ទិដ្ឋភាពការសាងសង់អាកាសយានដ្ឋានអន្តរជាតិតេជោ កាលពីថ្ងៃទី២៧ ខែមករា។ BTV News
កម្ពុជារំពឹងថារដ្ឋាភិបាល និងផ្នែកឯកជនជប៉ុននឹងជួយជំរុញ និងលើកទឹកចិត្តក្រុមហ៊ុនអាកាសចរណ៍ជប៉ុន ANA ឱ្យតភ្ជាប់ជើងហោះហើរត្រង់មកកម្ពុជាឡើងវិញ ខណៈការហោះហើរត្រង់គឺមិនត្រឹមតែជួយបង្កើនលំហូរភ្ញៀវទេសចរប៉ុណោះទេ ប៉ុន្តែក៏រួមចំណែកលើកកម្ពស់កិច្ចសហប្រតិបត្តិការផ្នែកពាណិជ្ជកម្ម និងទាក់ទាញវិនិយោគិនជប៉ុនឱ្យចូលមកបណ្តាក់ទុនផ្ទាល់នៅកម្ពុជាកាន់តែច្រើនផងដែរ។
ឯកអគ្គរាជទូតជប៉ុនប្រចាំកម្ពុជា លោក ENO Atsushi កាលពីថ្ងៃទី២៧ ខែមករា បានដឹកនាំតំណាងសមាគមធុរកិច្ចជប៉ុនប្រចាំកម្ពុជា(JBAC), អង្គការពាណិជ្ជកម្មក្រៅប្រទេសជប៉ុន(JETRO)ប្រចាំកម្ពុជា, និងទីភ្នាក់ងារសហប្រតិបត្តិការអន្តរជាតិជប៉ុន(JICA) មកពីក្រុមហ៊ុនជប៉ុនចំនួន ៥៨ សរុបប្រហែល ១២០នាក់ ទៅធ្វើទស្សនកិច្ចនៅការដ្ឋានសាងសង់អាកាសយានដ្ឋានអន្តរជាតិតេជោ។
បន្ទាប់ពីដំណើរទស្សនកិច្ចខាងលើ លោក ឆារស៍ វ៉ាន់ នាយកគ្រប់គ្រងក្រុមហ៊ុន CAIC បានប្រាប់ក្រុមអ្នកយកព័ត៌មានថា នៅក្នុងដំណើរទស្សនកិច្ចនេះ ភាគីជប៉ុនបានបង្ហាញការចាប់អារម្មណ៍ខ្លាំងចំពោះវឌ្ឍនភាពនៃការសាងសង់អាកាសយានដ្ឋានអន្តរជាតិតេជោ(TIA) និងបានកោតសសើរកម្ពុជាដែលនឹងមានអាកាសយានដ្ឋានអន្តរជាតិដ៏ធំ ខ្នាត 4F នាពេលឆាប់ៗ។
បន្ថែមពីលើនេះ ភាគីជប៉ុនក៏បានសន្យានឹងធ្វើការបន្តជាមួយក្រុមហ៊ុនអាកាសចរណ៍ជប៉ុន ANA ដើម្បីលើកទឹកចិត្តពួកគេឱ្យបើកជើងហោះហើរត្រង់មកកម្ពុជាឡើងវិញ បន្ទាប់ពីផ្អាកការហោះហើរតាំងពីការផ្ទុះឡើងនៃវត្តមានជំងឺកូវីដ១៩។
លោកបន្ថែមថា រដ្ឋមន្ត្រីនៃរដ្ឋលេខាធិការអាកាសចរណ៍ស៊ីវិលកម្ពុជា ឯកអគ្គរាជទូតជប៉ុន និងក្រុមហ៊ុនវិនិយោគអាកាសយានដ្ឋានអន្តរជាតិតេជោ នឹងធ្វើការងាររួមគ្នាដើម្បីលើកទឹកចិត្តបន្ថែមដល់ក្រុមហ៊ុនអាកាសចរណ៍ជប៉ុន ឱ្យចាប់ផ្តើមហោះត្រង់រវាងជប៉ុន-កម្ពុជាឡើងវិញ។
លោកបានថ្លែងថា៖«យោងតាមដំណើរទស្សនកិច្ចរបស់ឯកអគ្គរាជទូតជប៉ុនក្នុងថ្ងៃនេះយើងសង្ឃឹមខ្លាំង ហើយលោកឯកអគ្គរាជទូតក៏បានលើកឡើងថានឹងព្យាយាមជំរុញអ៊ែរឡាញជប៉ុន(ក្រុមហ៊ុនអាកាសចរណ៍)ដើម្បីឱ្យហោះហើរ Direct មកកម្ពុជានៅក្នុងថ្ងៃអនាគតឆាប់ៗនេះ»។
ក្នុងឱកាសនៃដំណើរទស្សនកិច្ចខាងលើ ភាគីជប៉ុនក៏បានបង្ហាញការចាប់អារម្មណ៍ការវិនិយោគក្នុងវិស័យដឹកជញ្ជូនតាមផ្លូវអាកាសកម្ពុជានៅកម្ពុជាផងដែរ។ នេះបើតាមលោក ឆារស៍ វ៉ាន់។
ទាក់ទងនឹងដំណើរការសាងសង់ លោក ឆារស៍ វ៉ាន់ បានប្រាប់ថា មកដល់ពេលនេះ ការសាងសង់អាកាសយានដ្ឋានអន្តរជាតិតេជោកំពុងដំណើរការទៅមុខតាមផែនការដោយសម្រេចការសាងសង់បានជាង ៩៤ភាគរយ និងចំណាយថវិកាអស់ប្រមាណ ១,៤ ពាន់លានដុល្លារ។
គម្រោងនេះគ្រោងបើកដំណើរការជាផ្លូវការនៅខែកក្កដា ឆ្នាំ ២០២៥។ អាកាសយានដ្ឋានអន្តរជាតិតេជោ ដំណាក់កាលទី១ មានសមត្ថភាពទទួលអ្នកដំណើរចេញ-ចូល ចំនួន ១៣លាននាក់ក្នុងមួយឆ្នាំ។
របាយការណ៍វឌ្ឍនភាពវិស័យដឹកជញ្ជូនតាមផ្លូវអាកាសរបស់រដ្ឋលេខាធិការដ្ឋានអាកាសចរណ៍ស៊ីវិលកម្ពុជា ឱ្យដឹងថា វិស័យដឹកជញ្ជូនតាមផ្លូវអាកាសរបស់អាកាសយានដ្ឋានអន្តរជាតិទាំង ៣ របស់កម្ពុជា(អាកាសយានដ្ឋានអន្តរជាតិភ្នំពេញ សៀមរាប និងខេត្តព្រះសីហនុ) កាលពីឆ្នាំ ២០២៤ បានកើនឡើងគួរឱ្យកត់សម្គាល់ ដោយទទួលបានជើងហោះហើរចេញ-ចូល(ទ្វេទិស) សរុប ៥៨ ៣៥៤ កើនឡើង ១៤ ភាគរយបើធៀបនឹងឆ្នាំ ២០២៣ និងអ្នកដំណើរឆ្លងកាត់ចេញ-ចូល(ទ្វេទិស) មានចំនួន ៦ ២៤១ ៨៤២ នាក់ កើនឡើង ២២ ភាគរយ។
ចំណែកទំនិញដឹកជញ្ជូនតាមផ្លូវអាកាសចេញ-ចូល(ទ្វេទិស) មាន ៧៧ ៧៥២តោន កើនឡើង ៤០ ភាគរយ។ សម្រាប់ឆ្នាំ ២០២៥ នេះតាមការព្យាករ គឺចំនួនជើងហោះហើរឆ្លងកាត់អាកាសយានដ្ឋានអន្តរជាតិទាំង ៣ នឹងអាចកើនលើសឆ្នាំ ២០២៤។
អគ្គនាយកក្រុមហ៊ុនទេសចរណ៍ World Express Co., Ltd និងជាប្រធានក្រុមប្រឹក្សាភិបាលសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានប្រាប់ភ្នំពេញប៉ុស្តិ៍ ក្នុងថ្ងៃទី៣១ ខែមករាថា អំឡុងឆ្នាំ២០០៥ ដល់ឆ្នាំ ២០០៧ ជនជាតិជប៉ុនបានឈរលើគេក្នុងនាមជាភ្ញៀវទេសចរធ្វើដំណើរមកកម្សាន្តនៅកម្ពុជាច្រើន និងបានជំរុញឱ្យក្រុមហ៊ុនអាកាសចរណ៍ជប៉ុន ANA បើកជើងហោះហើរត្រង់មកកម្ពុជានាពេលបន្ទាប់មក។
ទោះយ៉ាងណាការលេចឡើងនៃវត្តមានជំងឺកូវីដ១៩ នាអំឡុងដើមឆ្នាំ២០២០ បានធ្វើឱ្យការធ្វើដំណើររបស់មនុស្សនៅទូទាំងពិភពលោកធ្លាក់ចុះយ៉ាងគំហុក ដែលបង្ខំឱ្យក្រុមហ៊ុន ANA ផ្អាកការហោះហើរមកកម្ពុជារហូតមកដល់ពេលនេះ។
លោកថ្លែងថា៖«ប្រសិនបើការហោះហើរត្រង់នេះអាចធ្វើឡើងក្នុងពេលឆាប់ៗគឺជាការប្រសើរណាស់ ព្រោះនៅពេលមានជើងហោះហើរត្រង់ គឺមិនមែននាំមកផលវិជ្ជមានតែក្នុងវិស័យទេសចរណ៍ប៉ុណ្ណោះទេ ប៉ុន្តែក៏សម្រាប់វិស័យពាណិជ្ជកម្មផងដែរ»។
ទិន្នន័យផ្លូវការរបស់ក្រសួងទេសចរណ៍ ឱ្យដឹងថា ក្នុងឆ្នាំ២០២៤ កម្ពុជាទទួលបានភ្ញៀវបរទេសសរុប ៦,៧ លាននាក់ កើនឡើង ២២,៩ ភាគរយបើធៀបឆ្នាំ ២០២៣ ក្នុងនោះភ្ញៀវមកពីប្រទេសជប៉ុន ឈរនៅលេខរៀងទី ១០ ជាមួយនឹងចំនួន ១១២ ៧១៨នាក់ កើន ៣០,៤ ភាគរយ ដែលនាំមុខគេដោយប្រទេសថៃ វៀតណាម ចិន ឡាវ អាមេរិក កូរ៉េ ឥណ្ឌូនេស៊ី បារាំង និងចក្រភពអង់គ្លេស។
អគ្គនាយកដ្ឋានគយ និងរដ្ឋាករកម្ពុជា(GDCE) ឱ្យដឹងថា ក្នុងឆ្នាំ២០២៤ ពាណិជ្ជកម្មអន្តរជាតិរបស់កម្ពុជា មានចំនួនសរុប ៥៤,៧៤ ពាន់លានដុល្លារ កើនឡើង ១៦,៩ ភាគរយបើធៀបនឹងឆ្នាំ២០២៣។
សម្រាប់ពាណិជ្ជកម្មទ្វេភាគីកម្ពុជា-ជប៉ុន គឺមានទឹកប្រាក់ ២,១៦ ពាន់លានដុល្លារ កើនឡើង ២០,១ភាគរយ ក្នុងនោះទំនិញកម្ពុជានាំទៅជប៉ុន ១,៤១ ពាន់លានដុល្លារ កើនឡើង ១៩,៨ ភាគរយ និងជប៉ុននាំចូល ៧៥២,៥៦ លានដុល្លារ កើនឡើង ២០,៧ភាគរយ។
