សកម្មភាពនៃការលើកកុងតឺន័រនៅកំពង់ផែស្វយ័តក្រុងព្រះសីហនុ។ ភ្នំពេញប៉ុស្តិ៍
ហ្វីលីពីន បានក្លាយជាដៃគូពាណិជ្ជកម្មទី ១៣ ដែលបានចុះកិច្ចព្រមព្រៀងស្តីពី«ការលុបបំបាត់ការយកពន្ធត្រួតគ្នាពាក់ព័ន្ធនឹងពន្ធលើប្រាក់ចំណូល និងការបង្ការការគេចវេះពន្ធនិងការចៀសវាងពន្ធ»(Double Taxation Agreement-DTA) ជាមួយកម្ពុជា ខណៈកិច្ចព្រមព្រៀងនេះនឹងជួយជំរុញកិច្ចសហប្រតិបត្តិការ និងទាក់ទាញវិនិយោគិននៃប្រទេសហ្វីលីពីន ឱ្យចូលមកបណ្តាក់ទុននៅកម្ពុជាកាន់តែច្រើន។
កិច្ចព្រមព្រៀងស្តីពី«ការលុបបំបាត់ការយកពន្ធត្រួតគ្នាពាក់ព័ន្ធនឹងពន្ធលើប្រាក់ចំណូល និងការបង្ការការគេចវេះពន្ធនិងការចៀសវាងពន្ធ»(DTA)រវាងកម្ពុជា-ហ្វីលីពីន ត្រូវបានចុះហត្ថលេខាដោយ លោក ប្រាក់ សុខុន ឧបនាយករដ្ឋមន្ត្រី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ ក្នុងនាមរាជរដ្ឋាភិបាលកម្ពុជា ជាមួយ លោក Ralph G. Recto រដ្ឋមន្ត្រីក្រសួងហិរញ្ញវត្ថុ ក្នុងនាមរដ្ឋាភិបាលនៃសាធារណរដ្ឋហ្វីលីពីន។
ពិធីចុះហត្ថលេខានេះធ្វើឡើងកាលពីដើមសប្តាហ៍នេះ នាអំឡុងពេលនៃដំណើរទស្សនកិច្ចផ្លូវការរបស់លោកនាយករដ្ឋមន្រ្តីកម្ពុជា ហ៊ុន ម៉ាណែត និងគណៈប្រតិភូទៅកាន់ប្រទេសហ្វីលីពីន។
លោកនាយករដ្ឋមន្រ្តីកម្ពុជា ហ៊ុន ម៉ាណែត និងប្រធានាធិបតីហ្វីលីពីន លោក Ferdinand Romualdez Marcos Jr. បានចូលរួមធ្វើជាសាក្សីក្នុងពិធីចុះហត្ថលេខានេះផងដែរ។
គិតមកដល់ពេលនេះ រាជរដ្ឋាភិបាលកម្ពុជាបានចុះហត្ថលេខាលើកិច្ចព្រមព្រៀង DTA ជាមួយប្រទេសដៃគូទាំងអស់ចំនួន ១៣ ក្នុងនោះចំនួន ១១ បានចូលជាធរមាន ដែលរួមមាន ប្រទេសថៃ សិង្ហបុរី ប្រ៊ុយណេ ចិន វៀតណាម តំបន់រដ្ឋបាលពិសេសហុងកុង ម៉ាឡេស៊ី ឥណ្ឌូនេស៊ី កូរ៉េខាងត្បូង ម៉ាកាវ និងតួកគី ខណៈកិច្ចព្រមព្រៀង DTA ជាមួយសាធារណរដ្ឋប្រជាធិបតេយ្យប្រជាមានិតឡាវ(ចុះហត្ថលេខាថ្ងៃទី៤ ខែធ្នូ ឆ្នាំ២០២៤) និងកិច្ចព្រមព្រៀង DTA ជាមួយសាធារណរដ្ឋហ្វីលីពីន មិនទាន់អាចចូលជាធរមានបានភ្លាមៗទេ។
យោងតាម អគ្គនាយកដ្ឋានពន្ធដារ នៃក្រសួងសេដ្ឋកិច្ចនិងហិរញ្ញវត្ថុ ក្រៅពីកិច្ចកិច្ចព្រមព្រៀងដែលបានចុះហត្ថលេខាទាំង ១៣ ខាងលើ បច្ចុប្បន្នកម្ពុជាក៏បានបញ្ចប់ការចរចាទាំងស្រុងក្នុងកម្រិតបច្ចេកទេសជាមួយសាធារណរដ្ឋនៃសហភាពមីយ៉ាន់ម៉ា ព្រមទាំងកំពុងចរចាលើកិច្ចព្រមព្រៀង DTA ជាមួយបណ្តាប្រទេសដៃគូមួយចំនួនទៀតដូចជា ជប៉ុន ម៉ារ៉ុក អេមីរ៉ាតអារ៉ាប់រួម បារាំង និងកាតា ជាដើម។
អនុប្រធានសមាគមពាណិជ្ជកម្មកម្ពុជា-ចិន លោក ឡោ វិចិត្រ បានប្រាប់ភ្នំពេញប៉ុស្តិ៍ ក្នុងថ្ងៃទី១៣ ខែកុម្ភៈ ថា ការលុបបំបាត់ការយកពន្ធត្រួតគ្នាពាក់ព័ន្ធនឹងពន្ធលើប្រាក់ចំណូល និងការបង្ការការគេចវេះពន្ធនិងការចៀសវាងពន្ធ(DTA) គឺមិនត្រឹមតែជួយទប់ស្កាត់ការបង់ពន្ធទ្វេដងប៉ុណ្ណោះទេ ប៉ុន្តែក៏មានតួនាទីសំខាន់ក្នុងការទាក់ទាញវិនិយោគិនបទេស(ប្រទេសដៃគូហត្ថលេខី)ឱ្យចូលមកបណ្តាក់ទុនផ្ទាល់នៅកម្ពុជាកាន់តែច្រើន ព្រមទាំងអាចជួយលើកកម្ពស់ការប្រកួតជាសកលផងដែរ។
លោកបន្តថា DTA ក៏ជួយទប់ស្កាត់ ឬការរើសអើងផ្នែកពន្ធរវាងក្រុមហ៊ុនក្នុងស្រុក និងក្រុមហ៊ុនក្រៅប្រទេស ដោយផ្តល់នូវយន្តការដោះស្រាយជម្លោះផ្នែកពន្ធ ហើយវាក៏ដើរតួជាយន្តការក្នុងការសម្រាប់ផ្លាស់ប្តូរព័ត៌មានរវាងរដ្ឋាភិបាល និងរដ្ឋាភិបាលលើផ្នែកពន្ធផងដែរ។
លោកបានថ្លែងថា៖«ជាសរុបការចុះហត្ថលេខា និងការអនុម័តលើកិច្ចព្រមព្រៀង DTA របស់រដ្ឋាភិបាលកម្ពុជាជាមួយប្រទេសនានា គឺបង្ហាញពីការបើកចិត្ត និងភាពច្បាស់លាស់របស់កម្ពុជា ក្នុងការធ្វើឱ្យបរិយាកាសវិនិយោគរបស់ខ្លួនកាន់តែមានលក្ខណៈល្អប្រសើរ និងល្អឥតខ្ចោះសម្រាប់ក្រុមហ៊ុនក្រៅប្រទេសដែលមកធ្វើអាជីវកម្ម និងវិនិយោគឆ្លងព្រំដែន»។
អនុប្រធានសភាពាណិជ្ជកម្មកម្ពុជា លោក លឹម ហេង បាននិយាយថា កិច្ចព្រមព្រៀងនេះធ្វើឡើងដើម្បីចៀសវាងការយកពន្ធត្រួតគ្នាពីក្រុមវិនិយោគិននៃភាគីទាំង ២ ហើយកិច្ចព្រមព្រៀងនេះនឹងអនុញ្ញាតឱ្យមានការបង់ពន្ធលើប្រាក់ចំណូលនៅទីកន្លែងណាដែលភាគីទាំង ២ បង្កើតប្រាក់ចំណេញ។
កិច្ចព្រមព្រៀងនេះនឹងជួយជំរុញការធ្វើពាណិជ្ជកម្មរវាងប្រទេសទាំង ២ ឱ្យកាន់តែមានភាពល្អប្រសើរឡើងថែមទៀត។
លោកអះអាងថា៖«នៅពេលប្រទេសណាមានកិច្ចព្រមព្រៀងនេះជាមួយកម្ពុជា គឺចំពោះពន្ធលើប្រាក់ចំណូលរដ្ឋយើង(កម្ពុជា)យកត្រឹមតែ ១០ភាគរយប៉ុណ្ណោះ តែបើគ្មានទេត្រូវបង់ដល់ ១៤ភាគរយ។ ដូចនេះនៅពេលកម្ពុជាមានកិច្ចព្រមព្រៀង DTA ជាមួយប្រទេសនានាកាន់តែច្រើន វានឹងអាចទាក់ទាញការវិនិយោគបន្ថែម តាមរយៈការលើកទឹកចិត្តពន្ធលើប្រាក់ចំណូល ខណៈច្បាប់វិនិយោគថ្មីរបស់កម្ពុជាក៏មានការលើកទឹកចិត្តលើផ្នែកពន្ធមួយចំនួនដែរ»។
ទិន្នន័យអគ្គនាយកដ្ឋានគយ និងរដ្ឋាករកម្ពុជា ឱ្យដឹងថា រយៈពេល ១១ខែ ដើមឆ្នាំ ២០២៤ ការផ្លាស់ប្តូរពាណិជ្ជកម្មទ្វេភាគីកម្ពុជា-ហ្វីលីពីន មានទឹកប្រាក់សរុប ៧៩ លានដុល្លារ ធ្លាក់ចុះ ១,៨២ ភាគរយបើធៀបនឹងរយៈពេលដូចគ្នាក្នុងឆ្នាំ ២០២៣។
ក្នុងចំនួននេះការនាំទំនិញពីកម្ពុជាទៅហ្វីលីពីន មានទឹកប្រាក់ ៤៤លានដុល្លារ ធ្លាក់ចុះ ១០,៦៧ភាគរយ ចំណែកទំនិញហ្វីលីពីននាំចូល ៣៥លានដុល្លារ កើនឡើង ១១,៩៦ភាគរយ។
