ជំនួបរវាងនាយករដ្ឋមន្ត្រីឡាវ លោក សនសៃ ស៊ីផាន់ដន និងលោកស្រី ចម និម្មល រដ្ឋមន្រ្តីក្រសួងពាណិជ្ជកម្មកម្ពុជា។ ក្រសួងពាណិជ្ជកម្ម
ក្នុងនាមជាប្រទេសមានព្រំដែនជាប់គ្នា កម្ពុជា និងឡាវ បានឯកភាពគ្នាលើចំណុចសំខាន់ៗចំនួន ៤ ដែលរំពឹងថានឹងជួយធ្វើឱ្យកិច្ចសហប្រតិបត្តិការផ្នែកពាណិជ្ជកម្ម និងទេសចរណ៍រវាងប្រទេសទាំង ២ កាន់តែមានភាពមមាញឹកជាងពេលបច្ចុប្បន្ន។
នៅក្នុងជំនួបជាមួយ លោក សនសៃ ស៊ីផាន់ដន នាយករដ្ឋមន្ត្រីនៃសាធារណរដ្ឋប្រជាធិបតេយ្យប្រជាមានិតឡាវ កាលពីថ្ងៃទី ២៨ ខែមករា នាឱកាសចូលរួមកិច្ចប្រជុំគណៈកម្មាធិការពាណិជ្ជកម្មចម្រុះកម្ពុជា-ឡាវ លើកទី២ នៅទីក្រុងវៀងច័ន្ទន៍ ប្រទេសឡាវ លោកស្រី ចម និម្មល រដ្ឋមន្រ្តីក្រសួងពាណិជ្ជកម្មកម្ពុជា បានលើកឡើងថា ទំនាក់ទំនងការទូត និងពាណិជ្ជកម្មរវាងកម្ពុជា-ឡាវ ត្រូវបានរំពឹងថានឹងកាន់តែល្អប្រសើរបន្ថែមទៀតបន្ទាប់ពីកិច្ចប្រជុំនៃគណៈកម្មាធិការពាណិជ្ជកម្មចម្រុះកម្ពុជា-ឡាវ លើកទី២ ដែលបានប្រព្រឹត្តទៅកាលពីព្រឹកថ្ងៃទី២៨ ខែមករា ឆ្នាំ២០២៥ បានបង្ហាញសញ្ញាវិជ្ជមានគួរឱ្យកត់សម្គាល់ ដោយភាគីទាំង ២ ក៏បានប្តេជ្ញាចិត្តនឹងខិតខំជំរុញទំហំពាណិជ្ជកម្មជាមួយគ្នាឱ្យកាន់តែធំ ប្រកបដោយប្រសិទ្ធភាព។
ជាកិច្ចឆ្លើយតប លោកនាយករដ្ឋមន្ត្រីឡាវ បានផ្តល់ការគាំទ្រចំពោះលទ្ធផល និងគំនិតផ្តួចផ្តើមដែលរដ្ឋមន្រ្តីពាណិជ្ជកម្មនៃប្រទេសទាំង ២ បានពិភាក្សា និងលើកទឹកចិត្តឱ្យក្រសួង-ស្ថានប័នពាក់ព័ន្ធ ព្រមទាំងរដ្ឋបាលខេត្តជាប់ព្រំដែនបន្តកិច្ចសហការឱ្យកាន់តែសកម្មបន្ថែមទៀតសំដៅជំរុញកំណើនពាណិជ្ជកម្ម និងវិនិយោគនៃប្រទេសទាំងពីរ។
យោងតាមក្រសួងពាណិជ្ជកម្មចំណុចសំខាន់ចំនួន ៤ ដែលភាគីកម្ពុជា-ឡាវ បានឯកភាពគ្នាក្នុងកិច្ចប្រជុំគណៈកម្មាធិការពាណិជ្ជកម្មចម្រុះកម្ពុជា-ឡាវ លើកទី២ រួមមាន ទី១. ការពិនិត្យលើសក្ដានុពលនៃកិច្ចសហប្រតិបត្តិការពាណិជ្ជកម្មនិងប្តេជ្ញាចិត្តបង្កើនទំហំពាណិជ្ជកម្មទ្វេភាគី, ទី២ ការពិនិត្យលទ្ធភាពបង្កើតយន្តការផ្សេងៗដើម្បីពង្រីកទំហំពាណិជ្ជកម្មទ្វេភាគី, ទី៣. ការពិនិត្យលទ្ធភាពបង្កើតយន្តការប្រជុំប្រចាំឆ្នាំនៃរដ្ឋបាលខេត្តជាប់ព្រំដែននៃប្រទេសទាំងពីរដើម្បីលើកកម្ពស់ការធ្វើពាណិជ្ជកម្មនិងពិនិត្យលើគំនិតផ្ដួចផ្ដើមដទៃទៀត ដែលថ្នាក់ដឹកនាំកំពូលទាំង ២ បានឯកភាពរួមទាំងហេដ្ឋារចនាសម្ព័ន្ធដឹកជញ្ជូន និងទី ៤ ជំរុញឱ្យមានការតាំងពិព័រណ៍, វេទិកាធុរកិច្ច និងវិនិយោគ, ទេសចរណ៍, ភស្តុភារកម្ម និងកិច្ចសហប្រតិបត្តិការនៃសភាពាណិជ្ជកម្មកម្ពុជា និងសភាពាណិជ្ជកម្ម ឧស្សាហកម្មឡាវ។
អ្នកសេដ្ឋកិច្ចនៅរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី២៩ ខែមករាថា បើទោះបីកម្ពុជា និងឡាវ ជាប្រទេសមានព្រំដែនជាប់គ្នា និងមានទំនាក់ទំនងការទូតល្អជាមួយគ្នាជាយូរមកហើយក្តី ក៏សកម្មភាពនៃការផ្លាស់ប្តូរទំនិញរវាងប្រទេសទាំង ២ ហាក់នៅមានកម្រិតតិចតួចនៅឡើយបើធៀបនឹងប្រទេសជិតខាងកម្ពុជា ដូចជា ថៃ និងវៀតណាម។
មូលហេតុដែលទឹកប្រាក់នៃការផ្លាស់ប្តូរពាណិជ្ជកម្មរវាងប្រទេសទាំង ២ មានចំនួនតិច គឺដោយសារតែប្រទេសទាំង ២ មានមូលដ្ឋានផលិតកម្មប្រហាក់ប្រហែលគ្នារាប់ចាប់តាំងពី វិស័យកសិកម្ម កសិ-ឧស្សាហកម្ម ព្រមទាំងរោងចក្រកែច្នៃ។ លោកបន្តថា ក្រៅពីនោះការផ្លាស់ប្តូរពាណិជ្ជកម្ម វិស័យទេសចរណ៍រវាងប្រទេសក៏មិនសូវមានសកម្មភាពផងដែរ។
លោកអះអាងថា៖«ក្នុងនាមជាប្រទេសជិតខាងដែលមានទំនាក់ទំនងល្អជាមួយគ្នា ប្រទេសទាំង ២ ប្រាកដជាមានឱកាសច្រើនក្នុងការបង្កើនទំហំពាណិជ្ជកម្ម។ បច្ចុប្បន្នរាជរដ្ឋាភិបាលកម្ពុជាក៏កំពុងខិតខំអភិវឌ្ឍន៍ហេដ្ឋារចនាសម្ព័ន្ធទៅតាមព្រំដែនជាមួយប្រទេសឡាវ ដើម្បីជំរុញពាណិជ្ជកម្មតាមព្រំដែនផងដែរ»។
លោកបានលើកឡើងទៀតថា ក្រៅពីពាណិជ្ជកម្មទំនិញ ប្រទេសកម្ពុជានាពេលបច្ចុប្បន្នក៏បានទទួលទិញថាមពលអគ្គិសនីមួយចំនួនពីប្រទេសឡាវផងដែរ។ សម្រាប់វិស័យទេសចរណ៍ គឺការធ្វើដំណើរទៅវិញទៅមករវាងប្រជាជននៃប្រទេសទាំង ២ នៅមានកម្រិតនៅឡើយ។
ទិន្នន័យផ្លូវការក្រសួងទេសចរណ៍ បានឱ្យដឹងថា រយៈពេល ១១ ខែដើមឆ្នាំ ២០២៤ កម្ពុជាទទួលបានភ្ញៀវបរទេសសរុប ៦ លាននាក់ កើនឡើង ២២ ភាគរយបើធៀបនឹងរយៈពេលដូចគ្នាក្នុងឆ្នាំ ២០២៣។
ក្នុងចំនួននេះ ភ្ញៀវមកពីប្រទេសឡាវ មានចំនួន ៣០៦ ៩៤៨នាក់ ធ្លាក់ចុះ ៧,២ភាគរយបើធៀបរយៈពេលដូចគ្នាក្នុងឆ្នាំ ២០២៣។ ភ្ញៀវជនជាតិឡាវ ស្ថិតនៅចំណាត់ថ្នាក់ទី ៤ បន្ទាប់ពីប្រទេសថៃ វៀតណាម និងចិន៕
