អ្នកបច្ចេកទេសឡើងភ្ជាប់ឧបករណ៍សម្រាប់ធ្វើឱ្យសេវាអ៊ីនធើណេតមានដំណើរការ ក្នុងរាជធានីភ្នំពេញ។ ភ្នំពេញប៉ុស្តិ៍
របាយការណ៍ក្រសួងប្រៃសណីយ៍ និងទូរគមនាគមន៍(ក.ប.ទ.) បានបង្ហាញថា រយៈពេល ៥ ឆ្នាំចន្លោះពីឆ្នាំ២០២០-២០២៤ ក្រសួងប្រៃសណីយ៍ និងទូរគមនាគមន៍ រកចំណូលបានប្រមាណ ៦២៨ លានដុល្លារ កើនឡើង ៣៤១ ភាគរយបើធៀបនឹងរយៈពេល ៥ឆ្នាំ គឺចន្លោះពីឆ្នាំ ២០១៥-២០១៩។
វិស័យឯកជនយល់ថា កំណើនប្រាក់ចំណូលនេះ គឺដោយសារររដ្ឋាភិបាលពង្រឹងការគ្រប់គ្រងលើប្រតិបត្តិករសេវាទូរសព្ទ និងអ៊ីនធើណិតបានល្អ ពិសេសភាពរីកចម្រើននៃការអភិវឌ្ឍហេដ្ឋារចនាសម្ព័ន្ធក្នុងវិស័យប្រៃសណីយ៍ និងទូរគមនាគមន៍ កាន់តែប្រសើរឡើង ខណៈអ្នកប្រើប្រាស់សេវាទូរសព្ទ បានកើនដល់ ២០,៦ លាន និងសេវាអ៊ីនធើណិត មានប្រមាណ ១៩ លាន។
របាយការណ៍បូកសរុបលទ្ធផលការងាររយៈពេល ៥ ឆ្នាំ ២០២០-២០២៤ របស់ក្រសួងប្រៃសណីយ៍ និងទូរគមនាគមន៍ បង្ហាញថា ជាលទ្ធផលចាប់ពីឆ្នាំ ២០២០-២០២៤ ក.ប.ទ. បានសម្រេចចំណូលសរុប ២,៥៧ ទ្រីលានរៀល ស្មើនឹង ប្រមាណ ៦២៨ លានដុល្លារ ដែលកើន ៣៤១ភាគរយបើប្រៀបធៀបទៅនឹងចំណូលចន្លោះពីឆ្នាំ ២០១៥-២០១៩ ដែលមានចំនួនសរុបត្រឹមតែ ០,៧៥ ទ្រីលានរៀល ស្មើនឹងប្រមាណ ១៨៤ លានដុល្លារប៉ុណ្ណោះ។
រដ្ឋមន្ដ្រីក្រសួងប្រៃសណីយ៍ និងទូរគមនាគមន៍ លោក ជា វ៉ាន់ដេត (Chea Vandeth, Minister of Post and Telecommunications) បានថ្លែងពិធីបិទសន្និបាតបូកសរុបលទ្ធផលការងាររយៈពេល ៥ ឆ្នាំ ២០២០-២០២៤ នៃដំណើរឆ្ពោះទៅបរិវត្ដកម្មឌីជីថល និងលើកទិសដៅការងារបន្ដកាលពីថ្ងៃទី៦ ខែកុម្ភៈ ឆ្នាំ២០២៥ ថា វិស័យទូរគមនាគមន៍ បានចូលរួមចំណែកយ៉ាងសំខាន់លើការតភ្ជាប់ឌីជីថល ដែលត្រូវបានចាត់ទុកថាជាមូលដ្ឋាននៃការធ្វើបរិវត្តកម្មឌីជីថលនៅកម្ពុជា។
លោកបន្ថែមថា ក្នុងរយៈពេល ៥ ឆ្នាំនេះក្រសួងសម្រេចបានលទ្ធផល ជាអាទិ៍ការរៀបចំ និងដាក់ឱ្យអនុវត្តលិខិតបទដ្ឋានគតិយុត្តដើម្បីពង្រឹងអភិបាលកិច្ច សម្រួលដល់ធុរកិច្ច និងការពារផលប្រយោជន៍ស្របច្បាប់របស់អ្នកប្រើប្រាស់។
លោករដ្ឋមន្រ្តីបន្ថែមថា ក្រសួងក៏បានផ្តល់អាជ្ញាបណ្ណប្រតិបត្តិការទូរគមនាគមន៍ សរុប ៥៩ ក្នុងនោះ អាជ្ញាបណ្ណទូរសព្ទ ៤ អាជ្ញាបណ្ណ ខ្សែកាបអុបទិកក្រោមបាតសមុទ្រ ២ ខ្សែកាបអុបទិកលើគោក ៥ និងអ៊ីនធើណិត ៣៩។
អ្នកប្រើប្រាស់ សេវាទូរសព្ទមានចំនួនប្រមាណ ២០,៦លាន និងសេវាអ៊ីនធើណិតមានចំនួនប្រមាណ ១៩ លាន ហើយក្រសួងក៏កំពុងជំរុញការអភិវឌ្ឍហេដ្ឋារចនាសម្ព័ន្ធតភ្ជាប់ឌីជីថល រួមមាន បង្គោលអង់តែនទូរសព្ទ បណ្តាញខ្សែកាបអុបទិកក្រោមបាតសមុទ្រ និងលើគោក។
ប្រធានសមាគមបច្ចេកវិទ្យាឌីជីថល លោក ឈិន កេន (Chhin Ken, president of the Cambodia Digital Tech Association (CDTA) បាននិយាយថា ពាក់ព័ន្ធនឹងប្រាក់ចំណូលរបស់ក្រសួងប្រៃសណីយ៍ និងទូរគមនាគមន៍ ក្នុងរយៈពេលប៉ុន្មានឆ្នាំចុងក្រោយនេះ គឺពិតជាមានការកើនឡើងខ្លាំងគួរឱ្យកត់សម្គាល់ ដោយលោកមើលឃើញថា ប្រាក់ចំណូលរបស់ក្រសួងកើនឡើងគឺដោយសាររាជរដ្ឋាភិបាលពង្រឹងការគ្រប់គ្រងដែនសេវាទូរសព្ទ និងសេវាអ៊ីនធើណិតបានល្អប្រសើរ។
លោក ឈិន កេន បានបន្ថែម ថា៖«ទី១ កាលពីមុនក្រុមហ៊ុនមួយចំនួនបានចុះបញ្ជីត្រឹមត្រូវ និងមួយចំនួនទៀតមិនបានចុះបញ្ជីត្រឹមត្រូវ តែបច្ចប្បន្នការពង្រឹងការគ្រប់គ្រងរបស់រាជរដ្ឋាភិបាលការគ្រប់គ្រងដែនសេវាទូរស័ព្ទ បានធ្វើឱ្យក្រុមហ៊ុន ដែលផ្តល់សេវាទូរសព្ទគឺត្រូវតែរាយការណ៍ឱ្យអស់ពីបង្គោលអង់តែនរបស់ខ្លួន។ នេះគឺជាប្រភពចំណូលមួយដែលយើងឃើញថាមានការកើនឡើង។ ចំណែកចំណុចទី ២ ពាក់ព័ន្ធប្រើប្រាស់សេវាអ៊ីនធើណិត ដែលការប្រើសេវាអ៊ីនធើណិតនេះគឺជារឿងមួយជួយបង្កើនប្រាក់ចំណូលជាតិរបស់យើងដែរ ដែលភាគច្រើនយើងប្រើប្រាស់ទូរសព្ទស្មាតហ្វូន យើងប្រើអ៊ីនធើណិតច្រើន អ៊ីចឹង អ៊ីនធើណិតឆ្លងកាត់ក្រសួងប្រៃសណីយ៍ ត្រូវមានការបង់ថ្លៃសេវាជូនខាងក្រសួង។ ចំណុចទី៣ ពាក់ព័ន្ធនឹងការពង្រឹងហេដ្ឋារចនាសម្ព័ន្ធផ្សេងៗ ដើម្បីគ្រប់គ្រងទិន្នន័យ។ ការគ្រប់ទិន្នន័យក៏ជាការប្រមូលចំណូលមួយដែរ ដូច្នេះការងារទាំងអស់គឺជាប្រភពចំណូល នាំឱ្យមានសន្ទុះកើនឡើងខ្លាំងសម្រាប់ក្រសួងប្រៃសណីយ៍ និងទូរគមនាគមន៍ទាំងមូល»។
របាយការណ៍បូកសរុបលទ្ធផលការងាររយៈពេល ៥ឆ្នាំ ២០២០-២០២៤ របស់ ក.ប.ទ. បញ្ជាក់ទៀតថា ប្រទេសកម្ពុជា មានបង្គោលអង់តែនទូរសព្ទមានសរុប ១១ ៥១១ បង្គោល ហើយក្រសួងមានផែនការជំរុញការសាងសង់ បង្គោលអង់តែនទូរសព្ទបន្ថែមចំនួន ៣ ៦៧៤ទៀត ដែលមានចំនួនស្ថានីយអង់តែនសរុប ៦ ៣៥៥ ត្រឹមឆ្នាំ២០២៧។
ដោយឡែក កម្ពុជាមានបណ្តាញខ្សែកាបអុបទិកលើគោកមានប្រវែង ៣៤ ៤៩១ គីឡូម៉ែត្រ ក្នុងនោះបំពង់កប់ក្រោមដី ២ ៩២៣ គីឡូម៉ែត្រ និងក្រោមបាតសមុទ្រ មានប្រវែង ២៦ ៣០០ គីឡូម៉ែត្រ និងគ្រោងមានបណ្តាញថ្មីប្រវែង ២ ៩៩៧ គីឡូម៉ែត្រ នៅឆ្នាំ២០២៦៕
