ភ្ញៀវទេសចរដើរលេងកម្សន្តតាមឆ្នេរសមុទ្រ ក្នុងខេត្តព្រះសីហនុ។ ភ្នំពេញប៉ុស្តិ៍
ដើម្បីផ្សព្វផ្សាយអំពីសក្តានុពលនៃវិស័យទេសចរណ៍ ក៏ដូចជាទាក់ទាញភ្ញៀវទេសចរជាតិ និងអន្តរជាតិឱ្យទៅកម្សាន្តតំបន់ឆ្នេរសមុទ្រ និងបណ្តាកោះកាន់តែច្រើន អាជ្ញាធរខេត្តព្រះសីហនុនឹងរៀបចំព្រឹត្តិការណ៍ប្រកួតថតរូបភាព និងវីដេអូ ឆ្នាំ២០២៤-២០២៥ នៅចុងខែមករា ក្រោមប្រធានបទ«ម្នាក់ៗជាអ្នកផ្សព្វផ្សាយទេសចរណ៍កម្ពុជា ម្នាក់»។
សេចក្តីជូនដំណឹងរបស់មន្ទីរទេសចរណ៍ខេត្តព្រះសីហនុ នាថ្ងៃទី៦ ខែមករា ឱ្យដឹងថា ក្រោមកិច្ចសហការ និងគាំទ្រពីក្រសួងទេសចរណ៍ និងរដ្ឋបាលខេត្តព្រះសីហនុ មន្ទីរទេសចរណ៍ខេត្តព្រះសីហនុ នឹងរៀបចំព្រឹត្តិការណ៍ពិព័រណ៍ទេសចរណ៍វប្បធម៌ និងពាណិជ្ជកម្ម ចាប់ពីថ្ងៃទី២៧-៣១ ខែមករា ឆ្នាំ ២០២៥ នៅទីលានតេជោ។ ក្នុងព្រឹត្តិការណ
នេះនឹងមានសកម្មភាពជាច្រើនដូចជា ការតាំងពិព័រណ៍ម្ហូបអាហារ ការតាំងផលិតផលពាណិជ្ជកម្ម ការសម្តែងសិល្បៈ និងការប្រកួតកីឡាជាដើម។ល។
សេចក្តីជូនដំណឹងបញ្ជាក់ថា៖«ព្រឹត្តិការណ៍នេះធ្វើឡើងក្នុងគោលបំណងជ្រើសរើសបេក្ខជនដែលមានទេពកោសល្យស្នាដៃឆ្នើម ជាពិសេសការផ្សព្វផ្សាយអំពីភាពទាក់ទាញ និងតំបន់សក្តានុពលទេសចរណ៍នៅខេត្តព្រះសីហនុទៅដល់ភ្ញៀវជាតិ និងអន្តរជាតិ »។
សេចក្តីជូនដំណឹងបានឱ្យដឹងទៀតថា សម្រាប់រូបភាព និងវីដេអូ ដែលចូលរួមប្រកួតប្រជែង គឺត្រូវតែមានភាពច្នៃប្រឌិតខ្ពស់ក្នុងន័យផ្សព្វផ្សាយពីគោលដៅទេសចរណ៍(ខេត្តព្រះសីហនុ), ការបង្កើតរូបភាព និងវីដេអូដែលមានភាពទាក់ទាញ, ជំរុញ និងបង្កើនការផ្សព្វផ្សាយផលិតផលខ្មែរ, សហគមន៍ទេសចរណ៍, សារអប់រំ និងបញ្ជ្រាបការយល់ដឹងជាសាធារណៈអំពីវិស័យទេសចរណ៍, និងសក្តានុពលទេសចរណ៍តំបន់ឆ្នេរសមុទ្រ។
កាលបរិច្ឆេទនៃការចុះឈ្មោះនឹងចាប់ផ្តើមពីថ្ងៃទី៥-១២ ខែមករា ឆ្នាំ២០២៥ តាមរយៈប្រព័ន្ធអនឡាញ ឬដោយផ្ទាល់។ នេះបើតាមសេចក្តីជូនដំណឹង។
ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា លោក ធួន ស៊ីណាន (Thourn Sinan, President of Pacific Asia Travel Association) បានប្រាប់ភ្នំពេញប៉ុស្តិ៍ក្នុងថ្ងៃទី៦ ខែមករា ថា គ្រប់ព្រឹត្តិការណ៍ពិព័រណ៍(លើកលែងពិព័រណ៍គ្រឿងស្រវឹង និងភេសជ្ជៈមួយចំនួន) គឺសុទ្ធតែផ្តល់ផលចំណេញដល់គោលដៅវិស័យទេសចរណ៍ និងការទាក់ទាញអ្នកវិនិយោគឱ្យចូលមកបណ្តាក់ទុនកាន់តែច្រើននៅកម្ពុជា។
ពិព័រណ៍រូបថត និងវីដេអូ គឺជាការផ្សព្វផ្សាយពីសម្រស់ទីតាំងភូមិសាស្រ្តបែបមាត់សមុទ្រ ធម្មជាតិ និងកែច្នៃជាដើម។
លោកបាននិយាយថា៖«ព្រឹត្តិការណ៍បែបនេះគឺមានភាពចាំបាច់ និងសារៈសំខាន់ខ្លាំងសម្រាប់ជាការផ្សព្វផ្សាយឱ្យពិភពលោកបានដឹងពីកម្ពុជា និងជាមធ្យោបាយបង្កើនភាពទាក់ទាញភ្ញៀវជាតិ និងអន្តរជាតិឱ្យធ្វើដំណើរកម្សាន្តកាន់តែច្រើន។ ការផ្សព្វផ្សាយឱ្យមានលក្ខណៈជាសកល នឹងនាំផលប្រយោជន៍ច្រើនសម្រាប់វិស័យទេសចរណ៍ និងប្រាក់ចំណូលសម្រាប់សេដ្ឋកិច្ចកម្ពុជា»។
លោកបន្ថែមថា ប្រសិនបើអាជ្ញាធរតាមបណ្តាខេត្តផ្សេងៗទៀតអាចបង្កើតឱ្យមានព្រឹត្តិការណ៍ពិព័រណ៍បែបនេះបានកាន់តែច្រើន គឺចរន្តនៃការផ្សព្វផ្សាយក៏កាន់តែល្អផងដែរ។
ចំនួនភ្ញៀវទេសចរជាតិ និងអន្តរជាតិ ដែលចេញដើរកម្សាន្តនៅតាមរមណីយដ្ឋាននានាក្នុងប្រទេសកម្ពុជា កំពុងបង្ហាញនិន្នាការកើនឡើងជាបន្តបន្ទាប់ ជាក់ស្តែងក្នុងឱកាសថ្ងៃឆ្លងឆ្នាំសកល ពីថ្ងៃទី៣០-៣១ ខែធ្នូ ឆ្នាំ២០២៤ មានភ្ញៀវចេញដើរកម្សាន្តតាមបណ្ដារាជធានី-ខេត្ត ទូទាំងប្រទេសចំនួនជាង ៣,៥៣ លាននាក់ ក្នុងនោះទេសចរជាតិ ៣,៤៨ លាននាក់ និងទេសចរអន្តរជាតិ ៤៧ ២៦០នាក់។ សម្រាប់ខេត្តព្រះសីហនុ ទទួលបានភ្ញៀវទេសចរសរុប ៤២២ ៨២៩នាក់។
សម្រាប់ជនបរទេសដែលចូលមកប្រទេសកម្ពុជា ក្នុងរយៈពេល ១១ ខែដើមឆ្នាំ ២០២៤ គឺមានប្រមាណ ៦ លាននាក់ កើនឡើង ២២ ភាគរយបើធៀបនឹងរយៈពេលដូចគ្នាឆ្នាំ ២០២៣។
ក្នុងចំនួនខាងលើ គឺជនជាតិថៃ មានចំនួន ១,៩១ លាននាក់, វៀតណាម ១,២ លាននាក់, ចិន ៧៦៩ ៧៧៥ នាក់, ឡាវ ៣០៦ ៩៤៨ នាក់, អាមេរិក ១៩០ ៨៥៦ នាក់ និងតាមពីក្រោយដោយជនជាតិកូរ៉េ ឥណ្ឌូនេស៊ី, បារាំង ចក្រភពអង់គ្លេស និងជប៉ុន៕
