាជីវកម្មកន្លងមក ហើយត្រូវបានប្រកាសក្ស័យធន និងពុំមានសកម្មភាពបម្រើសេវាកម្មទៀតឡើយ ដែលមិនស្របតាមគោលបំណងក្នុងមាត្រា ១ នៃអនុក្រឹត្យលេខ ២៨៩ អនក្រ.បក ស្តីពីការគ្រប់គ្រងសន្តិសុខឯកជន។ ក្នុងន័យនេះក្រសួងមហាផ្ទៃ បានសម្រេចលុបឈ្មោះចេញពីបញ្ជីអនុញ្ញាតឱ្យផ្តល់សេវាសន្តិសុខឯកជនចំនួន ២៦ ក្រុមហ៊ុន។
អ្នកសេដ្ឋកិច្ចនៅរាជបណ្ឌិត្យសភាកម្ពុជា លោក ហុង វណ្ណៈ (Hong Vanak, an economic researcher at the Royal Academy of Cambodia) បានប្រាប់ភ្នំពេញប៉ុស្តិ៍ក្នុងថ្ងៃទី២៨ ខែមករា ថា ការប្រកាសលុបឈ្មោះក្រុមហ៊ុនបម្រើសេវាកម្មសន្តិសុខឯកជនពីសំណាក់ក្រសួងមហាផ្ទៃ គឺដោយសារតែក្រុមហ៊ុនទាំងអស់នោះមិនមានលទ្ធភាពក្នុងការបន្តអាជីវកម្មរបស់ខ្លួន។
កង្វះសមត្ថភាពក្នុងការឈរជើងលើទីផ្សារនេះ អាចបណ្តាលមកពីកត្តារួមផ្សំមួយចំនួនដូចជា ការធ្លាក់ប្រាក់ចំណូលក្រុមហ៊ុន ចំនួនក្រុមហ៊ុនបម្រើសេវាកម្មដូចគ្នាមានចំនួនច្រើន និងបញ្ហាផ្ទៃក្នុងរបស់ក្រុមហ៊ុន។
លោកបន្តថា បន្ថែមពីលើនេះក៏មានម្ចាស់ក្រុមហ៊ុន/សហគ្រាមួយចំនួនដែលកាលពីមុនធ្លាប់ជួលកម្លាំងសន្តិសុខច្រើន គឺបាននាំគ្នាកាត់បន្ថយចំនួនសន្តិសុខ និងងាកទៅប្រើប្រាស់កាមេរ៉ាសុវត្ថិភាពខ្លះៗជាជំនួយ។
លោកបានថ្លែងថា៖«នៅក្នុងវដ្តនៃក្រុមហ៊ុន/អាជីវកម្មនីមួយៗតែងតែជួបនឹងភាពរីកចម្រើន និងការធ្លាក់ចុះជារឿងធម្មតា។
ចំនួនក្រុមហ៊ុនផ្តល់សេវាសន្តិសុខដែលបិទទាំងអស់នេះ ក៏អាចមកពីមុខពួកគាត់មើលឃើញគេបើកទទួលជោគជ័យ ក៏នាំគ្នាបើកតាមទាំងដែលខ្លួនមិនសូវមានជំនាញ និងមិនមានអតិថិជននៅក្នុងដៃ»។
អនុប្រធានសមាគមពាណិជ្ជកម្មកម្ពុជា-ចិន លោក ឡោ វិចិត្រ Lor Vichet, vice-president of the Cambodia Chinese Commerce Association(CCCA) បាននិយាយថាទិដ្ឋភាពជាក់ស្តែងនាពេលបច្ចុប្បន្ន គឺការប្រើប្រាស់កាមេរ៉ាសុវត្ថិភាពបានកើតមាននៅស្ទើគ្រប់ទីកន្លែង ដោយរាប់ចាប់តាំងពីទីធ្លាសាធារណៈ ទីស្នាក់ការក្រុមហ៊ុន រោងចក្រ/សហគ្រាស និងលំនៅឋានឯកជន។
កំណើននៃការប្រើប្រាស់កាមេរ៉ាសុវត្ថិភាព គឺជាហេតុផលចម្បងដែលធ្វើឱ្យអាជីវកម្មរបស់ក្រុមហ៊ុនផ្តល់សេវាកម្មសន្តិសុខឯកជនធ្លាក់ចុះ។ ជាទូទៅការចំណាយលើការបំពាក់កាមេរ៉ា គឺមិនចាំបាច់ចំណាយរាល់ខែដូចទៅនឹងការជួលសន្តិសុខឡើយ។
លោកបាននិយាយថា៖«បច្ចុប្បន្នម្ចាស់អាជីវកម្មភាគច្រើន តែងព្យាយាមកាត់បន្ថយចំណាយ ដូច្នេះកន្លែងណាដែលអាចបំពាក់កាមេរ៉ាបាន គឺគេបំពាក់កាមេរ៉ា លើកលែងតែកន្លែងដែលត្រូវការមានសន្តិសុខដើម្បីដើរត្រួតពិនិត្យ ឬរាប់ចំនួនទំនិញចេញចូលដែលកាមេរ៉ាមិនអាចធ្វើបាន ទើបពួកគេត្រូវការមនុស្សឱ្យធ្វើ»។
លោកលើកឡើងទៀតថា មួយវិញទៀតនៅពេលដែលចំនួនក្រុមហ៊ុនផ្តល់សេវាកម្មសន្តិសុខឯកជននៅសល់ចំនួនតិច ក៏ជាឱកាសឱ្យអាជ្ញាធរមានសមត្ថកិច្ច ធ្វើការពង្រឹងគុណភាពនៃក្រុមហ៊ុនសន្តិសុខឯកជនដែលនៅមានប្រតិបត្តិការផងដែរ។
យោងតាមក្រសួងមហាផ្ទៃ ក្រុមហ៊ុនផ្តល់សេវាសន្តិសុខឯកជន ទាំង ២៦ រួមមាន ក្រុមហ៊ុន C.B.I Security Co., Ltd(CBI), LAIS Security Agency Co., Ltd(LSA), V&M Universal Security Co., Ltd(VM), Public Safety Agent Co., Ltd (PSA), SEUNG TEP Security(S.T.S) Co., Ltd(STS), Cambodia Security Management Co., Ltd(CSM), Eagle Patrol Security Co., Ltd(EPS), SAHAS PPSEZ Co., Ltd(SH), STAING DEK MEK CHHOR Service Co., Ltd(S.D.M.C), REAM THEA Cambodia Security Co., Ltd(RT), Cambodia Security Agency Limited (CSA), Security Safety For You Co., Ltd(S.S.Y), Oscar Security Co., Ltd (OSCAR), INTRYTEP Security Co., Ltd.(IS), Lucky Security Agency Co., Ltd. (LUCKY), GRATICITY Security Services (Cambodia) Co., Ltd (GT.S.S), Sydney Security and Protective Services Co., Ltd(SSS), Good Prevention Security Co., Ltd (GPSC), Clement Shield (Cambodia) Security Consultant Co., Ltd(CLS), Khmer Hunter Security Service Co., Ltd. (KHS), Nging Phorn Heng Samnang Security Co., Ltd(N.P.S), V.P.D.S Dragon Security Co., Ltd, Mesh Security Co., Ltd(MESH), Asia Security (Cambodia) Co., Ltd(ASC), NR Security (Cambodia) Co., Ltd (NRSC), និងក្រុមហ៊ុន PS 9 Global Security Service Co.,Ltd (PS9)៕
