សកម្មភាពនៅការដ្ឋានសាងសង់លំនៅឋានមួយកន្លែងក្នុងរាជធានីភ្នំពេញ។ ហ៊ឹន ពិសី
អ្នកជំនាញក្នុងវិស័យអចលនទ្រព្យលើកឡើងថា សកម្មភាពនៃការទិញ លក់ លំនៅឋានតម្លៃក្រោម ៧ ម៉ឺនដុល្លារនៅដើមឆ្នាំ ២០២៥ នេះហាក់បានកម្រើកឡើងវិញខ្លះៗហើយ បន្ទាប់ពីរដ្ឋាភិបាលបានដាក់ចេញនូវវិធានការជាបន្តបន្ទាប់ដើម្បីជួយជំរុញវិស័យនេះឱ្យងើបឡើងវិញ បន្ទាប់ពីជាប់គាំងតាំងពីឆ្នាំ ២០២០។
រយៈពេលជាង ១ ទសវត្សមុនការផ្ទុះឡើងនៃវិបត្តិជំងឺកូវីដ១៩ វិស័យអចលនទ្រព្យនៅកម្ពុជាបានបង្ហាញពីសម្ទុះមួយដ៏លឿនដែលគ្រប់គ្នាមិននឹកស្មានដល់ ហើយវាបានចូលរួមចំណែកយ៉ាងច្រើនក្នុងការជំរុញកំណើនសេដ្ឋកិច្ចជាតិ។
ទោះយ៉ាងណា ចាប់តាំងពីការលេចឡើងនូវវិបត្តិជំងឺកូវីដ១៩ នាដើមឆ្នាំ២០២០ រហូតមកដល់ពេលនេះ វិស័យមួយនេះនៅមិនទាន់បង្ហាញពីការសម្ទុះនៃកំណើនគួរឱ្យកត់សម្គាល់នោះទេ។
ដើម្បីចូលរួមចំណែកជំរុញវិស័យអចលនទ្រព្យ រាជរដ្ឋាភិបាលបានដាក់ចេញនូវវិធានការជាបន្តបន្ទាប់ ជាពិសេសការលើកលែងពន្ធប្រថាប់ត្រាសម្រាប់អ្នកទិញផ្ទះ ឬលំនៅឋានក្នុងបុរី ដែលមានក្រោមតម្លៃ ៧ ម៉ឺនដុល្លារ។
អគ្គនាយកក្រុមហ៊ុនអចលនទ្រព្យ ឡាក់គី រៀលធី លោក ឌឹត ចណ្ណា បានប្រាប់ភ្នំពេញប៉ុស្តិ៍ក្នុងថ្ងៃទី១៤ ខែកុម្ភៈ ថា វិធានការរបស់រដ្ឋាភិបាលកម្ពុជាដែលបានដាក់ចេញទាក់ទងនឹងវិស័យអចលនទ្រព្យ ពិសេសសម្រាប់លំនៅឋានតម្លៃមធ្យម និងក្រោមមធ្យម(ក្រោម ៧ ម៉ឺនដុល្លារ) គឺកំពុងចូលរួមជួយឱ្យទីផ្សារមួយនេះចាប់ផ្តើមមានចលនាទិញ លក់ឡើងវិញជាបណ្តើរៗ។
លោកបន្តថា បន្ថែមលើនេះ នាពេលថ្មីៗនេះ រដ្ឋាភិបាលក៏បានបន្ថែមការលើកទឹកចិត្តមួយចំនួនចំពោះលំនៅឋានដែលមានតម្លៃរហូត ២១ម៉ឺនដុល្លារ អ៊ីចឹងតម្លៃផ្ទះ ២១ ម៉ឺនដុល្លារ ក៏ត្រូវរួចពន្ធប្រថាប់ត្រាមួយចំណែក ដែលវិធានការនេះ គឺពិតជាបានជួយដល់ម្ចាស់គម្រោងអាចលក់ចេញអចនលទ្រព្យរបស់គាត់បានច្រើនជាងមុន ហើយអ្នកទិញ ក៏អាចទទួលបានតម្លៃទាបជាងមុនផងដែរ។
លោកបាននិយាយថា៖«នៅពេលមានការចំណាយតិចជាងមុន ម្ចាស់ម្រោងនីមួយៗអាចបញ្ចុះតម្លៃជូនដល់អតិថិជនថែមទៀត អ៊ឺចឹងអតិថិជនកាន់តែមានភាពងាយស្រួលក្នុងការទិញផ្ទះបានកាន់តម្លៃល្អ។ សម្រាប់ផ្នែកឯកជននៅក្នុងស្ថានភាពសេដ្ឋកិច្ចអត់សូវល្អ ប៉ុន្តែអាចទទួលបានការលើកទឹកពីរាជរដ្ឋាភិបាលបែបនេះ គឺពួកគាត់សប្បាយចិត្តណាស់»។
លោកបន្តថា៖«ក្នុងនាមជាអ្នកនៅក្នុងវិស័យអចលនទ្រព្យ ខ្ញុំសង្កេតឃើញមានកំណើននៃការលក់ផ្ទះក្រោមតម្លៃ ៧ ម៉ឺនដុល្លារល្អជាងមុន។ ខ្ញុំគិតថា ប្រសិនបើក្រសួង-ស្ថាប័នពាក់ព័ន្ធអាចជួយសម្របសម្រួល និងជួយលើកទឹកចិត្តបន្ថែមទៀតនោះ ប្រហែលជាអាចជួយវិស័យដីធ្លី ព្រមទាំងអ្នកអភិវឌ្ឍគម្រោងបានកាន់តែច្រើន»។
បើតាម លោក ចណ្ណា ដើម្បីធ្វើឱ្យទីផ្សាទិញ លក់លំនៅឋាន ព្រមទាំងវិស័យសំណង់ និងអចលនទ្រព្យទាំងមូល មានដំណើរការកាន់តែល្អ ម្ចាស់គម្រោងនីមួយៗគួរតែសិក្សាបន្ថែមទៀតក្នុងការចេញគម្រោងថ្មីដែលមានតម្លៃទាប ឬក៏ធ្វើការកែសម្រួលគម្រោងចាស់ៗដែលជាប់គាំឡើងវិញ ដើម្បីផ្តល់ភាពអំណោយផលសម្រាប់អតិថិជនក្នុងការទិញ។
លោកបានប្រាប់ទៀតថា ការចូលរួមរបស់វិស័យហិរញ្ញវត្ថុ ក៏ជាចំណែកសំខាន់ក្នុងការធ្វើឱ្យទីផ្សារអចលនទ្រព្យឆាប់ងើបឡើងវិញផងដែរ។
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក ផាន់ ផល្លា ក្នុងវេទិកាស្តីពី«ការគ្រប់គ្រងម៉ាក្រូសេដ្ឋកិច្ច និងច្បាប់ថវិកាឆ្នាំ ២០២៥» ដែលរៀបចំកាលពីថ្ងៃទី១០ ខែកុម្ភៈ ឆ្នាំ២០២៥ បានឱ្យដឹងថា រាជរដ្ឋាភិបាលបានដាក់ចេញនូវវិធានការជាច្រើនដើម្បីស្ដារវិស័យអចលនទ្រព្យឱ្យងើបឡើងវិញតាមរយៈការលើកលែងផ្នែកពន្ធប្រថាប់ត្រាសម្រាប់ម្ចាស់គម្រោងអភិវឌ្ឍបុរី។
លោកបន្តថា រដ្ឋាភិបាលតែងតែមានបំណងចង់ឱ្យវិស័យអចលនទ្រព្យងើបឡើងវិញ ដោយបានដាក់ចេញនូវវិធានការជាបន្តបន្ទាប់ ពិសេសទាក់ទងនឹងការបង់ពន្ធ។
លោកបន្ថែមទៀតថា រាជរដ្ឋាភិបាលបានសម្រួលដល់អ្នកទិញផ្ទះដោយអ្នកទិញផ្ទះតម្លៃក្រោម ៧ម៉ឺនដុល្លារ មិនចាំបាច់បង់ពន្ធប្រថាប់ត្រានោះទេ ហើយបច្ចុប្បន្ននេះដើម្បីឱ្យកាន់តែមានភាពស្រួល និងដោះបន្ទុកនៃការលំបាកមួយចំនួន រាជរដ្ឋាភិបាលបានដាក់ចេញនូវវិធានការបន្ថែមទៀតប្រសិនបើមានអ្នកទិញផ្ទះក្នុងគម្រោងបុរីលើកទី ១ មានតម្លៃក្រោម ២១ម៉ឺនដុល្លារមិនចាំបាច់បង់ពន្ធប្រថាប់ត្រានោះទេ។
លោកបានថ្លែងថា៖«នេះជាគោលនយោបាយត្រូវបានដាក់ចេញតាំងតែពីអំឡុងពេលកូវីដ១៩។ កាលពីពេលថ្មីៗនេះយើងទើបមានការសម្រេចសម្រួលបន្ថែមទៀតពាក់ព័ន្ធការបង់ប្រាក់ និងប្លង់ សម្រាប់ការទទួលបានការអនុគ្រោះពន្ធប្រថាប់ត្រា»។
បើតាមលោក ផាន់ ផល្លា រាជរដ្ឋាភិបាលកម្ពុជា ជាពិសេសក្នុងនីតិកាលទី៧ នៃរដ្ឋសភា នេះបានខិតខំយ៉ាងខ្លាំងក្នុងការដោះស្រាយបញ្ហាជាច្រើននៅក្នុងវិស័យដីធ្លី និងសំណង់គ្រប់ប្រភេទ។
ប្រធានសមាគមអចលនទ្រព្យសកល និងជាអគ្គនាយកក្រុមហ៊ុនអចលនទ្រព្យ Sam SN Realty លោក សំ សុខនឿន បាននិយាយថា ការចូលរួមអន្តរាគមន៍របស់អាជ្ញាធរ គឺពិតជាមានភាពចាំបាច់ និងសារៈសំខាន់ណាស់ក្នុងជួយធ្វើឱ្យទីផ្សារអចលនវត្ថុ និងសំណង់នៅកម្ពុជាមានភាពវិជ្ជមានឡើងវិញ បន្ទាប់ពីស្ងប់ស្ងាត់ចាប់តាំងពីការផ្ទុះឡើងនៃវិបត្តិជំងឺកូវីដ១៩ កាលពីដើមឆ្នាំ២០២០។
ការចូលអន្តរាគមន៍របស់រដ្ឋាភិបាល នឹងក្លាយជាកម្លាំងចលករធ្វើឱ្យវិស័យលំនៅឋាននៅកម្ពុជាល្អប្រសើរជាងមុន។ ចាប់តាំងពីមានវិបត្តិកូវីដ១៩ មកគឺទាំងអស់អភិវឌ្ឍន៍លំនៅឋាន និងអ្នកទិញលំនៅឋានសុទ្ធតែជួបបញ្ហាហិរញ្ញវត្ថុ។
លោកបានបញ្ជាក់ថា៖«អន្តរាគមន៍ដែលរដ្ឋាភិបាលបានចូលរួមក្នុងការមិនយកពន្ធលើការទិញលក់លំនៅឋានតម្លៃទាប គឺជាកាតាលីករមួយដែលជួយជំរុញឱ្យសម្មភាពក្នុទីផ្សារអចលនទ្រព្យមានចលនាឡើងវិញ»៕
