ទិដ្ឋភាពរថយន្តកុងតឺន័រដឹកទំនិញនៅកំពង់ផែស្វយ័តក្រុងព្រះសីហនុ។ ភ្នំពេញប៉ុស្តិ៍
ចំនួនទឹកប្រាក់នៃការធ្វើពាណិជ្ជកម្មអន្តរជាតិរបស់កម្ពុជាបានបន្តភាពល្អប្រសើរ ដោយក្នុងខែទី១ នៃឆ្នាំ ២០២៥ សម្រេចបានជាង ៥ ពាន់លានដុល្លារ កើនជិត ២៥ ភាគរយបើធៀបនឹងខែមករា ឆ្នាំ ២០២៤។ ចំនួនទឹកប្រាក់នាំចេញទំនិញរបស់កម្ពុជាមានប្រមាណ ៤៥ ភាគរយនៃចំនួនទឹកប្រាក់សរុប។
ទិន្នន័យកត់ត្រាដោយអគ្គនាយកដ្ឋានគយ និងរដ្ឋាករកម្ពុជា(GDCE) ចេញផ្សាយក្នុងថ្ងៃទី១០ ខែកុម្ភៈ នេះឱ្យដឹងថា ក្នុងខែមករា ឆ្នាំ ២០២៥ ការនាំចេញ-ចូលទំនិញរវាងកម្ពុជាជាមួយប្រទេសដៃគូពាណិជ្ជកម្មទាំងអស់មានទឹកប្រាក់សរុប ៥ ០៥៧,២ លានដុល្លារ កើនឡើង ២៤,៦ ភាគរយបើធៀបនឹងខែមករា ឆ្នាំ ២០២៤ ដែលមានចំនួន ៤ ០៥៧,១៣ លានដុល្លារ។ ក្នុងចំនួននេះ គឺទំនិញកម្ពុជានាំចេញមានទឹកប្រាក់ ២ ៣០៦,៤៩ លានដុល្លារ កើនឡើង ១៧,៣ ភាគរយ និងទំនិញនាំចូលពីក្រៅប្រទេសចំនួន ២ ៧៥០,៧ លានដុល្លារ កើនឡើង ៣១,៦ ភាគរយ។
ផ្អែកតាមស្ថិតិខាងលើ គឺជញ្ជីងពាណិជ្ជកម្មកម្ពុជា មានឱនភាពប្រមាណ ៤៤៤,២១ លានដុល្លារ ខណៈកាលពីខែមករា ឆ្នាំ២០២៤ មានចំនួន ១២៣,០៩លានដុល្លារ។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ភ្នំពេញប៉ុស្តិ៍ថា ក្នុងនាមជាប្រទេសកំពុងអភិវឌ្ឍន៍ កម្ពុជាកំពុងខិតខំយ៉ាងខ្លាំងក្នុងការធ្វើឱ្យសេដ្ឋកិច្ចរបស់ខ្លួនកាន់តែមានភាពរឹងមាំ និងបោះជំហានទៅមុខឱ្យកាន់តែលឿនក្នុងសញ្ញាវិជ្ជមាន។
ការដាក់ចេញនូវគោលនយោបាយថ្មីៗ និងការកសាងហេដ្ឋារចនាសម្ព័ន្ធគាំទ្រពីសំណាក់រាជរដ្ឋាភិបាល ព្រមទាំងការខិតខំរបស់ផ្នែកឯកជនដើម្បីទាក់ទាញ និងលើកទឹកចិត្តចំពោះវិនិយោគិនជាតិ និងអន្តរជាតិ បានធ្វើឱ្យសេដ្ឋកិច្ចកម្ពុជាសម្រេចបានសមិទ្ធិផលវិជ្ជមានជាបន្តបន្ទាប់។
លោកបន្តថា ចំនួនទឹកប្រាក់នៃការនាំចូល និងនាំចេញ គឺដោយសារកំណើននៃការបង្កើតរោងចក្រ/សហគ្រាសទើបចាប់ផ្តើមដំណើរការសាងសង់ ឬចាប់ផ្តើមដំណើរការផលិតកម្មរបស់ខ្លួនលើកដំបូង ដែលទាមទារឱ្យមានការនាំចូលច្រើន។ លោកបន្តថា ទោះយ៉ាងណាកំណើនទឹកប្រាក់នាំចូលនេះ គឺនឹងត្រូវបម្រើឱ្យការការផលិតវិញនៅពេលខាងមុខ។
លោកបានថ្លែងថា៖«កំណើននៃទំហំពាណិជ្ជកម្មអន្តរជាតិ នេះគឺបញ្ជាក់ពីទំនុកចិត្តនៃការវិនិយោគថ្មីៗ និងការនាំចេញទំនិញរបស់កម្ពុជាទៅកាន់ទីផ្សារអន្តរជាតិ។ ចំនួនទឹកប្រាក់នាំចេញ នាំចូលទំនិញ នឹងនឹងបន្តកើនឡើងថែមប្រសិនបើនយោបាយ និងសេដ្ឋកិច្ចពិភពលោកមិនមានបញ្ហាធំណាមួយកើតឡើង»។
លោកលើកឡើងទៀតថា ការកែលម្អប្រព័ន្ធច្បាប់វិនិយោគ ប្រព័ន្ធអនុគ្រោះពន្ធគយទំនិញដែលកម្ពុជាទទួលបានពីប្រទេសធំៗ និងការអនុវត្តកិច្ចព្រមព្រៀងពាណិជ្ជកម្មដែលចូលជាបន្តបន្ទាប់ នឹងជួយឱ្យកម្ពុជាទាក់ទាញក្រុមហ៊ុនលំដាប់អន្តរជាតិធំៗកាន់តែច្រើនបន្ថែមទៀត។
បន្ថែមពីលើនេះ ការដំឡើងពន្ធទំនិញរវាងប្រទេសធំៗមួយចំនួន ក៏បានផ្តល់ផលវិជ្ជមានឱ្យកម្ពុជាអាចស្រូបទាញការវិនិយោគផ្ទាល់កាន់តែច្រើន។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បាននិយាយថា មានកត្តាជាច្រើនដែលបានចូលរួមចំណែកក្នុងការធ្វើឱ្យសកម្មភាពនៃការផ្លាស់ប្តូរទំនិញជាអន្តរជាតិរបស់កម្ពុជាកើនឡើងជាបន្តបន្ទាប់ ខណៈចំនួនក្រុមហ៊ុន/សហគ្រាសដែលចូលមកបើកអាជីវកម្មនៅកម្ពុជាក៏កំពុងបន្តកើនឡើងគួរឱ្យកត់សម្គាល់ផងដែរ។
លោកបានអះអាងថា៖«មួយរយៈចុងក្រោយនេះ ខ្ញុំឃើញមានការផ្សព្វផ្សាយច្រើនអំពីកំណើននៃការមកបណ្តាក់ទុនថ្មីៗនៅកម្ពុជា ដែលនេះគឺជាក្តីសង្ឃឹមសម្រាប់កម្ពុជាក្នុងការបង្កើនទំហំពាណិជ្ជកម្មនាំចេញទំនិញ ខណៈកាលពីប៉ុន្មានទសវត្សមុនៗជញ្ជីងពាណិជ្ជកម្មអន្តរជាតិរបស់កម្ពុជាបានគ្របដណ្តប់ស្ទើរទាំងស្រុងដោយការនាំចូល»។
លោកប្រាប់ទៀតថា ការកសាង និងកែលម្អហេដ្ឋារចនាសម្ព័ន្ធដឹកជញ្ជូនជាបន្តបន្ទាប់ ក៏ជាធាតុផ្សំដ៏សំខាន់ផងដែរក្នុងការបង្កើនភាពទាក់ទាញទៅដល់វិនិយោគិនជាតិ និងអន្តរជាតិឱ្យចូលមកវិនិយោគ ក៏ដូចជាជួយកាត់បន្ថយថ្លៃដើមផលិតនៅកម្ពុជាឱ្យធ្លាក់ចុះកាន់តែទាប ដើម្បីលើកកម្ពស់សមត្ថភាពប្រកួតប្រជែងលើទីផ្សារអន្តរជាតិ។
ឯកសារថវិកាសង្ខេបឆ្នាំ ២០២៥ (Budget in Brief Fiscal Year 2025) បានឱ្យដឹងថា សម្រាប់ឆ្នាំ ២០២៥ សេដ្ឋកិច្ចកម្ពុជាត្រូវបានព្យាករណ៍ថា នឹងសម្រេចបានកំណើនក្នុងរង្វង់ ៦,៣ភាគរយ ដែលនឹងត្រូវទ្រទ្រង់ចម្បងដោយវិស័យឧស្សាហកម្ម ដែលនឹងអាចបន្តនិន្នាការកើនឡើងក្នុងរង្វង់ ៨,៦ភាគរយ តាមពីក្រោយដោយវិស័យសេវាកម្ម ៥,៦ភាគរយ និងវិស័យកសិកម្ម ១,១ភាគរយ។
ក្នុងឆ្នាំ ២០២៤ ការនាំចេញ-នាំចូលទំនិញរបស់កម្ពុជាជាមួយប្រទេសដៃគូទាំងអស់មានទឹកប្រាក់ ៥៤,៧៤ ពាន់លានដុល្លារ កើនឡើង ១៦,៩ ភាគរយបើធៀបនឹងឆ្នាំ២០២៣ ក្នុងនោះទំនិញដែលកម្ពុជានាំចេញទៅក្រៅប្រទេសមានទឹកប្រាក់ ២៦,២ ពាន់លានដុល្លារ កើនឡើង ១៥,៧ ភាគរយ និងការនាំចូលមានទឹកប្រាក់ ២៨,៥៤ ពាន់លានដុល្លារ កើនឡើង ១៨ ភាគរយ។ នេះបើយោងតាម GDCE។
ប្រទេសដែលជាដៃគូពាណិជ្ជកម្មសំខាន់ជាងគេទាំង ៥ របស់កម្ពុជា រួមមាន ចិន អាមេរិក វៀតណាម ថៃ និងជប៉ុន។
ទំនិញសំខាន់ៗដែលកម្ពុជានាំចេញមានភាគច្រើន ជាផលិតផលសម្លៀកបំពាក់ និងគ្រឿងបន្ទាប់បន្សំដែលធ្វើឡើងពីក្រណាត់, ផ្លែឈើ និងគ្រាប់ផ្លែឈើ, ម៉ាស៊ីន, ឧបករណ៍អគ្គិសនី, ស្បែកជើង, កៅស៊ូ និងផលិតផលធ្វើអំពីកៅស៊ូ រួមនិងទំនិញសំខាន់ៗមួយចំនួន ទៀត ចំណែកទំនិញនាំចូលមានដូចជា គ្រឿងម៉ាស៊ីន យានយន្ត វត្ថុធ្វើពីដែក វត្ថុធ្វើពីប្លាស្ទីក និងផលិតផលគីមី ជាដើម៕
