ក្រុមហ៊ុន Arvin International Marketing INC ដែលជាអ្នកផ្គត់ផ្គង់ និង​ចែកចាយ​អំបិលធំជាងគេនៅប្រទេសហ្វីលីពីន បានបង្ហាញចំណាប់អារម្មណ៍​បញ្ជាទិញ​អង្ករពីប្រទេសកម្ពុជា​ដើម្បី​ចែកចាយនៅក្នុងទីផ្សារនៅ​ក្នុង​ប្រទេស​របស់ខ្លួន។

ការបង្ហាញចំណាប់អារម្មណ៍នេះធ្វើឡើងក្នុង​ជំនួប​នា​ព្រឹកនៅ​ថ្ងៃទី១១ ខែកុម្ភៈ ​រវាង​​លោកស្រី Azucena L. Yao ប្រធានក្រុមប្រឹក្សាភិបាលក្រុមហ៊ុន Arvin International Marketing INC ជាមួយ​លោកស្រី ចម និម្មល រដ្ឋមន្ត្រីក្រសួងពាណិជ្ជកម្មកម្ពុជា​ ក្នុងពេល​អមដំណើរលោក​នាយករដ្ឋមន្ត្រី ហ៊ុន ម៉ាណែត ទៅបំពេញទស្សនកិច្ចផ្លូវការ​នៅសាធារណ​រដ្ឋហ្វីលីពីន។

លោកស្រី Azucena L. Yao បានប្រាប់​លោកស្រី​ ស្រី ចម និម្មល អំពីប្រតិបត្តិការ និងវឌ្ឍនភាពរបស់ក្រុមហ៊ុន​ឋ្លួន ព្រមទាំងបានបង្ហាញពីចំណាប់អារម្មណ៍ក្នុងការនាំចូលអង្ករពីកម្ពុជាដែលជាអង្ករមានគុណភាពខ្ពស់ និងទទួលបានចំណាត់ថ្នាក់ជាអង្ករល្អដាច់គេលើពិភពលោកចំនួន ៦លើកនាពេលកន្លងមក។

ជាការឆ្លើយតប ចម និម្មល បានបង្ហាញក្តីសោមនស្សរីករាយចំពោះចំណាប់អារម្មណ៍របស់ក្រុមហ៊ុនក្នុងការនាំចូលអង្ករពីកម្ពុជា និងបានជំរុញឱ្យភាគីពាក់ព័ន្ធបង្កើននូវកិច្ចសហប្រតិបត្តិការក្នុងការនាំចេញផលិតផលកសិកម្មជាពិសេសស្រូវ និងអង្ករ។​

រដ្ឋមន្ត្រីពាណិជ្ជកម្មកម្ពុជា​ បានលើកឡើងអំពីការដាក់ចេញនូវគោលនយោបាយ និងវិធានការរបស់រាជរដ្ឋាភិបាលក្នុងការគាំទ្រវិស័យកសិកម្ម និងកសិ-ឧស្សាហកម្ម ដោយបានលើកទឹកចិត្តដល់ក្រុមហ៊ុននាំចូលអង្ករពីកម្ពុជា ជាពិសេសអង្ករប្រណិត និងប្រភេទអង្ករផ្សេងៗទៀត ឱ្យបន្តវិនិយោគលើទំនិញកសិ-ឧស្សាហកម្មមួយចំនួនបន្ថែមទៀត ដែលអាចចូលរួមបំពេញតម្រូវការក្នុងច្រវាក់ផលិតកម្មនៃវិស័យកសិកម្ម រួមមាន ស្វាយចន្ទី និងតំឡូងមី ជាដើម។

ក្នុង​ឆ្នាំ​២០២៤ កម្ពុជា​-ហ្វីលីពីន បានឯកភាព​គ្នាលើការធ្វើពាណិជ្ជកម្ម​អង្ករ​ ដែល​ជាលទ្ធល​កម្ពុជាបាននាំចេញអង្ករទៅកាន់ប្រទេសហ្វីលីពីន​សម្រេចបាន​ចំនួន ២ ៦៥០​តោន​។ នេះបើ​តាម​ក្រសួងពាណិជ្ជកម្មកម្ពុជា​។​

សហព័ន្ធស្រូវអង្ករកម្ពុជា(CRF) បាន​ឱ្យ​ដឹងថា​ ក្នុង​ឆ្នាំ២០២៤ កម្ពុ​ជាបា​ននាំចេញ​អង្ករចំនួន​ ៦៥១ ៥២​២ តោន ទៅកា​ន់​ទីផ្សារគោ​លដៅ​ចំ​នួ​​ន ​៦​៨ប្រទេសជុំវិញពិភពលោក ដោយ​ទីផ្សារអឺរ៉ុប និងចិន នៅតែជាទីផ្សារចម្បងជាងគេសម្រាប់អង្គរកម្ពុជា​។

ក្រៅពីនោះ កម្ពុជាក៏បាននាំចេញអង្ករទៅកា​ន់បណ្តា​ប្រ​ទេ​ស​អា​ស៊ា​​​នចំនួន ៧ប្រទេស​​ រួមទាំងទីម័រខាងកើត និងទៅកាន់គោលដៅ ៣២ប្រទេសផ្សេងទៀត ដូចជា​ អាហ្វ្រិក មជ្ឈឹម​បូព៌ា អាមេរិក កាណាដា អូស្ត្រាលី ញ៉ូហ្សេឡេន ជាដើម។

អង្ករ​កម្ពុជា​ ធ្លាប់​បាន​ឈ្នះពានរង្វាន់អង្ករល្អបំផុតរបស់ពិភពលោក «World’s Best Rice» ចំនួន ៦ លើក​រួច​មក​ហើយ គឺ​ក្នុង​ឆ្នាំ ២០១២, ២០១៣, ២០១៤, ២០១៨, ២០២២ និង​ឆ្នាំ ២០២៤។

ការ​ឈ្នះ​លើ​កចុង​ក្រោយ គឺកាលពីខែវិច្ឆិកា ឆ្នាំ ២០២៤ នាទីក្រុងម៉ានីល ប្រទេសហ្វីលីពីន(“World’s Best Rice” at the 2024 International World Rice Conference in Manila, Philippines on November 7)។

លោក​នាយករដ្ឋមន្ត្រីកម្ពុជា ហ៊ុន ម៉ាណែត ក្នុង​ជំនួប​ជាមួយ​លោក ហ្វឺឌីណាន់ ម៉ាកូស ជេអ ប្រធានាធិបតីហ្វីលីពីន ក្នុង​ថ្ងៃ​ទី​១១ ខែ​កុម្ភៈ ក្នុង​ដំណើរទស្សនកិច្ចជាផ្លូវការលើកដំបូងទៅ​ប្រទេសហ្វីលីពីន បានសម្ដែងការពេញចិត្ត និងវាយតម្លៃខ្ពស់ចំពោះ​ទំនាក់​ទំនង និងកិច្ចសហប្រតិបត្តិការដ៏ល្អ និងចំណងមិត្តភាពដ៏យូរលង់រវាង​ប្រទេស​ទាំងពីរ។

នៅ​ក្នុង​ជំនួប​នេះ ថ្នាក់ដឹកនាំ​នៃ​ប្រទេស​ទាំងពីរ បាន​សន្យា​នឹង​បន្តជំរុញទំនាក់ទំនងនៃប្រទេសទាំងពីរឱ្យឈានទៅដល់កម្រិតខ្ពស់បន្ថែមទៀត ក៏ដូចជាការពង្រឹង និងពង្រីកកិច្ចសហប្រតិបត្តិការទ្វេភាគី​ឱ្យកាន់​តែរីកចម្រើន និងរឹងមាំបន្ថែមទៀត។

បន្ថែម​ពី​លើ​នេះ​ថ្នាក់ដឹកនាំទាំងពីរក៏បានពិភាក្សាលើការលើកកម្ពស់​ និងជំរុញកិច្ចសហ​ប្រតិ​បត្តិការក្នុងក្របខ័ណ្ឌទ្វេភាគីលើវិស័យសំខាន់ៗជាច្រើន ដូចជា ពាណិជ្ជកម្ម,​ វិនិយោគ, ធុរកិច្ច, ការពារជាតិ និងសន្តិសុខ, កសិកម្ម, សុខាភិបាល, វប្បធម៌, អប់រំ, ការបណ្ដុះបណ្ដាលជំនាញវិជ្ជាជីវៈ,​បច្ចេកវិទ្យា និងការជំរុញការតភ្ជាប់ប្រជាជន និងប្រជាជននៃប្រទេសទាំងពីរផងដែរ​។

កាល​ពី​ថ្ងៃ​ទី១០ ខែ​កុម្ភៈ នៅ​ក្នុង​ឱកាស​នៃ​ជំនួប​ជាមួយ​ ​លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក Francisco P.Tiu Laurel Jr. រដ្ឋមន្ត្រីក្រសួងកសិកម្មនៃសាធារណរដ្ឋហ្វីលីពីន ក៏បានប្រាប់​ភាគី​កម្ពុជាអំពី​តម្រូវការ​ផលិតផលកសិកម្ម​ពីប្រទេសកម្ពុជាដើម្បី​ផ្គត់ផ្គង់ឱ្យទីផ្សាររបស់ខ្លួនផងដែរ។

លោក​ Francisco P.Tiu Laurel Jr. បាន​និយាយ​ថា ប្រទេសហ្វីលីពីន មានតម្រូវការលើផលិតផលកសិកម្មជាច្រើនពីប្រទេសកម្ពុជា ដើម្បីឆ្លើយតបទៅនឹងតម្រូវការនៃកំណើនប្រជាជនហ្វីលីពីន។ លោកបន្ថែមថា សាធារណរដ្ឋហ្វីលីពីនមានតម្រូវការផលិតផលកសិកម្មសំខាន់ៗ​ ដូចជា អង្ករ សាច់ជ្រូក សាច់គោ មាន់ ត្រី និងបន្លែផ្លែឈើជាច្រើនមុខទៀត។​

ក្នុងកិច្ចពិភាក្សា​នោះ លោករដ្ឋមន្ដ្រី ឌិត ទីណា បានគូសបញ្ជាក់ថា ការធ្វើកសិ-ពាណិជ្ជកម្មរវាងប្រទេសទាំងពីរ ធ្វើឡើងក្នុងគោលបំណងបំពេញតម្រូវការឱ្យគ្នាទៅវិញទៅមកមិនមែនជាការប្រកួតប្រជែងគ្នានោះទេ ហើយប្រទេសទាំងពីរអាចពង្រឹងកិច្ចសហប្រតិបត្តិការជាមួយគ្នាកាន់តែរឹងមាំបន្ថែមទៀត​ ដើម្បី​ជំរុញការរីកចម្រើនក្នុងវិស័យ​កសិកម្ម សំដៅចូលរួមចំណែកលើកកម្ពស់សេដ្ឋកិច្ច និងការអភិវឌ្ឍឱ្យមានចីរភាព។

ជាមួយគ្នានេះ លោក ឌិត ទីណា ក៏បានអញ្ជើញលោក​រដ្ឋមន្ត្រីហ្វីលីពីន​ និងគណៈប្រតិភូនៃក្រសួងកសិកម្មហ្វីលីពីន ទៅទស្សនកិច្ចនៅប្រទេសកម្ពុជា ដើម្បីពិនិត្យពីសក្តានុពលនៃផលិតផលកសិកម្មកម្ពុជា និងពិភាក្សាលម្អិតបន្ថែមទៀតរវាងវិស័យឯកជននៃប្រទេសទាំងពីរ។

ក្នុងជំនួបនោះ​ ​លោក​រដ្ឋមន្ត្រីទាំងពីរ ក៏​បានចុះហត្ថលេខាលើអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការលើវិស័យកសិកម្ម និងកសិពាណិជ្ជកម្ម​ រវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋហ្វីលីពីន ផងដែរ៕